უკრაინაში ომის დაწყებამდე და ომის დაწყების შემდეგ ორი შეხვედრა გაიმართა, მოსული იყო კონკრეტული ადამიანი, ოფიციალური თანამდებობის პირი, რომელმაც ომში ჩართვა პირდაპირ მოგვთხოვა. პრობლემები დაიწყო სწორედ იმ მომენტიდან, როდესაც ამაზე უარი ვთქვით, თან პირდაპირ არ გვითქვამს არაფერი, კითხვები დავსვით, რაზეც პასუხის გაცემაც არ იკადრეს, მოითხოვეს ომში ჩართვა, მეორე ფრონტის გახსნა, – ამის შესახებ პრემიერ-მინისტრმა, ირაკლი კობახიძემ განაცხადა.

მისი თქმით, საინტერესოა, მოლდოვას რატომ არ დაუპირისპირდნენ, როდესაც რუსეთს სანქციები არ დაუწესა და ომში ჩართვა მოლდოვასაც რატომ არ მოსთხოვეს?

„რამდენიმე განცხადება გავაკეთე, რომ გლობალური ომის პარტიის ქვეშ აშშ-სა და ევროკავშირს არ ვგულისხმობთ. რამდენიმე განცხადება მაქვს სიტყვასიტყვით ასეთი გაკეთებული, ამიტომ ნუ მოატყუებთ საზოგადოებას. ახლა ავიღოთ ქრონოლოგია. შეგახსენებთ, რა ხდებოდა 2020 წლის საპარლამენტო არჩევნების შემდეგ, როდესაც პირდაპირ ორი ელჩი – დეგნანი და ჰარცელი იყვნენ ჩართული იმ საბოტაჟში, რომელიც წარმოებდა რადიკალური ოპოზიციის ხელით. იძულებითი მოლაპარაკებები, იძულებითი შეთანხმება, ე.წ. მიშელის შეთანხმება და ა.შ. ერთი წელი აწვალეს ეს ქვეყანა და ქართველი ხალხი, ვიდრე, საბოლოო ჯამში, არ გადავლახეთ 43-პროცენტიანი ბარიერი ადგილობრივი თვითმმართველობის არჩევნებში. რა შუაშია აქ ფინანსური შანტაჟი და ა.შ.? მერე იყო ორთვიანი სიმშვიდე და თებერვალში გაიმართა ორი შეხვედრა ომის დაწყებამდე და ომის დაწყების შემდეგ. დღესაც არ ვაკონკრეტებ იმას, თუ ვინ იყო კონკრეტულად მოსული, მაგრამ იყო კონკრეტული ადამიანი მოსული, ოფიციალური თანამდებობის პირი, რომელმაც პირდაპირ მოგვთხოვა ომში ჩართვა და პრობლემები დაიწყო სწორედ ამ მომენტიდან, როდესაც ჩვენ ვთქვით უარი. თან პირდაპირ არ გვითქვამს არაფერი. კითხვები დავსვით. პოლიტიკაში ეს ჩვეულებრივი ამბავია, ჯერ სვამ კითხვებს და მერე აფიქსირებ საკუთარ პოზიციას. კითხვებზეც კი არ იკადრეს პასუხების გაცემა, უმარტივეს კითხვებზეც კი. მოითხოვეს ჩვენი ომში ჩართვა, მეორე ფრონტის გახსნა და აქედან დაიწყო პრობლემები, მათ შორის ბიძინა ივანიშვილის მიმართ ფინანსური შანტაჟი. ყველაფერი დღესავით ცხადია, თუ რა უნდოდათ ჩვენი ქვეყნისგან. მოლდოვას რატომ არ დაუპირისპირდნენ, როდესაც არ დაუწესა რუსეთს სანქციები? ჩვენთან რატომ მოვიდა იგივე ადამიანი, ვინც ომში ჩართვას ითხოვდა და რატომ ითხოვდა დაჟინებით ასევე რუსეთისთვის სანქციების დაწესებას და რატომ არ მოსთხოვა იგივე მოლდოვას?“ – განაცხადა ირაკლი კობახიძემ.

მისი თქმით, ვერ იტყვის, თუ ვინ ითხოვდა საქართველოს მთავრობისგან ომში ჩართვას, რადგან ქვეყნის ინტერესებს და უსაფრთხოებას იცავს, როდესაც ყველა დეტალს არ ასაჯაროვებს.

