ეს არის ჩვეულებრივი აბსურდული პიარკამპანია. აბსურდის თეატრია და როლები აქვთ ამ ადამიანებს გადანაწილებული, – ამის შესახებ თბილისის მერმა, კახა კალაძემ განაცხადა, რითაც ე.წ ტექნიკური მთავრობის ჩამოყალიბებას გამოეხმაურა.

კალაძის თქმით, პრეზიდენტს კონსტიტუციურად ე.წ. ტექნიკური მთავრობის წარდგენის შესაძლებლობა არ აქვს.

„ჩვეულებრივი სისულელეა. ჯერ ვინ ეკითხება სალომე ზურაბიშვილს. მას კონსტიტუციური თვალსაზრისით, ამის შესაძლებლობა არ აქვს. ეს არის ჩვეულებრივი აბსურდული პიარკამპანია. აბსურდის თეატრია და როლები აქვთ ამ ადამიანებს გადანაწილებული. რა ტექნიკურ მთავრობაზეა საუბარი ერთპროცენტიანი და ორპროცენტიანი ოპოზიციური პარტიებისთვის?“,- განაცხადა კალაძემ.

ამასთან, „ქართული ოცნების“ გენერალური მდივანი პრეზიდენტის ხელახალი იმპიჩმენტის პროცესს გამოეხმაურა და აღნიშნა, რომ „მნიშვნელოვანია, ის წავიდეს არა როგორც ყოფილი პრეზიდენტი, არამედ გაშვებული პრეზიდენტი“.

„უბრალოდ, გულდასაწყვეტია, როდესაც ამ სტატუსის მქონე ადამიანი კონსტიტუციას არღვევს. პირველი უნდა იყოს, ვინც კონსტიტუციის დაცვის სადარაჯოზე იდგება. სალომე ზურაბიშვილის მსგავსი ქმედებები პირველი შემთხვევა არ არის. რა თმა უნდა, მნიშვნელოვანია, რომ ის წავიდეს არა როგორც ყოფილი პრეზიდენტი, არამედ გაშვებული პრეზიდენტი. პრევენციისთვის მნიშვნელოვანია, რათა მომავალში ვერავინ გაბედოს კონსტიტუციის დარღვევა; სახელმწიფოს, კონსტიტუციის და კანონების შეურაცხყოფა. უბრალოდ, წარმოუდგენელია ეს დამოკიდებულება“,- განაცხადა კალაძემ.

რასაც ისინი კადრულობენ და აკეთებენ, არაფრით განსხვავდება საბჭოთა კავშირისგან – ევროპას რატომ აქვს ფასი? იმით, რომ განსხვავებული სახელმწიფოები არის იქ, რომელსაც თავისი კულტურა, ტრადიციები აქვთ – თუ ამ ყველაფერს ხაზი გადავუსვით და ერთნაირად დაშტამპულები უნდა ვიყოთ, რა მნიშვნელობა აქვს, საბჭოთა კავშირის სტატუსი იქნება თუ ევროკავშირის? – ამის შესახებ თბილისის მერმა, კახა კალაძემ განაცხადა, რითაც ლუქსემბურგში, ევროკავშირის საგარეო საქმეთა მინისტრების შეხვედრას გამოეხმაურა.

კალაძის თქმით, „ეს დამოკიდებულება მისაღები არ არის“.

