29 დეკემბერს არაფერი მთავრდება, შეიძლება, პირიქით, უფრო მნიშვნელოვანი პროცესები დაიწყოს, ეს არის აქ მთავარი, მე არ მაქვს მოლოდინი, რომ 29-მდე ჩაინიშნება ახალი არჩევნები და ჩვენ საარჩევნო პროცესში გადავალთ, – ამის შესახებ თამარ ჩუგოშვილმა პრეზიდენტ სალომე ზურაბიშვილთან შეხვედრის შემდეგ განაცხადა, სადაც სამოქალაქო სექტორისა და პოლიტიკური პარტიების წარმომადგენლები იმყოფებოდნენ.

ჩუგოშვილის თქმით, ახალ არჩევნებამდე ბევრი რამეა გასაკეთებელი.

„ჩვენ მოგვიწევს 29-ის მერეც საპროტესტო პროცესებში ყოფნა. ეს მარტივი არ არის. ბრძოლა გასაგრძელებელია. ეს პარლამენტი რომ არალეგიტიმურია და გასულია კონსტიტუციური ჩარჩოდან, ეს უკვე ცხადია, ყველამ იცის. დათხოვნა და ახალი თარიღის გამოცხადება მე პირადად არ მიმაჩნია სწორად და არ ვფიქრობ, რომ ეს არის გამოსავალი და საჭირო. ბევრი სხვა რამ არის მანამდე გასაკეთებელი, ვიდრე ახალი რიცხვები დადგინდება. ეს არის პროტესტის სხვადასხვა ფორმები, პარტიების უფრო მეტი კონსოლიდაცია და საზოგადოებრივი ჯგუფებისგან კიდევ უფრო მეტი კრეატივის შემოტანა. არის მნიშვნელოვანი ელემენტი ბიზნესი. ეკონომიკა არის მნიშვნელოვანი კომპონენტი ამ კრიზისში. ძალიან ბევრი ბიზნესია, რომელიც აფიქსირებს ღიად თავის პოზიციას და ეს ყველაფერი არის გასაგრძელებელი“, – განაცხადა ჩუგოშვილმა.

„ხალხის ძალის“ წევრი ზურაბ ქადაგიძე საპარლამენტო არჩევნებზე IRI-ის დასკვნას ეხმიანება და აღნიშნავს, რომ ეუთო/ოდირის დასკვნის გასაბათილებლად გამოაქვეყნეს.

ქადაგიძე აღნიშნავს, რომ ამით ვერც „ეუთოს“ მისიას ჩაანაცვლებენ და ვერც რეალობას შეცვლიან.

„ვერაფერს უხერხებენ „ეუთოს“ დასკვნას და ჟონგლიორობენ, იქნებ გადაფარონ.

რესპუბლიკური ინსტიტუტის, ყველა ბოლო კვლევა, რომ 10%-იანი ცდომილებით ხასიათდებოდა და სოციოლოგიის მაგიერ, აზრის ფორმირებას ემსახურებოდა, ჰგონიათ საქართველოს მოქალაქეებს მოკლე მეხსიერება აქვთ?!

26 ოქტომბრის არჩევნების მაღალი აქტივობა და სახელისუფლებო პარტიის 1 120 000-იანი მხარდაჭერა, მიუხედავად სამი ვადისა, სწორედ ორმაგმა სტანდარტებმა, გლობალური პოლიტ-კონიუნქტურის დაძალებამ და უბრალოდ, უსამართლო დამოკიდებულებებმა განაპირობა. აი ისეთმა, როგორიც “IRI”-ისა და მის პარტნიორ ორგანიზაციებს ახასიათებდათ, განსაკუთრებით ბოლო წლებში.

ამიტომაც გამოაგორეს ახლა, რომ რამენაირად „ეუთოს“ დასკვნა გააბათილონ.

რეალობა ერთია – მთავარმა სადამკვირვებლო მისიამ კონკრეტულად, მკაფიოდ დადო დასკვნა, რომ არჩევნები შედგა.

ახლა, რამდენიც გინდათ იჟონგლიორეთ, ვერც „ეუთოს“ მისიას ჩაანაცვლებთ და ვერც რეალობას შეცვლით.

ხვალ „NDI“ გამოვა და დაგვმოძღვრავს, ზეგ ალბათ, “ჰელსინკის კომისია” და ასე გააგრძელებენ ყეფას…არა და ქართული ქარავანი კარგა ხანია თავის გზას გაუყვა !”- წერს ზურაბ ქადაგიძე.

„ველოდებოდი IRI-ს „შეფასებას“, უფრო სწორედ ეუთო/ოდირის ისედაც კრიტიკული დასკვნის ინტერპრეტირებას – მისი „კოშმარიზაციისა“ და „დემონიზაციის“ კუთხით. ეს ხომ სწორედ ის მკვლევარი კომპანიაა, რომლის არც ერთი წინასაარჩევნო პროგნოზი მინიმალურად ადეკვატურ ცდომილებასთან ახლოსაც კი არ იყო“, – წერს „ხალხის ძალის“ წევრი დავით ქართველიშვილი სოციალურ ქსელში.

