უმაღლესი განათლების დასაფინანსებლად 2250 ლარი 2010 წელს დაწესდა. ამის მერე მოხდა ინფლაცია, გაუფასურება, ლარის კურსი დაეცა, გეკითხებით, ეს ციფრი არ უნდა შეიცვალოს? პროფესორის ხელფასი რომ არ იზრდება და დაახლოებით 1000 ლარია, როგორ უნდა მისცეს მან ნორმალური განათლება ახალგაზრდა სტუდენტს? – ასე მიმართა „სტრატეგია აღმაშენებლის“ ლიდერმა გიორგი ვაშაძემ პარლამენტში, ფრაქცია „ნაციონალური მოძრაობის“ სხდომაზე ფინანსთა მინისტრის მოადგილის, გიორგი კაკაურიძეს, რომელიც 2024 წლის ბიუჯეტის პირველად ვერსიას წარადგენს.
მისივე თქმით, სტატუსშეჩერებული სტუდენტებისთვის ჩამოწერილი თანხები, ისევ უნივერსიტეტებსა და პროფესორ-მასწავლებლებს დააკლდათ.
„უმაღლესი განათლების დასაფინანსებლად 2250 ლარი 2010 წელს დაწესდა. ამის მერე მოხდა ინფლაცია, გაუფასურება, ლარის კურსი დაეცა, გეკითხებით, ეს ციფრი არ უნდა შეიცვალოს? პროფესორის ხელფასი რომ არ იზრდება და დაახლოებით 1000 ლარია, როგორ უნდა მისცეს მან ნორმალური განათლება ახალგაზრდა სტუდენტს? პროფესორ- მასწავლებელმა რა დაგიშავათ ასეთი, რომ სამჯერ კი არ ვითხოვთ ზრდას, 10% -ითაც არ გაიზარდა მათი ხელფასი?! გეკითხებით, რატომ არ გადაიხედა? განათლება თუ არ არის ქვეყნის პრიორიტეტი, ის ქვეყანა წინ ვერ წავა. 2250 ლარიან გრანტს ერთი კაპიკითაც რომ არ ზრდით, არ არის ეს უსამართლო? საიდან ფული? ქამრები შემოიჭირეთ და ფული საკმარისზე მეტია! როცა ეს არ გაინტერესებთ, პროფესორი დილის 9 – დან საღამოს 9- მდე ლექციებს რომ კითხულობს, მშიერი არ მოკვდეს და როდის განვითარდეს? როდის მოემზადოს? როდის მისცეს უკეთესი ცოდნა ახალგაზრდას? და ამით ისევ ახალგაზრდა ზარალდება. ახლა მეორე საკითხი- სტატუსშეჩერებული სტუდენტების საკითხზე დაიბარეთ უნივერსიტეტები, “დააკაჩავეთ” და უთხარით, რომ ეს ვალები ჩამოაწერონ სტუდენტებს და 20% – ს გადმოგიგდებთო. მე კითხვა მაქვს ვის დააკლდა ეს ფული? უმაღლეს სასწავლებლებს! თქვენ რაიმე დაიკელით? საბოლოოდ პროფესორ- მასწავლებლებსა და მათ ხელფასს დააკლდა, ინფრასტრუქტურას დააკლდა, ასე არ არის?! სტუდენტს დააკლდა იმიტომ, რომ წარსულის ვალი ჩამოაწერინეთ, მაგრამ მომავლის, 1 წლის ფული მაინც გადაგეხადათ, რომ სტუდენტებს სწავლა გაეგრძელებინათ, რამდენმა გააგრძელა სწავლა? თითქმის, არცერთმა. ამით დაზარალდა, უნივერსიტეტი, პროფესორ- მასწავლებელი, სტუდენტი და მოგებული დარჩა ღარიბაშვილი. რატომ? იმიტომ, რომ ისევ ჩარტერით უნდა გაფრინდეს, ეს არის უსამართლობა“, – განაცხადა გიორგი ვაშაძემ.
რაც შეეხება საწვავის ფასს, როგორც ვაშაძემ ფრაქციის სხდომაზე აღნიშნა, საწვავის ფასის შესამცირებლად, საჭიროა სახელმწიფომ აქციზის გადასახადზე უარი თქვას.
„საწვავის ფასი კატასტროფულად ზრდის განმაპირობებელი ის, რომ რუსეთს გამოგვაბით ჭიპლარით. საწვავის ზრდა ახდენს ყველაზე ზეგავლენას, საზოგადოებრივ ტრანსპორტზე, დისტრიბუციაზე, სოფელში მცხოვრებმა რომ დაამუშაოს მიწა, იქაც საწვავის ფასი ახდენს გავლენას. ბიუჯეტში შემოდის თანხა აქციზის სახით. ამდენით რომ იზრდება ბიუჯეტი, ხომ შეიძლება ერთხელ მაინც თქვათ, ვზრუნავთ ყველაზე თანაბრად, 523 მილიონზე ვიტყვით უარს და დაახლოებით 50 თეთრით შევამციროთ საწვავის ფასი?! ეს ფასების ზრდას შეანელებს და ყველა მოქალაქეზე აისახება, საზოგადოებრივ ტრანსპორტზე, პროდუქტის ფასზე, სოფელში მცხოვრებზე, ყველაზე აისახება. აი, იმპორტიორებიც ამბობენ, რომ საწვავის ფასი როცა არის მაღალი, ფასს ვზრდით მყისიერადო. ამდენი ფული გაქვთ, თქვი უარი ამაზე, რაღაცა ნაბიჯი გადადგით ხალხისკენ. როცა ამბობთ, რომ ეკონომიკა იზრდება და ხალხს ეს არ ემჩნევა, ასე აღარ იქნება, იმიტომ, რომ მზარდი ეკონომიკა მოქალაქეებზე გადანაწილდება- ჩემზე, თქვენზე, დასაქმებულზე, უმუშევარზე, მანქანის მფლობელზე, ყველაზე თანაბრად აისახება. გეკითხებით, რატომ ამბობთ უარს, რომ აქციზი საწვავზე გაუქმდეს და დაუბრუნდეს ეს ხალხს? ახლა თუ მეტყვით რომ პოპულიზმიაო, პოპულიზმი არის ტყუილი დაპირებები, როცა კალაძე გამოვიდა და თქვა, რომ ქუთაისში ელექტრომანქანების საწარმოს ავაშენებთო, სად არის ეს საწარმო? ან როცა ღარიბაშვილი გამოვიდა და თქვა, რომ როჩილდებთან ერთად ჰაბი გავხდებითო. ფული გადავუხადეთ მათ, მაგრამ არაფერი მათი მოტანილი არ გვინახავს. 5 მილიონი ყველა სოფელს, უფასო ფული, ეგ არის ტყუილი! ეს არის პოპულიზმი! მე რასაც გეუბნებით, ეს არის ციფრებით გამყარებული“, – განაცხადა გიორგი ვაშაძემ.
