საქართველოს პრეზიდენტმა კანონმდებლობის საწინააღმდეგოდ წარმოადგინა ვეტო, სადაც არავითარი არგუმენტი, შენიშვნა არ არის, რითაც ყველანაირი დისკუსია დახურა.

მისივე თქმით, „საქართველოს პრეზიდენტმა მორიგი მავნებლობა ჩაიდინა“.

„გავაგრძელებთ მუშაობას პარტნიორებთან. ამ კანონის მიღებით არ სრულდება და არ დაწყებულა ყველაფერი მათთან ურთიერთობაში. საქართველოს პრეზიდენტმა ჩაიდინა მორიგი მავნებლობა, როდესაც განზრახ დახურა ყველანაირი დიალოგის შესაძლებლობა. მისი მხრიდან ეს არის განზრახი აქტი. იცოდა, რომ ლამის ავტომატურ რეჟიმში იმეორებდა საპარლამენტო უმრავლესობიდან ყველა დეპუტატი, ავტომოპასუხესავით ყველა ვიმეორებდით, რომ დიალოგის სივრცე კვლავ არის და ეს შეიძლება გაიმართოს მოტივირებული, ანუ არგუმენტებიანი ვეტოს გარშემო საუბრისას. რა გააკეთა საქართველოს პრეზიდენტმა? საქართველოს პრეზიდენტმა იმ პროცედურის საწინააღმდეგოდ, შეუსაბამოდ, რასაც ჩვენი კანონმდებლობა ითვალისწინებს, წარმოადგინა ვეტო, სადაც არავითარი არგუმენტი, შენიშვნა არ არის. ამით დახურა ყველანაირი დისკუსია. რატომ დახურა? პრეზიდენტი შენიშვნებს თუ არ მოიწერებოდა, პარლამენტი სამართლებრივად მოკლებულია ყველანაირ შესაძლებლობას, დისკუსია გამართოს იმის მიღმა, რაც წერია ვეტოში. ეს ალბათ კარგად უნდა ავუხსნათ ყველას, ვინც ვეტოს პროცედურებში ასე კარგად ჩახედული არ არის. პრეზიდენტი თუ წარმოადგენდა არგუმენტებს, რომლებიც იქნებოდა მისი ან არასამთავრობო სექტორის, უცხოელი პარტნიორების ან ნებისმიერი დაინტერესებული მოქალაქის, ასეთ შემთხვევაში, პარლამენტი ამ არგუმენტებზე მსჯელობას შეძლებდა. დღეს პარლამენტი ვეღარ იმსჯელებს იმაზე, რაც წარმოდგენილი არ არის, ამიტომ პრეზიდენტმა მავნებლურად დახურა ყველანაირი სივრცე დიალოგის, საუბრის. იმის მაგივრად, რომ პრეზიდენტი იყოს კონსტიტუციური გარანტი სტაბილურობის, მშვიდობიანობის, მრავალი თვეა, პირიქით იქცევა და რაც მეტი არეულობა იქნება ქვეყანაში, თითქოს ეს საკუთარ წარმატებად მიაჩნია“, – განაცხადა თეა წულუკიანმა.

როგორც წულუკიანმა აღნიშნა, პარლამენტი პრეზიდენტის ვეტოს აუცილებლად დაძლევს.

„ვეტო აუცილებლად დაიძლევა, მაგრამ იმისთვის, რომ პარტნიორებს კანონის მიღების შემდეგ და ვეტოს გადალახვის პროცესშიც ავუხსნათ, რატომ არ არის და ვერ იქნება ეს კანონი წინაღობა მოლაპარაკებების გახსნის პროცესში, ბევრი მუშაობა იქნება საჭირო, რისთვისაც მზად ვართ. როდესაც სიკეთეებს შორის უნდა გადაწყვიტო კანონის მიღება და სუვერენიტეტის გაძლიერება, ამ ეტაპზე არის ძალიან დიდი სიკეთე, რომელსაც დაცვა ჭირდება“, – აღნიშნა წულუკიანმა.

პარლამენტმა „უცხოური გავლენის გამჭვირვალობის შესახებ“ კანონი მესამე მოსმენით 14 მაისს მიიღო. საქართველოს პრეზიდენტმა, სალომე ზურაბიშვილმა „უცხოური გავლენის გამჭვირვალობის შესახებ“ კანონს ვეტო 19 მაისს დაადო. „ეს კანონი არ ექვემდებარება არავითარ ცვლილებას, არავითარ გაუმჯობესებას და ამდენად, არის ძალიან მარტივი ვეტო. ეს კანონი უნდა გაუქმდეს“, – განაცხადა სალომე ზურაბიშვილმა.

