„ჩვენ წითელი ხაზი გადავკვეთეთ სლოვაკეთში. პოლიტიკურ სიძულვილს ან პოლიტიკასთან დაკავშირებულ უთანხმოებას შედეგად მოჰყვა მკვლელობის მცდელობა- ამის შესახებ სლოვაკეთის ახალარჩეულმა პრეზიდენტმა, პიტერ პელეგრინიმ საავადმყოფოში დაჭრილი პრემიერ-მინისტრის რობერტ ფიცოს მონახულების შემდგე განაცხადა.
როგორც სლოვაკური მედია წერს, საავადმყოფოდან გამოსვლისას პელეგრინიმ თქვა, რომ ფიცოს მდგომარეობა ჯერ კიდევ სერიოზულია.
პრეზიდენტმა მოქალაქეებს მოუწოდა, უარყონ ძალადობა და სიძულვილის ენა. მან ასევე მოუწოდა საზოგადოებას თანამშრომლობისა და ურთიერთგაგებისკენ, რათა არ მოხდეს დაძაბულობის ესკალაცია.
„ჩვენ წითელი ხაზი გადავკვეთეთ სლოვაკეთში. პოლიტიკურ სიძულვილს ან პოლიტიკასთან დაკავშირებულ უთანხმოებას შედეგად მოჰყვა მკვლელობის მცდელობა. პრემიერ-მინისტრი ძლივს გადაურჩა სიკვდილს. საკმარისი იყო, ტყვიები რამდენიმე სანტიმეტრით სხვა ადგილას მოხვედრილიყო, დღეს ჩვენ სულ სხვა რამეზე ვისაუბრებდით“, – განაცხადა პელეგრინიმ.
როგორც მედია წერს, ახალარჩეულმა პრეზიდენტმა პოლიტიკურ ბანაკებს შორის შეტაკების თავიდან ასაცილებლად, საზოგადოებას სიმშვიდისკენ და გაყოფილი სლოვაკეთის გაერთიანების დაწყებისკენ მოუწოდა.
შეგახსენებთ, სლოვაკეთის პრემიერ-მინისტრს, რობერტ ფიცოს მთავრობის სხდომის შემდეგ ქუჩაში ცეცხლსასროლი იარაღიდან ესროლეს. მთავრობის სხდომა ბრატისლავადან 180 კილომეტრში მდებარე ქალაქ ჰანდლოვას კულტურის სახლში იმართებოდა. თავდამსხმელი პოლიციამ ადგილზევე დააკავა.
