ამერიკის შეერთებული შტატების ახალ ადმინისტრაციასთან ეკონომიკური თანამშრომლობის პერსპექტივები განიხილეს საქართველოს პირველმა ვიცე-პრემიერმა, ლევან დავითაშვილმა და აშშ-ის საგანგებო და სრულუფლებიანმა ელჩმა საქართველოში, რობინ დანიგანმა ეკონომიკის სამინისტროში გამართულ შეხვედრაზე, რომელსაც ასევე ეკონომიკისა და მდგრადი განვითარების მინისტრის მოადგილე გენადი არველაძე და აშშ-ის საელჩოს ეკონომიკურ საკითხთა სექციის ხელმძღვანელის მოადგილე, დაიანა კოსტა ესწრებოდნენ. ამის შესახებ ეკონომიკის სამინისტროს მიერ გავრცელებულ ინფორმაციაშია ნათქვამი.

მათივე ცნობით, ელჩთან შეხვედრაზე ლევან დავითაშვილმა საქართველოს ეკონომიკურ პრიორიტეტებზე ისაუბრა და ხაზი გაუსვა იმ შესაძლებლობებს, რომლებიც ამ კონტექსტში მნიშვნელოვანი იქნება ორივე ქვეყნისთვის.

ინფორმაციის თანახმად, მხარეებმა ასევე განიხილეს ამერიკის ახალი ადმინისტრაციის მიერ გაცხადებული ეკონომიკური პრიორიტეტები და თანამშრომლობის საკითხები სხვადასხვა მიმართულებით, მათ შორის, ინოვაციებისა და ტექნოლოგიების, ვაჭრობის, ტრანსპორტისა და ლოგისტიკის, შუა დერეფნის, ასევე ენერგეტიკის სფეროში ინვესტიციებისა და თანამშრომლობის წახალისების შესახებ.

„როგორც შეხვედრაზე აღინიშნა, მიმდინარე წელს სან ფრანცისკოში დაგეგმილია საქართველოს ფარგლებს გარეთ პირველი ტექნოლოგიური ჰაბის შექმნა, რომლის მიზანი იქნება ქართული სტარტაპ კომპანიების ინტერნაციონალიზაციის და გლობალურ ბაზრებზე წვდომის მხარდაჭერა, ასევე საქართველოს ინოვაციების ეკოსისტემით გლობალური ტექნოლოგიური კომპანიების, უცხოური ვენჩურული ფონდებისა და ენჯელ ინვესტორთა ქსელების დაინტერესება. როგორც რობინ დანიგანმა განაცხადა, აშშ-ის საელჩო აქტიურად დაუჭერს მხარს აღნიშნულ პროექტს, რომელიც საქართველოს საგარეო საქმეთა სამინისტროსა და ეკონომიკის სამინისტროს ინოვაციებისა და ტექნოლოგიების სააგენტოს მიერ ერთობლივად განხორციელდება.

ეკონომიკის სამინისტროში გამართულ შეხვედრაზე მხარეებმა ასევე განიხილეს სავაჭრო მისიების ხელშეწყობის საკითხები, რომლებიც ორ ქვეყანას შორის განხორციელდება. შეხვედრაზე ითქვა, რომ უახლოეს თვეებში აღნიშნული მისიების ფარგლებში ქართული კომპანიები ამერიკას, ხოლო ამერიკული კომპანიები საქართველოს ეწვევიან. სავაჭრო მისიებს საქართველოს ეკონომიკის სამინისტრო და აშშ-ის საელჩო საქართველოში ხელს აქტიურად შეუწყობენ”, – ნათქვამია ინფორმაციაში.

პარლამენტის დიასპორისა და კავკასიის საკითხთა კომიტეტის თავმჯდომარის, ირაკლი ზარქუამ გუშინ, რუსთველის გამზირზე გამართული აქცია შეაფასა სადაც პიროტექნიკა გამოიყენეს. ზარქუას განცხადებით, გარე ძალები კვლავ ერევიან საქართველოს შიდა საქმეებში და ახალგაზრდებს მეტი ძალადობისკენ ახალისებენ.

ზარქუას თქმით, განსაკუთრებით უნდა გამოიყოს გერმანიის ელჩი, რომელიც უკვე რადიკალების მხარეს დგას.

