რუსულმა ჯარმა ტაქტიკა დახვეწა – ისინი იყენებენ ნაღმებს, „კამიკაძე დრონებს“, არტილერიასა და ვერტმფრენებს, რათა უკრაინის კონტრიერიში შეანელონ.
ინფორმაციას დიდი ბრიტანეთის თავდაცვის სამინისტროს დაზვერვა ავრცელებს.
მათივე ინფორმაციით, ზოგიერთ რაიონში დანაღმული ტერიტორიის სიმჭიდროვე მიუთითებს იმაზე, რომ რუსეთმა, სავარაუდოდ, გამოიყენა იმაზე მეტი ნაღმი, ვიდრე მისი სამხედრო დოქტრინით არის გათვალისწინებული.
„ნაღმების საშუალებით უკრაინული ჯარის წინსვლის შენელებით, რუსული ჯარი ცდილობს, იერიში მიიტანოს უკრაინულ ჯავშანტექნიკაზე „კამიკაძე დრონების“, ვერტმფრენებისა და არტილერიის გამოყენებით“, – აღნიშნავენ ბრიტანულ დაზვერვაში.
მათივე ცნობით, ასეთმა ტაქტიკამ რუსულ ჯარს უკრაინული კონტრიერიშის ადრეულ ეტაპზე „გარკვეული წარმატება მოუტანა“, თუმცა რუსული მხარის მთავარი პრობლემა – საარტილერიო ჭურვების ნაკლებობა – ამ დრომდე არაა აღმოფხვრილი.
