უცხო ქვეყნის გავლენის გამჭვირვალობა არ შედის უცხო ქვეყნების ინტერესში, ეს ბუნებრივია, ეს კანონი არის ქართველი ხალხის ინტერესით მისაღები, თორემ უცხო ქვეყნებში რომ არ აქვთ ინტერესი, მათი გავლენა იყოს გამჭვირვალე, ბუნებრივია, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

მისი თქმით, არც ამერიკის შეერთებულ შტატებს და არც ევროპულ ქვეყნებს არ უნდათ, რომ მათი გავლენა იყოს გამჭვირვალე საქართველოში.

„კონგრესმენების წერილს რაც შეეხება და სხვა განცხადებებს, ნაცვლად იმისა, რომ კონგრესმა უზრუნველყოს ამერიკის დემოკრატიის ნაციონალური ფონდის ხარჯების გამჭვირვალობა, რომელიც ფარულად აფინანსებს საქართველოში პოლიტიკურ პარტიებსა და რადიკალურ ჯგუფებს, ვხედავთ, რომ პირიქით ხელს აფარებენ ამერიკის შეერთებული შტატების ბიუჯეტის ფარულ ხარჯვას საქართველოში და კრიტიკას გამოთქვამენ ქართული საზოგადოების მიმართ, რომელსაც სურს, იცოდეს, რაში იხარჯება ამერიკული ფული საქართველოში, ისევე როგორც უნდა იცოდეს, რაში იხარჯება ევროპული ფული საქართველოში. ცოტა აბსურდული მდგომარეობაა, ნაცვლად იმისა, რომ ევროპელმა და ამერიკელმა აქტორებმა შეისმინონ ქართველი ხალხის სურვილი და წუხილი, რომ მათ ქვეყანაში შემოდის ამერიკული და ევროპული ფული, უჩუმრად იხარჯება პოლიტიკურ აქტივობებში, გაიგონ ეს წუხილი და უზრუნველყონ ამ ფონდების გამჭვირვალობა, ჩვენ ვხედავთ, რომ არის წახალისება დეზინფორმაციული კამპანიისა ამ კანონის წინააღმდეგ და იმისთვის, რომ საბოლოო ჯამში რაღაც ისტერია დაითესოს“, – განაცხადა პაპუაშვილმა.

ეს რა თქმა უნდა, არ არის ერთი ადამიანის თავში დაბადებული იდეა, რომ შეეგროვებინა ფარულად სხვისი ინტიმური ცხოვრების ამსახველი კადრები. აქ ცალსახად დგას მიზანი, აშანტაჟონ ადამიანები, – ამის შესახებ პარლამენტის თავმჯდომარემ შალვა პაპუაშვილმა ჟურნალისტებთან განაცხადა.

მისივე თქმით, ფარული ჩანაწერების შეგროვება „ნაციონალური მოძრაობის“ ხელწერაა და ახლა, რადგან ხელისუფლებაში არ არიან, კერძო ინიციატივით აგროვებენ პირადი ცხოვრების ამსახველ ფაილებს.

„როცა ვსაუბრობთ ოპოზიციაზე, ჩვენ ვსაუბრობთ „ნაციონალურ მოძრაობაზე“. ეს სწორედ მათი სტილია, რაც ჩვენ ვნახეთ. ფარული ჩანაწერები, ინტიმური ცხოვრების ამსახველი, რომელიც, როგორც ჩანს, შემდეგ გამოიყენებოდა შანტაჟისთვის. ეს ზუსტად არის „ნაციონალური მოძრაობის“ ხელწერა, რომელიც მათ 2012 წლამდე ჰქონდათ, როდესაც მთელი ბაზა ჰქონდათ შექმნილი ვიდეოფაილებისა, რითაც შემდეგ აშანტაჟებდნენ ადამიანებს. ვინაიდან ახლა ხელისუფლებაში არ არიან, მათი საცეცები ახლა უკვე კერძო ინიციატივით აგროვებენ ასეთ ფაილებს.

