„ჯორჯიან ეარვეისის“ დირექტორი თამაზ გაიაშვილი მედიასთან აცხადებს, რომ რუსეთ-საქართველოს შორის ფრენების აღდგენა აუცილებელია და ვერ ხედავს რეალურ არგუმენტს, რატომ არ უნდა აღდგეს ფრენები იმ სიტუაციაში, როდესაც რუსეთ-საქართველოს საზღვარზე ყველა სხვა ტრანსპორტის გადაადგილება დაშვებულია. „თუ შეიძლება, რომ [რუსეთ-საქართველოს] საზღვარზე ველოსიპედით გადავიდნენ, ტრაილერებმა იაროს, მსუბუქმა ავტომობილებმა, ავტობუსებმა, ყველა სახის ტრანსპორტმა, თვითმფრინავმა რა დააშავა?! თუ დემოკრატიულ ქვეყანაში ვცხოვრობთ, ამ შემთხვევაში რატომ ვართმევთ უფლებას ადამიანს, აირჩიოს რომელი ტრანსპორტით ისარგებლოს?!“, – განაცხადა გაიაშვილმა. რუსეთის პრეზიდენტის ბრძანებით, 2023 წლის 15 მაისიდან საქართველოს მოქალაქეები რუსეთში შესვლას ვიზის გაფორმების გარეშე შეძლებენ. პუტინის გადაწყვეტილებით, ასევე უქმდება 2019 წლის ივნისში გამოცემული ბრძანებულება, რომლითაც აიკრძალა საქართველოსთან პირდაპირი ფრენები.
