ცხადზე ცხადია, როგორი მომავალი სურს ქართველ ხალხს. მათთვის მიცემული დაპირებები ახლა უნდა შესრულდეს, – ასე ეხმაურება ლიეტუვის საგარეო საქმეთა მინისტრი გაბრიელიუს ლანდსბერგისი საქართველოში მიმდინარე მოვლენებს.

ლიეტუვის საგარეო უწყების ხელმძღვანელმა გუშინ განაცხადა, რომ საქართველოში მშვიდობიანი დემონსტრანტებისა და სამოქალაქო საზოგადოების აქტივისტების დაშინება და მათ წინააღმდეგ ძალადობა სამარცხვინო ტაქტიკაა.

ყველა პუნქტი, მუხლი და წინადადება ამ კანონში [„უცხოური გავლენის გამჭვირვალობის შესახებ“ კანონი] მავნებლური და რუსულია – ეს კანონი სრულად და უპირობოდ უნდა იქნეს გაწვეული, – ამის შესახებ „სტრატეგია აღმაშენებლის“ ერთ-ერთმა ლიდერმა, სერგო ჩიხლაძემ განაცხადა.

ჩიხლაძის თქმით, ყველა ოპოზიციური პარტია ამ გადაწყვეტილებაში ერთსულოვანია.

„ყველა ოპოზიციური პარტია ერთსულოვანია ამ გადაწყვეტილებაში – ეს კანონი [„უცხოური გავლენის გამჭვირვალობის შესახებ“] გაუმჯობესებას, გაკეთილშობილებას ან მოდიფიცირებას არ ექვემდებარება. ყველა პუნქტი, მუხლი და წინადადება ამ კანონში მავნებლური და რუსულია. ეს კანონი სრულად და უპირობოდ უნდა იქნეს გაწვეული. სხვა გამოსავალი და გადაწყვეტა ამ საკითხის არ არსებობს. ამაში ერთსულოვანი ვართ, როგორც პოლიტიკოსები, ასევე ქართული საზოგადოება. იმავეს ეუბნება ბიძინა ივანიშვილს მთელი დასავლური სამყაროც“, – განაცხადა სერგო ჩიხლაძემ.

დაკავებული ბლოგერის უჩა აბაშიძის ადვოკატის შოთა თუთბერიძის განცხადებით, თბილისის საქალაქო სასამართლოს მოსამართლის, ალექსანდრე იაშვილის გადაწყვეტილება დაკავებული უჩა აბაშიძისა და მისი მეუღლისთვის აღკვეთის ღონისძიების სახით პატიმრობის გამოყენების თაობაზე უსამართლო და დაუსაბუთებელია.

როგორც ადვოკატმა დღევანდელი სასამართლო პროცესის შემდეგ ჟურნალისტებს განუცხადა, უჩა აბაშიძე ბრალს არ აღიარებს.

“სამწუხაროს, სასამართლომ პროკურატურის შუამდგომლობა დააკმაყოფილა და აღკვეთის ღონისძიების სახით ბრალდებულებს პატიმრობა შეეფარდათ. ბუნებრივია, ამ გადაწყვეტილებას არ ვეთანხმებით. მიგვაჩნია, რომ დაუსაბუთებელი და უსამართლოა. ცხადია, საქმის მასალები უნდა დავამუშაოთ და გადავწყვეტთ მისი გასაჩივრების შესაძლებლობას. უჩა აბაშიძე ბრალს არ აღიარებს”, – განაცხადა თუთბერიძემ.

ადვოკატმა განმარტა, რომ პროკურატურის მიერ გავრცელებული ახალი ინფორმაცია მისი დაცვის ქვეშ მყოფის შესახებ არ უნახავს, თუმცა მიაჩნია, რომ არასწორია, როცა ადვოკატებს გაუთქმელობაზე აქვთ ხელი მოწერილი და ამ დროს პროკურატურა ინფორმაციებს აქვეყნებს.

“ერთი მხრივ, თავად დაუტოვო უფლება, რომ რაც გინდა ის გამოაქვეყნო, რაზეც გინდა იმაზე ისაუბრო და მეორე მხარეს შეუზღუდო უფლება, რომ პასუხი გაგცეს, სამწუხაროდ, ჩვენ ამ მდგომარეობაში ვართ. გაფრთხილებულები ვართ სისხლის სამართლებრივი პასუხისმგებლობის დადგომის შესახებ, რომ საქმის მასალებზე ვერ ვისაუბრებთ. ამიტომ, ეს არ არის სწორი”,-განაცხადა თუთბერიძემ.