მნიშვნელოვანია, რომ შს სამინისტრომ შეისწავლოს ვინ დგას ამის უკან დამკვეთების სახით. ეს რა თქმა უნდა, არ არის კერძო, ერთი ადამიანის თავში დაბადებული იდეა, რომ შეეგროვებინა ფარულად სხვისი ინტიმური ცხოვრების ამსახველი კადრები. აქ ცალსახად დგას მიზანი, რომელიც სპეცსამსახურების სტილშია, იმისთვის, რომ აშანტაჟონ ადამიანები. ითქვა კიდეც, რომ როგორც ჩანს, ცნობადი სახეებიც არიან ამ შანტაჟის ობიექტები და აქედან გამომდინარე მნიშვნელოვანია, რომ ამ დანაშაულის ყველა დეტალი გაირკვეს. განსაკუთრებით ამაზრზენი სახით არის ეს დანაშაული ჩადენილი, როგორც ჩანს, როდესაც ხდებოდა შეტყუება ადამიანების და შემდეგ მათი ფარული ჩაწერა“, – აღნიშნა შალვა პაპუაშვილმა.

9 მაისს ბლოგერი უჩა აბაშიძე დააკავეს. ბლოგერსა და სამხედრო ექსპერტს ბრალი ორი მუხლით ოფიციალურად წარუდგინეს მას გამოძიება იარაღისა და საბრძოლო მასალის უკანონო შეძენა-შენახვასა და ახლა უკვე ინტიმური კავშირის ამსახველი მასალების უკანონოდ მოპოვებას და შენახვას ედავება. ამავე მუხლით დაკავებულია ბლოგერისმეუღლე მარიამ იაშვილიც.

ათობით ათასი მშვიდობიანი დემონსტრანტი შეიკრიბა წვიმიან თბილისში, რათა მოსთხოვოს „ქართულ ოცნებას“ კანონის გაწვევა, – ამის შესახებ ეროვნული უსაფრთხოების საკითხებში თეთრი სახლის მრჩეველი ჯეიკ სალივანი სოციალურ ქსელში წერს.

„ქართველი ხალხი თავის მოსაზრებას გამოთქვამს. არ შეუშინდა რა დაშინების ტაქტიკას, ათობით ათასი მშვიდობიანი დემონსტრანტი შეიკრიბა წვიმიან თბილისში, რათა მოსთხოვოს „ქართულ ოცნებას“ კანონის გაწვევა“, – წერს სალივანი.

თბილისში, 11 მაისს სხვადასხვა ოპოზიციური პარტიისა და არასამთავრობო ორგანიზაციების წარმომადგენლების ორგანიზებით, საპროტესტო მარში გაიმართა. თავდაპირველად, მარშის მონაწილეები მეტროსადგურ „300 არაგველთან“, მარჯანიშვილის მოედანზე, რესპუბლიკის მოედანსა და „ექსპო ჯორჯიასთან“ შეიკრიბნენ, რის შემდეგაც მსვლელობით ევროპის მოედანზე მივიდნენ.

პარლამენტის პირველმა ვიცე-სპიკერმა, გიორგი ვოლსკიმ მედიასთან  ევროპის მოედანზე მიმდინარე აქციასთან დაკავშირებით ისაუბრა.

„რასაკვირველია, [აქციის მონაწილეთა] რაოდენობას აჭარბებენ, მაგრამ გადათვლა შეიძლება. რასაც ვხედავ, ნათელი სახეა ადამიანების, რომლებიც ალბათ რაღაცნაირად გულუბრყვილობით, ან გულწრფელობით არიან შეკრებილნი იმ დროშის ქვეშ, რომელიც ააფრიალეს ადამიანებმა, რომლებმაც უღირსად გაიარეს თავისი [ხელისუფლების] პერიოდი. როცა ვამბობთ, რომ სისხლიანი 9 წელი როდის უნდა დავივიწყოთო, დავივიწყებდით, დაიღალა ხალხი ამდენი ნეგატივით, მაგრამ ამ პროცესებში ვუყურებთ ხალხს, რომელიც პირდაპირ მონაწილეობდა რეჟიმის შექმნაში“, – აღნიშნა ვოლსკიმ.

