საქართველოს დროშა ევროპული ქვეყნების დროშებს შეუერთდება – სალომე ზურაბიშვილი

26
spot_img

პრეზიდენტის სასახლეში სახელმწიფო დროშის დღისადმი მიძღვნილი ღონისძიება მიმდინარეობს.

იქ შეკრებილ საზოგადოებას პრეზიდენტმა სალომე ზურაბიშვილმა სიტყვით მიმართა. ათონელის რეზიდენციაში საქართველოს დროშა საზეიმოდ აღიმართა.

„სიამაყე, სიხარული, იმედი,  ეს არის ის განცდები, რომელი მე მეუფლება და ალბათ, თქვენც, როცა ვუყურებთ ამ დროშის შემოსვლას, აღმართვას. ეს დროშა ყველასთვის ძალიან ბევრს წარმოადგენს. პირველ რიგში, ეს სიმბოლო არის ჩვენი სახელმწიფოსი, მისი სუვერენობის, მისი დამოუკიდებლობის, იმის, რისთვისაც ჩვენი ბევრი წინაპარი ძალიან დიდხანს იბრძოდა, კვდებოდა იმისთვის, რომ ეს დროშა ჩვენთვის პატივსაცემად ყოფილიყო და ჩვენთვის ხვალინდელი დღის იმედს წარმოადგენდეს.

დროშა არის სიმბოლო ჩვენი ერთიანობის. ის, რაც საქართველო იყო და რაც იქნება. ჩვენი დროშა არის ჩვენი ძალის გამოხატულება და მინდა, რომ ეს ვუთხრა ახალგაზრდებს. ეს არ არის მხოლოდ ისეთი მატერიალური სიმბოლო. დროშა წარმოადგენს ყველაფერს, რაც საქართველოს შეადგენს. მისი ღირებულებები, მისი იდენტობა, მისი მრწამსი, მისი ბრძოლები წარსულში და მისი გამარჯვებები დღეს და ხვალ. ამიტომ, ჩვენ ყველას გვევალება დროშის პატივისცემა და ამავე დროს, უნდა ვგრძნობდეთ იმ პასუხისმგებლობას, რის გარეშეც ეს დროშა არაფერს ნიშნავს.

ყველანი ვართ ამაყი, როცა ვხედავთ, რომ საქართველო უკვე არის ევროკავშირის კანდიდატის სტატუსის მქონე ქვეყნის დროშა და ხვალ შეუერთდება ევროპული ქვეყნების დროშებს, რომ შეადგინოს ის ახალი, დიდი, ძლიერი ერთიანობა. ჩვენ ვიცით, რომ ჩვენი ჯარისკაცები ამ დროშის ქვეშ იცავენ ჩვენს ქვეყანას და დაიცავენ სადაც საჭირო იქნება მუდამ, ყოველთვის. სუვერენობის გარანტები იქნებიან ისინი და ამისთვის ჩვენი პატივისცემა და ჩვენი მადლიერება.

მინდა ახალგაზრდებს გითხრათ, ეს დროსა თქვენ გეკუთვნით, თქვენი დასაცავია. თქვენ ეს დროშა იქ უნდა მიიტანოთ, სადაც ამ ქვეყნის მომავალია. ეს დროშა მუდმივად იქნება მუდმივი საქართველოს სიმბოლო და მას გამარჯვებას ვუსურვებ“, – განაცხადა ზურაბიშვილმა.