“ქალბატონო ანა, დაანებეთ მასწავლებლობას თავი” – ბექა ოდიშარია ანა ნაცვლიშვილს

17
spot_img

ქალბატონო ანა, დაანებეთ ამ მასწავლებლობას თავი რა, სანამ ჩვენ ზრდილობაზე დაიწყებთ რამე აზრების გამოთქმას, თქვენს ზრდილობას მიხედეთ რა! – ქალი ხართ და არ გეკადრებათ, გაუფრთხილდით მანდილის ღირსებას რა! – ამ განცხადებით „ქართული ოცნების“ დეპუტატმა ბექა ოდიშარიამ პარლამენტის პლენარულ სხდომაზე ოპოზიციონერ კოლეგას ანა ნაცვლიშვილს მიმართა.

ანა ნაცვლიშვილმა სესიაზე ხმაური გააპროტესტა, რასაც ვიცე-სპიკერის ნინო წილოსანის საკანონმდებლო ინიციატივის განხილვის დროს ჰქონდა ადგილი და სხდომის წამყვანს შალვა პაპუაშვილს სთხოვა უმრავლესობის წევრებს მომხსენებლისთვის მოესმინათ.

„ბატონო შალვა, სხდომათა დარბაზში საშინელი ხმაურია. იქნებ თქვენივე უმრავლესობის წევრებს მაინც მოუწოდოთ, რომ გუნდის წევრსა და ვიცე-სპიკერს პატივი სცენ, როდესაც ის ტრიბუნასთან დგას და მოუსმინონ“, – მიმართა პაპუაშვილს ანა ნაცვლიშვილმა.

პაპუაშვილმა დაადასტურა, რომ სხდომათა დარბაზში ხმაური მართლაც იყო და კოლეგებს გამომსვლელისთვის მოსმენისაკენ მოუწოდა. პაპუაშვილის მოწოდებას ბექა ოდიშარიას განცხადება მოჰყვა.

„გუშინ ვერ მოვასწარი და ქალბატონო ანა, დაანებეთ ამ მასწავლებლობას თავი რა! სხვათა შორის, სანამ ჩვენ ზრდილობაზე დაიწყებთ რაიმე აზრების გამოთქმას, თქვენს ზრდილობას მიხედეთ რა – უსმინეთ თქვენს გამოსვლებს ტრიბუნიდან როგორ, რა ლექსიკით ესაუბრებით კოლეგებს ან პოლიტიკურ „ისტებლიშმენტზე“ როგორ საუბრობთ რა! ქალი ხართ და არ გეკადრებათ – ცოტა გაუფრთხილდით მანდილის ღირსებას რა!“ – მიმართა ბექა ოდიშარიამ ანა ნაცვლიშვილს.