გეტყვით, რომ ამერიკის შეერთებული შტატები საქართველოს სტრატეგიული პარტნიორია. მე ვფიქრობ, რომ ის კონკრეტული ინიციატივა, რომელიც კონგრესის გარკვეული წევრების მხრიდან მოდიოდა [კონკრეტული მაღალჩინოსნების სანქცირებასთან დაკავშირებით], ალბათ, არ იქნება მიღებული,- ამის შესახებ ეკონომიკისა და მდგრადი განვითარების მინისტრმა ლევან დავითაშვილმა მთავრობის სხდომის დასრულების შემდეგ განაცხადა.

საქართველოს ვიცე-პრემიერი მიიჩნევს, რომ ეს არ არის ის ფორმა, რომელი ფორმითაც პარტნიორები ერთმანეთთან თანამშრომლობენ ან ურთიერთობენ.

„ჩვენ სტრატეგიულ თანამშრომლობას და პარტნიორობას გავაგრძელებთ მომავალ წლებში და ეს თანამშრომლობა, დარწმუნებული ვარ, რომ კიდევ უფრო გაღრმავდება, კიდევ უფრო პროდუქტიული იქნება ორი ქვეყნისთვის და მოემსახურება ორი ქვეყნის ინტერესებს. ეს თანამშრომლობა დაფუძნებული იქნება ნდობასა და პატივისცემაზე. შესაბამისად, მე ვფიქრობ, რომ ის კონკრეტული ინიციატივა, რომელიც კონგრესის გარკვეული წევრების მხრიდან მოდიოდა, ალბათ, არ იქნება მიღებული. მოვლენებს ნუ გავასწრებთ წინ, დაველოდოთ. ცალსახად შეიძლება ითქვას, რომ ეს არ არის ის ფორმა, რომელი ფორმითაც პარტნიორები ერთმანეთთან თანამშრომლობენ ან ურთიერთობენ. ამ შემთხვევაში, კიდევ ერთხელ ტერმინი „რუსული კანონის“ გამოყენება, გეტყვით, რომ არასწორი და არაკორექტულია. ეს არის კლიშე და არის მიზანმიმართული მცდელობა, რომ ადგილობრივი თუ საერთაშორისო საზოგადოება შევიდეს შეცდომაში. შეცდომაში შეჰყავს ოპოზიციას, პოლიტიკურ ძალებს მოსახლეობა და შემდგომში, რა თქმა უნდა, ეს გაზიარებული იქნა რამდენიმე უცხოელი პოლიტიკოსის მხრიდანაც.

მე გეტყვით, რომ კანონი ცალსახად არ არის რუსული, არანაირი კავშირი არ აქვს რუსულთან. როდესაც მასობრივად ხდება ადამიანების არასწორი ინფორმირება, ტერმინის დამკვიდრება, ეს განმეორებული იქნა სხვადასხვა პოლიტიკოსის მიერ, თუმცა, სამწუხაროდ, არ იქნა პრინციპულ განსხვავებებზე მსჯელობა, რომელზეც პრემიერმა ისაუბრა ძალიან დეტალურად და ვფიქრობ, რომ საზოგადოებისთვის ძალიან მკაფიოდ არის გასაგები“,- განაცხადა დავითაშვილმა.

გილოცავთ კანონის მიღებას და უკვე მომავალ ორშაბათს, მოგილოცავთ, ვეტოს გადალახვას, – ასე უპასუხა კულტურის მინისტრმა, თეა წულუკიანმა მთავრობის ადმინისტრაციაში ჟურნალისტების კითხვას „უცხოური გავლენის გამჭვირვალობის შესახებ“ კანონზე.

კულტურის მინისტრს მედიამ კითხვა დაუსვა, შეუძლია თუ არა დაასახელოს ის კვლევითი ორგანიზაცია, რომელიც პრემიერ-მინისტრ ირაკლი კობახიძის გაცხადებით, ამტკიცებს, რომ „უცხოური გავლენის გამჭვირვალობის შესახებ“კანონს მოსახლეობის 60% უჭერს მხარს.

