გვახსოვს ტრამპთან, ფიცოსთან დაკავშირებული მკვლელობის მცდელობა. დღეს ვინც იცავს მშვიდობას, ტრადიციებსა და ოჯახურ ღირებულებებს, მას პირდაპირი გაგებით, თავს ესხმიან. ბიძინა ივანიშვილი საქართველოში არის ნომერ პირველი მშვიდობის, ოჯახური ღირებულებების და სუვერენიტეტის შენარჩუნების გარანტი და თავისთავად ცხადია, ის იქნება ნომერ პირველი სამიზნე საქართველოში, – განაცხადა პარტია „ხალხის ძალის“ აღმასრულებელმა მდივანმა გურამ მაჭარაშვილმა.

დეპუტატი „ქართული ოცნების“ საპატიო თავმჯდომარის გაძლიერებული უსაფრთხოების თემით სპეკულაციას გამოეხმაურა.

„ჩვენ გვახსოვს ტრამპთან, ფიცოსთან დაკავშირებული მკვლელობის მცდელობა. დღეს ვინც იცავს მშვიდობას, ტრადიციებსა და ოჯახურ ღირებულებებს, მას პირდაპირი გაგებით, თავს ესხმიან. დღევანდელი მოცემულობით, ლიბერალური ფაშიზმი განსხვავებულ მოსაზრებას კლავს. ეს ჩვენ ვნახეთ სლოვაკეთის პრემიერის მკვლელობის მცდელობის დროს, ლიბერალმა ადამიანმა პირდაპირ თქვა, რომ ვესროლე პრემიერს, რადგან ჰქონდა განსხვავებული პოლიტიკური შეხედულებაო. ბიძინა ივანიშვილი საქართველოში არის ნომერ პირველი მშვიდობის, ოჯახური ღირებულებების და სუვერენიტეტის შენარჩუნების გარანტი და თავისთავად ცხადია, ის იქნება ნომერ პირველი სამიზნე საქართველოში, ამიტომ უსაფრთხოების წესები უნდა იყოს დაცული“, – აღნიშნა მაჭარაშვილმა.

დღეს არის 42-ე დღე, რაც მოწმენი ვართ იმისა, როგორ მიატოვა „ქართული ოცნების“ ხელისუფლებამ გაფიცული ადამიანები – კომპანია „ევოლუშენის“ თანამშრომლები, რომლებიც საკუთარი შრომითი უფლებებისთვის იბრძვიან, – ამის შესახებ „ძლიერი საქართველოს“ ერთ-ერთმა ლიდერმა, ანა ნაცვლიშვილმა ბრიფინგზე განაცხადა.

მისი თქმით, ამ საკითხთან დაკავშირებით 2 აგვისტოდან დღემდე შრომის ინსპექციამ პასუხიც კი ვერ მოამზადა და წარმოადგინა – რას აკეთებენ, რა გააკეთეს და როგორ აპირებენ შეასრულონ ის ვალდებულებები, რომელიც მათ კანონმა დააკისრა.

„დღეს არის 42-ე დღე, რაც მოწმენი ვართ იმისა, როგორ მიატოვა „ქართული ოცნების“ ხელისუფლებამ გაფიცული ადამიანები – კომპანია „ევოლუშენის“ თანამშრომლები, რომლებიც საკუთარი შრომითი უფლებებისთვის იბრძვიან. მოწმენი ვართ, როგორი დაუცველი და მიტოვებული არიან ადამიანები. 42 დღეა მიმდინარეობს მათი უწყვეტი პროტესტი და მათ მოუწიათ, უკიდურესი ზომებისთვისაც მიემართათ – შიმშილობის გამოცხადება და გუშინ ახალგაზრდა ადამიანმა პროტესტის ნიშნად პირი ამოიკერა. „ქართულმა ოცნებამ“ ეს ადამიანები მარტო დატოვა.

