ცნობილი ადამიანების შარჟები საუკუნისწინანდელ პრესაში – ეროვნული არქივის ახალი ონლაინკოლექცია

142
spot_img

საქართველოს იუსტიციის სამინისტროს ეროვნული არქივის ვებგვერდზე ახალი კოლექცია – 1910-20-იან წლებში ქართულ პრესაში დაბეჭდილი ცნობილი ადამიანების შარჟები – გახდა ხელმისაწვდომი.

პერიოდულ გამოცემებს, რომელიც საქართველოში XX საუკუნის დასაწყისში იბეჭდებოდა, ცნობილი მხატვრები აფორმებდნენ. მათ შორის იყვნენ: შალვა ქიქოძე, მიხეილ ჭიაურელი, ლადო გუდიაშვილი, ელენე ახვლედიანი, ოსკარ შმერლინგი და სხვები. ილუსტრირებულ გაზეთებში ცნობილი ადამიანების ასეულობით შარჟს შეხვდებით.

ეროვნული არქივის მიერ შექმნილ ონლაინკოლექციაში შესულია პოლიტიკოსების, მსახიობების, მწერლების, კომპოზიტორების შარჟები პერიოდული გამოცემებიდან: „ცნობის ფურცლის სურათებიანი დამატება” „თეატრი და ცხოვრება”, „ეშმაკის მათრახი”.

კოლექცია, რომელშიც პირველ ეტაპზე 100-ზე მეტი შარჟი გაერთიანდა, ხელმისაწვდომია ბმულზე: https://archive.gov.ge/ge/tsnobili-adamianebis-sharzhebi-1.