წულუკიანმა აღნიშნული ორგანიზაცია არ დაასახელა, თუმცა განმარტა, რომ ამ კითხვას პრემიერ-მინისტრმა არაერთხელ უპასუხა, რომ კვლევა ჩაატარა რესპექტაბელურმა ორგანიზაციამ. რესპექტაბელობაში კი, წულუკიანის განმარტებით, იგულისხმება პროფესიონალიზმი, მიუკერძოებლობა და დიდი გამოცდილება სოციოლოგიური კვლევების ჩატარების სფეროში

„ახსნილი იქნა, რომ ეს არის გამჭვირვალე ორგანიზაცია მაღალი რეპუტაციის მქონე“, -განაცხადა წულუკიანმა.

გარდა ამ საკითხისა, კულტურის მინისტრს ჟურნალისტმა ჰკითხა „ქართული ოცნების“ დეპუტატის მარიამ ლაშხის მიერ The News Agents-თან გაკეთებულ განცხადებაზე, რომ “გლობალური ომის პარტია” მასონების მსგავსი ძალაა“.

„არ მომისმენია, ბოდიშს გიხდით, მოვისმენ და გიპასუხებთ. არ მომისმენია, რა შუაში არიან მასონები? მოვისმენ და გიპასუხებთ“, – აღნიშნა წულუკიანმა

პრეზიდენტ ზურაბიშვილის მხრიდან პოლიტიკური, ბლანკეტური ვეტოს გამოყენება სწორი გადაწყვეტილება იყო, იმიტომ, რომ “რუსული კანონი” გაკეთილშობილებას, შელამაზებას და შესაბამისად, მოდიფიკაციას არ ექვემდებარება, – ამის შესახებ საპარლამენტო ფრაქცია “ერთიანი ნაციონალური მოძრაობის” თავმჯდომარემ, თინა ბოკუჩავამ ჟურნალისტებთან განაცხადა.

ბოკუჩავას თქმით, ეს პოლიტიკურად ნამდვილად სწორი გადაწყვეტილება და ნაბიჯი იყო.

“პრეზიდენტ ზურაბიშვილის მხრიდან პოლიტიკური, ბლანკეტური ვეტოს გამოყენება სწორი გადაწყვეტილება იყო, იმიტომ, რომ “რუსული კანონი” გაკეთილშობილებას, შელამაზებას და შესაბამისად, მოდიფიკაციას არ ექვემდებარება. მისი გაწვევა უნდა მოხდეს, რადგან არ გაიწვია ივანიშვილის პარტიამ და მიიღო 3 მოსმენით, პრეზიდენტს გააჩნდა ერთი ბერკეტი და შესაძლებლობა, რომ ბლანკეტურად, ანუ სრულად დაედო ამ კანონისთვის ვეტო. ამიტომ ვფიქრობ, რომ ეს პოლიტიკურად ნამდვილად სწორი გადაწყვეტილება და ნაბიჯი იყო. ამიტომ ეს იძლევა კიდევ ერთ შანსს იმისთვის, რომ ივანიშვილის პარტიამ არ დაძლიოს ვეტო და ქვეყანას მისცეს საშუალება, რომ ასე თუ ისე ნორმალიზდეს პოლიტიკური პროცესები. ბუნებრივია, რომ ნორმალიზებაზე საუბარი, მას შემდეგ, რაც ამდენი ადამიანი ნაცემი და დაკავებულია, ძალიან რთულია, მაგრამ თუ რაიმე გონივრულის გაკეთება ახლა მაინც შეუძლია ივანიშვილის პარტიას, არის ის, რომ არ გადალახოს პრეზიდენტ ზურაბიშვილის ვეტო”,- აღნიშნა ბოკუჩავამ.

ცნობისთვის, პრეზიდენტი სალომე ზურაბიშვილი”უცხოური გავლენის გამჭვირვალობის შესახებ” კანონპროექტს პარლამენტს იგივე სახით უკან უბრუნებს და მხოლოდ ერთ მუხლის ამატებს, რომლის მიხედვით, კანონი ამოქმედებიდან მხოლოდ ერთი დღის განმავლობაში მოქმედებს და მეორე დღესვე ძალას კარგავს.

ადამიანები, რომლებიც ნატო-ს ქოლგის ქვეშ არიან შეფარებული და ჩვენ გვთხოვდნენ, ორმხრივი სანქციები დაგვეწესებინა რუსეთისთვის, თვითმფრინავით გაგვეშვა მოხალისეები უკრაინაში, ყველა გვწირავდა ეკონომიკური კოლაფსისთვის და, დიდი ალბათობით, ომისთვის, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.

