ვინც მივიდა ოთხ საათზე აქციაზე, ყველა მივიდა დამხობის აქციაზე, რომელიც დაანონსებული იყო ბურჭულაძის და მისი პარტნიორების მიერ. როგორც კი ნახეს, რომ ეს დამხობა ჩავარდა, მაშინვე სამარცხვინოდ გაემიჯნნენ, – განაცხადა პარტია „ქართული ოცნების“ თავმჯდომარემ, პრემიერ-მინისტრმა ირაკლი კობახიძემ პარტიის ოფისში გამართულ ბრიფინგზე.

მან აღნიშნა, რომ ყველამ იცოდა, რომ 4 ოქტომბრის 16:00 საათისთვის დაანონსებული აქცია ხელისუფლების დამხობის აქცია იყო.

„ვინმეს რამე ხომ არ მოგვეჩვენა? ანუ ვინც მივიდა ოთხ საათზე აქციაზე, ყველა მივიდა დამხობის აქციაზე, რომელიც დაანონსებული იყო ბურჭულაძის და მისი პარტნიორების მიერ. როგორც კი ნახეს, რომ ეს დამხობა ჩავარდა, მაშინვე სამარცხვინოდ გაემიჯნნენ ბურჭულაძეს, ზოდელავას და სხვებს. რა თქმა უნდა, მათი საქციელიც სამარცხვინოა – ბურჭულაძის და ორგანიზატორების, მაგრამ მათზე ბევრად უფრო სამარცხვინოა იმ ადამიანების საქციელი, რომლებიც ჩავარდნილი დამხობის შემდეგ გაემიჯნნენ ბურჭულაძეს. ბურჭულაძის მიერ დაანონსებულ დამხობის აქციაზე მივიდნენ, დაიწყო ბურჭულაძემ დამხობა, ჩაუვარდა და ამის მერე გაემიჯნნენ”, – განაცხადა ირაკლი კობახიძემ.

ჟურნალისტის კითხვაზე, რომ ბურჭულაძის მოწოდების შემდეგ აქციის მონაწილეების ნაწილი რუსთაველის გამზირზე, პარლამენტის შენობის წინ დარჩა და ბურჭულაძეს მცირე ნაწილი გაჰყვა, ირაკლი კობახიძემ განაცხადა, რომ იყო ტაქტიკური ნაბიჯები და ამ ტაქტიკური ნაბიჯების მიხედვით მიიღეს შესაბამისი ნაბიჯები.

„ანუ ტაქტიკურად იყო გადანაწილებული მათი რესურსი, მაგრამ როგორც კი ნახეს, რომ ძალოვანი სტრუქტურები მოქმედებდნენ ეფექტიანად, მაშინვე დაიწყეს გამიჯვნა მთლიანად დამხობის აქციისგან, როცა საკუთარი ფეხით, თვითონ მივიდნენ დამხობის აქციაზე, ეს არავის მოგვჩვენებია. ოთხ საათზე ვინც მივიდა თავისუფლების მოედანზე, ყველა მივიდა დამხობის აქციაზე. დამხობა როგორ არის მშვიდობიანი პროტესტი?”, – განაცხადა პრემიერმა.

კითხვაზე, რატომ არ გაჰყვნენ აქციის მონაწილეები პაატა ბურჭულაძეს, ირაკლი კობახიძემ განაცხადა, რომ ჰქონდათ მონახაზი, რომლის მიხედვითაც ერთი ნაწილი უნდა წასულიყო ათონელის ქუჩაზე, უნდა შეჭრილიყვნენ პრეზიდენტის ადმინისტრაციაში და შემდეგ სხვა ჯგუფებს სხვა მიმართულებით უნდა ემოქმედათ.

„მაგრამ როგორც კი ნახეს, რომ პირველივე მცდელობა ჩავარდათ, მაშინვე სამარცხვინოდ გაემიჯნნენ ბატონ ბურჭულაძეს, ზოდელავას და სხვებს. ძალიან სამარცხვინოა ეს ყველაფერი, ესეც აჩვენებს „ნაცის“ სახეს”, – განაცხადა პარტიის თავმჯდომარემ.