დღეს მინდა საქართველოს თითოეულმა მოქალაქემ იცოდეს, მიუხედავად იმისა, რომ ამ ქვეყანაში „ქართული ოცნების“ დამსახურებით სამუშაო ადგილები არ არის, იმ ადამიანებისთვის, ვინც შეძლებს, რომ სამსახური იშოვოს, ოფიციალურად შექმნილია სახელმწიფო უწყება ჯანდაცვის სამინისტროს დაქვემდებარებაში – შრომის ინსპექცია. ამ ინსპექციის ბიუჯეტი მაგალითად, წელს არის 7 მილიონ 300 ათასი ლარი. ხოლო მის ხელმძღვანელს დაქვემდებარებაში 162 თანამშრომელი ჰყავს. ისე მოხდა, რომ ამ უწყებისთვის საინტერესო არ არის, რომ ის ვალდებულებები შეასრულოს, რომელიც მას კანონით აკისრია და შეამოწმოს, რამდენად არიან დაცული ამ კომპანიაში დასაქმებული ადამიანები და მათი შრომითი უფლებები. მე არ ვსაუბრობ ზეპირად, მე წარმოგიდგენთ იმ ოფიციალურ წერილს, რომელიც ჯერ კიდევ 2 აგვისტოს გავგზავნე პარლამენტიდან ამ უწყების ხელმძღვანელის მისამართით და მისგან მოვითხოვე რეაგირება ამ უმწვავეს კრიზისზე, რომელიც უკავშირდება შრომის პირობებს და უფლებებს. ასევე, მისგან ვითხოვე ანგარიშის წარდგენა და ინფორმაციის გამოგზავნა საერთოდ აკეთებს თუ არა რაიმეს ეს უწყება შექმნილ უმწვავეს, ამ ქვეყნის ისტორიაში უპრეცედენტოდ მასშტაბურ გაფიცვასთან დაკავშირებით, რომელიც გამოიწვია იმ უსამართლობამ, რასაც ეს ადამიანები წლების განმავლობაში აწყდებოდნენ.

არ გაგიკვირდებათ თუ გეტყვით, რომ ამ 7 მილიონიანმა უწყებამ, სადაც 162 ადამიანი მუშაობს, პასუხიც კი ვერ მოამზადა და წარმოადგინა – რას აკეთებენ, რა გააკეთეს და როგორ აპირებენ შეასრულონ ის ვალდებულებები, რომელიც მათ კანონმა დააკისრა“, – განაცხადა ანა ნაცვლიშვილმა.

როგორც ნაცვლიშვილმა აღნიშნა, „ძლიერი საქართველო“ დებს გამოსავალს მთელი საქართველოს წინაშე, რომელიც პრაქტიკაში არჩევნების შემდეგ განხორციელდება.

„ჩვენ – „ძლიერი საქართველო“ გამოსავალს ვდებთ მთელი საქართველოს წინაშე და ეს გამოსავალი აუცილებლად განხორციელდება პრაქტიკაში არჩევნების შემდეგ:

ეს არის ხელისუფლება, რომლის მთავარი პრიორიტეტი იქნება, ემსახუროს ამ ქვეყნის მოქალაქეებს, თითოეული სახელმწიფო ინსტიტუცია ჩააყენოს ამ ქვეყნის მოქალაქეების და არა რუსი ოლიგარქის სამსახურში;

ეს არის სახელმწიფო ინსტიტუციები, რომლებიც იმოქმედებენ კანონით და არა პარტიული მითითებებით;

ეს არის ევროპული სტანდარტის დანერგვა ყველა სფეროში, როგორც დამსაქმებლისთვის და მისი უფლებების დასაცავად, ასევე დასაქმებულისათვის და მისი უფლებების დასაცავად;

ეს არის სამუშაო ადგილების შექმნა – ვამბობ კონკრეტულ რიცხვს – 200 ათასი ადგილის შექმნა. სამართლიანი ანაზღაურებით და შრომითი პირობებით და არა ისე, როგორც დღეს ათი ათასობით ადამიანს უწევს მოითმინოს და აიტანოს უფლებების დარღვევის ისეთი ფაქტები, რომელსაც არავინ მოითმენს და დაუშვებს ევროკავშირის წევრ სახელმწიფოში.