პაპუაშვილის თქმით, ქართველი ხალხის ინტერესს საქართველოს მთავრობაზე მეტად არავინ გაითვალისწინებს.

მთავარია, ჩვენი ქვეყნის, ხალხის ინტერესში რა არის. ჩვენ ევროპული ქვეყანა და ევროპელი ხალხი ვართ. ის, რაც ქართველი ხალხის ინტერესშია, ის არის ჩვენი ევროპული მომავლის ინტერესში და არა ის, რაც რომელიღაც ევროკავშირის წევრი ქვეყნის რომელიღაც მინისტრის ინტერესშია. არანაირად არ გვაინტერესებს რომელიღაც მინისტრის ინტერესი. მათი ინტერესები რაცაა, მოვისმინეთ, ესაა სააკაშვილის გათავისუფლება. რა ვქნათ, ამ ინტერესებს ვერ ავყვებით, ეს ინტერესები ჩვენთვის გასაზიარებელი არ არის. ზუსტად იგივე ხალხი გვეუბნებოდა, ან დაუწესებთ რუსებს სანქციებს, ან დაივიწყეთ კანდიდატის სტატუსიო. ხომ არ დავაწესეთ, ხომ მივიღეთ კანდიდატის სტატუსი, რატომ? თვითონაც მიხვდნენ, ჩვენ რომ დაგვეწესებინა, ევროკავშირსაც დააზიანებდა. ხან მოხალისეების თვითმფრინავით გაშვების, ხან სააკაშვილის გამოშვების საკითხი იყო. ჩვენზე კარგად ჩვენს საქმეს არავინ განიხილავს, ჩვენზე მეტად ქართველი ხალხის ინტერესს არავინ გაითვალისწინებს. უცხოელი წარმოადგენს თავისი ქვეყნის ინტერესს და არა საქართველოს ინტერესს. უცხოელი პოლიტიკოსები მიტინგზე რომ დაგიდგებიან და სიყვარულს გეფიცებიან, ისინი უპირველეს ყოვლისა, საკუთარი ხალხის ინტერესს წარმოადგენენ. ერთ წუთში გაგვწირავენ, თუკი დასჭირდათ. როგორც გაგვწირეს, როცა გვეუბნებოდნენ, კარგით რა, ერთი-ორი თვითმფრინავით მაინც გაუშვით მოხალისეებიო. ასეთი ადამიანი ხომ სწირავდა ქართველ ხალხს ომისთვის. ისევე როგორც, გვეუბნებოდნენ, ყველა უწესებს სანქციებს და თქვენც დაუწესეთ სანქციები რუსეთსო. რომ ვეკითხებოდით, თქვენ ნატო-ს წევრი ხართ და დაცული ხართ, გვაძლევთ უსაფრთხოების გარანტიას? არა, არ გაძლევთ, მაგრამ დაუწესეთ სანქციებიო. ხომ გვწირავდა ასეთი ადამიანი, ვინც გვთხოვდა, ორმხრივი სანქციები დაგვეწესებინა რუსეთისთვის, თვითმფრინავით გაგვეშვა მოხალისეები უკრაინაში. ადამიანები, რომლებიც არ გვთავაზობდნენ უსაფრთხოებას, თვითონ კი ნატო-ს ქოლგის ქვეშ არიან შეფარებული, ყველა გვწირავდა ეკონომიკური კოლაფსისთვის და, დიდი ალბათობით, ომისთვის“, – განაცხადა შალვა პაპუაშვილმა.

„ენჯეოებისა“ და „ნაცმოძრაობის“ სიმბიოზი უკვე ორი წელია საბოტაჟს ცდილობს. იგივე ხდებოდა პანდემიის დროსაც. რაც რუსეთმა უკრაინის წინააღმდეგ ომი დაიწყო, ვხედავთ საბოტაჟს საბოტაჟზე, – ამის შესახებ საქართველოს პარლამენტის თავმჯდომარემ, შალვა პაპუაშვილმა მედიასთან განაცხადა.

მისი თქმით, ისინი ცდილობენ, რომ საქართველო გახდეს სანქციების სამიზნე.