„დამატებითი პრობლემებს შექმნა არ გვინდა, გვინდა, გავუფრთხილდეთ რაღაც-რაღაცებს და ამისათვის კონკრეტული სუბიექტები უნდა იყვნენ მადლიერები ჩვენი ხელისუფლების მიმართ. მოლდოვას რაც შეეხება, ერთი კრიტიკა თუ გახსოვთ, რომ მან არ დატოვა დამოუკიდებელ სახელმწიფოთა თანამეგობრობა? ვინმემ გააკრიტიკა ამისთვის მოლდოვა, ან ვინმემ მოსთხოვა მოლდოვას რუსეთისთვის სანქციების დაწესება, ან ვინმეს გაუკრიტიკებია მოლდოვა აღვირახსნილი კორუფციისთვის, რაც სერიოზული პრობლემაა, ან ვინმეს ოდესმე უხსენებია, რომ მოლდოვაში პოლიტიკოსები დაიჭირეს და პარტიები აკრძალეს? იგივე ეხება უკრაინასაც. რატომ არ ვისმენთ ასეთ განცხადებებს? იმიტომ, რომ საქართველოს მიმართ არის კონკრერული ინტერესი და მოლდოვის მიმართ არ არის იგივე ინტერესი. მოლდოვას, უკრაინას ეპატიება კორუფციაც, პარტიების აკრძალვაც, პოლიტიკოსების დაჭერაც, მაგრამ საქართველოში, შეიძლება, ე.წ. მოლოტოვის კოქტეილი გესროლონ და ასეთი კაციც არ უნდა დაიჭირონ. აქ ჩანს რეალურად ორმაგი სტანდარტი, რაც ევროპას არ შეშვენის. ევროპა ჯერ კიდევ 30 წლის წინ გამოირჩეოდა სამართლიანობით, სამართლის უზენაესობის პატივისცემით. ევროპაში ასეთი მდგომარეობა იყო 2008 წლამდე. 2008 წლის შემდეგ არის ძალიან მძიმე უკუსვლა მთელი ევროპის მასშტაბით, რაც არის ძალიან დასანანი და სამწუხარო“, – განაცხადა ირაკლი კობახიძემ.

რობინ დანიგანი არის არა გადამდგარი, არამედ რეალურად გადაყენებული ელჩი. გადაყენებული ელჩი როდესაც ჭორებით საუბრობს, ეს არ არის თავისთავად სერიოზული, – ამის შესახებ „ქართული ოცნების“ თავმჯდომარემ, პრემიერ-მინისტრმა ირაკლი კობახიძემ განაცხადა.

ირაკლი კობახიძეს კითხვა დაუსვეს რობინ დანიგანის განცხადებასთან დაკავშირებით, რომ „ქართული ოცნების“ ხელმძღვანელობამ მას გაუგზავნა პირადი წერილი ტრამპის ადმინისტრაციისთვის. რობინ დანიგანის თქმით, ეს წერილი „იყო მუქარის შემცველი, შეურაცხმყოფელი, არასერიოზული და უკიდურესად ცუდად იყო მიღებული ვაშინგტონში“.

„ჯერ ერთი, რომ გვდომოდა ღია წერილის გაგზავნა, გაიგზავნებოდა ღია წერილი და მეორე, თქვენ იცით, რომ ქალბატონი რობინი არის არა გადამდგარი, არამედ, რეალურად, გადაყენებული ელჩი. ახლა გადაყენებული ელჩი როდესაც ჭორებით საუბრობს, ეს არ არის თავისთავად სერიოზული, ამიტომ ამ საკითხზე ჩვენ არ გვჭირდება კომენტარების გაკეთება. თქვენი გადასაწყვეტი არ არის, რა გასაჯაროვდება და რა არა. თქვენ რა გინდათ, ერთია, რა გვინდა ჩვენ და რა უნდა საზოგადოებას, ეს არის მეორე. საჯარო წერილი რომ ყოფილიყო, გავასაჯაროვებდით. რაც იყო საჯარო, გავასაჯაროვეთ კიდეც. რაც შეეხება გადაყენებული ელჩის ჭორაობას, ამაზე კომენტარი აბსოლუტურად უადგილოა. თქვენ ნახეთ, დემონსტრაციულად, ერთსა და იმავე დღეს დააწერინეს განცხადება ქალბატონ დანიგანს და იმავე დღეს მოგვცეს თანხმობა საქართველოს ელჩის დანიშვნაზე, რაც იყო დემონსტრაციული ფაქტი. გადააყენეს ადამიანი, დაკავებულია ჭორების გავრცელებით, ეს არ არის სერიოზული“, – განაცხადა კობახიძემ ჟურნალისტის კითხვის პასუხად.

