“უკრაინას მეტი საჰაერო თავდაცვის სისტემა სჭირდება” – ზელენსკი კიევზე თავდასხმაზე

29
spot_img

უკრაინას სჭირდება მეტი საჰაერო თავდაცვის სისტემა, რომელიც უზრუნველყოფს ჩვენი ქალაქების უსაფრთხოებას და გადაარჩენს ადამიანების სიცოცხლეს, – ასე გამოეხმაურა უკრაინის პრეზიდენტი, ვოლოდიმირ ზელენსკი რუსული ძალების მიერ კიევზე დღეს განხორციელებულ სარაკეტო შეტევას.

„რუსმა ტერორისტებმა ბალისტიკური რაკეტები გაუშვეს კიევში. სამწუხაროდ, ტიპური ურბანული უბნის სახლები დაზიანდა. დაშავებულია 5 ადამიანი. ნანგრევების გაწმენდა მიმდინარეობს. ვიმეორებთ, რომ უკრაინას სჭირდება მეტი საჰაერო თავდაცვის სისტემა, რომელიც უზრუნველყოფს ჩვენი ქალაქების უსაფრთხოებას და გადაარჩენს ადამიანების სიცოცხლეს. ყველა ჩვენგანმა, ვინც პატივს ვცემთ და ვიცავთ ადამიანების სიცოცხლეს, ბოლო უნდა მოვუღოთ ამ ტერორს“, – წერს ზელენსკი X-ზე გამოქვეყნებულ პოსტში.

კიევზე თავდასხმას უკრაინის საგარეო საქმეთა მინისტრი, დმიტრო კულებაც გამოეხმაურა და მოკავშირეებს მოუწოდა, უკრაინას მეტი საჰაერო თავდაცვის სისტემები მიაწოდონ.

„ეს არის შეხსენება, რომ უკრაინას სასწრაფოდ სჭირდება მეტი საჰაერო თავდაცვა, განსაკუთრებით Patriot-ის სისტემები და რაკეტები, რომლებსაც შეუძლიათ ნებისმიერი რუსული თავდასხმის მოგერიება“, – აღნიშნა კულებამ.

შეგახსენებთ, რუსულმა ძალებმა დღეს კიევს ბალისტიკური რაკეტებით შეუტიეს. უკრაინელებმა ორივე ბალისტიკური რაკეტა ჩამოაგდეს. რაკეტების ნამსხვრევები დედაქალაქის ოთხ რაიონში ჩამოცვივდა. ამ დროისთვის არსებული ინფორმაციით, დაშავებულია 5 ადამიანი.