უკრაინის შეიარაღებული ძალების გენერალური შტაბი დამოუკიდებლად წყვეტს უკრაინის ჯარების კონტრშეტევას. ასეთი გადაწყვეტილება ბოლო მომენტში იქნება მიღებული, – ამის შესახებ უკრაინის ეროვნული უსაფრთხოებისა და თავდაცვის საბჭოს მდივანმა ოლექსი დანილოვმა განაცხადა.
დანილოვმა კომენტარი გააკეთა პენტაგონის საიდუმლო დოკუმენტების „გაჟონვაზე“ და მედიის ცნობებზე, რომ ამის შემდეგ უკრაინას გარკვეული სამხედრო გეგმები უნდა შეეცვალა.
„სპეციალური სამსახურები უფრო ფხიზლად უნდა იყვნენ, როდესაც საქმე ეხება საიდუმლო დოკუმენტებს“, – აღნიშნა დანილოვმა.
ამასთან, ეროვნული უშიშროების საბჭოს მდივანმა აღნიშნა, რომ შეიარაღებული ძალების მთავარსარდალი და მისი შტაბი კონტრშეტევაზე გადაწყვეტილებას ბოლო მომენტში მიიღებენ.
„თუ ვინმე ფიქრობს, რომ ჩვენ გვაქვს მხოლოდ ერთი ვარიანტი, მაშინ ეს ასე არ არის. სამი ვარიანტიც კი არ არის საკმარისი“, – დასძინა დანილოვმა.
