,,როგორც ჩანს, ქალბატონი სალომე ძალიან მოწყენილია იმიტომ, რომ მას პრეზიდენტობის ვადა უმთავრდება”- პრემიერი

89
spot_img

როგორც ჩანს, ქალბატონი სალომე ძალიან მოწყენილია იმიტომ, რომ მას პრეზიდენტობის ვადა უმთავრდება და პოლიტიკაში დარჩენა უნდა, ყველაფერი უკავშირდება მის ამ სურვილს, – ამის შესახებ პრემიერ-მინისტრმა ირაკლი ღარიბაშვილმა განაცხადა.

„მისი აფილაცია, კოორდინაცია და შეთანხმებული მოქმედებები ოპოზიციასთანაც მხოლოდ ამას ადასტურებს. მე ზედმეტი კომენტარის გაკეთება აღარ მსურს, ჩვენ ძალიან ბევრი საქმე გვაქვს, მინდა ყველას წარმატება ვუსურვო“, – განაცხადა ირაკლი ღარიბაშვილმა.

ამასთან, პრემიერის განცხადებით, მმართველი გუნდი ქართველი ხალხის სახელით მოქმედებს და როდესაც ქვეყანა კანდიდატის სტატუსს მიიღებს, ეს იქნება ხელისუფლების დამსახურება ხალხთან ერთად.

„საერთოდ ძალიან უსუსურად გამოიყურება მთელი ეს ოპოზიცია. ისინი ამბობენ, რომ „თუ მიიღებს სტატუსს ქვეყანა…“ როგორც ჩანს, მათ იციან, რომ მართლაც რაღაც პოზიტიური დინამიკაა, რაღაც ხდება, პოზიტიური მოლოდინები არსებობს, და წინასწარ თავს იზღვევენ და ასეთი უსუსური გამართლება აქვთ, რომ კანდიდატის სტატუსი ხალხმა უნდა მიიღოს. უკაცრავად და ხალხის არჩეული მთავრობა ვართ ჩვენ, ხალხის დაკვეთაც ვასრულებთ ჩვენ, მთავრობა. ხალხის დაკვეთა იყო ის, როცა მე პირადად მქონდა ის ბედნიერება, რომ ხელი მოვაწერე ასოცირების შეთანხმებას, მივიღეთ უვიზო რეჟიმი, მოვაწერეთ ხელი თავისუფალ ვაჭრობას და ევროპული პერსპექტივა მივიღეთ, რომელზეც ვერ იოცნებებდა ვერც სალომე ზურაბიშვილი, ვერც ოპოზიცია და ვერც ვერავინ ქვეყანაში, ეს ყველაფერი გააკეთა „ქართულმა ოცნებამ“, ჩვენმა ხელისუფლებამ. სტატუსს როცა მიიღებს ქვეყანა, რა თქმა უნდა, ეს იქნება ჩვენი ხელისუფლების დამსახურება, ხალხთან ერთად, ვიანიდან ჩვენ ვმოქმედებთ ქართველი ხალხის სახელით და ქართველი ხალხისთვის“, – განაცხადა ირაკლი ღარიბაშვილმა.