“ზურაბიშვილის გადასაწყვეტია, რას იზამს სააკაშვილთან დაკავშირებით” – ხატია დეკანოიძე

19
spot_img

მესმის პარტნიორების შეშფოთება სააკაშვილის პატიმრობაზე, განსაკუთრებით ნავალნის მკვლელობის შემდეგ, ზურაბიშვილის გადასაწყვეტია, რას იზამს, თუმცა კარგი იქნებოდა, საქართველოს ევროინტეგრაციის გზა პოლიტიკური მართლმსაჯულების ფაქტორების გარეშე გაევლო, – ამის შესახებ ოპოზიციონერმა დეპუტატმა, ხატია დეკანოიძემ განაცხადა.

„ჩემი პოზიცია არ შემიცვლა. ამ სასამართლოს და მართლმსაჯულების პირობებში ძალიან სერიოზულ შეშფოთებას იწვევს ჩვენი პარტნიორების მხრიდან, როდესაც საქართველოს ყოფილი პრეზიდენტი არის პატიმრობაში. მათ შორის, როდესაც ასეთი მნიშვნელოვანი ფიგურაა სასჯელაღსრულების დაწესებულებაში. მტკიცებულებების სტანდარტი, კანონის უზენაესობა და ყველა პრინციპი უნდა იყოს დაცული. ამიტომ მე მესმის ჩვენი პარტნიორების შეშფოთება, განსაკუთრებით ალექსანდრე ნავალნის მკვლელობის შემდეგ. სალომე ზურაბიშვილის გადასაწყვეტია, რას იზამს, მაგრამ კარგი იქნებოდა, თუ საქართველო ევროინტეგრაციის ამ გზას პოლიტიკური მართლმსაჯულების ფაქტორების გარეშე გაივლიდა“, – განაცხადა ხატია დეკანოიძემ.

რაც შეეხება კითხვას მიუნხენში სალომე ზურაბიშვილის მთავრობის ნებართვის გარეშე წასვლასთან დაკავშირებით, ხატია დეკანოიძის თქმით, კარგია, რომ სალომე ზურაბიშვილი წარმოადგენს საქართველოს პოზიციას და ის საკმაოდ კარგ აქცენტებს სვამს, მათ შორის, ევროატლანტიკური ინტეგრაციის კონტექსტში.

„კარგია, რომ სალომე ზურაბიშვილი წარმოადგენს საქართველოს ეროვნულ ინტერესებს და პოზიციას და არ წარმოადგენს, მაგალითად, საქართველოს ხელისუფლების ის ნაწილი, რომელიც სრულიად ანტიდასავლურია. ზურაბიშვილი საკმაოდ კარგ აქცენტებს სვამს ჩვენი ქვეყნისთვის, მათ შორის, ევროატლანტიკური ინტეგრაციის კონტექსტში“, – განაცხადა ხატია დეკანოიძემ.

ამავდროულად, ხატია დეკანოიძე გამოეხმაურა კოალიციურ მთავრობასთან დაკავშირებით სალომე ზურაბიშვილის განცხადებას. დეკანოიძის თქმით, პროდასავლური ძალების კოალიცია ქვეყანაში დემოკრატიის კუთხით წინ გადადგმული ნაბიჯი იქნებოდა.

„ამ ქვეყანაში ერთპარტიული მმართველობა უნდა დასრულდეს. მათ შორის, ბიძინა ივანიშვილის ოლიგარქიული კლეპტოკრატია საშიშროებაა ქვეყნისთვის. კოალიცია არის ბალანსი და შეთანხმებაზე, კონსენსუსზე დაფუძნებული მმართველობა. ვიზიარებ, რომ პროდასავლური ძალების კოალიცია ქვეყანაში დემოკრატიის კუთხით წინ გადადგმული ნაბიჯი იქნებოდა“, – აღნიშნა ხატია დეკანოიძემ სალომე ზურაბიშვილის განცხადების შეფასებისას.