დეზინფორმაციასთან ბრძოლა არის ერთ-ერთი საკითხი, რაზეც მრავალი წელია ვითხოვ და მივესალმები. დეზინფორმაცია არის მავნებელი, ცუდი და დამანგრეველი ქვეყნისთვის. დეზინფორმაციის წინააღმდეგ უნდა ვიბრძოლოთ და გადმოვიღოთ ევროპული კანონმდებლობა, – ამის შესახებ „ხალხის ძალის“ ერთ-ერთმა ლიდერმა, დეპუტატმა სოზარ სუბარმა „ქრონიკაში“ განაცხადა.
მისი თქმით, გლობალური ომის პარტიაში არიან ადამიანები, რომლებსაც უნდოდათ საქართველო გამოეყენებინათ მეორე ფრონტად და კანდიდატის სტატუსი სწორედ ზეწოლის მექანიზმი იყო.
„იმ განცხადებების გამო, რაც ჩვენ გავაკეთეთ და იმ სიმართლის გამო, რაც ხალხს ვუთხარით, ხალხმა დაინახა, რომ აქ ისე არ არის საქმე, როგორც ლამაზად გვიფუთავენო, რომ თითქოს საქართველოს ხელისუფლება დღეს რუსეთის მხარეს დგას და მოძმე უკრაინას არ ეხმარებაო. ყველა მიხვდა, რომ საქართველოს ომში ჩათრევა ასე ადვილად ვერ მოხდებოდა. აქ უკვე გარდამტეხი მნიშვნელობა მოახდინა საქართველოსთვის სტატუსის მინიჭებაში და ამის შემდეგ გადაწყვეტილებები დავიდა ობიექტურ მოცემულობამდე“, – აღნიშნა სოზარ სუბარმა.