“მერამდენედ ვაფრთხილებთ, ნუ ერევიან შიდა საქმეებში, ნუ აფინანსებენ რადიკალებს. კიდევ ახალისებთ ახალგაზრდებს, რომ მეტი ძალადობა ჩაიდინონ, მეტი პიროტექნიკა გამოიყენონ, რომელიც კანონით აკრძალულია და მეტად საციხოდ გაუხადოთ საქმე. განსაკუთრებით მინდა გამოვყო გერმანიის ელჩი, რომელიც უკვე რადიკალების მხარეს დგას. ამ ადამიანმა, რომელიც უკვე არალეგიტიმურია, დამარცხებული პარტიის წარმომადგენლები რევოლუციას გვიწყობენ აქ. გაგიგიათ ასეთი რაღაც? ეტყობა ბოლო პერიოდი აქვს დარჩენილი და უნდა ბოლომდე ჩაიდინოს მავნებლობა. მოგიწოდებთ, რომ დაგმოთ ის, რაც ჩაიდინეს თქვენს თქვენს მიერ წახალისებული ახალგაზრდებს გუშინ. რომელიმე გამოდით, გელოდებით, რომ დაგმოთ ეს. თუ ეს თქვენთვის მისაღებია, რომ თქვენს ქვეყანაში პარლამენტის შენობას ახალგაზრდებმა დაუშინონ პიროტექნიკა და ცეცხლი გაუხსნან. ჩვენ ვნახეთ როგორ რეაგირებთ მანდ და საქართველო “დაბალი ღობე” გგონიათ და აქ ყველაფერი მოსულა ხომ? არა ბატონებო”, – განაცხადა ირაკლი ზარქუამ.

მეათე არჩევნები გვიახლოვდება და იმ პოლიტიკური მიდგომებით, რასაც ვუყურებთ ამ წლების განმავლობაში და რაც ვნახეთ გუშინ, არამგონია ჩვენს ოპოზიციას რაიმემ უშველოს, – განაცხადა პარტია „ხალხის ძალის“ წევრმა დავით ქართველიშვილმა

წამყვანმა მას ჰკითხა, რა აჩვენა 31 მარტის შეკრებამ რუსთაველის გამზირზე, გამოჩნდა ოპოზიციის და სალომე ზურაბიშვილის შანსები, კონკრეტული გეგმა, პროტესტის განგრძობითობა, თუ უშანსობა.

„როგორც ამ ქვეყნის მოქალაქე, დაინტერესებული ვარ, რომ ხელისუფლებას ჰყავდეს კონსტრუქციული, კრიტიკული ოპოზიცია, რომელიც არ მისცემს საშუალებასა ხელისუფლებას რაღაც მიმართულებებში მნიშვნელოვანი შეცდომების დაშვების. თუმცა უკანასკნელი 13 წლის განმავლობაში თვალს ვადევნებთ ჩატარებულ ოთხ საპარლამენტო, სამ საპრეზიდენტო არჩევნებს თავისი პირველი და მეორე ტურით, გვიახლოვდება სამი ადგილობრივი თვითმმართველობის არჩევნები, სადაც მათ შორის ოპოზიციას ეძლევა საშუალება, დემოკრატიულ, თავისუფალ გარემოში მიიღონ მონაწილეობა. მეათე არჩევნები გვიახლოვდება და იმ პოლიტიკური მიდგომებით, რასაც ვუყურებთ ამ წლების განმავლობაში და რაც ვნახეთ გუშინ, არამგონია, ჩვენს ოპოზიციას რაიმემ უშველოს“, – აღნიშნა ქართველიშვილმა.

საქართველოს პრეზიდენტი მიხეილ ყაველაშვილი საქართველოს თავდაცვის ძალების დასავლეთისა და აღმოსავლეთის სარდლობების დაარსების დღეს სოციალურ ქსელში ეხმაურება.

ყაველაშვილის თქმით, ჯარისკაცები ყოველთვის გმირულად და ვაჟკაცურად იცავდნენ და იცავენ სამშობლოს.

„დღეს საქართველოს თავდაცვის ძალების დასავლეთისა და აღმოსავლეთის სარდლობების დაარსების დღეა. მოხარული ვარ, რომ ეს მნიშვნელოვანი თარიღი საქართველოს ვიცე-პრემიერთან, თავდაცვის მინისტრ ირაკლი ჩიქოვანთან, თავდაცვის ძალების ხელმძღვანელ პირებთან და ჯარისკაცებთან ერთად, სენაკის მე-2 ქვეით ბრიგადაში აღვნიშნე.

„სახმელეთო ჯარების გარდაქმნა და ორ ძლიერ და შეკრულ ავტონომიურ სტრუქტურად – დასავლეთისა და აღმოსავლეთის სარდლობებად ჩამოყალიბება მნიშვნელოვანი ნაბიჯი იყო საქართველოს თავდაცვის ძალების ოპტიმიზაციისა და გაძლიერების გზაზე. ამ ცვლილებამ ჩვენი ქვეყნის თავდაცვისუნარიანობის განმტკიცებასა და განვითარებაში დიდი როლი შეასრულა.