„რისთვის ვიბრძოლეთ? იმისთვის, რომ ვყოფილიყავით დამოუკიდებლები. ვიყავით საბჭოთა კავშირში და არ გვინდოდა, ყველა დაშტამპული სახელმწიფოებივით ვიყავით, ყველას ერთნაირი ხაზი გვქონდა. გვინდოდა, თავისუფლები ვყოფილიყავით და დამოუკიდებლები. დღეს რასაც ისინი კადრულობენ და აკეთებენ, არაფრით განსხვავდება საბჭოთა კავშირისგან. ჩვენ თავისუფლება, დამოუკიდებლობა, ჩვენი სუვერენიტეტი გვინდა. ევროპას რატომ აქვს ფასი? იმით, რომ განსხვავებული სახელმწიფოები არის იქ, რომელსაც თავისი კულტურა, ტრადიციები აქვთ. ამ მრავალფეროვნებით არის ევროკავშირი და ზოგადად, ევროპა საინტერესო. თუ ამ ყველაფერს ხაზი გადავუსვით და ერთნაირად დაშტამპულები უნდა ვიყოთ, რა მნიშვნელობა აქვს საბჭოთა კავშირის სტატუსი იქნება თუ ევროკავშირის? თუ ამ ფორმით უნდა ვიყოთ. წარმოუდგენელია. ეს დამოკიდებულება მისაღები არ არის“,- განაცხადა კახა კალაძემ.

პრემიერ-მინისტრ ირაკლი კობახიძის განცხადებით, როდესაც უკრაინაში ომი დასრულდება, ევროკავშირთან და აშშ-სთან ურთიერთობები გადაიტვირთება.

როგორც კობახიძემ ჟურნალისტებს განუცხადა, ურთიერთობების გადატვირთვის შემდეგ, „უსამართლოო რეზოლუციები არავის ემახსოვრება“.

„ჩვენთვის ერთი რამ არის მთავარი – როგორც კი უკრაინაში ომი დასრულდება და ვფიქრობთ, რომ ეს მომავალ წელს მოხდება, გადაიტვირთება ურთიერთობები, როგორც ევროკავშირთან, ასევე აშშ-თან. შესაბამისად, არავის ემახსოვრება ასეთი უსამართლოო რეზოლუციები. აუცილებლად უნდა გადაიტვირთოს საქართველო-ევროკავშირის და საქართველო-ამერიკის ურთიერთობები. მგონია, რომ როგორც კი უკრაინაში ომი დასრულდება, მაშინვე ვიხილავთ შემხვედრ ნაბიჯებს როგორც ევროკავშირის სტრუქტურებისგან, ასევე ამერიკისგან“, – განაცხადა კობახიძემ.

რაც შეეხება სანქციების შესაძლო დაწესებას, პრემიერ-მინისტრის თქმით, „ეს არ არის აქტუალური საკითხი“.

„როგორც კი უკრაინის ომი დასრულდება, ჩვენ შედეგად სრულიად სხვა მოცემულობას მივიღებთ. აქედან გამომდინარე, დროებით მოვლენებზე, როგორიც არის მაგალითად, ევროპარლამენტის რეზოლუცია, განსაკუთრებულ ყურადღებას არ გავამახვილებდი. ჩვენი პრინციპული და სტრატეგიული ამოცანაა, გადავტვირთოთ ურთიერთობები და ეს მომავალი წლიდან აუცილებლად მოხდება. უკრაინის ომი ხელს უშლის, არათუ შუაშია, თავშია. ეს არის მთავარი მიზეზი, რატომაც კონკრეტულ ძალებს აქვთ განსხვავებული ინტერესები საქართველოს მიმართ. როგორც კი პირველი ფრონტი დასრულდება, მაშინვე დასრულდება მეორე ფრონტის ინტერესს საქართველოს მიმართ. ეს ხელს შეუწყობს საქართველო-ევროკავშირის და საქართველო-ამერიკის ურთიერთობების გადატვირთვას“, -განაცხადა კობახიძემ.

დროებით მოვლენებზე, როგორიც არის მაგალითად ევროპარლამენტის რეზოლუცია, მე განსაკუთრებულ ყურადღებას არ გავამახვილებდი. ჩვენი სტრატეგიული ამოცანაა, გადავტვირთოთ ურთიერთობები და ეს მოხდება აუცილებლად მომავალი წლიდან, – ამის შესახებ პრემიერმა ჟურნალისტებს განუცხადა.

როგორც მთავრობის მეთაურმა აღნიშნა, უკრაინის ომი არის მთავარი მიზეზი, რატომაც კონკრეტულ ძალებს დღეს აქვთ განსხვავებული ინტერესი საქართველოს მიმართ.