რაც შეეხება კითხვას, რას მოითხოვდნენ წერილში, კობახიძემ განაცხადა, რომ მმართველი გუნდის მთავარი მოთხოვნა ყველასთვის ცნობილია.

კობახიძის თქმით, ყოფილმა ელჩებმა, დეგნანმა და დანიგანმა სერიოზული წვლილი შეიტანეს ქართულ-ამერიკული ურთიერთობების თვისებრივად გაუარესებაში.

„ჩვენ მთავარი მოთხოვნა არის ყველასთვის ცნობილი. ეს არის ის, რომ ჩვენ გვინდა, აღდგეს სუფთა ფურცლიდან სტრატეგიული პარტნიორობა აშშ-თან და, რა თქმა უნდა, ეს იყო ჩვენი ყველა წერილის, ყველა კომუნიკაციის გაცხადებული შინაარსი. აბსოლუტურად ყველა კომუნიკაციის შინაარსი, მიზანი ეს იყო. ჩვენ გვინდა, სუფთა ფურცლიდან აღდგეს სტრატეგიული პარტნიორობა, ღირსეული პარტნიორობა საქართველოსა და აშშ-ს შორის. ძალიან ბევრი რამ გააფუჭა წინა ადმინისტრაციამ, მათ შორის, კონკრეტულმა ელჩებმა გააფუჭეს ძალიან ბევრი რამ – დეგნანი, დანიგანი. რეალურად, მათ სერიოზული წვლილი შეიტანეს ქართულ-ამერიკული ურთიერთობების თვისებრივად გაუარესებაში. აქედან გამომდინარე, მათ მორალური უფლებაც არ აქვთ, რომ რაიმეზე ისაუბრონ, როდესაც საქმე ეხება ქართულ-ამერიკულ ურთიერთობებს. ახალი ადმინისტრაციის პირობებში, იმედი გვაქვს, რომ იქნება განსხვავებული დამოკიდებულება, მათ შორის ელჩების მხრიდან“, – განაცხადა ირაკლი კობახიძემ.

როგორც მთავრობის მეთაურმა აღნიშნა, ახლა საქართველოს ხელისუფლება ელოდება შემხვედრ ნაბიჯებს აშშ-ის ადმინისტრაციისგან.

„ჩვენ საჯარო განცხადება გაკეთებული გვაქვს და ველოდებით შემხვედრ ნაბიჯებს. რეალურად, საჭიროა ჯანსაღი მიდგომა, სამართლიანი მიდგომა, ჩვენ ვართ მოლოდინის რეჟიმში. ჩვენ გვაქვს მაქსიმუმზე გაკეთებული განაცხადი. მაქსიმუმი რა არის? რომ მზად ვართ, განვიხილოთ ნებისმიერი საკითხი, რაც არის დაკავშირებული ქართულ-ამერიკულ ურთიერთობებთან. მთავარია, შედგეს კომუნიკაცია. ნებისმიერ საკითხს განვიხილავთ ჩვენს ამერიკელ პარტნიორებთან. როგორც კი დავინახავთ აქტიური კომუნიკაციის ინტერესს, ნებისმიერი საკითხი შეიძლება იყოს განხილული და უფრო მეტიც, ჩვენ განვაცხადეთ, რომ მზად ვართ, განვაახლოთ სტრატეგიული პარტნიორობა არა ქაღალდზე, როგორც იყო წარსულში, არამედ რეალური დოკუმენტით, რეალური გზამკვლევით. ეს არის ჩვენი ძალიან ცხადი შეთავაზება. ერთადერთი, რასაც შეიძლება, ასეთ პირობებში დაველოდოთ, ეს არის შემხვედრი ნაბიჯები“, – განაცხადა ირაკლი კობახიძემ.

