ბოდბელმა მთავარეპისკოპოსმა, იაკობმა გადაცემაში „იმედი LIVE“ განაცხადა, რომ 17 მაისის, ოჯახის სიწმინდის დღის აღნიშვნამ საქართველო გააერთიანა.
„ვნახეთ, ხალხი როგორ გაერთიანდა. ანუ, ხალხი ვართ ერთად. ჩვენ ახლა ამას ყველაფერს ვუყურებთ, ვუფრთხილდებით ახალგაზრდებს. ლანბერგისმა, თუ ვინც იქნება, თავის სახელმწიფოს მიხედოს. ჩვენი სახელმწიფოა და არავის მივცემთ უფლებას, მაიდანი გაიმეოროს“, – დასძინა მეუფე იაკობმა.
მისივე თქმით, ყველამ ერთ ქვეყანაში უნდა ვიცხოვროთ და ძლიერი სახელმწიფო უნდა შევქმნათ.
„შევქმნით იმით, თუ ერთად ვიქნებით და არა იმით, თუ უცხოელები რაღაცას გვეტყვიან. კი, მათ უნდა მოვუსმინოთ. პირველ რიგში, აუცილებელია, ამერიკელებთან კონტაქტი და შემდეგ ევროპელებთან“, – განაცხადა მთავარეპისკოპოსმა.
მაღალი იერარქიის სასულიერო პირი ასევე, გერმანიის ბუნდესტაგის საგარეო ურთიერთობათა კომიტეტის თავმჯდომარის, მიხაელ როთის ეკლესიაზე გაკეთებულ განცხადებასაც გამოეხმაურა.
„რომ მოდის საქართველოში, თავად რა დამსახურებები აქვს?! 80 წლის წინანდელი გერმანია რომ შევახსენო, ჩემგან ლამაზი ხომ არ იქნება?! დღევანდელ ჩემს საქართველოს, მართლმადიდებლობას, ახალგაზრდობას თავი გაანებოს. ახალგაზრდობა და ჩვენ ერთად ვიქნებით იმ ნათელ მომავალში, რომელიც მოსატანია თითოეული ქართველისთვის“, – აღნიშნა მეუფე იაკობმა.
