შეერთებულ შტატებში რესპუბლიკული პარტიის საპრეზიდენტო კანდიდატების მეორე დებატებში დონალდ ტრამპმა დაუსწრებლად გაიმარჯვა. ამერიკულმა პრესამ აღიარა, რომ ტრამპმა გაიმარჯვა მის კონკურენტებზე, რომლებმაც ვერ შესთავაზეს ამომრჩევლებს უფრო მიმზიდველი პოლიტიკური პროგრამა.
მაგრამ ტრამპი ლიდერობს არა მხოლოდ მისი პარტიის მხარდამჭერებს შორის. The Washington Post-ისა და ABC News-ის მიერ ორგანიზებულმა ბოლო გამოკითხვამ სენსაციური შედეგი აჩვენა: დონალდ ტრამპი ჯო ბაიდენს 10%-ით უსწრებს. https://www.washingtonpost.com/politics/2023/09/24/biden-trump-poll-2024-election/
The Washington Post აღნიშნავს, რომ სხვა კომპანიების გამოკითხვის მონაცემები აჩვენებს ორივე კანდიდატის გამარჯვების თითქმის თანაბარ შანსებს, როგორც ეს ნახატზეა ნაჩვენები.
თუმცა, ეს მონაცემები შესაძლოა მიუთითებდეს ამერიკის პოლიტიკაში არსებულ ტენდენციაზე – ტრამპის მხარდაჭერის გაზრდა და ბაიდენის მხარდაჭერის შესუსტება. მიუხედავად იმისა, რომ დონალდ ტრამპს ბრალი 91 დანაშაულში აქვს წაყენებული, მისი მომხრეების ორი მესამედი ამ სისხლის სამართლის საქმეებს პოლიტიკურ დევნად მიიჩნევს. სხვა სიტყვებით რომ ვთქვათ, ტრამპის წინააღმდეგ სისხლის სამართლის საქმეებმა მისი მომხრეები თავიანთი ლიდერის გარშემო გააერთიანა.
ამავდროულად, მოქმედ პრეზიდენტს ჯო ბაიდენს აკრიტიკებენ ეკონომიკური მდგომარეობის გამო. ამერიკელების უმეტესობას მიაჩნია, რომ მათი ცხოვრება უკეთესობისკენ არ შეცვლილა პრეზიდენტ ბაიდენის დროს. ამერიკელები არ არიან კმაყოფილნი თავიანთი შემოსავლებით და ბენზინზე და საკვებზე ფასების მატებით.
აშშ-მექსიკის საზღვარზე საიმიგრაციო კრიზისი ბაიდენის მინუსად მიიჩნია გამოკითხულთა 62%-მა და მხოლოდ 23%-მა დაუჭირა მხარი პრეზიდენტის ქმედებებს.
ტრამპიც და ბაიდენიც ასაკოვანი პოლიტიკოსებია, მაგრამ ყველაზე ხშირად სწორედ ბაიდენს აკრიტიკებენ იმის გამო, რომ ძალიან ასაკოვანია მეორე ვადით არჩევისთვის.
იმ სიტუაციაში, როდესაც ელექტორატი თითქმის თანაბრად იყოფა, იმარჯვებს კანდიდატი, რომელიც მოიგებს გადაუწყვეტელ ამომრჩეველთა ხმებს. დონალდ ტრამპის უპირატესობა ჯო ბაიდენთან შედარებით, რაც The Washington Post-ისა და ABC News-ის გამოკითხვამ აჩვენა, შესაძლოა იმაზე მიუთითებდეს, რომ ტრამპი ახერხებს გადაუწყვეტელი ამომრჩევლების ხმების მოზიდვას. მაგრამ სიტუაცია შეიძლება პირიქით შეიცვალოს, თუ ჯო ბაიდენის საარჩევნო შტაბი გაერკვევა, თუ როგორ მოიზიდოს ახალი მხარდამჭერები. ამერიკის არჩევნები სპორტის მსგავსად საინტერესო ბრძოლაა და ზუსტად ვერავინ გამოიცნობს, რომელი გუნდი გაიტანს გადამწყვეტ გოლს მატჩის ბოლო წუთზე.
ავთანდილ წულაძე
პოლიტოლოგი, პოლიტოლოგიის დოქტორი