ბლოგერ უჩა აბაშიძესა და მის მეუღლეს, მარიამ იაშვილს აღკვეთის ღონისძიების სახით პატიმრობა შეეფარდათ.

წინასასამართლო სხდომა 2 ივლისს ჩაინიშნა.

გამოძიების ინფორმაციით, მარიამ იაშვილის საკონტაქტო მონაცემები სექსუალური მომსახურების სხვადასხვა ინტერნეტ საიტებზე იყო გამოქვეყნებული, სადაც მისი მხრიდან სექსუალური მომსახურების შეთავაზება ხდებოდა. მას შემდეგ, რაც კონკრეტულ პირთან მოხდებოდა შეთანხმება და იგი მივიდოდა ზემოხსენებულ ბინაში, ბრალდებულები, აღნიშნული პირისგან მალულად, სპეციალურად დამონტაჟებული მოწყობილობების საშუალებით, სისტემატურად, უკანონოდ იღებდნენ და ინახავდნენ ინტიმური კავშირის ამსახველ აუდიო-ვიდეო ჩანაწერებს.

ამასთან, პროკურატურა აცხადებს, რომ 2019 წლიდან 2024 წლამდე პერიოდში, განხორციელდა ასობით სხვადასხვა პირის სქესობრივი კავშირის ამსახველი ათასობით ვიდეო-აუდიო მასალის ჩაწერა. იდენტიფიცირებულია რამდენიმე პირი, რომელთა პირადი ცხოვრების საიდუმლოს ამსახველი ჩანაწერებიც უკანონოდ ინახებოდა ბრალდებულთა კომპიუტერულ ტექნიკასა და ელექტრონული ინფორმაციის შემნახველ მოწყობილობებში.

გამოძიება საქართველოს სისხლის სამართლის კოდექსის 157-ე პრიმა მუხლით და 236-ე მუხლით მიმდინარეობს, რაც პირადი ცხოვრების საიდუმლოს უკანონოდ მოპოვება – შენახვას და ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვას გულისხმობს.

უცხო ქვეყნის გავლენის გამჭვირვალობა არ შედის უცხო ქვეყნების ინტერესში, ეს ბუნებრივია, ეს კანონი არის ქართველი ხალხის ინტერესით მისაღები, თორემ უცხო ქვეყნებში რომ არ აქვთ ინტერესი, მათი გავლენა იყოს გამჭვირვალე, ბუნებრივია, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

მისი თქმით, არც ამერიკის შეერთებულ შტატებს და არც ევროპულ ქვეყნებს არ უნდათ, რომ მათი გავლენა იყოს გამჭვირვალე საქართველოში.

„კონგრესმენების წერილს რაც შეეხება და სხვა განცხადებებს, ნაცვლად იმისა, რომ კონგრესმა უზრუნველყოს ამერიკის დემოკრატიის ნაციონალური ფონდის ხარჯების გამჭვირვალობა, რომელიც ფარულად აფინანსებს საქართველოში პოლიტიკურ პარტიებსა და რადიკალურ ჯგუფებს, ვხედავთ, რომ პირიქით ხელს აფარებენ ამერიკის შეერთებული შტატების ბიუჯეტის ფარულ ხარჯვას საქართველოში და კრიტიკას გამოთქვამენ ქართული საზოგადოების მიმართ, რომელსაც სურს, იცოდეს, რაში იხარჯება ამერიკული ფული საქართველოში, ისევე როგორც უნდა იცოდეს, რაში იხარჯება ევროპული ფული საქართველოში. ცოტა აბსურდული მდგომარეობაა, ნაცვლად იმისა, რომ ევროპელმა და ამერიკელმა აქტორებმა შეისმინონ ქართველი ხალხის სურვილი და წუხილი, რომ მათ ქვეყანაში შემოდის ამერიკული და ევროპული ფული, უჩუმრად იხარჯება პოლიტიკურ აქტივობებში, გაიგონ ეს წუხილი და უზრუნველყონ ამ ფონდების გამჭვირვალობა, ჩვენ ვხედავთ, რომ არის წახალისება დეზინფორმაციული კამპანიისა ამ კანონის წინააღმდეგ და იმისთვის, რომ საბოლოო ჯამში რაღაც ისტერია დაითესოს“, – განაცხადა პაპუაშვილმა.

