თბილისის მერია ვახტანგ გორგასლის ქუჩაზე არსებული შუა ზოლის რეაბილიტაციას იწყებს

17
spot_img

თბილისის მერია ვახტანგ გორგასლის ქუჩაზე არსებული შუა ზოლის რეაბილიტაციას იწყებს. როგორც თბილისის მერმა, კახა კალაძემ დედაქალაქის მთავრობის დღევანდელ სხდომაზე განაცხადა, ტერიტორია მთლიანად იქნება მოწესრიგებული და განახლებული, რისთვისაც დაახლოებით 4 მლნ დაიხარჯება.

„თბილისის მერიის გარემოსდაცვითი საქალაქო სამსახური ვახტანგ გორგასლის ქუჩაზე არსებული შუა ზოლის რეაბილიტაციას იწყებს. აღნიშნული ბულვარი, რომლის ფართობი 2 ჰა არის, დღეს არის მძიმე მდგომარეობაში. ჩვენ თავიდან ვფიქრობდით, რომ აღნიშნულ მონაკვეთზე საავტომობილო გზის მოძრაობა მიწის ქვემოთ ჩაგვეტანა, გვირაბებში და ზედა სივრცე მთლიანად მწვანე პროექტად გაგვეკეთებინა, თუმცა, კვლევების შედეგად გამოიკვეთა, რომ აღნიშნულ ბულვარზე განთავსებული ხეების დიდი ნაწილი უნდა მოიჭრას, რაც რა თქმა უნდა, უდიდესი პრობლემაა. ასწლოვანი ხეებია და მისი მოჭრა კატეგორიულად მიუღებელია, ძალიან დიდი სილამაზეა ეს ყველაფერი. ამიტომ, მივიღეთ გადაწყვეტილება, რომ საავტომობილო მოძრაობა დავტოვოთ ისე, როგორც არის და გამყოფი ბულვარი მთლიანად მოწესრიგდეს. ამ პროექტის ფარგლებში მოეწყობა გარე განათების სისტემა, საფეხმავლო ბილიკი, ვიდეომეთვალყურეობის სისტემები, გარდა ამისა, ჩატარდება გამწვანების ყველა საჭირო სამუშაო. ტერიტორიაზე შევა ახალი, ნოყიერი მიწის ნაზავი. მოეწყობა სარწყავი სისტემა, დაირგვება სხვადასხვა სახეობის ნერგი და დაითესება ბალახი. გარდა ამისა, განვახორციელებთ მიმდებარე ტერიტორიაზე არსებული სიძველისა და გაუთვალისწინებელი მიზეზის გამო დაზიანებული ძეგლებისა და მემორიალური ობიექტების აღდგენა-რეაბილიტაციას, მათ შორის ერთ-ერთი პირველი 1962 წელს განთავსებული 300 არაგველის მემორიალი იქნება, რომელსაც განახლება-რეაბილიტაცია ჩაუტარდება. აღნიშნული ტერიტორია მთლიანად იქნება მოწესრიგებული და განახლებული. დაახლოებით 4 მლნ დაიხარჯება ამ პროექტის განსახორციელებლად“,-განაცხადა კალაძემ.