პრემიერ-მინისტრს აქვე კითხვა დაუსვეს, რატომ თქვა ბიძია ივანიშვილმა უარი აშშ-ის ელჩთან შეხვედრაზე, რასთან დაკავშირებითაც კობახაძემ განაცხადა:

„მიზეზი არის განმარტებული და ეს მიზეზი საჯაროდაც განმარტა ბატონმა ბიძინა ივანიშვილმა. სანქციების პირობებში, შანტაჟის პირობებში, რა თქმა უნდა, არასწორი იქნებოდა მისი მხრიდან ასეთი შეხვედრის გამართვა. მან ასევე მიანიშნა ელჩს იმასთან დაკავშირებით, რომ არსებობს ხელისუფლება, რომელსაც ის უნდა ესაუბროს. რეალურად, კომუნიკაციაზე არავის უთქვამს უარი. იყო პირდაპირი შეთავაზება გაკეთებული, რომ საუბარი დაწყებულიყო იმ ადამიანებთან, რომლებიც არ არიან კონკრეტულად, სუბიექტურად შანტაჟის ქვეშ. ძალიან მარტივი შეთავაზება იყო გაკეთებული. ამაზე როდესაც ითქვა უარი, გამძაფრდა შთაბეჭდილება იმასთან დაკავშირებით, რომ სწორედ შანტაჟის ფონზე სურდა ქალბატონ ელჩს შეხვედრა ბატონ ბიძინა ივანიშვილთან. ძალიან მარტივია ეს ლოგიკა“, – განაცხადა ირაკლი კობახიძემ.

შენ გიწევს რიგში დგომა, ან არ დგომა ვიზასთან დაკავშირებით, ეს ტექნიკური საკითხია, სტაბილურობა თუ არ გვექნა ქვეყანაში, გინდა უვიზოდ წადი, გინდა ვიზით, არავითარი მნიშვნელობა არ აქვს, – ამის შესახებ პრემიერ-მინისტრმა, ირაკლი კობახიძემ ბრიფინგზე განაცხადა.

მისივე თქმით, ჯორდანო ბრუნოს მსგავსად, უნდათ კოცონზე დაწვან საქართველოს ვიზალიბერალიზაცია, რადგან კაცი კაცია და ქალი ქალი.

„გვთხოვენ ოჯახური ღირებულებების შესახებ კანონის გაუქმებას, სადაც წერია, რომ კაცი უნდა დარჩეს კაცად. მე მახსოვს, ევროპის შუა საუკუნეების ისტორია როცა ვისწავლეთ, მაშინ იყო ინკვიზიცია და ადამიანებს წვავდნენ. გუშინ ბატონი შალვაც იხსენებდა ამ ყველაფერს. ადამიანებს წვავდნენ ევროპაში განსხვავებული აზრის გამო. ჯორდანო ბრუნო დაწვეს, რადგან ის ადასტურებდა დედამიწის ბრუნვას და დღეს ადამიანებს წვავენ, რადგან მიაჩნიათ რომ კაცი კაცია და ქალი ქალია.

მოდით ვნახოთ, ჯერ რა წერია ამ კანონში და რატომ არის მოთხოვნა ინკვიზიციური თავის შინაარსით. ჯორდანო ბრუნოს ისტორია მეორდება, ცოტა განსხვავებული ფორმით, რადგან 21-ე საუკუნეა. ჩვენ ვაცხადებთ ჯიუტად, რომ კაცი კაცია, ის მაინც ბრუნავს და ევროპული ბიუროკრატია გვეუბნება, რომ ამის გამო ჩვენ ვიზალიბერალიზაცია უნდა გაგვიუქმდეს. ასე ვთქვათ, კოცონზე უნდა დაწვან ჩვენი ვიზალიბერალიზაცია, რადგან ჩვენ მიგვაჩნია, რომ კაცი კაცია და ქალი ქალია. რა წერია ამ კანონში, მარტივად გავყვეთ. სულ არის 6-7 პუნქტი, ზუსტად არ მახსოვს. წერია მაგალითად ის, რომ არ შეიძლება კონკრეტული მამაკაცი მივიდეს სამოქალაქო რეესტრში და მოითხოვოს პირადობის მოწმობაში მდედრობითი სქესის ჩაწერა. ამაზე გვეუბნებიან, რომ ეს არის ადამიანის უფლებების დარღვევა. როგორ შეიძლება მე მივიდე სამოქალაქო რეესტრში და მოვითხოვო, რომ ვარ ქალი, ამის ჩაწერა, ამის დაფიქსირება. ვენეციის კომისიასაც მიაჩნია, რომ ეს არის ადამიანის უფლებების დარღვევა. ეს ხომ სირცხვილია. გეუბნებიან რას, რომ რუსუდან დუმბაძე შეიძლება მივიდეს სამოქალაქო რეესტრში და თუ მოითხოვს, რომ მისი სქესის შესახებ ჩანაწერი გადაკეთდეს მამაკაცად, თქვენი მოთხოვნა უნდა დაკმაყოფილდეს. ვენეციის კომისია გვეუბნება, რომ თუ რუსუდან დუმბაძეს ამ მოთხოვნას არ დაუკმაყოფილებენ, ეს არის მისი, ადამიანის უფლებების დარღვევა. ეს ხომ სირცხვილია. ინკვიზიციაზე უარესი უბედურება ხომ არის ეს?! ეს ხომ არის ევროპის თავზე დამტყდარი უბედურება.