ჩვენი ჯარისკაცები ყოველთვის გმირულად და ვაჟკაცურად იცავდნენ და იცავენ სამშობლოს. ჩვენი ქვეყნის მშვიდობის უზრუნველყოფასთან ერთად, მნიშვნელოვანია საერთაშორისო უსაფრთხოება და მოხარული ვარ, რომ ჩვენს სამხედროებს დიდი წვლილი აქვთ შეტანილი გლობალური მშვიდობის შენარჩუნების საქმეში.

ჩვენ მუდამ გვემახსოვრება საქართველოს ტერიტორიული მთლიანობისა და მსოფლიოში მშვიდობის შენარჩუნებისათვის თავგანწირული ქართველი გმირები – არასდროს დავივიწყებთ მათ სიმამაცესა და თავდადებას.

არ არსებობს იმაზე უფრო ეროვნული და საპატიო საქმე, ვიდრე სამშობლოს მსახურებაა. მსურს, გამოვხატო უდიდესი პატივისცემა და მადლიერება თითოეული ჯარისკაცის მიმართ, რადგან საქართველოს ერთგულად, კეთილსინდისიერად და უდიდესი პასუხისმგებლობით ემსახურებიან. მათი პროფესიონალიზმი და ღირსეული საქმიანობა განაპირობებს ჩვენი ქვეყნის სტაბილურობასა და მშვიდობას.

გილოცავთ თავდაცვის ძალების დასავლეთისა და აღმოსავლეთის სარდლობების დაარსების

დღეს დარწმუნებული ვარ, ჩვენი ჯარისკაცები მუდამ იდგებიან ჩვენი სამშობლოს უსაფრთხოების სადარაჯოზე!“, – წერს მიხეილ ყაველაშვილი.

„ნაციონალურმა მოძრაობამ“ გუშინ რაც ჩაიდინა, არის სამარცხვინო, მაგრამ ესეც არ არის ახალი, რადგან 13 წელია, „ნაციონალური მოძრაობა“ თავს ესხმის ყველანაირ პროცესს, სადაც ცენტრში არ არის მიშა სააკაშვილი, – ამის შესახებ „ფედერალისტების“ ლიდერმა, თამარ ჩერგოლეიშვილმა განაცხადა.

ჩერგოლეიშვილის თქმით, სალომე ზურაბიშვილის ინიციატივაში ახალი არის ის, რომ ცდილობს მოჯადოებული წრის გარღვევას და შეთანხმებების მიღწევას.

„არსებობს ასეთი ძალიან კარგი ლეგენდა კიბოს, ქარიყლაპიასა და გედის შესახებ, რომლის სიბრძნე, მორალი იმაშია, რომ შენ ტვირთი შეგიძლია წინ წაიღო მხოლოდ მაშინ, თუ ერთი მიმართულებით მიგაქვს. აქამდე პოლიტიკური სპექტრი დადიოდა მოჯადოებულ წრეზე და ცდილობდა შეთანხმების მიღწევას იქ, სადაც ვერ თანხმდება. არა „ქართულ ოცნებასთან“, არამედ პირველ რიგში საკუთარ თავთან მარცხდებოდა. შეიძლება, ეს ვიღაცას ნაკლებად ამბიციურად მოეჩვენოს, რადგან მიჩვეულები არიან ამ პოლიტიკური სპექტრისგან ტყუილ, გაბუქებულ დაპირებებს, მაგრამ სალომე ზურაბიშვილის ინიციატივა არის ერთადერთი ოპტიმალური, სწორი გზა. ეს გზა არ უზღუდავს არავის, თუ რაღაც ჯადოსნური გეგმები აქვთ და სხვა გზები, ამ გზებით იარონ. უბრალოდ, ჩვენი კოორდინაციის ნაწილი ეს ვერ იქნება და თავისთვის იყვნენ. ის, რაც გუშინ „ნაციონალურმა მოძრაობამ“ ჩაიდინა, არის სამარცხვინო, მაგრამ ესეც არ არის ახალი, რადგან 13 წელია, „ნაციონალური მოძრაობა“ თავს ესხმის ყველანაირ პროცესს, სადაც ცენტრში არ არის მიშა სააკაშვილი. შესაბამისად, იმის გამო, რომ აქ ცენტრში არის პროტესტი, ხალხი და ხალხის ინტერესი, აქედან გამომდინარე, სააკაშვილი ცდილობს, რომ ამ პროცესის დისკრედიტაცია მოახდინოს. სალომე ზურაბიშვილმა გამოაცხადა ის, რაზეც ვიყავით შეთანხმებულები. არაადეკვატური მოლოდინები გააჩინა „ნაციონალური მოძრაობის“ უსაქციელობამ და მათი პოლიტიკოსების არასწორმა განცხადებებმა, ამიტომ სალომე ზურაბიშვილს გუშინ ვერაფერს ვუსაყვედურებდი“, – განაცხადა ჩერგოლეიშვილმა.

