დასავლელი ლიდერები არ უნდა შეშინდნენ ბირთვული ესკალაციის შესახებ კრემლის მუქარებით, – ამის შესახებ აშშ-ის ცენტრალური სადაზვერვო სააგენტოს (CIA) დირექტორმა, უილიამ ბერნსმა განაცხადა.
„პუტინი მოძალადეა. ის დროდადრო გააგრძელებს იარაღის ჟღარუნს. ჩვენ არ გვაქვს უფლება, ამ იარაღის ჟღარუნმა შეგვაშინოს. უნდა გვახსოვდეს ეს. შეერთებულმა შტატებმა უზარმაზარი მხარდაჭერა გაუწია უკრაინას და დარწმუნებული ვარ, პრეზიდენტი განიხილავს სხვა გზებს, რომლითაც ჩვენ შეგვიძლია მათი მხარდაჭერა“, – აღნიშნა უილიამ ბერნსმა.
შეკითხვაზე, ღელავენ თუ არა ვაშინგტონსა და სხვა დასავლურ დედაქალაქებში იმის გამო, რომ უკრაინისთვის Storm Shadow-ს რაკეტების რუსეთის ტერიტორიაზე გამოოყენების ნებართვის მიცემამ, შესაძლოა, ომის ესკალაცია გამოიწვიოს, უილიამ ბერნსმა უპასუხა: „არც ერთმა ჩვენგანმა არ უნდა მიიღოს ესკალაციის რისკი მსუბუქად“ და დასძინა, რომ ომის პირველი წლის განმავლობაში ცენტრალურ სადაზვერვო სააგენტოში რეალურად არსებობდა აზრი, რომ რუსეთს, უკრაინის ბრძოლის ველზე, შესაძლოა, ტაქტიკური ბირთვული იარაღი გამოეყენებინა.
„იყო მომენტი 2022 წლის შემოდგომაზე, როდესაც ვფიქრობ, რომ არსებობდა ტაქტიკური ბირთვული იარაღის პოტენციური გამოყენების რეალური რისკი“, – განაცხადა ბერნსმა და დასძინა, რომ მისი აზრით, ასეთი შეშფოთება ძალიან სერიოზულად არ უნდა იქნას მიღებული.
„არასდროს მიფიქრია, რომ ჩვენ ამით ზედმეტად უნდა დავშინდეთ“, – აღნიშნა აშშ-ის ცენტრალური სადაზვერვო სააგენტოს (CIA) დირექტორმა.