ქართველიშვილის შეფასებით, არაერთ თავმოყვარე სახელმწიფოში, IRI-ს „ობიექტურობასა“ თუ „პროფესიონალიზმის“, მათ მიერ გამოყენებული კვლევების მეთოდოლოგიისა თუ სიზუსტის, მიღებული შედეგების ინტერპრეტირების მიმართ უამრავი კითხვები წარმოშვეს.

მისივე თქმით, არა მხოლოდ საქართველოში, არამედ მის ფარგლებს გარეთ IRI-მ, როგორც მიუკერძოებელმა “არბიტრმა” დიდი ხანია ყოველგვარი პატივისცემა და ნდობა დაკარგა.

„სიმართლე გითხრათ – ველოდებოდი IRI-ს „შეფასებას“, უფრო სწორედ ეუთო/ოდირის ისედაც კრიტიკული დასკვნის ინტერპრეტირებას – მისი „კოშმარიზაციისა“ და „დემონიზაციის“ კუთხით. ეს ხომ სწორედ ის მკვლევარი კომპანიაა, რომლის არც ერთი წინასაარჩევნო პროგნოზი მინიმალურად ადეკვატურ ცდომილებასთან ახლოსაც კი არ იყო. ეს ის ორგანიზაციაა, რომელიც ახერხებს ერთ და იგივე რესპოდენტებთან პატრიარქის 90%-იანი პოპულარობა, NATO-ში გაწევრიანების 85%-იანი მოლოდინი და ტერიტორიული მთლიანობის მიმართ მოსახლეობის მხოლოდ 18%-იანი ინტერესი გააერთიანოს.

არ იფიქროთ, რომ მას მხოლოდ საქართველოში აქვს „სამიზნე“ მორყეული. 2021 წელს ყირგიზეთში ჩატარებული კვლევებით, IRI-მ დააფიქსირა მოქმედი პრეზიდენტის სადირ ჟაპაროვის მიმართ მოსახლეობის ნდობის კლება სულ რაღაც 9 თვეში 51%-დან – 32%-მდე, რამაც ყირგიზეთის ოპოზიციაშიც კი გაკვირვება გამოიწვია. ანალოგიური პოლიტ-კონიუქტურული კვლევებით IRI-მ თავი დაამახსოვრა სომხეთსაც, სადაც 2023 წელს კვლევის შედეგებმა დააფიქსირეს გამოკითხულთა შორის აზერბაიჯანთან სამშვიდობო ხელშეკრულების ხელმოწერის მომხრეთა 56%, მაშინ როდესაც ყველა პარალელური და ობიექტური კვლევებით ამ ხელშეკრულების მოწინააღმდეგეთა რიცხვი 80%-ს წარმოადგენდა.

ამ და სხვა მაგალითებმა არაერთ თავმოყვარე სახელმწიფოში, IRI-ს „ობიექტურობასა“ თუ „პროფესიონალიზმის“, მათ მიერ გამოყენებული კვლევების მეთოდოლოგიისა თუ სიზუსტის, მიღებული შედეგების ინტერპრეტირების მიმართ უამრავი კითხვები წარმოშვეს. არა მხოლოდ საქართველოში, არამედ მის ფარგლებს გარეთ IRI-მ, როგორც მიუკერძოებელმა „არბიტრმა“ დიდი ხანია ყოველგვარი პატივისცემა და ნდობა დაკარგა“, – წერს ქართველიშვილი.

როდესაც ვამბობთ, რომ ამერიკის ახალი ადმინისტრაცია მნიშვნელოვანწილად გამოხატავს პოზიციებს, რომელიც ემთხვევა საქართველოს ხელისუფლების ხედვებს და პოზიციას, ეს იმას არ ნიშნავს, რომ ავტომატურად მოხდება ყველაფერი, მუშაობაა საჭირო, – განაცხადა პარლამენტის პირველმა ვიცე-სპიკერმა გიორგი ვოლსკიმ.

„ახალი ადმინისტრაცია ჩვენ გვესახება იმ ძალად, რომელიც ჩამოაყალიბებს სამართლიან ატმოსფეროს მთელს მსოფლიოში და ამ მძიმე პროცესებს დაუდებს ბოლოს“, – აღნიშნა გიორგი ვოლსკიმ.

ვერ გეტყვით დღეს ვნახავთ თუ არა კონკრეტულ გადაწყვეტილებას, რადგან ამ წუთას გადაწყვეტილების მიმღები საქართველოს პრეზიდენტია – ჩემი პირადი პოზიციაა პარლამენტის დათხოვნა და ვადამდელი არჩევნები! სხვა გამოსავალს ვერ ვხედავ,- ამის შესახებ „კოალიცია ცვლილებისთვის“ ლიდერმა ნიკა გვარამიამ პრეზიდენტთან ოპოზიციის შეხვედრამდე ჟურნალისტებს განუცხადა.

