ევროპული პოლიტიკური გაერთიანების მე-4 შეხვედრაზე პრემიერ-მინისტრს ჰქონდა სხვადასხვა ლიდერებთან კომუნიკაციის შესაძლებლობა, სამიტის გახსნაზე ვფიქრობ, იყო ძლიერი გზავნილი და კიდევ ერთხელ ხაზი გაესვა ევროპული ოჯახის კონსოლიდაციის და ერთიანობის მნიშვნელობას, – ამის შესახებ საგარეო საქმეთა მინისტრმა ილია დარჩიაშვილმა გაერთიანებულ სამეფოში ჟურნალისტებს განუცხადა.

მისი თქმით, აღნიშნული ფორმატი არის ერთ-ერთი მექანიზმი, რომლითაც საქართველო ცდილობს, უფრო მეტად დაუახლოვდეს ევროპულ ოჯახს.

„დღეს ძალიან მნიშვნელოვანი ღონისძიება ტარდება გაერთიანებულ სამეფოში. ჩვენ გვახსოვს, რომ აღნიშნული პლატფორმა შეიქმნა პრეზიდენტ მაკრონის ინიციატივით და ემსახურება მთავარ მიზანს, რომ ქვეყნები, რომლებიც მიისწრაფვიან ევროკავშირში გაწევრიანებისკენ და არიან ევროპული ოჯახის წევრები, უფრო მეტად დაახლოვდნენ და ეს არის ერთ-ერთი მექანიზმი, რომლითაც საქართველოც ცდილობს, უფრო მეტად დაუახლოვდეს ევროპულ ოჯახს, ევროკავშირს. ჩვენ ცალკე, ინდივიდუალური, ორმხრივი ფორმატი გვაქვს ევროკავშირთან, რომელიც არის მთავარი ხაზი ჩვენი ევროინტეგრაციის, თუმცა ევროპული პოლიტიკური გაერთიანების პლატფორმა არის ჩვენთვის ერთ-ერთი სასარგებლო მექანიზმი, იმისათვის, რომ საქართველომ გააგრძელოს წარმატებული ევროპული ინტეგრაცია.

დღეს საქართველოს პრემიერ-მინისტრს ჰქონდა სხვადასხვა ლიდერებთან კომუნიკაციის შესაძლებლობა. გახსნის ღონისძიებაზე ერთ-ერთი მთავარი თემა იყო უკრაინა და ის გამოწვევები, რომელიც გვაქვს უსაფრთხოების თვალსაზრისით. ვფიქრობ, იყო ძლიერი გზავნილი და კიდევ ერთხელ ხაზი გაესვა ევროპული ოჯახის კონსოლიდაციის და ერთიანობის მნიშვნელობას”, – განაცხადა ილია დარჩიაშვილმა.

საგარეო საქმეთა მინისტრის თქმით, პრემიერ-მინისტრმა სხვადასხვა ლიდერებთან ერთად მონაწილეობა მიიღო მრგვალი მაგიდის ფორმატში, რომლის მთავარი თემა იყო  ენერგეტიკა და დაკავშირებადობა.