ახლა მეორე რას ითხოვს, ეგეც გავიაროთ. ერთნაირსქესიანი პარტნიორობის, ერთნაირსქესიანთა ქორწინების დაკანონება. ამასაც ითხოვს. აი სადამდე ჩავიდა ევროპული ბიუროკრატიის აზროვნება და გეუბნებიან, რომ ეს თუ არ არის დაშვებული შენს ქვეყანაში, ამ შემთხვევაში უხეშად ირღვევა ადამიანის უფლებები. ჩვენ კანონში საუბარია იმაზე, რომ არ უნდა აიყვანოს ერთნაირსქესიანმა წყვილმა შვილად არასრულწლოვანი. ამაზეც გვეუბნებიან, რომ ეს არის ადამიანის უფლებების უხეში დარღვევა. მე უბრალოდ იმის ჩვენება მინდა, თუ რა დონემდე არის დასული ევროპული ბიუროკრატიის აზროვნება სწორედ „დიფ სტეიტის“, გლობალური ომის პარტიის გავლენით“, – განაცხადა კობახიძემ.

ჟურნალისტის კითხვაზე, როგორ აპირებს ხელისუფლება, რომ უვიზო მიმოსვლის მექანიზმი არ იყოს შეჩერებული, კობახიძემ აღნიშნა, რომ მზად არიან ყველასთან შესახვედრად.

„ვართ მზად ყველასთან შესახვედრად. ახლა მეორე მოთხოვნაზე გადავიდეთ, გამჭვირვალობის კანონს რაც შეეხება. ჩვენ თავის დროზე, როცა ვიღებდით გამჭვირვალობის კანონს, ღიად ვაცხადებდით, რომ მათ შორის დასავლური წყაროებიდან ხდებოდა საქართველოში რევოლუციური პროცესების, ექსტრემიზმის, სახელმწიფო ინსტიტუტებზე თავდასხმის, პოლიციაზე თავდასხმის დაფინანსება. ეს ყველაფერი ხომ მერე გაცხადდა. მათ შორის ამერიკის ახალმა ადმინისტრაციამ დაადასტურა, რომ USAID-ის და Ned-ის მეშვეობით სხვადასხვა ქვეყანაში და მათ შორის ერთ-ერთი იყო საქართველო, ფინანსდებოდა ასეთი პროცესები. მთელი ყალბი კამპანია აწარმოეს, რომ თითქოს ეს იყო საშინელი კანონი და არქვეს რუსული კანონი და ა.შ. ამ დროს ამერიკის ადმინისტრაციამ პირდაპირ დაადასტურა, რომ რეალურად სწორედ ის პროცესები წარიმართებოდა USAID-ის, Ned-ის და სხვა ფონდების მეშვეობით, მათ შორის EED-ი და ა.შ, რომლებზეც ჩვენ ვსაუბრობდით. თურმე ეს კანონი ყოფილა აუცილებელზე აუცილებელი. რა მნიშვნელობა აქვს ამერიკელი გაგიკეთებს ამას, ევროპელი, რუსი, თუ იაპონელი. არავითარი მნიშვნელობა არ აქვს“, – აღნიშნა კობახიძემ.

პრემიერ-მინისტრის თქმით, ვიზასთან დაკავშირებით რიგში დგომა არაეგზისტენციალური საკითხია.

