„ვეტინგის“ სისტემის შემოთავაზება სხვა არაფერია, თუ არა კიდევ ერთხელ რადიკალური ოპოზიციის კოლონიალური დამოკიდებულების გამოვლენა, – ამის შესახებ „ხალხის ძალის“ წევრმა, გურამ მაჭარაშვილმა განაცხადა.
როგორც გურამ მაჭარაშვილმა განაცხადა, ქვეყნები საკუთარი სუვერენიტეტისა და სახელმწიფო ინსტიტუტების გარე ძალების ჩარევისგან დაცვას ცდილობენ, ამ დროს ოპოზიცია ცდილობს, უცხოური ძალები შემოუშვან ქართულ პოლიტიკასა და მართლმსაჯულებაში.
„„ვეტინგის“ სისტემა ბუნებრივად მიუღებელი და ანტიკონსტიტუციურია. თურმე დამოუკიდებლობის მოპოვების შემდეგ ამდენი იმიტომ ვიბრძოლეთ, რომ მოსამართლეები ხალხის მიერ არჩეულ ხელისუფლებას და იუსტიციის საბჭოს კი არ დაენიშნა, არამედ საელჩოებს, რომლებიც თურმე ხელისუფლების მესამე შტოს უნდა მართავდნენ. ეს არის, ოპოზიციის გაგებით, სუვერენიტეტი და დამოუკიდებლობა“, – განაცხადა მაჭარაშვილმა.
პარტია „ნაციონალურმა მოძრაობამ“ მოითხოვა „ვეტინგის“ სისტემის შემოღება, რომელიც მოსამართლეების მიერ ე.წ. კეთილსინდისიერების ტესტის გავლას გულისხმობს.
