კელი დეგნანის განცხადებები პოლარიზაციის გაზრდას უწყობს ხელს – ბოლო განცხადება ელექტრონული საარჩევნო სისტემის ეჭვქვეშ დაყენებას ისახავს მიზნად, – ასე ეხმაურება საპარლამენტო უმრავლესობის წევრი გივი მიქანაძე, აშშ-ს ელჩის, კელი დეგნანის განცხადებას არჩევნებთან დაკავშირებით.
მიქანაძის განცხადებით, კელი დეგნანის ანცხადებები არ მოდის თანხვედრაში იმ ფუნქციებთან, „რასაც, წესით, ელჩი უნდა ახორციელებდეს“.
„სამწუხაროა, მაგრამ უნდა აღინიშნოს, რომ ქალბატონო ელჩის მიერ ბოლო პერიოდში გაკეთებული განცხადებები, მათ შორის, ბოლო განცხადებაც, რომელიც ელექტრონულ საარჩევნო სისტემის ეჭვქვეშ დაყენებას ისახავს მიზნად და არის სრულიად უსაფუძვლო მცდელობა, ემსახურება იმ ინტერესებს, რომელიც დეპოლარიზაციას კი არ ამცირებს, არამედ პოლარიზაციას ზრდის. ეს არ არის ელჩის ფუნქცია. ელჩი უნდა ცდილობდეს მაქსიმალურად შეძლოს მხარეთა პოზიციების თანხვედრა მოახდინოს. ასეთი განცხადებები და ეს პირველი შემთხვევა არ არის, პოლარიზაციის გაზრდას უწყობს ხელს. ჩვენი უკმაყოფილება სწორედ ამგვარ განცხადებებთან არის დაკავშირებული, რომელიც თანხვედრაში ვერ მოდის იმ ფუნქციებთან, რასაც, წესით, ჩვენი ასეთი მნიშვნელოვანი სტრატეგიული პარტნიორი ქვეყნის ელჩი უნდა ახორციელებდეს,“ – განაცხადა მიქანაძემ.