„სანქციების დაწესება არ არის აქტუალური საკითხი. მე მგონია, რომ მომავალი წლიდან თვისებრივად გადაიტვირთება ურთიერთობები როგორც ევროკავშირთან, ისე აშშ-სთან. როგორც კი უკრაინაში ომი დასრულდება, ჩვენ მივიღებთ შედეგად სრულიად სხვა მოცემულობას. დროებით მოვლენებზე, როგორიც არის მაგალითად ევროპარლამენტის რეზოლუცია, მე განსაკუთრებულ ყურადღებას არ გავამახვილებდი. ჩვენი სტრატეგიული ამოცანაა, გადავტვირთოთ ურთიერთობები და ეს მოხდება აუცილებლად მომავალი წლიდან. უკრაინის ომი არის მთავარი მიზეზი, რატომაც კონკრეტულ ძალებს დღეს აქვთ განსხვავებული ინტერესი საქართველოს მიმართ. როგორც კი დასრულდება პირველი ფრონტი, მაშინვე დასრულდება მეორე ფრონტის ინტერესი საქართველოს მიმართ და ეს ხელს შეუწყობს საქართველო-ევროკავშირისა და საქართველო- აშშ-ს შორის ურთიერთობების გადატვირთვას,”- განაცხადა ირაკლი კობახიძემ.

ევროკავშირის საგარეო პოლიტიკური უწყების ხელმძღვანელის, ჯოზეფ ბოირელის განცხადებით, ლუქსემბურგში ევროკავშირის საგარეო საქმეთა მინისტერიალზე საქართველოს საკითხის განხილვა დღის წესრიგში არ არის, თუმცა სურვილის შემთხვევაში ეს საკითხიც განიხილება.

ბორელმა უპასუხა კითხვას, განიხილება თუ არა მინისტერიალზე საქართველოს საკითხი.

„ეს საკითხი დღის წესრიგში არ არის, მაგრამ ზოგიერთ წევრს თუ ენდომება ამის განხილვა, ჩვენ ასეც მოვიქცევით“, – აღნიშნა ბორელმა.

პრეზიდენტის დახმარებით „ქოცებმა“ ოპოზიცია საკუთარ ანკესზე წამოაგეს. წარმოიდგინეთ პრეზიდენტი, როგორც ტროას ცხენი, რომელიც წინასაარჩევნოდ ოპოზიციაში შეაგზავნეს, ძვირფას ოპოზიციას ზედ წინასაარჩევნოდ ააფეთქებს ტექნიკური მთავრობით, – ამის შესახებ „გირჩის“ ლიდერმა, იაგო ხვიჩიამ განაცხადა.

ხვიჩიას თქმით, პრეზიდენტი ტექნიკურ მთავრობაზე იმ ხალხს ელაპარაკება, რომლებსაც პრემიერობა ოცნებად აქვთ ქცეული.

„Ჩემი აზრით, „ქოცებმა“ პრეზიდენტის დახმარებით ოპოზიცია საკუთარ ანკესზე წამოაგეს. პრეზიდენტი წარმოიდგინეთ, როგორც ტროას ცხენი, რომელიც წინასაარჩევნოდ ოპოზიციაში შეაგზავნეს და ზედ არჩევნებზე ააფეთქებს. პრეზიდენტი ტექნიკურ მთავრობაზე იმ ხალხს ელაპარაკება, რომლებსაც პრემიერობა ოცნებად აქვთ ქცეული. სწორედ ამ ხალხს ეუბნება, რომ პრემიერს დაგინიშნავთო და თან არაპოლიტიკოსსო. ესეც არ იკმარა და ზედ მთავრობის წევრებსაც დავნიშნავ, თქვენ კი ერთი წლის განმავლობაში უსაქმურად იყავითო. ახლა ქარტიის ხელმომწერ პოლიტიკოსებს ეს არ მოსწონთ და ცდილობენ, ამ უხერხული სიტუაციიდან რამენაირად გამოძვრნენ.

