“პრიგოჟინი, ბუზალაძე და „პატრიოტიზმი“ ქართულად!”- ზაურ ნაჭყებია

269
spot_img
“საქართველოს პრეზიდენტად წოდებული ზურაბიშვილი საჩქაროდ ლარსის გამშვები პუნქტის ჩაკეტვას და უშიშროების საბჭოს მოწვევას ითხოვდა. დაახლოებით იგივე ინიციატივით გამოვიდა ექსპრემიერი, პოლიტიკურად გაძარცვული გიორგი გახარია.” – წერს  სოციალურ ქსელში ჟურნალისტი და პუბლიცისტი, ზაურ ნაჭყებია.
“პრიგოჟინი, ბუზალაძე და „პატრიოტიზმი“ ქართულად!
სალომე ზურაბიშვილის გადაწყვეტილებით მიღებული შოკი არ მოგვინელებია (მსგავსი `შოკები` მისგან მომავალშიც გამორიცხული არ არის!), პრიგოჟინის „ამბოხმა“ და კრემლისკენ გეზის აღებამ უფრო მეტად დაგვშოკა:
მიუხედავად იმისა, დასავლეთი შედარებით მშვიდად (ფრთხილად)ადევნებდა თვალყურს რუსეთში დაწყებულ „რევოლუციურ პროცესებს“. ქართველმა ლიბერასტებმა და თითქმის მათთან გათანაბრებულმა ექსპერტ-პოლიტოლოგებმა სიხარულისგან ლამის ვენები გადაიჭრეს – ისეთი კაკაფონია გამართეს, ლამის საათები გვაშორებდა კრემლის დამხობას, რომელსაც, მათი აზრით, რუსეთის დაშლა უნდა მოჰყოლოდა.
ზოგიერთები უფრო შორსაც წავიდნენ და ხელისუფლებას მოუწოდებდნენ, გამოეყენებინა ეს შანსი საქართველოს ტერიტორიული მთლიანობის აღსადგენად!
საქართველოს პრეზიდენტად წოდებული ზურაბიშვილი საჩქაროდ ლარსის გამშვები პუნქტის ჩაკეტვას და უშიშროების საბჭოს მოწვევას ითხოვდა. დაახლოებით იგივე ინიციატივით გამოვიდა ექსპრემიერი, პოლიტიკურად გაძარცვული გიორგი გახარია.
ტვინამღვრეულ თანამოქალაქეთა „ხბოს აღტაცებას“ ვინ ჩივის, ისეთ პროგნოზებს დებდნენ ქართველი ე.წ. პოლიტოლოგები და სამხედრო ექსპერტები. ბევრს მეორე დღეს სოციალური ქსელიდან თავიანთი სტატიებისა და სტატუსების აღებამ მოუწია, ზოგიერთმა ბოდიშიც კი მოიხადა არასწორი პროგნოზების გამო.
განსაკუთრებით გამოირჩეოდა გია ხუხაშვილის ფეისბუქსტატუსი, რომელმაც „უტყუარად“ აღწერა, თუ რა შედეგით დამთავრდებოდა პრიგოჟინის „ამბოხება“ და როგორ განვითარდებოდა რუსეთში მოვლენები- რა გავლენას მოახდენდა ეს პროცესები დანარჩენ მსოფლიოზე და საქართველოზე.
არ ვდებ თავს დიდ პროგნოზისტობაზე, მაგრამ, როცა პრიგოჟინი მოსკოვს უახლოვდებოდა და მედიასაშუალებები პუტინის გაუჩინარებასაც ახმოვანებდნენ, გავბედე და დავდე პატარა ფეისბუქსტატუსი, სადაც გარკვევით ვწერდი, რომ შესაძლოა ეს „ამბოხება“ შეთანხმებული ყოფილიყო თავად პუტინთან და რაღაც სხვა მიზანს ემსახურებოდა.
ასეც რომ არა, გადაჭრით ვამბობდი, რომ რუსეთში არანაირი სამხედრო გადატრიალება არ იყო მოსალოდნელი, რადგან ხელისუფლებას გააჩნდა სათანადო ბერკეტი „ამბოხებულთა“ 25 ათასიანი ჯგუფის გასანეიტრალებლად.
საბოლოოდ დადგინდა, რომ ეს ყველაფერი იყო ფარსი და კონკრეტულ მიზანს ემსახურებოდა. სამწუხაროდ, ბევრი ჩვენი თანამოქალაქე, რომელიც რუსეთის დაშლას წინასწარ ზეიმობდა, პირში ჩალაგამოვლებული აღმოჩნდა. ასე იცის ხოლმე „ხბოს აღტაცებამ“ და სურვილის რეალობად წარმოჩენამ.
უახლოესი დღეები გვიჩვენებს, რა მიზნით დაიდგა ეს სპექტაკლი და რა ცვლილებებია მოსალოდნელი რუსეთ-უკრაინის ფრონტზე, რა „ჩისტკას“ განახორციელებს, „გასაქცევად გამზადებული პუტინი“ რუსეთის სამხედრო და ფინანსურ ელიტაში.
რუსეთზე ვსაუბრობთ და ბარემ აქვე ვიტყვი: სამწუხაროდ, ტვინგამორეცხილთა და ერთუჯრედიანთა არმია დღითიდღე მატულობს საქართველოში. ამის დასტურია ქართველი ახალგაზრდა მომღერლის, ნუცა ბუზალაძისადმი მათი ყოველგვარ საღ აზრს მოკლებული დამოკიდებულება- როგორ გაბედა მომღერალმა მოსკოვში ჩასვლა და მეგობრის დაბადების დღეზე იმღერა?! – ამაზე დიდი დაცემა ვერ წარმომიდგენია.
სად ხელოვნება და სად ბინძური პოლიტიკა?!
ასეთი აკვიატებული ზიზღითა და მოწამლული მენტალობით, საერთოდ გავედით ასტრალიდან და მეშინია დავუბრუნდებით თუ არა ბუნებრივ მდგომარეობას.
ეს არ არის ადვილად გასატარებელი – ეს სასჯელია!”- წერს სოციალურ ქსელში  ზაურ ნაჭყებია.