„ვლადიმერ კლიჩკო, მსოფლიოს ექს-ჩემპიონი კრივში: „წააგო თუ არა უკრაინამ ომი?“

139
spot_img

 „როცა „ჰამასელი“ ტერორისტები ისრაელის ტერიტორიაზე შეიჭრნენ და 1400-მდე ებრაელი დახოცეს, მსოფლიოს საზოგადოებისა და მასობრივი ინფორმაციის საშუალებების ყურადღება უკრაინიდან  ახლო აღმოსავლეთში დაწყებულ ომზე გადაერთო“, – ნათქვამია ინტერვიუში, რომელიც გერმანულ ყოველდღიურ უდიდეს გაზეთ „ბილდში“ (Bild)  გამოქვეყნდა სათაურით „ვლადიმერ კლიჩკო, მსოფლიოს ექს-ჩემპიონი კრივში: „წააგო თუ არა უკრაინამ ომი?“.

გთავაზობთ პუბლიკაციას შემოკლებით:

47 წლის სპორტსმენს, კიევის მერის – ვიტალი კლიჩკოს (ასევე მოკრივის) ძმას ესაუბრება ჟურნალისტი პაულ რონცჰაიმერი. ექს-ჩემპიონი პასუხობს კითხვებს – გრძნობს თუ არა უკრაინა თავს მიტოვებულად და დავიწყებულად, ჩაიშალა თუ არა კონტრშეტევა და როგორია უკრაინის მოსახლეობის განწყობა.

„მსოფლიო უკრაინას არ მიატოვებს“

„ისევე როგორც ყველა მსოფლიოში, მეც შევძრწუნდი, როცა „ჰამასის“ მიერ ჩადენილი ხოცვა-ჟლეტვის ამბავი გავიგე. დიახ, მსოფლიოს ყურადღება დღეს ახლო აღმოსავლეთისკენაა მიპყრობილი, მაგრამ მინდა ვთქვა, რომ უკრაინას არ დაივიწყებენ. შესაძლოა მცირე ხნით, რაღაც პაუზა იქნება ისრაელში დატრიალებული საშინელების გამო, მაგრამ უკრაინა დასავლეთის ხედვის არედან არ გაქრება. მსოფლიო ისევ გააგრძელებს უკრაინისადმი მხარდაჭერას“, – ამბობს ვლადიმერ კლიჩკო.

არადა, სწორედ ახლა, როცა ზამთარი ახლოვდება და ტემპერატურა იკლებს, უკრაინა კვლავ ენერგეტიკული პრობლემის გამწავავების წინაშე დგება. რუსებმა ისევ დაიწყეს უკრაინისათვის სასიცოცხლოდ მნიშვნელოვანი ენერგოობიექტების დაბომბვა. კონკრეტულად ეს ნიშნავს ელექტრო- და თბოსადგურების მწყობრიდან გამოყვანას, ელექტროგამანაწილებელი პუნქტების აფეთქებას და ყველაფერი იმის დაზიანებას, რაც საჭიროა მოსახლეობისათვის – რომ არ გაიყინონ და მათ სახლებში რომ შუქი ენთოს.

კითხვა ვლადიმერ კლიჩკოს:

– „როგორც ცნობილია, უკრაინის ჯარების სარდალმა, გენერალმა ვალერი ზალუჟნიმ ბრიტანული „ეკონომისტისათვის“ მიცემულ ინტერვიუში ფრონტზე შექმნილი სიტუაცია საკმაოდ ობიექტურად შეაფასა და აღიარა, რომ „რუსეთთან ომი ჩიხში შევიდაო“. თქვენ რას იტყოდით ფრონტზე ამჟამად შექმნილი სიტუაციის ირგვლივ?

– დასამალი არ არის, რომ რუსეთის არმიას ჰქონდა დრო თავდცვის ხაზი გაემაგრებინა და მნიშვნელოვანი ზღუდეები აეგო, დაენაღმა ადგილები ისეთი დონით, რომ ჩვენ მათი სწრაფად გადალახვა არ შეგვიძლია. უბრალოდ, წინ ნელა მივდივართ. რუსეთი, მართალია, ფრონტზე უამრავ ჯარისკაცს გზავნის, მაგრამ ისინი ბევრი იხოცება. ეს ეხება რუსების ტექნიკას, არტილერიას, რაკეტებს… ჩვენი შეიარაღებული ძალები უამრავ რუსულ ტანკს, რაკეტას და დრონს ანადგურებს“, – ამბობს მსოფლიოს ექს-ჩემპიონი კრივში.

ვლადიმერ კლიჩკო უკრაინის ომსა და კრივს შორის პარალელს ავლებს:

„ომში ხშირად ხდება როგორც წინსვლა, ასევე უკუსვლაც. შეტევები, კრივის მსგავსად, რამდენიმე რაუნდად შეიძლება განხორციელდეს. ომი საშინელებაა, ყველაფერი უნდა გაითვალისწინო. მთავარია, არავინ არ  დაიღალოს არც უკრაინაში და არც დასავლეთში – ის ადამიანები, ვინც მხარს უკრაინას უჭერს. ჩვენ ყველას სიმტკიცისა და ამტანობის მაგალითი უნდა ვაჩვენოთ. სწორედ ამით უდა დავამარცხოთ მსოფლიოში სიდიდით მეორე არმია“.

– არის თუ არა იმის საფრთხე, რომ ვლადიმერ პუტინის სტრატეგია „უკრაინის დაღლა-გამოფიტვის“ შესახებ იმუშავებს?

– მე დარწმუნებული ვარ, რომ ომი იმ დრომდე გაგრძელდება, სანამ თვითონ რუსეთის მოსახლეობა არ მიხვდება იმას, რომ უკრაინაზე თავდასხმა კრემლის მიერ დაშვებულ უდიდეს შეცდომას წარმოადგენს. როცა რუსები ამას გააცნობიერებენ, მაშინ რუსეთი უკვე სხვა პოლიტიკას გაატარებს – რუსებს სხვა პრეზიდენტი ეყოლებათ“.

ვლადიმერ კლიჩკომ მკაფიოდ აღნიშნა:

„სანამ ვლადიმერ პუტინი ჰააგის სასამართლოსწინაშე არ წარსდგება, მანამ, სამწუხაროდ ომი არ შეწყდება. არ ვიცი, ეს როდის მოხდება და როდის ექნება დასასრული ომს, მაგრამ მთავარია, რომ ჩვენი წინააღმდეგობა მტრის მიმართ სამართლიანია, ჩვენ ვიცავთ საკუთარ სამშობლოს აგრესორი მეზობლისაგან, ჩვენ ვიბრძვით თავისუფალი ცხოვრებისათვის, მტრის მიერ მიტაცებული ტერიტორიების დაბრუნებისთვის“.

უკრაინის მოსახლეობის განწყობის თაობაზე მსოფლიოში სახელგანთქმული მოკრივე ამბობს: „რაც უფრო მეტად გვიტევს რუსეთი, რაც უფრო მეტად გვბომბავს და ანგრევს უკრაინას, რაც უფრო ცდილობს ჩვენთვის დემოკრატიისა და თავისუფლების წართმევას, მით უფრო მეტი იქნება ჩვენი წინააღმდეგობა მტრის მიმართ“.

წყარო