ჩემი აზრით, პრეზიდენტი ბოლომდე მიაწვება და ძვირფას ოპოზიციას ზედ წინასაარჩევნოდ ააფეთქებს ტექნიკური მთავრობით. ვისაც პრეზიდენტი ოპოზიციონერი ჰგონია, ის იდიოტი მგონია, რადგან ავიწყდებათ, ბატონ ბიძინას სალომე ზურაბიშვილისთვის რამხელა სიკეთე აქვს გაკეთებული და მისთვის იმედი არც ზურაბიშვილს გაუცრუებია. ის ყოველთვის შესანიშნავად ახერხებს, რომ ათასნაირი სულელური იდეით ოპოზიცია მოამარაგოს და თავის დაკრულ მუსიკაზე აცეკვოს. შემდეგ ოპოზიციას არაფერი რომ არ გამოსდის, უკვირთ, რადგან ფიქრობენ, პრეზიდენტი ხომ ჩვენ გვერდით არის და რატომ არ გამოგვდისო. ვინც მათი დანიშნული და არჩეული არ არის, მისი იმედი ნაკლებად უნდა ჰქონდეთ. ვინც უძალიანდებოდა, გახარია იყო, მაგრამ ბოლოს მანაც ქარტიას ცეკვა-ცეკვით მოაწერა ხელი. პრეზიდენტმა გასაგებად უთხრა, თუ ხელს აწერდით, შესრულებაც უნდა იცოდეთო. ყველა ისევ ოთხ ფეხზე დადგა და შემდეგ თქვეს, არა, ყველანი ვრჩებითო. მგონი, ამათ არაფერი აღარ უშველით, ახლა სალომე ზურაბიშვილთან ერთად უნდა იყვნენ და მისი კაპრიზები შეასრულონ“, – განაცხადა იაგო ხვიჩიამ.

საქართველოს პრეზიდენტმა, სალომე ზურაბიშვილმა განაცხადა, რომ ტექნიკურ მთავრობას არჩევნებამდე დაასახელებს.

„ვაპირებ, წარვადგინო ტექნიკური მთავრობა, ამ გარდავალ ეტაპზე შევქმნა ტექნიკური, ადმინისტრაციული მთავრობა, რომელიც იქნება მხოლოდ და მხოლოდ პასუხისმგებელი იმაზე, რომ აღმასრულებელის მხრიდან შეასრულოს ის, რაც წერია ქარტიაში და ამ თვეებში მიგვიყვანოს იქ, სადაც უნდა მივიდეთ, ანუ ევროპის კართან. რადგან ჩემი წარსადგენია, ვთვლი, რომ უნდა იყოს წარდგენილი ადრე, არჩევნებამდე, რათა საზოგადოებამ იცოდეს, ვინ იქნება პასუხისმგებელი მთავრობაში და პარლამენტის კონტროლის ქვეშ ვინ წაიყვანს ამ ქვეყანას ქარტიის გზაზე“, – განაცხადა სალომე ზურაბიშვილმა.

უცხო ძალებისა და ადგილობრივი მეხუთე კოლონის მიერ მზადდება ბოლო 33 წლის მანძილზე რიგით მესამე პუტჩი და სახელმწიფო გადატრიალება, – წერს ექსპერტი ედიშერ გვენეტაძე სოციალურ ქსელში.

მისი განცხადებით, სწორედ სახელმწიფო გადატრიალებას ემსახურება სალომე ზურაბიშვილის მიერ შემოთავაზებული „ქართული ქარტია“ და „ტექნიკური მთავრობა“, რომელიც შეთანხმებულია დასავლეთის „გლობალურ ომის პარტიასთან“. გვენეტაძის თქმით, ამის შესახებ თავად ზურაბიშვილმა ისაუბრა, რომელიც პუტჩის მეთაურად გარე ძალებმა დანიშნეს.

