საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ჯოზეფ ბორელმა მოუწოდა ამერიკელ კანონმდებლებს, გადახედონ გადაწყვეტილებას უკრაინის ფინანსური მხარდაჭერის შეჩერების შესახებ. აღნიშნულის შესახებ ინფორმაციას „ამერიკის ხმა“ ავრცელებს.
კიევში უკრაინის პრეზიდენტ ვოლოდიმირ ზელენსკისთან შეხვედრის შემდეგ ბორელმა აღნიშნა, რომ ევროპელი მაღალჩინოსნები გაოცებული არიან ვაშინგტონში მიღებული გადაწყვეტილებით და პირობა დადო, რომ 27 წევრი ევროპული ქვეყანა გააგრძელებს უკრაინის დახმარებას რუსული აგრესიის წინააღმდეგ ბრძოლაში.
„ჩვენ ვდგავართ ეგზისტენციალური საფრთხის წინაშე. უკრაინელები მთელი სიმამაცით, შესაძლებლობებით იბრძვიან და თუ გვინდა, რომ წარმატებული იყვნენ, მაშინ მათ უნდა მივაწოდოთ უკეთესი იარაღი, თანაც უფრო სწრაფად“, – განაცხადა ბორელმა.
შეგახსენებთ, აშშ-ის წარმომადგენელთა პალატამ დაამტკიცა დროებითი ბიუჯეტი, რომელშიც უკრაინის დახმარების საკითხი არ არის გათვალისწინებული.
