NDI-ის კვლევაში 86 პროცენტი რომ სატელეფონო გამოკითხვის დროს არ ამბობს, ვის აძლევს ხმას და რა პოლიტიკური განწყობები აქვს, ეს არის ნორმალური ისეთ ქვეყანაში, სადაც მამაოებსაც, პედაგოგებსაც უსმენენ, – ამის შესახებ „ერთიანი ნაციონალური მოძრაობის“ თავმჯდომარემ, ლევან ხაბეიშვილმა განაცხადა.
მისივე თქმით, ყველა კვლევა ადასტურებს, რომ „რუსულ ოცნებას“ საქართველოში ყოველდღიური კლება აქვს.
„IRI-ის კვლევა, რომელიც იგივე თვის არის, ამბობს, რომ 74-მა პროცენტმა უპასუხა, აქ მხოლოდ 14-მა პროცენტმა უპასუხა და 86 პროცენტი რომ არ ამბობს, სატელეფონო გამოკითხვის დროს ვის აძლევს ხმას, რა პოლიტიკური განწყობები აქვს, ეს არის ნორმალური ისეთ ქვეყანაში, სადაც მამაოებსაც, პედაგოგებსაც უსმენენ. ამასობაში ეს კვლევა, რომ აღვიქვათ, მაგალითად IRI-ის კვლევით, სადაც „მთავარ არხს“ 14 პროცენტი ენდობოდა, 11 პროცენტი ენდობოდა „ტვ პირველს“, ამ კვლევით არის, რომ 8 პროცენტი ენდობა „მთავარ არხს“ და 3 პროცენტი ენდობა „ტვ პირველს“ და ესეც მხოლოდ იმიტომ, რომ 14 პროცენტი არის გამოკითხულო და 86 პროცენტმა ბოლომდე ინტერვიუზე უარი განაცხადა.
რაც შეეხება პრობლემებს ოპოზიციაში, ცხადია, ჩვენ მეტი მუშაობა გვმართებს, მაგრამ ყველა კვლევა ადასტურებს იმას, რომ „რუსულ ოცნებას“ საქართველოში ყოველდღიური კლება აქვს ე.წ რეიტინგში, მე კი საერთოდ მგონია, რომ მათ რეიტინგი საერთოდ არ აქვთ, ეს არის ადმინისტრაციული რესურსი და დაშინებული ადამიანები, რომლებიც მათ შორის ტელეფონზე პირდაპირ ამბობენ, რომ „ქართულ ოცნებას“ უჭერენ მხარს და ესეც მხოლოდ 20 პროცენტი ყველა გამოკითხვით. ამიტომ, დიდი უმრავლესობაა, რაზეც მუშაობა შეიძლება და დარწმუნებული ვარ პროდასავლური პარტიები ამ მიმართულებით იმუშავებენ. ცხადია, „ნაციონალური მოძრაობა“ აქტიურ მუშაობას გააგრძელებს და დარწმუნებული ვარ, რომ „რუსული ოცნება“ არის დასრულებული. ერთადერთი, რაც ამას სჭირდება – ძალა ერთობაშია და უნდა გავიგოთ, რომ ამ ქვეყნის მტერი არის ბიძინა ივანიშვილი, რომელიც საქართველოს რუსეთში მიაქანებს,“ – განაცხადა ლევან ხაბეიშვილმა.