„ძვირფასო მეგობრებო!

გილოცავთ სვეტიცხოვლობას!

აქვე მოგახსენებთ, რომ სამწუხაროდ საქართველოში უცხო ძალებისა და ადგილობრივი მეხუთე კოლონის მიერ დაანონსებულია, მზადდება ბოლო 33 წლის მანძილზე რიგით მესამე პუტჩი და სახელმწიფო გადატრიალება. საუბედუროდ ამ პროცესს ნებსით თუ უნებლიეთ მხარს უჭერს მოსახლეობის უმცირესი, მაგრამ მაინც ნაწილი(გარედან დაფინანსებული არასამთავრობოების ოჯახის წევრები, მოტყუებულ-გაბრიყვებული მოზარდები, ხელისუფლებაზე ცალკეულ გარემოებათა გამო განაწყენებულები)-გაიხსენეთ, ზუსტად ასე იყო 1991-1992 წწ-ში.

მხოლოდ და მხოლოდ სახელმწიფო გადატრიალებას და სხვას არაფერს ემსახურება ე.წ. პრეზიდენტის მიერ შემოთავაზებული „ქართული ქარტია“ თავისი ე.წ. „ტექნიკური მთავრობით“, რომელიც შეთანხმებულია დასავლეთის გლობალურ ომის პარტიასთან. ამის შესახებ დღისით, მზისით მსოფლიოს თვალწინ გაახმოვანა მომავალი პუტჩის მეთაურად გარედან დანიშნულმა, აწ უკვე უკანონოდ ცნობილმა პრეზიდენტმა.

ხაზგასმითაა აღსანიშნავი, ე. წ. „ტექნიკური მთავრობა“, სხვა არაფერია თუ არა 1991-1992 წლებში სახელმწიფო გადატრიალების შემდეგად შექმნილი ჯერ სამხედრო, ხოლო შემდეგ სახელმწიფო საბჭო. თუ რა მოუტანა საქართველოს სახელმწიფოს და ხალხს 1991-1992 წწ. და 2003 წ. გადატრიალებებმა საყოველთაოდაა ცნობილი:
სამოქალაქო დაპირისპირებები, ტერიტორიული მთლიანობის დარღვევა, საკუთარ სამშობლოში 300 ათასი ლტოლვილი, ქუჩებში ადამიანების ჩახოცვა, პატიმრების წამება. ოკუპანტისადმი ტერიტორიების გაფორმება…

მომავალი პუტჩის შემთხვევაში საქართველოს და მის მოსახლეობას ელოდება:

„ოჯახური ღირებულებების და არასრულწლოვანის დაცვის შესახებ კანონის“ მომენტალურად გაუქმება;

ერთსქესიანთა ქორწინების დაკანონება;

საქართველოს ომში ჩაბმა და სრული განადგურება.

ანუ ვინც ვერ იგებს ზემოთჩამოთვლილს იმათთვის-რაც გიშრომიათ, გიშენებიათ, შეგიქმნიათ ერთ წუთში იმის გაცამტვერება.

ისმის კითხვა:

სად წერია საქართველოს უმაღლეს საკანონმდებლო დოკუმენტში კონსტიტუციაში ე.წ. „ტექნიკური მთავრობის“ შესახებ?

რამდენად კანონიერია კონსტიტუციით ზეპარტიული პრეზიდენტის მიერ, ორბელიანების სასახლეში 26 ოქტომბრისათვის ფაქტობრივად პუტჩის ცენტრის დაანონსება და გადატრიალების ცენტრის შექმნის მცდელობა?

მე არავის ვაშინებ, მაგრამ ვაფრთხილებ უახლოეს დღეებში საქართველოს სახელმწიფო ინსტიტუტებს და ქართველ ხალხს ელოდება უმძიმესი დღეები და უდიდესი გამოცდა.