რადიკალური ოპოზიციის უცხოელი პარტნიორები და ანტიქართული განცხადებებით გამორჩეული პოლიტიკოსები, 4 ოქტომბერს, მთელი დღის განმავლობაში ახალისებდნენ საქართველოში ხელისუფლების დამხობის პროცესს.

მიხაელ როთი, რასა იუკნევიჩიენე, მაია სანდუ, ანა ფოტიგა, მარკო მიჰკელსონი, ნატალი ლუაზო, ჟიგიმანტას პავილიონისი და სხვა უცხოელი აქტორები, რადიკალური ოპოზიციის მიერ გამართულ აქციას, რომლის მიზანიც, თავად აქციის ორგანიზატორების განცხადებითვე, ხელისუფლების დამხობა იყო, სოციალურ ქსელში მთელი დღის განმავლობაში ეხმიანებოდნენ და აქციას ღიად უჭერდნენ მხარს.

ლიეტუველმა ევროპარლამენტარმა რასა იუკნევიჩიენემ გამოაქვეყნა ძალადობრივი პროტესტის ფოტოებისგან შემდგარი ბანერი წარწერით: “ყველას მზერა თბილისისკენაა მიმართული”, მანამდე კი, იუკნევიჩიენე წერდა: “საქართველოს სჭირდება ჩვენი ყურადღება და მხარდაჭერა. დღეს ერთ-ერთი ყველაზე მნიშვნელოვანი საპროტესტო აქცია იმართება ევროპული საქართველოსთვის”.

რადიკალურ ოპოზიციას მხარდაჭერა გამოუცხადა მოლდოვის პრეზიდენტმა მაია სანდუმაც, რომლის განცხადებით, დემოკრატიის გაჩუმება შეუძლებელია.

“ჩემი ფიქრები საქართველოს ხალხთანაა, რომლებიც თავისუფლებისა და ევროპული მომავლისთვის იბრძვიან. დემოკრატიის გაჩუმება შეუძლებელია. მოლდოვა თქვენს გვერდითაა.” – აღნიშნავს სანდუ X-ზე.

ფრანგმა ევროპარლამენტარმა, ნატალი ლუაზომ კი, ოპოზიციონერ აქტივისტ ანა გვარიშვილის მიერ გავრცელებულ კადრებზე დაყრდნობით დაწერა: “რაღაც ხდება თბილისში. ქართველ ხალხს ყელში ამოუვიდა წარსულისა და მომავლის წართმევა. მათთან ერთად ვარ.”

კიდევ ერთი უცხოელი აქტორი, ესტონეთის პარლამენტის საგარეო საქმეთა კომიტეტის თავმჯდომარე მარკო მიჰკელსონიც მხარდაჭერას უცხადებს რადიკალებს და წერს: “ქართველი ხალხი არასოდეს დანებდება. გაუმარჯოს თავისუფალ, ევროპულ საქართველოს!”

გერმანიის ბუნდესტაგის საგარეო საქმეთა კომიტეტის ყოფილმა თავმჯდომარემ მიხაელ როთმა, საქართველოს მთავრობის მეთაურს “ეგრეთ წოდებული” უწოდა, ხოლო, მოძალადეების წინააღმდეგ გამოყენებულ სპეციალურ საპოლიციო ღონისძიებებს – სირცხვილი.

“საქართველოს მთავრობის ე.წ. მეთაური, სულ რაღაც ორი დღის წინ ცდილობდა ევროპელი ლიდერების წინაშე მნიშვნელოვან ფიგურად გამოჩენილიყო. დღეს კი მისი რეჟიმი ცრემლმდენი გაზითა და ძალადობით ომს უცხადებს საკუთარ ხალხს. რა სირცხვილია. ევროპავ, დაუდექი საქართველოს ხალხს მხარში.” – დაწერა როთმა X-ზე.

ყოფილმა ევროპარლამენტარმა, რადიკალური ოპოზიციის ერთ-ერთმა პარტნიორმა, ანა ფოტიგამ კი დაწერა: “ადგილობრივი არჩევნები საქართველოში. მმართველი პარტიის – „ქართული ოცნების“, რომელიც დომინირებულია პრორუსი ოლიგარქის, ბიძინა ივანიშვილის მიერ, შაბათის არჩევნები კიდევ ერთი ტესტია იმ თვალსაზრისით, შეუძლია თუ არა ხელისუფლებას ქვეყნის მართვის შენარჩუნება.

