ე.წ. სამხრეთ ოსეთის „მინისტრთა კაბინეტმა“ დე ფაქტო საზღვრის დაცვის განხორციელებისას იარაღისა და სამხედრო ტექნიკის გამოყენების პროცედურაში ცვლილებები შეიტანა.
ამიერიდან „სამხრეთ ოსეთის“ თვითგამოცხადებული რესპუბლიკის ე.წ. ხელისუფლებას ქართული უპილოტო საფრენი აპარატების წინააღმდეგ იარაღის გამოყენება შეეძლება.
ახალი „დოკუმენტის“ თანახმად,ე.წ. უშიშროების ძალებს „საზღვრის დარღვევის მცდელობის აღსაკვეთად“ დრონების წინააღმდეგ იარაღის გამოყენება შეეძლებათ.
„ამჟამად, უპილოტო საფრენი აპარატები პოულობენ გამოყენების მზარდ დიაპაზონს როგორც სამოქალაქო, ასევე სამხედრო სფეროში. გამონაკლისი არც სამხრეთ ოსეთის სახელმწიფო საზღვარია საქართველოსთან, რასაც მოწმობს მეზობელი სახელმწიფოს მიერ უპილოტო საფრენი აპარატების გაზრდილი გამოყენება“, – განაცხადა ე.წ. სასაზღვრო სამსახურის უფროსმა ვალერი ალიხანტიმ.