მისი თქმით, დღეს სახალხო პროტესტის მიმართულებით არავის არაფერი სალაპარაკო არ აქვს, მაგრამ პოლიტიკოსებმა პოლიტიკური გადაწყვეტილებები უნდა მიიღონ.

„სახალხო პროტესტის მიმართულებით არავის არაფერი სალაპარაკო არ აქვს. დღეს რომ პოლიტიკოსებზე ლაპარაკობენ, ეს სამართლიანია, იქიდან გამომდინარე, თუ რა ჩანს. მაგრამ პოლიტიკოსები ბევრი საქმით არიან დაკავებულები და ყველაფერი არ ჩანს. სამაგიეროდ, შედეგებს ვხედავთ, მათ შორის სანქციების, არაღიარების და ა.შ. სახით. თუმცა საბაზისო მნიშვნელობა ყველა გადაწყვეტილებისთვის, რაც არსებობს და რაც კიდევ იქნება მიღებული, სახალხო პროტესტია, რადგან ძალაუფლება ხალხისაა და მას ეს ძალაუფლება უნდა დაუბრუნდეს. ხალხი ამ ძალაუფლებას იბრუნებს. რაც შეეხება პოლიტიკოსებს, პოლიტიკოსებმა პოლიტიკური გადაწყვეტილებები უნდა მიიღონ აუცილებლად. ეს არ ნიშნავს იმას, რომ სახალხო პროტესტზე დგომა ან ამის მხარდაჭერა ჩვენი, როგორც მოქალაქეების მხრიდან, საკმარისია. ვერ გეტყვით დღეს ვნახავთ თუ არა კონკრეტულ გადაწყვეტილებას იმიტომ, რომ ჩვენ, პოლიტიკური პარტიები ამ წუთას ამ გადაწყვეტილებას არ ვიღებთ. ამ წუთას გადაწყვეტილების მიმღები საქართველოს პრეზიდენტია.

ჩემთვის ერთი რამ ნათელია და ჩემი პირადი პოზიციაა – პარლამენტის დათხოვნა და ვადამდელი არჩევნები! სხვა გამოსავალს ვერ ვხედავ. ამაზე ვხედავ რეაქციას„ქართული ოცნების“, რომელიც აცხადებს, რომ ამის გამო ყველას დაიჭერს. „ქართული ოცნების“ რეაქციები ცხადყოფს, რისი ეშინიათ მათ რეალურად“, – განაცხადა ნიკა გვარამიამ.

სალომე ზურაბიშვილი გამოუვალ მდგომარეობაშია, ცდილობს, არჩევნების ჩანიშვნისთვის ახალი საფუძველი მოიფიქროს, ხვეწნა-მუდარით გამოდის, როგორმე იმ სიტუაციიდან გამოვიყვანოთ, რაშიც პატრონებმა ჩააგდეს, – ამის შესახებ პარლამენტის იურიდიულ საკითხთა კომიტეტის თავმჯდომარემ, არჩილ გორდულაძემ განაცხადა.

მისი თქმით, სალომე ზურაბიშვილს უნდა, საბჭო შექმნას, რევკომი აღადგინოს ან რეპრესიები აამოქმედოს, ოპოზიციის შედეგი იქნება ნული, რაც პოლიტიკური ნულები არიან, იგივე დარჩებიან.

„სალომე ზურაბიშვილი კონსტიტუციას ფეხქვეშ რომ თელავს, სამწუხაროდ, ეს ახალი არ არის, მაგრამ საზოგადოებას შევახსენებ, რომ არჩევნების დანიშვნას სამი საფუძველი აქვს: როცა საპარლამენტო ციკლის ოთხწლიანი ვადა გადის, პარლამენტი მთავრობას ორჯერ ნდობას არ უცხადებს და სასამართლოს მიერ არჩევნების ბათილად ცნობა ხდება. საზოგადოებამ კარგად იცის, ქვეყანაში ეს საფუძვლები არსებობს თუ არა. სალომე ზურაბიშვილი ახლა გამოუვალ მდგომარეობაშია და ხვეწნა-მუდარით გამოდის, როგორმე იმ სიტუაციიდან გამოვიყვანოთ, რაშიც პატრონებმა ჩააგდეს. ცდილობს, ახალი საფუძველი მოიფიქროს, რათა არჩევნები ჩაინიშნოს. ამ დავალების შესრულებაში არასოდეს დავეთანხმებით. უნდა, საბჭო შექმნას და უნდა, რევკომი აღადგინოს ან რეპრესიები აამოქმედოს, მათი შედეგი ნული იქნება, რაც პოლიტიკური ნულებიც არიან, იგივე დარჩებიან“, – განაცხადა არჩილ გორდულაძემ.