მთავარმა ოპოზიციურმა ძალებმა, “ერთიანი ნაციონალური მოძრაობის” ხელმძღვანელობით, არჩევნების ბოიკოტისკენ მოუწოდეს ამომრჩეველს.

ერთი წლის განმავლობაში განხორციელებული რეპრესიების ფონზე, 60-ზე მეტი პოლიტიკური ლიდერის დაკავების შემდეგაც, საქართველოს მოქალაქეები კვლავ მტკიცედ განწყობილნი არიან გააგრძელონ საპროტესტო გამოსვლები.

თბილისში პროტესტი დაიწყო, მიუხედავად პრემიერ-მინისტრ ირაკლი კობახიძის მუქარანარევი და ისტერიული განცხადებებისა, რომელმაც დემონსტრანტებს მიუთითა, რომ შესაძლო შედეგი ხანგრძლივი პატიმრობა იქნება. მათ წინააღმდეგ გამოყენებულ იქნა საპოლიციო ძალები და წყლის ჭავლი.”

ხელისუფლების დამხობის მოთხოვნით მიმდინარე აქციას მხარდაჭერა გამოუცხადა ლიეტუვის პარლამენტის წევრმა და თავდაცვის ყოფილმა მინისტრმა ლაურინას კაშჩუნასმა, რომელმაც X-ზე დაწერა: “სამშობლოს კავშირი – ლიეტუველი ქრისტიან-დემოკრატები” დღეს ქართველებს უდგანან გვერდში – სანამ რუსული გავლენისგან არ გათავისუფლდებით და ევროკავშირისა და ნატოს ნაწილი არ იქნებით”.

კაშჩუნასის განცხადება ლიეტუვის სეიმის საგარეო საქმეთა კომიტეტის თავმჯდომარის მოადგილე ჟიგიმანტას პავილიონისმაც გააზიარა და დაწერა: “ჩვენ დღეს ყველანი ქართველები ვართ!”

ხელისუფლების დამხობის მიზნით გამართულ აქციას მხარი დაუჭირა ბელორუსის ოპოზიციის ერთ-ერთი ლიდერმა, პაველ ლატუშკამ, რომელმაც X-ზე დაწერა: “ქართველები იბრძვიან თავისუფლებისთვის, დემოკრატიისთვის – ღირსეული, ევროპული მომავლისთვის, რომელსაც მათ ძალით ართმევენ.

ჩემი სრული მხარდაჭერა თქვენთანაა, ისევე როგორც, დარწმუნებული ვარ, ასობით ათასი ბელარუსი ადამიანის. გამარჯვება გმართებთ და გაიმარჯვებთ კიდეც.”

გერმანელი აქტივისტი, იურგენ ნაუდიტი, რომელიც ასევე აქტიურად უჭერს მხარს რადიკალებს, “დროას” წარმომადგენლის, მარიკა მიქიაშვილის პოსტს აზიარებს და წერს: “ეს არის რევოლუციური ნაპერწკალი – საქართველო ცხელდება. ეს შეიძლება გახდეს “ქართული ოცნების” მმართველობის დასაწყისის დასასრული, თუ მასები მტკიცედ იდგებიან. თვალი ადევნეთ მოვლენებს; თქვენ ქმნით ისტორიას.”

სახელმწიფო იდგება მოწოდების სიმაღლეზე. ჩვენ ყველგან დავიცავთ ეროვნულ ინტერესებს. ვინც მონაწილეობს უცხოური სპეცსამსახურების მიერ დაკვეთილ ოპერაციებში, ყველას გაეცემა საკადრისი პასუხი, – ამის შესახებ საქართველოს პრემიერ-მინისტრმა, ირაკლი კობახიძემ განაცხადა.

პრემიერის თქმით, ვინც სცადა ხელი აღემართა სახელმწიფოზე, ყველა მიიღებს უმკაცრეს პასუხს.