„ორჯონიკიძეობა სხვა რამე კი არ არის, როდესაც შენი ქვეყნის წინააღმდეგს სხვა ქვეყნებს აქეზებ. ერთადერთი ამოცანა რაც მათ ჰქონდათ იყო ის, რომ მოენიშნათ საქართველო როგორც სამიზნე, რომ სანქციების ცეცხლი გამოეწვიათ. ამას აკეთებენ ახლაც, დარბიან ბრიუსელსა და ვაშინგტონში და ნიშნავენ საქართველოს, როგორც სამიზნედ სანქციების ცეცხლისა. ეს არის ზუსტად ორჯონიკიძეობა, როდესაც საკუთარი ქვეყნის წინააღმდეგ იბრძვი, რანაირად უყურებენ თვალებში საკუთარ ხალხს? წელიწადნახევარი დაგვჭირდა, რომ ენჯეოების მიერ ატეხილი კამპანია ჩაგვეხშო, რომელიც სანქციების გვერდის ავლას ეხებოდა“, – აღნიშნა პაპუაშვილმა.

აქციების ერთ-ერთმა ლიდერმა რამდენიმე დღის წინ განაცხადა, რომ მას შურს უკრაინელების, მე ვიტყოდი, რომ ეს არ არის შემთხვევითი წამოცდენა, მთავარი მიზანი, დავალება, რაც ამ ადამიანებს ამოძრავებთ, არის საქართველოს უკრაინიზაცია, ანუ ის, რომ საქართველომ უკრაინის ბედი გაიზიაროს, – ამის შესახებ საქართველოს პრემიერ-მინისტრმა, ირაკლი კობახიძემ მთავრობის სხდომაზე განაცხადა.

მთავრობის მეთაურის თქმით, მათ ამას ვერ მიაღწიეს 2022 წელს, თუმცა ფაქტია, რომ დღემდე ამის იმედი არ დაუკარგავთ.

„მინდა, ყველას კიდევ ერთხელ შევახსენო, რას ნიშნავს უკრაინის ბედის გაზიარება და რა მდგომარეობაა დღეს უკრაინაში. სამწუხაროდ, ამ ომის შედეგად უკრაინაში დაღუპულია ათი ათასობით ადამიანი. კონკრეტული სტატისტიკური მაჩვენებელია 19-24 წლის ახალგაზრდა მამაკაცების 2/3 ან ქვეყნიდან გავიდა, ან დაიღუპა. საუბარია უკრაინის გენოფონდის განადგურებაზე. ეს არის ის, რისიც შურთ ჩვენს ოპონენტებს. დაახლოებით 10 მილიონი ადამიანი, ანუ ყოველი მეოთხე უკრაინელი ან დევნილად არის ქცეული ქვეყნის შიგნით, ან ლტოლვილად – გასულია ქვეყნიდან. ეკონომიკა განადგურებულია, მარტო პირველსავე წელს 30% ჰქონდათ ეკონომიკის ვარდნა, რაც სრულ კატასტროფას ნიშნავს. ინფრასტრუქტურა განადგურებულია, დღეს რუსეთს აქვს ოკუპირებული 2,5-ჯერ მეტი ტერიტორია, ვიდრე ჰქონდა ოკუპირებული ომის დაწყების მომენტისთვის. ომის ფონზე უკრაინაში ხელს ითბობენ პოლიტიკოსები და ჩინოვნიკები და ყვავის კორუფცია, გაუქმებულია არჩევნები, პოლიტიკური პლურალიზმი, მედიის თავისუფლება, ყველაფერი, რაც დაკავშირებულია ზოგადად დემოკრატიის ცნებასთან. ამ ყველაფრის შურთ კოლექტიური „ნაცმოძრაობის“ წარმომადგენლებს და არა მარტო შურთ, მათ სურთ ეს ყველაფერი იხილონ საქართველოში, მათ სურთ, საქართველომ გაიზიაროს უკრაინის ბედი, რასაც, რა თქმა უნდა, ვერ დავუშვებთ.

ფაქტია, მათ იმედი არ დაუკარგავთ და მათ მიერ ორგანიზებული ყველა პროვოკაცია და პროტესტი სწორედ ამ მიზანს ემსახურება, თუმცა საქართველო აუცილებლად შეინარჩუნებს მშვიდობას, რაც არის წინსვლის და განვითარების აუცილებელი პირობა“, – განაცხადა პრემიერმა.