დაბრძანდნენ პატივცემულები და პრეზიდენტთან ერთად მოამზადონ მოტივირებული შენიშვნები. მაინტერესებს რას ჩაწერენ, – ამის შესახებ საპარლამენტო უმრავლესობის ლიდერმა, „ქართული ოცნების“ აღმასრულებელმა მდივანმა მამუკა მდინარაძემ „ქრონიკასთან“ სატელეფონო ინტერვიუში განაცხადა.

მდინარაძის თქმით, „ქართული ოცნება“ ყველა იმ წინადადებას გაითვალისწინებს კანონში, რომელსაც მისი მოწინააღმდეგეები არგმენტირებულად წარმოადგენენ.

„დაბრძანდნენ პატივცემულები და პრეზიდენტთან ერთად მოამზადონ მოტივირებული შენიშვნები. მაინტერესებს რას ჩაწერენ. საქართველოს მოსახლეობის აბსოლუტურ უმრავლესობას აინტერესებს, რას ჩაწერენ მოტივირებულ შენიშვნებში მას შემდეგ, რაც პრეზიდენტი კანონს ვეტოს დაადებს. ოდნავ რაციონალური, ოდნავ საღ აზრთან მიახლოებული თუ იქნება, ვიმსჯელოთ ამაზე და შეიძლება გავითვალისწინოთ კიდეც. რა არ ვარგა კანონში, ერთი წინადადება მაინც გვითხრან და იმ ერთ წინადადებაზეც კი ვიმსჯელებთ. ამაზე კარგი წინადადება რა შეიძლება იყოს“, – აღნიშნა მდინარაძემ.

არანაირი რევოლუციის მომწყობები ეგენი არ არიან, მაგის თავი არ აქვთ, – ამის შესახებ „ქართული ოცნების“ აღმასრულებელმა მდივანმა და უმრავლესობის ლიდერმა მამუკა მდინარაძემ მედიასთან  განაცხადა.

„ჯერ პარადოქსი ის არის, ვინ გელაპარაკება, ვინ ცდილობს ოკუპანტი ქვეყნის იარლიყი მოგაკეროს?! ამ ახალგაზრდებს მინდა ვუთხრა, ბავშვებო, შვილებო, მეგობრებო ვის აჰყევით იცით, ომიდან ორ თვეში ვინც საქართველოსა და ქართველ ჯარისკაცებს ომის დაწყება და ომის დანაშაული დააბრალა. სტრატეგიული ობიექტები მიყიდა რუსეთს და საქართველოს ხმა რომ სჭირდებოდათ რუსებს მსოფლიო სავაჭრო ორგანიზაციაში გასაწევრიანებლად ჩვენი ომის შემდეგ, საქართველომ, ანუ „ნაციონალურმა მოძრაობამ“ მაშინ ეს ხმა მისცა. აი ამ ხალს უდგახართ გვერდით! სულ რომ რაღაცას ისეთს ვაკეთებდეთ რომ რაღაცა გადახრა იყოს რუსეთისკენ, ვისთან ერად აპროტესტებთ ვინც ყველაფერი გააკეთა რუსეთისთვის რომ რუსეთს რაც შეიძლება გაემყარებინა საქართველოში პოზიციები“, – აღნიშნა მამუკა

ევროპის მოედანზე შეკრებილ აქციის მონაწილეებს, “გირჩის“ წევრი ვახტანგ მეგრელიშვილიც შეუერთდა. როგორც მან განაცხადა, მნიშვნელოვანია აქციები პოლიტიკოსებმა მართონ, რადგან მისივე თქმით, სხვა შემთხვევაში შეუძლებელია აქციებმა შედეგი გამოიღოს:

“ათასობით ადამიანი გამოხატავს გულწრფელ პროტესტს, თუმცა ჩემი კოლეგა პოლიტიკოსები რატომღაც შიშობენ, რომ ტრიბუნაზე ავიდნენ და ილაპარაკონ. მგონი მომწიფდება ის დრო, როდესაც პოლიტიკური გზავნილები გაკეთდება და პოლიტიკოსების მიერ მართვადი მიტინგები იქნება. რადგანაც, მანამდე, უბრალოდ შეუძლებელია აქციებმა შედეგი მოგვცეს,” – აცხადებს ვახტანგ მეგრელიშვილი.