„ვინც სცადა ხელი აღემართა, ჩვენს სახელმწიფოზე უცხოელი სპეცსამსახურების მიერ ორგანიზებულ აქციაზე, ყველა მიიღებს უმკაცრეს პასუხს. საქართველო არ არის ის ქვეყანა, სადაც უცხოურ სპეცსამსახურებს შეიძლება, ვინმემ მისცეს ხელისუფლების დამხობის შესაძლებლობა. საქართველო არ არის ის ქვეყანა, სადაც უცხოურ სპეცსამსახურებს შეიძლება, ვინმემ მისცეს ხელისუფლების დამხობის შესაძლებლობა. გუშინდელი დამხობის აქცია იყო სპეცსამსახურების მიერ დაორგანიზებული ე.წ. 300-დღიანი პროტესტის გაგრძელება, პირდაპირი, ლოგიკური კავშირია 150-კაციან პროტესტებსა და გუშინდელ დამხობის აქციას შორის. აქედანაც მინდა, გამოიტანოთ დასკვნები, როგორი იქნება ჩვენი ხელისუფლების პოლიტიკა უცხოური აგენტების მიმართ და უცხოური სპეცსამსახურების აგენტების მიმართ. ჩვენ ვიქნებით უკომპრომისო ნებისმიერი მოძალადის მიმართ. სახელმწიფო იდგება მოწოდების სიმაღლეზე. ჩვენ ყველგან დავიცავთ ეროვნულ ინტერესებს. ვინც მონაწილეობს უცხოური სპეცსამსახურების მიერ დაკვეთილ ოპერაციებში, ყველას გაეცემა საკადრისი პასუხი“, – განაცხადა კობახიძემ.

არჩევნებმა მშვიდ, გამართულ და თავისუფალ გარემოში ჩაიარა, – ამის შესახებ ცენტრალური საარჩევნო კომისიის თავმჯდომარემ, გიორგი კალანდარიშვილმა ბრიფინგზე განაცხადა.

მისივე თქმით, ის ფაქტი, რომ პროცესი ფაქტობრივად ხარვეზების გარეშე წარიმართა, კიდევ ერთხელ ადასტურებს, რომ საარჩევნო ადმინისტრაცია არჩევნების დაგეგმვასა და ორგანიზებას მაღალი საერთაშორისო სტანდარტების შესაბამისად ახორციელებს.

“საარჩევნო ადმინისტრაციამ კიდევ ერთი მნიშვნელოვანი საარჩევნო დღე წარმატებით დაასრულა. ახლა უკვე მუნიციპალიტეტის ორგანოთა არჩევნებში, ფართო მასშტაბით პირველად იქნა გამოყენებული საარჩევნო ელექტრონული აპარატები და არჩევნების მოდერნიზების ეს ეტაპიც შედგა.

მიუხედავად იმისა, რომ მუნიციპალიტეტის ორგანოთა არჩევნები ადმინისტრირების თვალსაზრისით ერთ-ერთი ყველაზე კომპლექსური პროცესია, არჩევნებმა მშვიდ, გამართულ და თავისუფალ გარემოში ჩაიარა. ის ფაქტი, რომ პროცესი ფაქტობრივად ხარვეზების გარეშე წარიმართა, კიდევ ერთხელ ადასტურებს, რომ საარჩევნო ადმინისტრაცია არჩევნების დაგეგმვასა და ორგანიზებას მაღალი საერთაშორისო სტანდარტების შესაბამისად ახორციელებს.

პროცესის წარმატებით წარმართვაში ადმინისტრაციასთან ერთად განსაკუთრებული წვლილი ამომრჩევლებმა შეიტანეს, რომლებმაც ტექნოლოგიების გამოყენებით, შეუფერხებლად, მარტივად გააკეთეს არჩევანი. მადლობას ვუხდი მათ მაღალი სამოქალაქო პასუხისმგებლობის გამოჩენისა და აქტიურობისთვის, რაც ამ პროცესის ერთ-ერთი უმთავრესი მიღწევა და ღირებულებაა.

აქვე მინდა განსაკუთრებული მადლობა გადავუხადო კომპანია საერთაშორისო ვენდორ კომპანია „სმარტმატიკს“, რომელთან თანამშრომლობითაც წარმატებით გრძელდება არჩევნების მოდერნიზების პროცესი.