ამიტომ, ვფიქრობ საქართველოს კონსტიტუციის დამრღვევი, პრაქტიკულად უკანონობის დამწყები და მოქმედი უკლებლივ ყველა პირი, მაშინვე მომენტალურად უნდა გახდეს სახელმწიფო ორგანოების ზრუნვის საგანი.
უფლის კვართი და ღვთისმშობლის კალთა ფარავდეს სრულიად საქართველოს!“, – წერს ედიშერ გვენეტაძე.

საქართველოს განათლების, მეცნიერებისა და ახალგაზრდობის სამინისტრო განცხადებას ავრცელებს.

„საქართველოს განათლების, მეცნიერებისა და ახალგაზრდობის სამინისტრო აცხადებს, რომ სალომე ზურაბიშვილის მიერ გავრცელებული ინფორმაცია, თითქოს სკოლებში კონკრეტული მიზნებისთვის ხდება ბავშვების პირადი მონაცემების შეგროვება, სიცრუეა და სიმართლეს არ შეესაბამება.

მსგავსი სახის დეზინფორმაციის გავრცელება არის მიზანმიმართული ქმედება, რომელიც მხოლოდ და მხოლოდ განათლების სისტემის დისკრედიტაციას ისახავს მიზნად.

გვსურს საზოგადოებას ვაცნობოთ, მოსწავლეთა მონაცემები – პირადი ინფორმაცია, მის მიერ კლასების დაძლევა, მიმდინარე ნიშნები – ასახულია განათლების მართვის საინფორმაციო სისტემაში. გარდა ამისა, სისტემაში ასახულია ინფორმაცია მშობლების ან კანონიერი წარმომადგენლების შესახებ.

პერიოდულად სკოლების მიერ ხდება სისტემაში არსებული მონაცემების, კერძოდ მშობლის/კანონიერი წარმომადგენლის, საკონტაქტო ტელეფონის, ელ.ფოსტისა და საცხოვრებელი მისამართის, განახლება.

აღნიშნული ემსახურება მშობელთან/კანონიერ წარმომადგენელთან, საჭიროების შემთხვევაში, სწრაფი და მარტივი კომუნიკაციის უზრუნველყოფას.

მონაცემების ზოგადი განათლების მართვის საინფორმაციო სისტემაში შეგროვებას, შენახვას, დამუშავებას, ანალიზსა და ადმინისტრირებას „პერსონალურ მონაცემთა დაცვის შესახებ“ საქართველოს კანონის მოთხოვნების დაცვით, დადგენილი წესით უზრუნველყოფს განათლების მართვის საინფორმაციო სისტემა.

განათლების მართვის საინფორმაციო სისტემა უფლებამოსილია, მიიღოს და გამოიყენოს სამინისტროს სისტემაში შემავალ სხვა საჯარო სამართლის იურიდიულ პირებში არსებული პერსონალური მონაცემები.

მოვუწოდებთ კონკრეტულ პირებს, რომ თავი შეიკავონ დეზინფორმაციის გავრცელებისგან, რაც მიზანმიმართულად საზოგადოების შეცდომაში შეყვანას ემსახურება“, – აღნიშნულია გავრცელებულ განცხადებაში.

მმართველ გუნდში აცხადებენ, რომ ოპოზიცია პროვოკაციებისთვის ემზადება. კომენტარი ამ თემაზე „ქართული ოცნების“ გლდანის დელეგატმა ვლადიმერ ბოჟაძემ გააკეთა.

„ბოლო ორი კვირა იქნება განსაკუთრებულად მნიშვნელოვანი – საარჩევნო პერიოდი მაქვს მხედველობაში და სამართალდამცავი ორგანოები უნდა იყვნენ მაქსიმალურად ფრთხილად, რადგან საზოგადოება ხედავს, რომ ოპოზიცია არის ყველაფრისთვის მზად და იმისთვი, რომ როგორმე დაბრუნდეს ხელისუფლებაში, ყველაფერზე არის წამსვლელი, მათ შორის არეულობაზე, დესტაბილიზაციაზე, სისხლისღვრაზე“, – განაცხადა ბოჟაძემ.