უახლოეს მომავალში დაიწყება მზადება თვითმმართველობის არჩევნებისათვის, პირობას ვაძლევ საზოგადოებას, რომ “ქართული ოცნება” მოიპოვებს მეათე დამაჯერებელ გამარჯვებას – ჩვენი ოპონენტები დამარცხებისათვის არიან განწირულები, – ამის შესახებ „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა მამუკა მდინარაძემ უმრავლესობის სხდომის დასრულების შემდეგ ბრიფინგზე განაცხადა.

როგორც მდინარაძემ ბრიფინგზე განაცხადა, მისი პარტიის განცხადებული მიზანია, 64-ვე მუნიციპალიტეტში არჩევნების მოგება და დამაჯერებელი გამარჯვება, ხოლო “აგენტურული პარტიები ვეღარასდროს გაიმარჯვებენ”.

“ერთ-ერთი საინტერესო საკითხი არის თვითმმართველობის მოახლოებული არჩევნები. მომდევნო დღეებში ნამდვილად არა, მაგრამ უახლოეს მომავალში დაიწყება მზადება არჩევნებისათვის, რომელშიც ჩართული იქნება პარტიული სტრუქტურის ყველა რგოლი. ჩვენი გაცხადებული მიზანია, რომ 64-ვე მუნიციპალიტეტში მოვიგოთ არჩევნები როგორც მერის, ასევე, საკრებულოს არჩევნებზეა საუბარი და გავიმარჯვოთ დამაჯერებლად, რისთვისაც, როგორც აღვნიშნე, უახლოეს პერიოდში დავიწყებთ მზადებას და პირობას ვაძლევ საზოგადოებას, რომ რიგით მე-10 არჩევნებში “ქართული ოცნება” მოიპოვებს მე-10 დამაჯერებელ გამარჯვებას.

ჯერ კიდევ არის დრო და ჩვენი ოპონენტები (ოპონენტებად თუ იწოდებიან) არ ვიცი, რა გადაწყვეტილებას მიიღებენ, მაგრამ, ნებისმიერ შემთხვევაში, ისინი დამარცხებისათვის არიან განწირულები, რადგან საქართველოში აგენტურული პარტიები ვეღარასდროს გაიმარჯვებენ”, – განაცხადა მამუკა მდინარაძემ.

 აგენტი არ შეიძლება საკუთარ სამშობლოს ემსახურებოდეს, ის ემსახურება იმას, ვინც ფულს უხდის, ვინც “დაავერბოვკა” და დავალებებს აძლევთ. დღეს, ჩემი ქვეყნის ტერიტორიაზე დგას რუსეთის საოკუპაციო ჯარი, რომელიც დიდად არ აწუხებდა ამ ხალხს, ვიდრე უკრაინის ომი არ დაიწყო და რუსეთი არ შეიჭრა უკრაინაში, – ამის შესახებ “ქართული ოცნების” აღმასრულებელმა მდივანმა, საპარლამენტო უმრავლესობის ლიდერმა, მამუკა მდინარაძემ, სამოქალაქო საზოგადოების ფონდის ევროინტეგრაციის პროგრამის მენეჯერის, ვანო ჩხიკვაძის სტატიაზე საუბრისას განაცხადა, რომელშიც ჩხიკვაძე ბრიუსელს ზომების მიღებას სთხოვს, მათ შორის, უვიზო მიმოსვლის შეჩერებას.

როგორც მამუკა მდინარაძემ აღნიშნა, სანამ რუსეთი უკრაინაში არ შეიჭრა, მანამდე ჩხიკვაძის მსგავსი ადამიანებისთვის საქართველოს ტერიტორიაზე მდგომი საოკუპაციო ჯარები და ომში დაღუპული გმირები პრობლემა არ იყო. უმრავლესობის ლიდერის შეფასებით, ის, რასაც ვანო ჩხიკვაძე და მთლიანად, აგენტურა აკეთებს, საკუთარი ქვეყნის ღალატია. “მანამდე არ აწუხებდათ და ზოგი რუსი ბანი იყო, ზოგი რუსეთში დადიოდა და კონცერტებს ატარებდა, ზოგი კულტურული ღონისძიებების ჩატარებას სთხოვდა რუსებს – საქართველოს დაღუპული გმირი მათთვის პრობლემა არ იყო, მაგრამ, უკრაინაში დაიწყო თუ არა ომი, მერე გახდა საშინელება რუსეთი, ისე, რომ მისი ხსენებაც არ შეიძლებოდა და ეკონომიკაში ტურიზმის იმ რგოლის მონაწილეობაზე, ტურისტის ჩამოსვლაზე ყოფილიყო ლაპარაკი, რომელიც ეკონომიკას ასტიმულირებდა, ეს იყო ღალატი, მაგრამ მანამდე თვითონ ეპატიჟებოდნენ. ასეთი ჩხიკვაძეები – აგენტურა, გაბრაზდნენ მას შემდეგ, რაც უკრაინაში შეიჭრა რუსეთი და ქართველი გმირები რომ დაგვიხოცა და აწამა აქ, მაშინ მათთვის არ იყო პრობლემა. ამას ორმაგი სტანდარტი რომ დავარქვა, ესეც რბილ შეფასებად მიმაჩნია, ამიტომ ეს არის მოღალატეობა საკუთარი ქვეყნის, რასაც ეს ხალხი სჩადის ამ მოქმედებით.” – განაცხადა მამუკა მდინარაძემ.