ასევე მინდა მადლობა გადავუხადო ამერიკულ კომპანია „Pro V&V”-ს, რომელმაც უკვე მეორედ, პროფესიულ დონეზე განახორციელა საარჩევნო ტექნოლოგიების შესაბამისობის აუდიტი და არ დატოვა კითხვები არჩევნებში ტექნოლოგიური საშუალებების გამოყენებასთან დაკავშირებით.

მადლობას ვუხდი ადგილობრივი და საერთაშორისო ორგანიზაციების დამკვირვებლებს, საარჩევნო სუბიექტებს, მედიას, რომლებიც აქტიურად იყვნენ ჩართული საარჩევნო პროცესში. თქვენმა ჩართულობამ, დაკვირვებამ და აქტიურობამ ხელი შეუწყო მოქალაქეების ინფორმირებას, პროცესის გაშუქებასა და მაქსიმალური გამჭვირვალობის უზრუნველყოფას.

და, რა თქმა უნდა, არჩევნების მაღალ პროფესიულ დონეზე ადმინისტრირებისთვის განსაკუთრებულ მადლობას ვუხდი საარჩევნო მოხელეებს, როგორც საუბნო ასევე საოლქო დონეზე, რომლებმაც შეძლეს კენჭისყრის პროცესის შეუფერხებლად წარმართვა. მათი თავდადება, მოთმინება, პროფესიონალიზმი და პასუხისმგებლობა იყო საიმედო საფუძველი, რომელზეც დაშენებულია დღევანდელი დღის წარმატება.

ყველა მონაწილე მხარის მიერ ერთობლივმა ძალისხმევამ დღეს კიდევ ერთხელ დაამტკიცა, რომ არჩევნები არა მხოლოდ ადმინისტრაციული პროცედურაა, არამედ პირველ რიგში არის საერთო საქმე.

აღსანიშნავია, რომ სწორედ ელექტრონული ტექნოლოგიების ფართო მასშტაბით გამოყენება გვაძლევს საშუალებას, დღეს, კენჭისყრის დასრულებიდან საათსა და 25 წუთში გაგაცნოთ წინასწარი პირველადი შედეგები.

აქვე შეგახსენებთ, რომ საარჩევნო უბნებს საქმიანობა ჯერ არ დაუსრულებიათ, ვინაიდან აპარატების მიერ დათვლის გარდა, კომისიები ხელით დამატებით დაითვლიან შედეგებს, რის შემდგომაც შედგება შემაჯამებელი ოქმები. ახლა საარჩევნო უბნებზე სწორედ ეს პროცესი მიმდინარეობს. მას შემდეგ, რაც შედგება საუბნო შემაჯამებელი ოქმები, როგორც მოდერნიზებულ, ისე ტრადიციულ საარჩევნო უბნებზე, ისინი უმოკლეს ვადაში მოეწოდება ცესკოს, აიტვირთება სპეციალურ ვებგვერდზე results.cec.gov.ge და ხელმისაწვდომი იქნება ნებისმიერი დაინტერესებული პირისთვის,” – განაცხადა კალანდარიშვილმა.

პარტია „ქართული ოცნება-დემოკრატიული საქართველოს” თბილისის მერობის კანდიდატი, დედაქალაქის მოქმედი მერი კახა კალაძე ამომრჩეველს კიდევ ერთხელ გამოცხადებული ნდობისთვის მადლობას უხდის.

საარჩევნო უბნების დახურვისა და ეგზიტპოლის შედეგების გამოქვეყნების შემდეგ კახა კალაძემ აღნიშნა, რომ „ქართული ოცნება” მორიგ გამარჯვებას ზეიმობს, რაც ქართველი ამომრჩევლის დამსახურებაა.