პარლამენტმა „უცხოეთის აგენტების რეგისტრაციის აქტი“, FARA-ს კანონპროექტი მესამე მოსმენით დაამტკიცა. დღევანდელ პლენარულ სხდომაზე ცვლილებებს მხარი 86-მა დეპუტატმა დაუჭირა.

კენჭისყრისას საქართველოს პარლამენტის თავმჯდომარემ, შალვა პაპუაშვილმა აღნიშნა, რომ მიღებულია ამერიკული სტანდარტისა და კანონის ზუსტი ასლი.

FARA-სთან ერთად, მიღებულია „სისხლის სამართლის კოდექსში“ დაგეგმილი ცვლილებები.

მიღებული კანონპროექტის მიხედვით, მოწესრიგდება უცხოური პრინციპალის აგენტად რეგისტრაციის საკითხები,  კერძოდ  – უცხოური პრინციპალის აგენტად რეგისტრაციის განაცხადი, სხვა სათანადო დოკუმენტების საჯაროობის უზრუნველყოფა; უცხოური პრინციპალის აგენტად რეგისტრირებული სუბიექტის მიერ ყოველწლიური საფინანსო დეკლარაციის წარდგენა; უცხოური პრინციპალის აგენტად რეგისტრირებული სუბიექტის რეგისტრაციის გაუქმება; უცხოური პრინციპალის აგენტის გამოსავლენად ან კანონპროექტით განსაზღვრულ მოთხოვნათა შესრულების შესამოწმებლად მონიტორინგის განხორციელება.

უცხოური პრინციპალის აგენტად რეგისტრაციისთვის თავის არიდება და კანონით განსაზღვრულ მოთხოვნათა შეუსრულებლობა სისხლის სამართლებრივი პასუხისმგებლობას გამოიწვევს. კანონის აღსრულება ანტიკორუფციულ ბიუროს დაევალება.

თბილისის მერის, კახა კალაძის განცხადებით, სალომე ზურაბიშვილი არც ლიდერია, არც ლიდერული თვისებები გააჩნია და შესაბამისად, ის ოპოზიციის გამაერთიანებელი ვერ იქნება.

როგორც მერმა ჟურნალისტებს შესაბამისი კითხვის პასუხად განუცხადა, ზურაბიშვილი არც ხელისუფლებისთვისაა საინტერესო და არც ოპოზიციისთვის.

„სალომე ზურაბიშვილი როგორც ჩვენთვის არ არის საინტერესო, ისე იმ რადიკალური დაჯგუფებისთვის. ის მათთვის საინტერესო იყო მაშინ, როდესაც პრეზიდენტის სტატუსი ჰქონდა. ზურაბიშვილი არც ლიდერია, არ ლიდერული თვისებები აქვს, შესაბამისად, ის ვერ იქნება ამ რადიკალური დაჯგუფების გამაერთიანებელი ან წარმომადგენელი. პირდაპირ რომ ვთქვათ, არსებითი მნიშვნელობა არ აქვს, ისინი გაერთიანებულები იქნებიან თუ დაშლილები. როდესაც შენ ქვეყნის წინააღმდეგ დგამ ნაბიჯებს, ხარ აგენტი, ემსახურები სხვა ქვეყნის ინტერესებს, ამ ქვეყანაში არანაირი მომავალი არ გაგაჩნია“, – განაცხადა კახა კალაძემ.

ამასთან, კითხვაზე, მოახერხებს თუ არა ოპოზიცია გაერთიანებას საერთო პლატფორმის ირგვლივ, თბილისის მერი პასუხობს, რომ ამას არანაირი მნიშვნელობა არ აქვს.

„ბევრჯერ გვინახავს გაერთიანებული ეს რადიკალური დაჯგუფება, რომელიც სხვადასხვა წარმომადგენლისგან შედგებოდა, თუმცა საბოლოო ჯამში, ეს არის ერთი ხელით მართული აგენტურა. შეიძლება დღეს სხვადასხვა სახელები დაირქვან, მაგრამ საბოლოო ჯამში, ერთ რამეს ემსახურებიან – გარე ძალებს. ყველაფერს აკეთებენ ქვეყნის წინააღმდეგ და, რა თქმა უნდა, ასეთ ადამიანებს, როგორც გაერთიანებულებს, ისე დაშლილებს, არანაირი პერსპექტივა და მომავალი არ გააჩნიათ“, – განაცხადა კახა კალაძემ.