ეს რა თქმა უნდა, არ არის ერთი ადამიანის თავში დაბადებული იდეა, რომ შეეგროვებინა ფარულად სხვისი ინტიმური ცხოვრების ამსახველი კადრები. აქ ცალსახად დგას მიზანი, აშანტაჟონ ადამიანები, – ამის შესახებ პარლამენტის თავმჯდომარემ შალვა პაპუაშვილმა ჟურნალისტებთან განაცხადა.

მისივე თქმით, ფარული ჩანაწერების შეგროვება „ნაციონალური მოძრაობის“ ხელწერაა და ახლა, რადგან ხელისუფლებაში არ არიან, კერძო ინიციატივით აგროვებენ პირადი ცხოვრების ამსახველ ფაილებს.

„როცა ვსაუბრობთ ოპოზიციაზე, ჩვენ ვსაუბრობთ „ნაციონალურ მოძრაობაზე“. ეს სწორედ მათი სტილია, რაც ჩვენ ვნახეთ. ფარული ჩანაწერები, ინტიმური ცხოვრების ამსახველი, რომელიც, როგორც ჩანს, შემდეგ გამოიყენებოდა შანტაჟისთვის. ეს ზუსტად არის „ნაციონალური მოძრაობის“ ხელწერა, რომელიც მათ 2012 წლამდე ჰქონდათ, როდესაც მთელი ბაზა ჰქონდათ შექმნილი ვიდეოფაილებისა, რითაც შემდეგ აშანტაჟებდნენ ადამიანებს. ვინაიდან ახლა ხელისუფლებაში არ არიან, მათი საცეცები ახლა უკვე კერძო ინიციატივით აგროვებენ ასეთ ფაილებს.

მნიშვნელოვანია, რომ შს სამინისტრომ შეისწავლოს ვინ დგას ამის უკან დამკვეთების სახით. ეს რა თქმა უნდა, არ არის კერძო, ერთი ადამიანის თავში დაბადებული იდეა, რომ შეეგროვებინა ფარულად სხვისი ინტიმური ცხოვრების ამსახველი კადრები. აქ ცალსახად დგას მიზანი, რომელიც სპეცსამსახურების სტილშია, იმისთვის, რომ აშანტაჟონ ადამიანები. ითქვა კიდეც, რომ როგორც ჩანს, ცნობადი სახეებიც არიან ამ შანტაჟის ობიექტები და აქედან გამომდინარე მნიშვნელოვანია, რომ ამ დანაშაულის ყველა დეტალი გაირკვეს. განსაკუთრებით ამაზრზენი სახით არის ეს დანაშაული ჩადენილი, როგორც ჩანს, როდესაც ხდებოდა შეტყუება ადამიანების და შემდეგ მათი ფარული ჩაწერა“, – აღნიშნა შალვა პაპუაშვილმა.

9 მაისს ბლოგერი უჩა აბაშიძე დააკავეს. ბლოგერსა და სამხედრო ექსპერტს ბრალი ორი მუხლით ოფიციალურად წარუდგინეს მას გამოძიება იარაღისა და საბრძოლო მასალის უკანონო შეძენა-შენახვასა და ახლა უკვე ინტიმური კავშირის ამსახველი მასალების უკანონოდ მოპოვებას და შენახვას ედავება. ამავე მუხლით დაკავებულია ბლოგერისმეუღლე მარიამ იაშვილიც.

ათობით ათასი მშვიდობიანი დემონსტრანტი შეიკრიბა წვიმიან თბილისში, რათა მოსთხოვოს „ქართულ ოცნებას“ კანონის გაწვევა, – ამის შესახებ ეროვნული უსაფრთხოების საკითხებში თეთრი სახლის მრჩეველი ჯეიკ სალივანი სოციალურ ქსელში წერს.

„ქართველი ხალხი თავის მოსაზრებას გამოთქვამს. არ შეუშინდა რა დაშინების ტაქტიკას, ათობით ათასი მშვიდობიანი დემონსტრანტი შეიკრიბა წვიმიან თბილისში, რათა მოსთხოვოს „ქართულ ოცნებას“ კანონის გაწვევა“, – წერს სალივანი.

თბილისში, 11 მაისს სხვადასხვა ოპოზიციური პარტიისა და არასამთავრობო ორგანიზაციების წარმომადგენლების ორგანიზებით, საპროტესტო მარში გაიმართა. თავდაპირველად, მარშის მონაწილეები მეტროსადგურ „300 არაგველთან“, მარჯანიშვილის მოედანზე, რესპუბლიკის მოედანსა და „ექსპო ჯორჯიასთან“ შეიკრიბნენ, რის შემდეგაც მსვლელობით ევროპის მოედანზე მივიდნენ.