ირაკლი კობახიძის შეფასებით, გამჭვირვალობის შესახებ კანონი ხელისუფლებას დაეხმარება იმაში, რომ საქართველოში უზრუნველყოფილი იყოს გრძელვადიანი მშვიდობა და სიმშვიდე, რაც ასე სჭირდება ქვეყანას და მოსახლეობას.

ადამიანები, ვინც ჩვენ გვთხოვდნენ, დაგვეწესებინა ორმხრივი სანქციები რუსეთისთვის, გაგვეშვა მოხალისეები და არ გვთავაზობდა უსაფრთხოების გარანტიას (თვითონ რომ ნატო-ს ქოლგის ქვეშ არიან), გვწირავდნენ ეკონომიკური კოლაფსისთვის და დიდი ალბათობით, ომისთვის, ესაა რეალობა – მეგობარი, რომელიც შენ ოჯახში შემოდის და თავის გემოვნებით ავეჯის გადადგმას იწყებს, ეს უკვე მეგობარი აღარაა,- ამის შესახებ პარლამენტის თავმჯდომარე შალვა პაპუაშვილმა ჟურნალისტებს საქართველოს პარტნიორებზე საუბრისას განუცხადა.

მისი თქმით, ხელისუფლებას აღნიშნული მეგობრებისთვის რომ დაეჯერებინა, დღეს საქართველო ეკონომიკურად ჩამონგრეული იქნებოდა“.

„ჩვენ გვჭირდება მეგობრები და არა მიმთითებლები და ადამიანები, რომლებიც ჩვენ მოთხოვნებს წამოგვიყენებენ. მეგობრობა სხვა რამეა – მეგობარი, რომელიც შენს ოჯახში შემოდის, სხვაა და მეგობარი, რომელიც შენ ოჯახში შემოდის და თავის გემოვნებით ავეჯის გადადგმას იწყებს, ეს უკვე მეგობარი აღარაა ამ გაგებით.

ზუსტად იგივე ხალხი გვეუბნებოდა, რომ რუსეთს თუ სანქციებს არ დაუწესებთ, კანდიდატის სტატუსს არ მოგცემთ. ზუსტად იგივე ხალხი, მათ შორის აქ მიტინგზე რომ იდგა, ერთ-ერთი მინისტრი, პირდაპირ გვეუბნებოდა, სააკაშვილს თუ არ გაუშვებთ ციხიდან, ვერ მიიღებთ კანდიდატის სტატუსს, თქვენი ევროპული მომავალი დადგება კითხვის ნიშნი ქვეშ. უნდა დავყოლოდით? „ენჯეოებისთვის“ და ოპოზიციისთვის რომ დაგვეჯერებინა, უნდა გვეთქვა: „რადგან იქიდან გვეუბნებიან, პატარა ხალხი ვართ და როგორ არ უნდა დავუჯეროთ, ჩვენ ვინ გვეკითხება, ისინი დიდები და უფროსები არიან და მათ უნდა დავუჯეროთ“. ოპოზიცია რომ ყოფილიყო ხელისუფლებაში, გაჰყვებოდნენ, სანქციებსაც დააწესებდნენ, მოხალისეებსაც დააორგანიზებდნენ, გაუშვებდნენ უკრაინაში და სააკაშვილსაც გამოუშვებდნენ. საქართველოში რა დატრიალდებოდა, შეგიძლიათ ამაზე დაფიქრდეთ, ეკონომიკურად გაზომილია, რა მოხდებოდა – გვექნებოდა ეკონომიკური კოლაფსი, 10%-იანი ვარდნა, იმ მეგობრების რეკომენდაციები რომ გაგვეთვალისწინებინა, ვინც სანქციების დაწესებას გვთხოვდა, გვირჩევდა და ხანდახან მუქარა ნარევი ტონითაც გვეუბნებოდა. იმ მეგობრებისთვის რომ დაგვეჯერებინა, დღეს საქართველო ეკონომიკურად ჩამონგრეული იქნებოდა. ასეთი მეგობრის რჩევა გასათვალისწინებელია? ან ასეთი მეგობარი მართლა მეგობარია, როდესაც ასეთ რამეს გეუბნება? რომ დაგვეჯერებინა და სააკაშვილი გამოგვეშვა, რა მოხდებოდა რადიკალიზაციის მხრივ, გასაგებია ხომ?!“,- განაცხადა შალვა პაპუაშვილმა.