ევროპული ფეხბურთის ასოციაციების კავშირმა (UEFA) რუსეთის 17-წლამდელთა ნაკრებების საერთაშორისო ტურნირებზე დაშვების გადაწყვეტილება მიიღო. როგორც საერთაშორისო ორგანიზაციის განცხადებაში ვკითხულობთ, „ბავშვები არ უნდა ისჯებოდნენ იმ ქმედებებისთვის, რომლებზეც პასუხისმგებლობა უფროსებს ეკისრებათ“.
უეფამ კვიპროსის ქალაქ ლიმასოლში გამართული აღმასრულებელი კომიტეტის სხდომის შემდეგ გავრცელებულ განცხადებაში ამ გადაწყვეტილების მიზეზები განმარტა.
„უეფა პირველი სპორტული ორგანიზაცია იყო, რომელმაც უკრაინის ომზე რეაგირება მოახდინა და 2022 წლის თებერვალში გადამწყვეტი ზომები მიიღო თავისი შეჯიბრებებიდან ყველა რუსული გუნდის ჩამოშორების და რუსეთში დაგეგმილი ისეთი ღონისძიებების გაუქმების სახით, როგორებიცაა უეფას ჩემპიონთა ლიგის ფინალი სანქტ-პეტერბურგში და უეფას სუპერთასი ყაზანში. ასევე გაუქმდა სასპონსორო კონტრაქტი „გაზპრომთან“.
თუმცა, უეფა ასევე აცნობიერებს, რომ არ შეიძლება ბავშვების დასჯა იმ ქმედებებისთვის, რომლებზეც პასუხისმგებლობა სრულად ეკისრებათ უფროსებს და მყარად ვართ დარწმუნებული, რომ ფეხბურთმა არასდროს არ უნდა შეწყვიტოს მშვიდობისა და იმედის გზავნილების გავრცელება. განსაკუთრებით სამწუხარო ისაა, რომ გრძელვადიანი კონფლიქტის გამო, არასრულწლოვანთა თაობას ჩამოერთვა საერთაშორისო ფეხბურთში ასპარეზობის უფლება.
ამ მიზეზთა გამო, უეფა-ს აღმასრულებელმა კომიტეტმა გადაწყვიტა, რომ რუსეთის არასრულწლოვანთა გუნდები ამ სეზონის განმავლობაში ისევ დაიშვებიან შეჯიბრებებზე“, – ნათქვამია განცხადებაში.
