“პარტნიორები კარგად ხედავენ, რომ ქვეყანას მართავენ ძალოვანი უწყებები” – იაგო ხვიჩია

223
spot_img

პარტნიორმა ქვეყანამ დაასანქცირა მოსამართლეები და ყოფილი გენპროკურორი, რაც იმას ნიშნავს, რომ პარტნიორები კარგად ხედავენ, ქვეყანას დემოკრატიული პროცესის ნაცვლად, ძალოვანი უწყებები მართავენ, – ამის შესახებ „გირჩის“ წევრმა, იაგო ხვიჩიამ განაცხადა.

მისი თქმით, ოთარ ფარცხალაძის დასანქცირება იმ პროცესის ნაწილია, რომელიც მოსამართლეების სანქცირებით დაიწყო.

„ანუ, პარტნიორმა ქვეყანამ დაასანქცირა მოსამართლეები და ყოფილი გენპროკურორი, რაც იმას ნიშნავს, რომ პარტნიორები კარგად ხედავენ, თუ რა უწყებებით იმართება ჩვენი ქვეყანა და ქვეყანას დემოკრატიული პროცესის ნაცვლად, ძალოვანი უწყებები მართავენ. ამიტომ, ამერიკამ ძალოვანი უწყებებისა და სასამართლო სისტემის თანამდებობის პირების დასანქცირება დაიწყო. ეს პროცესი სანამდე მივა, არავინ იცის. ხელისუფლების არგუმენტი, რომ ეს კაცი 11 წელია, ჩვენთან არ არის, ცოტა ხანში გაბათილდება, რადგან დაინახავენ, რა პირობებში ხდება სანქციების დაწესება“, – განაცხადა იაგო ხვიჩიამ.

აშშ რუსეთის მიერ უკრაინაში უკანონო ომის წარმოებასთან დაკავშირებით, 150-ზე მეტ ფიზიკურ და იურიდიულ პირს სანქციებს უწესებს. სანქცირებულ პირთა შორის არის საქართველოს ყოფილი მთავარი პროკურორი ოთარ ფარცხალაძე.