„გილოცავთ ყველას ამ შესანიშნავ გამარჯვებას. ვულოცავ სრულიად საქართველოს! კიდევ ერთი პასუხი ღირსეული ქართველების იმ უსამშობლო აგენტების წარმომადგენლების მიმართ – მშვიდობა საქართველოს, მეტი სიკეთე თბილისს! ჩვენ ძალიან ბევრი ვისაუბრეთ, თუ რამდენად მნიშვნელოვანია მშვიდობა იმის გათვალისწინებით, თუ რა ხდება მსოფლიოში, რა გამოწვევები და პოლიტიკური ინტერესებია. ყველა ვხვდებით, რომ შემთხვევითი არ არის, რაც ჩვენს ქვეყანაში ხდება. ეს მარტივი არ არის. უამრავი შეურაცხყოფა, ცილისწამება, მუქარა მოვისმინეთ, მაგრამ ჩვენი მტკიცე პოლიტიკით, ვიცავთ ქვეყნის ინტერესებს. მინდა, ვისარგებლო შემთხვევით და მადლიერება გამოვხატო – ვამაყობ, რომ ვარ ბიძინა ივანიშვილის თანამებრძოლი. მინდა, მადლიერება გამოვხატო ამ ადამიანის მიმართ, რადგან დღეს ჩვენს ქვეყანაში რომ სუფევს მშვიდობა, მისი გამჭრიახობის, მტკიცე ხასიათის, დამოკიდებულებისა და იმ პოლიტიკის დამსახურებაა, რომელსაც მისი ხელმძღვანელობით ვახორციელებთ”, – განაცხადა კახა კალაძემ.

დედაქალაქის მერმა მადლობა გადაუხადა პრემიერ-მინისტრ ირაკლი კობახიძეს, პარლამენტის თავმჯდომარე შალვა პაპუაშვილსა და თბილისის საარჩევნო შტაბის ხელმძღვანელს, ლევან მაჭავარიანს. განსაკუთრებული მადლობა კი კახა კალაძემ ქართველ ამომრჩეველს გადაუხადა.

„მინდა, მადლობა გადავუხადო პრემიერ-მინისტრს, ირაკლი კობახიძეს მხარდაჭერისთვის, თანადგომისთვის. ჩვენი სიძლიერე ზუსტად იმაში მდგომარეობას, რომ ვართ ერთად, ვართ ერთი დიდი ოჯახი. მინდა, მადლობა გადავუხადო პარლამენტის თავმჯდომარეს, შალვა პაპუაშვილს. მადლობა ასევე მინდა, გადავუხადო თბილისის საარჩევნო შტაბის ხელმძღვანელს, ლევან მაჭავარიანს. განსაკუთრებული მადლობა კი თქვენ, ჩემს თანამებრძოლებს, ჩვენს მხარდამჭერებს. ზუსტად თქვენი თანადგომითა და მხარდაჭერით შევძელით ძალიან მნიშვნელოვანი გამარჯვების მოპოვება. ხვალიდან ვიწყებთ იმ პროექტების განხორციელებას, რომლებიც ქალაქისთვის მნიშვნელოვანია”, – აღნიშნა კახა კალაძემ.

მისივე თქმით, ერთადერთი გუნდი, ვისაც რეალურად შეუძლია, ქალაქი განავითაროს, „ქართული ოცნება-დემოკრატიული საქართველოა”, რაც არჩევნების შედეგებზეც აისახა.

„ერთადერთი გუნდი ვართ, ვისაც რეალური ხედვა ჰქონდა მთელი კამპანიის განმავლობაში და რომელიც კონკრეტულ პროექტებზე, გასაკეთებელ საქმეებსა და გამოწვევებზე საუბრობდა. არ მოგვრიდებია გვესაუბრა, თუ რა პრობლემებია დედაქალაქში. ზუსტად ვიცით, რა სჭირდება თბილისს, რა უნდა გაკეთდეს და როგორი უნდა იყოს ის ოთხი წლის შემდეგ. ძალიან დიდი მადლობა იმისთვის, რომ გვერდში დაგვიდექით, მხარი დაგვიჭირეთ. გპირდებით, როგორც დედაქალაქის მერი, რომ ამ პატივისცემასა და სიყვარულს ძალიან კარგი საქმეებით დავაბრუნებ. წარმატებები და გამარჯვებები ჩვენს ქვეყანას. თბილისს და ჩვენს გამარჯვებას გაუმარჯოს! ღმერთი იყოს სრულიად საქართველოს მფარველი”, – განაცხადა თბილისის მერმა.