ეს ყველაფერი აუცილებლად გახდება ამ ქვეყნის რეალობა მას შემდეგ, რაც 26 ოქტომბერს ქართველი ხალხის ხელით დასრულება რუსი ოლიგარქისა და მისი პატრონის მსახური ხელისუფლება და ამ ქვეყანას ეყოლება ხელისუფლება, რომელიც საქართველოს მოქალაქეების უფლებებსა და ინტერესებს დააყენებს ყველაზე და ყველაფერზე წინ“, – აღნიშნა ნაცვლიშვილმა.

ჩვენი ოპოზიციისთვის ხომ უსაფრთხოება და ეროვნული ინტერესები მეასე და მეათასე ხარისხოვანია? ამიტომ, ახლა ისინი ამ მდაბიო „ღადაობაში“ იქნებიან „კაი“ ხანი ჩარჩენილები – ერთი რამ ნათელია, რომ იმას, ვინც მშვიდობისთვის იბრძვის, ესვრიან, – ამის შესახებ “ქართული ოცნების” დეპუტატმა, ირაკლი ქადაგიშვილმა ჟურნალისტებთან საუბრისას განაცხადა, რითაც ის ფაქტი შეაფასა, რომ „ქართული ოცნების“ გუშინდელ ღონისძიებაზე, პარტიის საპატიო თავმჯდომარის, ბიძინა ივანიშვილის ტრიბუნა ტყვიაგაუმტარ მინებში იყო მოთავსებული.

მისი თქმით, უსაფრთხოების სამსახურს რომ უსაფრთხოების ზომები გაძლიერებული აქვს, კონკრეტული მოცემულობიდან გამომდინარეობს.

„ოპოზიცია გასაგებია, რომ მეათასე ხარისხოვან საკითხებს ეკიდება იმ პოლიტიკურ გზავნილებთან და პლატფორმასთან მიმართებაში, რაზეც მათ ბევრი სათქმელი არ აქვთ. ამიტომ, ცდილობენ, რომ აბუჩად აგდების კონტექსტში გადაიყვანონ ეს ყველაფერი. ერთი რამ ნათელია, რომ იმას, ვინც მშვიდობისთვის იბრძვის, ესვრიან. ეს აშშ-ის პრეზიდენტობის კანდიდატის მაგალითზეც თვალნათლივ ვიხილეთ სულ რაღაც 1 თვის წინ. ასევე ვიხილეთ, ერთ-ერთი ევროპული ქვეყნის პრემიერ-მინისტრის მაგალითზე. ისტორიულად თუ გადავხედავთ, ბევრ მნიშვნელოვან, მსოფლიო პოლიტიკოსს მაშინ ესროდნენ, როდესაც ის ყველაზე მეტად იბრძოდა მშვიდობისთვის. ამიტომ, აქაც რა თქმა უნდა, ეს პოლიტიკური კონტექსტი სამწუხაროდ, საქართველოში არსებობს. აგრეთვე, ვიცით, რომ უსაფრთხოების სამსახური კონკრეტულ გამოძიებას ატარებს, პრევენციულ ზომებს იღებენ და ის, რომ მას უსაფრთხოების ზომები გაძლიერებული აქვს, ესეც კონკრეტული მოცემულობიდან გამომდინარეა”, – აღნიშნა ქადაგიშვილმა.

ამავე თემაზე საუბრისას, ირაკლი ქადაგიშვილმა აღნიშნა, რომ უსაფრთხოების საკითხებზე პასუხისმგებლობას და გადაწყვეტილებას შესაბამისი სამსახური იღებს და ეს დამოკიდებული არ არის პიროვნებაზე – მას როგორ და რანაირად სურს.

“ეს პირველ რიგში, დამოკიდებულია იმ სამსახურების და თანამდებობის პირების გადაწყვეტილებაზე, ვინც პასუხისმგებელია კანონისა და დაცვის ობიექტის წინაშე მისი უსაფრთხოებისათვის.

