რუსული ავიაკომპანიები მოსკოვიდან თბილისში, კვირაში 7 პირდაპირ რეისს განახორციელებენ. ამის შესახებ „რია ნოვოსტის“ რუსეთის ტრანსპორტის სამინისტროს პრეს-სამსახურმა განუცხადა.
როგორც რუსული მედია აღნიშნავს, ამჟამად, ავიაკომპანიები საქართველოსთან ფრენების აღსადგენად ემზადებიან.
რუსეთმა საქართველოს მოქალაქეებისთვის სავიზო რეჟიმი გააუქმა. შესაბამისი განკარგულება რუსეთის პრეზიდენტმა ვლადიმერ პუტინმა გამოსცა. პუტინის განკარგულების თანახმად, სავიზო რეჟიმი 15 მაისიდან გაუქმდება. ამასთან, ვლადიმერ პუტინმა რუსული ავიაკომპანიებისთვის საქართველოში ფრენებზე აკრძალვაც მოხსნა.