„ვიღაც როდესაც ცდილობს, გარედან შელახოს შენი სუვერენიტეტი, აგირიოს ქვეყანა, ხელოვნურად გააღვივოს სიძულვილი და როცა ამას უპირისპირებ გამჭვირვალობის კანონს, ეს ხომ ლეგიტიმური მოვლენა. ეს არის კანონი, რომელიც პირდაპირ არის მიმართული საქართველოს სუვერენიტეტია, უსაფრთხოების, სტაბილურობისა და მშვიდობის დაცვაზე. დავუშვათ, რომ მართლა გვიუქმებენ ამ უვიზო რეჟიმს. რა დგას სასწორზე – ერთ მხარეს არის რა, ტექნიკური საკითხია, რომ შენ რიგში გიწევს დგომა, ან არ დგომა ვიზასთან დაკავშირებით. ეს არის არაეგზისტენციალური საკითხი ადამიანისთვის. სამედიცინო დახმარება თუ გინდა კონკრეტული მიმართულებით მიიღო მაღალი ხარისხით, სხვა ქვეყნებიც არის, ეს ცარიელი თითიდან გამოწოვილი ამბავია, ეს არის სპეკულაცია. რაც შეეხება უვიზო მიმოსვლას, ეს არის ტექნიკური საკითხი. შენ გიწევს რიგში დგომა, ან არ გიწევს რიგში დგომა ვიზასთან დაკავშირებით. ახლა რა არის ეგზისტენციური საკითხები – ეს არის მაგალითად მშვიდობა, სტაბილურობა, პირველი საკითხი. გამჭვირვალობის კანონი, გრანტების შესახებ კანონი, „ფარას“ კანონი, სამივე კანონი არის მიმართული სტაბილურობის დაცვისკენ. სტაბილურობა თუ არ გვექნება ქვეყანაში, გინდა უვიზოდ წადი მერე სხვა ქვეყანაში და გინდა ვიზით, არავითარი მნიშვნელობა არ აქვს. ეს კანონები არის თავიდან ბოლომდე ორიენტირებული ქვეყანაში მშვიდობის, სტაბილურობის დაცვისკენ“, – განაცხადა კობახიძემ.

ჩვენ ყველა ნაბიჯისთვის ვართ მზად, გარდა იმ ნაბიჯებისა, რომლებიც დაკავშირებულია საქართველოში მშვიდობისა და სტაბილურობის დარღვევასთან, – ამის შესახებ „ქართული ოცნების“ თავმჯდომარემ, პრემიერ-მინისტრმა ირაკლი კობახიძემ პარტიის ცენტრალურ ოფისში გამართულ ბრიფინგზე განაცხადა.

მისივე თქმით, საქართველოს მიმართ ევროპული ბიუროკრატიის მხრიდან წაყენებული ყველა პირობა პრაქტიკულად დაკავშირებულია საქართველოში მშვიდობისა და სტაბილურობის დარღვევასთან.

„რაც შეეხება იმ პირობებს, რომლებსაც აყენებს ევროპული ბიუროკრატია საქართველოს მიმართ, საქართველოს ხელისუფლების მიმართ ყველა ეს პირობა პრაქტიკულად დაკავშირებულია საქართველოში მშვიდობისა და სტაბილურობის დარღვევასთან. რასთან დაკავშირებითაც პირველ რიგში საზოგადოებამ უნდა გააკეთოს შესაბამისი ანალიზი, შესაბამისი შეფასებები, რაში სჭირდება ევროპულ ბიუროკრატიას საქართველოში მშვიდობისა და სტაბილურობის დარღვევა. თქვენ, გარდა ამ პირობებისა, ხედავთ, რომ პირდაპირ ხდება ევროპული ბიუროკრატიის მხრიდან იმ პროცესების მხარდაჭერა, რომელიც დაკავშირებულია ქვეყანაში სიძულვილის გაღვივებასთან, რადიკალური პროცესების გაღვივებასთან. ამას ბუნებრივია, საზოგადოება აკვირდება და საზოგადოება აფასებს. მთავარია, რომ საზოგადოებამ არ დაკარგოს სიფხიზლე, სიფრთხილე და თითოეულ იმ ქმედებას, რომელსაც იხილავს, უნდა დააკვირდეს მაქსიმალური ყურადღებით; ეს არის მთავარი. ჩვენი მხრიდან გაკეთდება ყველაფერი იმისათვის, რომ გაგრძელდეს ქვეყნის განვითარება ყველა მიმართულებით. ეს არის ჩვენი პასუხისმგებლობა საზოგადოების წინაშე და ბუნებრივია, ვიმოქმედებთ ამ პასუხისმგებლობით“, – განაცხადა კობახიძემ.