როდესაც საუბარია უსაფრთხოებაზე და როდესაც ამ უსაფრთხოებას კონკრეტული საფრთხე ემუქრება, როდესაც ძალიან მოკლე პერიოდში სახეზე გვაქვს ის თავდასხმები, რაც ქვეყნის პოლიტიკურ ლიდერებზე ხორციელდება და ის გზავნილები, რაც საქართველოსთან მიმართებაშიც იქნა გაჟღერებული, რა თქმა უნდა, უსაფრთხოებას შესაბამისი გაგებითა და სერიოზულობით უნდა მოვეკიდოთ. მაგრამ, ჩვენი ოპოზიციისთვის, ხომ უსაფრთხოება და ეროვნული ინტერესები მეასე და მეათასე ხარისხოვანია? ამიტომ, ახლა ისინი ამ მდაბიო “ღადაობაში” იქნებიან „კაი“ ხანი ჩარჩენილები. მეტი სერიოზული მსჯელობისთვის მათ პოზიცია და არგუმენტი არ აქვთ. ასე რომ, ნუ ინერვიულებენ ისინი. საზოგადოება ნორმალურად აფასებს, როდესაც ადამიანს უსაფრთხოების უზრუნველყოფა სჭირდება და ეს უზრუნველყოფილია“, – აღნიშნა ქადაგიშვილმა.

გამჭვირვალობა არაევროპული ყოფილა, ვიღაცებს ფულს რომ გადმოურიცხავენ ზოგიერთი ქვეყნიდან იმისთვის, რომ რევოლუცია დაუფინანსონ, თურმე ამასთან დაკავშირებით ჩვენ ინფორმაცია არ უნდა ვიცოდეთ. ასეთი ბრიყვები ნამდვილად არ ვართ, – ამის შესახებ თბილისის მერმა, კახა კალაძემ საკონსტიტუციო სასამართლოში „უცხოური გავლენის გამჭვირვალობის შესახებ“ კანონის განხილვასთან დაკავშირებით განაცხადა, რომელიც 29 აგვისტოს დაიწყება.

კალაძის განცხადებით, ეს არის სიცრუის კამპანია, რომელიც არა მხოლოდ ქვეყნის შიგნით, არამედ გარედანაც იმართება.

„ხომ გახსოვთ, როდესაც პრეზიდენტმა კონსტიტუცია დაარღვია, სასამართლომ გამოიტანა დასკვნა, რომ ეს კონსტიტუციური დარღვევა იყო. გახსოვთ მაშინ პრეზიდენტის განცხადებები, რა განცხადებებს აკეთებდა საკონსტიტუციო სასამართლოსთან დაკავშირებით? დღეს პრეზიდენტს შეაქვს სარჩელი გამჭვირვალობასთან დაკავშირებით. თუ მაშინ ეს სასამართლო არ ვარგოდა და პრობლემა იყო, მაშინ დღეს რატომ შეაქვს სარჩელი იგივე სასამართლოში?! წარმოუდგენელი რაღაცები ხდება. ეს არის სიცრუის კამპანია, პირდაპირ თეთრზე შავის მტკიცება. ეს მხოლოდ ქვეყნის შიგნიდან არ მოდის, ყველა ეს პროცესი გარედან იმართება. ხალხს გვეუბნებიან, თითქოს გამჭვირვალობა ცუდია. გამჭვირვალობა არაევროპული ყოფილა, ვიღაცებს ფულს რომ გადმოურიცხავენ ზოგიერთი ქვეყნიდან იმისთვის, რომ რევოლუცია დაუფინანსონ, თურმე ამასთან დაკავშირებით ჩვენ ინფორმაცია არ უნდა ვიცოდეთ. ასეთი ბრიყვები ნამდვილად არ ვართ. შესაბამისად, გამჭვირვალობა არის მნიშვნელოვანი. ჩვენ ყველაფერს გავაკეთებთ იმისთვის, რომ ქვეყანა განვითარდეს, ევროინტეგრაცია მოხდეს და ასე შემდეგ“, -განაცხადა კალაძემ.

