ბრიტანული გაზეთი „დეილი ტელეგრაფი“ (The Daily Telegraph) აქვეყნებს სარედაქციო სტატია-კომენტარს სათაურით “პუტინი ახლა უფრო ძლიერად გამოიყურება, ვიდრე ოდესმე”, რომელშიც რუსეთში ჩატარებული საპრეზიდენტო არჩევნების შეფასებაა მოცემული.
„საარჩევნო თვალთმაქცობა მთელმა მსოფლიომ დაინახა. დასავლეთმა ყველაფერი უნდა იღონოს, რომ კრემლს არჩევნებში ტრიუმფი სამხედრო კატასტროფად უნდა შეუბრუნდეს“, – ნათქვამია მასალაში.
გთავაზობთ პუბლიკაციას მცირე შემოკლებით:
სრულიად მოსალოდნელი და კანონზომიერი იყო, რომ ერთ-ერთი პირველი მსოფლიო ლიდერი, რომელიც ვლადიმერ პუტინს საპრეზიდენტო არჩევნებში „მოპოვებულ დიდ გამარჯვებას“ მიულოცავდა, ჩინეთის სახალხო რესპუბლიკის თავმჯდომარე სი ძინპინი იქნებოდა – დემოკრატიის „პიონერი“, რომლის ხელმძღვანელობით ჩინეთის კომუნისტური პარტია თავს არ იწუხებს საერთო-ეროვნული არჩევნები ჩაატაროს, თანაც ყალბი ოპონენტების მონაწილეობით.
ვლადიმერ პუტინი, რომელიც დემოკრატიული არჩევნებით მანიპულირებას ცდილობს, როგორც ჩანს, დარწმუნებულია, რომ მან საკუთარ თავს და თავის რეჟიმს ლეგიტიმურობა მიანიჭა, მაგრამ მთელი მსოფლიო ხედავს, თუ როგორი თვალთმაქცობაა რუსეთში ჩატარებული ე.წ. არჩევნები: კრემლმა გამოაცხადა მოქმედი პრეზიდენტის დამაჯერებელი გამარჯვება, რომელსაც კიდევ ექვსი წელი აქვს გარანტირებული ქვეყნის მეთაურის პოსტი, რომლის ვადის გასვლის შემდეგ ვლადიმერ პუტინს 77 წელი შეუსრულდება, ანუ იგი იქნება რუსეთის ყველაზე ხანგრძლივი მმართველი იმპერატორ ეკატერინე II-ის შემდეგ.
ვლადიმერ პუტინმა, წინასწარი ოფიციალური მონაცემებით, ხმების თითქმის 90% მოაგროვა, ამომრჩეველთა 78%-იანი მონაწილეობით. უეჭველია, ბევრმა რუსმა გულწრფელად მისცა ხმა პრეზიდენტს: იმიტომ, რომ კრემლის პროპაგანდის სჯერათ – დასავლეთი რუსეთს ავიწროებს, მათი ლიდერი კი ძლიერი ადამიანია, ანუ ისეთი, რომელიც გაბედულია და ნატოს დაუპირისპირდება.
ვლადიმერ პუტინს არ ჰყავდა სერიოზული ოპონენტები: მისი მთავარი მოწინააღმდეგე ალექსი ნავალნი არქტიკულ ზონაში მდებარე კოლონიაში (ყოფილ სამხედრო ტყვეთა ბანაკში) მოკვდა, ხოლო კიდევ ორ კანდიდატს არჩევნებში ბალოტირება აეკრძალა ი მიზეზით, რომ მათ უკრაინაში რუსეთის შეჭრა გააკრიტიკეს.
რუსული დამოუკიდებელი ჯგუფის „გოლოსის“ განცხადებით, რომელიც არჩევნების მონიტორინგს აწარმოებდა, ეს იყო ყველაზე თაღლითური და ყველაზე კორუმპირებული არჩევნები რუსეთის ისტორიაში.
არჩევნები და მისი შედეგები არ შეიძლება ჩაითვალოს ლეგიტიმურად, რამდენადაც საარჩევნო კამპანია მიმდინარეობდა რუსეთი კონსტიტუციის დარღვევით, რომლითაც გარანტირებულია ადამიანის პოლიტიკური თავისუფლებები“.
თუმცა ეს ძალიან აკადემიურად ჟღერს. სხვა სიტყვებით რომ ვთქვათ, ვლადიმერ პუტინი არასოდეს არ ამბობდა ხელისუფლებაზე უარს და ის ყალბი სახალხო ავტორიტეტი, რომელიც მან ასევე გაყალბებული არჩევნებით მიიღო, განსაკუთრებით ცუდი ახალი ამბავია უკრაინელი ხალხისათვის. მიუხედავად რიგი რუსი ამომრჩევლების გაბედულებისა, რომლებიც საარჩევნო ურნებთან ვლადიმერ პუტინის წინააღმდეგ გამოვიდნენ, კრემლი არჩევნების შედეგებს სამხედრო მოქმედებების გასააქტიურებლად გამოიყენებს და შეეცდება უკრაინის ტერიტორიის ოკუპაცია გააფართოოს.
ორ წელზე მეტი გავიდა მას შემდეგ, როცა იყო ვარაუდები, რომ უკრაინაში შეჭრის შემდეგ რამდენიმე დღეში რუსები კიევის კაფეებში იზეიმებდნენ გამარჯვებას, ასევე იმედოვნებდნენ, რომ უკრაინაში რუსული ბლიცკრიგის ჩაშლა ვლადიმერ პუტინის რეჟიმის სწრაფ დამხობას გამოიწვევდა… მაგრამ მრავალრიცხოვანი მსხვერპლის მიუხედავად, ვლადიმერ პუტინი ისევ კრემლში ზის და უფრო ძლიერად გამოიყურება, ვიდრე ოდესმე.
ამ პაროდიაზე საუკეთესო პასუხი ასეთი უნდა იყოს: ნატომ [და დასავლეთმა] უფრო მეტად უნდა დაუჭიროს მხარი უკრაინას, უფრო მეტი ფული და იარაღი უნდა მიაწოდოს, რომელიც აუცილებელია ვლადიმერ პუტინის „გამარჯვების“ გასანეიტრალებლად – კრემლს ტრიუმფი სამხედრო კატასტროფად უნდა შეუბრუნდეს.