საქართველოს პრეზიდენტის, მიხეილ ყაველაშვილის ოფიციალური ვიზიტი სომხეთის რესპუბლიკაში დაიწყო.

„ზვარტნოცის“ საერთაშორისო აეროპორტში საქართველოს პრეზიდენტის დახვედრის ცერემონია გაიმართა. მიხეილ ყაველაშვილს აეროპორტში სომხეთის რესპუბლიკის ვიცე-პრემიერი ტიგრან ხაჩატურიანი დახვდა.

ვიზიტის ფარგლებში, საქართველოს პრეზიდენტი მაღალი რანგის შეხვედრებს გამართავს სომეხ კოლეგასთან ვაჰაგნ ხაჩატურიანთან და პრემიერ-მინისტრ ნიკოლ ფაშინიანთან. პრეზიდენტი ასევე, შეხვდება ყოველთა სომეხთა კათალიკოს გარეგინ მეორესთან.

მიხეილ ყაველაშვილი სომხეთის რესპუბლიკაში დელეგაციასთან ერთად იმყოფება, რომლის შემადგენლობაშიც არიან პრეზიდენტის ადმინისტრაციის უფროსი ქეთევან კვინიკაძე, საგარეო საქმეთა მინისტრის მოადგილე ლაშა დარსალია, საქართველოს პარლამენტის თავმჯდომარის პირველი მოადგილე გიორგი ვოლსკი, დეპუტატები – სამველ მანუკიანი და სუმბატ კიურეღიანი.

საქართველოს გააჩნია პოტენციალი, რეგიონში უსაფრთხოებისთვის იზრუნოს, როგორც ნეიტრალურმა მოთამაშემ, როგორც ქვეყანამ, რომელიც დაინტერესებულია სომხეთსა და აზერბაიჯანს შორის ურთიერთობების მოგვარებით, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.

დეპუტატმა საქართველოს პრეზიდენტის, მიხეილ ყაველაშვილის სომხეთში ვიზიტი შეაფასა.

მისივე თქმით, სტრატეგიულ პარტნიორთან ურთიერთობის განვითარება ხელისუფლების საგანგებო ინტერესის სფეროს წარმოადგენს.

„ზოგადად, მნიშვნელობა აქვს იმ სიმბოლიზმს, რომელიც ამ ვიზიტს თან ახლავს. ახლად არჩეული პრეზიდენტი ჩავიდა ბაქოში, ჩამოვიდა ერევანში, დელეგაციასთან ერთად გარკვეულ საკითზებზე საუბარია, მათ შორის საგანგებოდ მნიშვნელოვანია იმის კიდევ ერთხელ ხაზგასმა, რომ საქართველოს გააჩნია პოტენციალი, რომ რეგიონში უსაფრთხოებისათვის იზრუნოს, როგორც ნეიტრალურმა მოთამაშემ, როგორც ქვეყანამ, რომელიც დაინტერესებულია სომხეთსა და აზერბაიჯანს შორის პრობლემების მოგვარებით, ურთიერთობების მოგვარებით.

ვფიქრობ, ერთი მხარეც და მეორე მხარეც გამოხატავს ამ დამოკიდებულებას, იგივე დამოკიდებულებას რომელიც სულ ახლახანს თბილისში ყოფნის დროს საგარეო უწყებების ხელმძღვანელებმა დააფიქსირეს ჩვენს საგარეო საქმეთა მინისტრთან შეხვედრისას.

საქართველოს პრეზიდენტის ჩასვლა სიმბოლოს წარმოადგენს ჩვენი ამ დამოკიდებულების. სამეზობლოში ურთიერთობების განვითარება, მით უმეტეს სტრატეგიულ პარტნიორთან, არის ჩვენი საგანგებო ინტერესის სფერო“,- განაცხადა გია ვოლსკიმ.

საქართველოს პრეზიდენტი მიხეილ ყაველაშვილი, დელეგაციასთან ერთად, ოფიციალური ვიზიტით დღეს სომხეთის დედაქალაქს ეწვია. ვიზიტის ფარგლებში  ყაველაშვილს სომხეთის პრეზიდენტი სასახლეში უმასპინძლებს. ოფიციალური ვიზიტის ფარგლებში საქართველოს პრეზიდენტი სომხეთის პრემიერ-მინისტრს, ნიკოლ ფაშინიანს და ყოველთა სომეხთა კათალიკოსს, გარეგინ მეორეს შეხვდება.