ბიძინა ივანიშვილი არის ჩვენი ქვეყნისთვის მნიშვნელოვანი ფიგურა, რომელსაც დიდი როლი აქვს იმაში, რომ ქვეყანაში არის მშვიდობა, ამიტომ, უსაფრთხოების ზომები გაზრდილია, – განაცხადა მედიასთან დედაქალაქის მერმა კახა კალაძემ.

კახა კალაძემ აშშ-ის პრეზიდენტობის კანდიდატის დონალდ ტრამპის მაგალითიც მოიყვანა და განაცხადა, რომ ყველა იცავს უსაფრთხოებას.

„ზოგიერთ ტელევიზიას აქვს სურვილი, ოპოზიცია წარმოაჩინოს როგორც განადგურებული და დაბეჩავებული. შეიძლება განადგურებული და დაბეჩავებული მართლა არის, მაგრამ ყველაფრის მკადრებელია. იმ პოზიციაში და ვითარებაში, სადაც ახლა ისინი იმყოფებიან – გვარამიამ უფრო კარგად იცის, სად იმყოფებიან – ყველაფრის მკადრებლები არიან. წარმოგიდგენიათ, ამერიკაში მიმდინარეობს საპრეზიდენტო არჩევნების კამპანია და ერთ-ერთ კანდიდატს ესროლეს, კლავდნენ ჩვეულებრივად. შესაბამისად, ყველაფერს იკადრებენ.

ბიძინა ივანიშვილი არის ჩვენი ქვეყნისთვის მნიშვნელოვანი ფიგურა, რომელსაც დიდი როლი აქვს იმაში, რომ ქვეყანაში შენარჩუნებულია მშვიდობა, სიმშვიდე, „ქართული ოცნება“ ატარებს პრაგმატული პოლიტიკას და ამ ყველაფერს ჩვენი ქვეყნის მოსახლეობა კარგად ხედავს, ამიტომ, რა თქმა უნდა, უსაფრთხოების ზომები გაზრდილია. თქვენ ნახეთ ალბათ ტრამპის საჯარო გამოსვლა. რა თქმა უნდა, ყველა იცავს ამ უსაფრთხოებას და ჩვენც შესაბამისად ვიქცევით.

ბატონი ბიძინა ივანიშვილი არის ადამიანი, რომელმაც ამ ქვეყანაში, ჩვენი ქვეყნის მოსახლეობასთან ერთად, დაამთავრა ბოროტება, რომელიც იყო წარმოდგენილი „ნაციონალური მოძრაობის“ სახით და გვიმტკიცებდნენ, რომ თითქოს ეს იყო დემოკრატიის შუქურა. ბიძინა ივანიშვილმა გადადო ყველაფერი, თავისი სიცოცხლის და ოჯახის ფასად და 2012 წელს დაამარცხა ბოროტება. ეს ძალა არსად წასულა, ისევ აქ არის. ეს არის რადიკალური დაჯგუფება – დავარქვათ „კოლექტიური ნაციონალური მოძრაობა“ რომელიც იმართება გარედან და რომლებიც ყველაფრის მკადრებლები არიან, შესაბამისად, სიფრთხილეს თავი არ სტკივა. რატომ არ უნდა დავიცვათ ადამიანი. ნახეთ, რომ ტრამპს პირდაპირ კლავდნენ. ადამიანი გამოდიოდა სიტყვით, ესროლეს და განწირული იყო. არ ვიცი, როგორ გადარჩა“, – განაცხადა კახა კალაძემ.

თბილისის მერი კახა კალაძე მიიჩნევს, რომ ზეწოლისა და არაერთი მოწოდების მიუხედავად, მმართველი გუნდისთვის ქვეყანაში მშვიდობის შენარჩუნება პრინციპულად მნიშვნელოვანია. ამგვარად შეაფასა მან პოლიტიკური პარტია „ქართული ოცნება – დემოკრატიული საქართველოს“ წარმომადგენლების მხრიდან წინასაარჩევნოდ გაკეთებული განცხადებები.

„ის, რაზეც ვსაუბრობთ და რასაც მოსახლეობას ვპირდებით, პრინციპულად მნიშვნელოვანია. მშვიდობას არ აქვს ალტერნატივა. ვხედავთ, თუ რა ხდება მსოფლიოში, რა ვითარებაა რეგიონში. მშვიდობის დაცვა, შენარჩუნება პრინციპულად მნიშვნელოვანია მაშინ, როდესაც მეორე მხარეს დგას ბინძური, ყველაფრის მკადრებელი ძალა, ანტისახელმწიფოებრივი ქმედებებით. ქვეყანა ვერ განვითარდება ეკონომიკურად, ვერ წავალთ წინ და ვერ გავხდებით ევროპული ოჯახის წევრი, თუ მშვიდობა არ გვექნა. გუშინ კიდევ ერთხელ გაკეთდა ახსნა-განმარტება იმასთან დაკავშირებით, თუ რატომ არის საჭირო საკონსტიტუციო უმრავლესობა. ვფიქრობ, რომ საზოგადოებას ახსნა არ სჭირდება, თუ რა ვითარებაა დღეს, ზოგადად, მსოფლიოში და რეგიონში, რა ძალები ებრძვიან ჩვენს ქვეყანას. ამიტომ, ყველა უნდა გავერთიანდეთ, დავიცვათ ქვეყნის მომავალი, მისი ხვალინდელი დღე, კულტურა და ა.შ.“, – განაცხადა კახა კალაძემ.

დედაქალაქის მერმა „ქართული ოცნების“ წინასაარჩევნო დაპირებებთან დაკავშირებულ შეკითხვასაც უპასუხა და აღნიშნა, რომ პასუხს ყველა ის ადამიანი აგებს, რომელთა ქმედებებმა საქართველოს ტერიტორიები დააკარგვინა.

„სიახლე არის ყველა ის პოლიტიკური ძალა, რომელიც ებრძვის ქვეყანას და ეწინააღმდეგება მის განვითარებას, მოქმედებს ანტისახელმწიფოებრივად, ჩადენილი აქვს უმძიმესი დანაშაული, რომლის შედეგად, დავკარგეთ ტერიტორიები, დაგვეღუპა გმირი ჯარისკაცები, მშვიდობიანი მოსახლეობა, გვაქვს დაკარგული სოფლები და განადგურებული ინფრასტრუქტურა. ისე უბრალოდ არ ხდება, რომ რაღაცამ ჩაიარა და მორჩა. ამ ყველაფერს სჭირდება პასუხის გაცემა. პასუხისგება კი ყველა იმ ადამიანს და პოლიტიკურ პარტიას მოუწევს, ვინც ამ ქმედებებში და ღალატში იქნება დადანაშაულებული“, – აღნიშნა თბილისის მერმა.

მისივე თქმით, ოქტომბერში მოსახლეობას არჩევანის გაკეთება არ გაუჭირდება, რადგან ერთ მხარეს დგას ბოროტება, ხოლო მეორე მხარეს სიმშვიდე და ქვეყნის ეკონომიკური განვითარება.

„დღეს საუბარი არ არის პარტიებზე. საუბარია ქვეყნის ბედზე, სად და როგორ იქნება საქართველო – ქვეყანაში იქნება ომი, გამოიყენებენ მას ისევე, როგორც სხვა ქვეყნები დიდი ქვეყნების ინტერესებისთვის, თუ შენარჩუნდება მშვიდობა და მოხდება ქვეყნის ეკონომიკური განვითარება. ძალიან მარტივია არჩევანის გაკეთება. ერთ მხარეს დგას ბოროტება, ომი, ქვეყნის განადგურება, სიცრუე და მეორე მხარეს არის სიმშვიდე, ქვეყნის ეკონომიკური განვითარება და წინსვლა ევროპული მომავლისკენ“, – განაცხადა კახა კალაძემ.