„მრგვალი მაგიდის ფორმატში პრემიერ-მინისტრი მონაწილეობდა სხვადასხვა ლიდერებთან ერთად. საკითხი ეხებოდა ენერგეტიკას და დაკავშირებადობას და საქართველო არის ძალიან მნიშვნელოვანი მონაწილე ამ პროცესის, ერთი მხრივ, ჩვენი გეოგრაფიული მდებარეობის თვალსაზრისით და მეორე მხრივ, ჩვენი როლის კუთხით, იმისთვის, რომ ეფექტურად შევძლოთ აღმოსავლეთის და დასავლეთის დაკავშირება. საუბარი შეეხო სხვადასხვა მსხვილ და საშუალო ენერგოპროექტებს. მათ შორის, საკითხი შეეხო შავი ზღვის ელექტროგადამცემი კაბელის პროექტს, რომელიც აუცილებლად მოემსახურება ევროპისთვის ენერგოდივერსიფიცირებას. ერთ-ერთი მნიშვნელოვანი საკითხია ის, რომ საქართველომ ჩამოიტანა კონკრეტული ინიციატივები, თუ რა შეიძლება მოხვდეს საბოლოო დოკუმენტში, რომელსაც შეაჯერებენ დღევანდელი ღონისძიების მონაწილეები. ის საკითხები, რომლებიც ჩვენთვის საინტერესოა და რომელზეც აქტიურად ვმუშაობთ, აქაც მიმდინარეობს ამაზე მუშაობა და დარწმუნებული ვარ, რომ ჩვენი ინიციატივები და ხედვები შესაბამისად იქნება დოკუმენტებში ასახული. ამაზე მიმდინარეობს მუშაობა. მთავარი გზავნილი არის ის, რომ ქვეყნები ცდილობენ მაქსიმალურად მოახდინონ კონსოლიდაცია და ასევე უზრუნველყონ ენერგორესურსების დივერსიფიცირება, იმისთვის, რომ არ იყოს ერთ რომელიმე ქვეყანაზე დამოკიდებულება”, – განაცხადა ილია დარჩიაშვილმა.

ჩვენ ჩვენი გეგმით “ლელოსთან“ მიმართებაში, კარგად მივდივართ და უაღრესად კმაყოფილი ვარ იმით, ახლა რა კონდიციაშიც არის და რაც ხდება, ეს ძალიან მომწონს, – ამის შესახებ პარტია “საქართველოსთვის” ლიდერმა გიორგი გახარიამ განაცხადა.

მისივე თქმით, მას “ლელოს” ლიდერ მამუკა ხაზარაძესთან კითხვები არ აქვს.

“მე არანაირი კითხვები მამუკა ხაზარაძესთან არ მაქვს და არც “ლელოსთან“. ჩვენ ჩვენი გეგმით „ლელოსთან“ მიმართებაში, კარგად მივდივართ და უაღრესად კმაყოფილი ვარ იმით, ახლა რა კონდიციაშიც არის და რაც ხდება, ეს ძალიან მომწონს.

იმედი მაქვს, რომ კიდევ ერთხელ, როგორც რამდენიმეჯერ, არ გააფუჭებენ. კითხვები არც მქონია და არც მაქვს.

მამუკას მე რა ვუყო, ჰქონდეს ეს კითხვები. კითხვები ხაზარაძეს ჩემთან შეიძლება ადრეც ჰქონდა და ითმენდა როგორღაც და კიდევ რამდენიმე წელი მოითმენს, არანაირი პრობლემა არ არის.

პარტიამ “საქართველოსთვის“ უკვე განაცხადა და კიდევ ერთხელ განაცხადებს, ეს ჩვენ არ გვითქვამს გუშინ, ეს არის ჩვენი წელიწად-ნახევარზე დიდხნიანი პოზიცია, რომ  ჩვენთვის წითელი ხაზია “ნაცმოძრაობა“ და წითელი ხაზია “ოცნება“. ეს პასუხი ყველასთვის ცნობილია, საზოგადოებისთვისაც ცნობილია უკვე დიდი ხანია. აქ არაფერი სიახლე არ არის”, – განაცხადა გახარიამ.

“ლელოს” ლიდერის განცხადებით, გახარიას პარტიასთან არანაირი მოლაპარაკებები და კონსულტაციები არ მიმდინარეობს.

“არანაირი მოლაპარაკებები არ მიმდინარეობს, არანაირი კონსულტაცია არ მიმდინარეობს ჩვენსა და გახარიას შორის. არის დაახლოებით 4 მნიშვნელოვანი კითხვა, რომელსაც ბატონმა გახარიამ უნდა უპასუხოს, ამის მერე, მე მზად ვარ, დაველაპარაკო ნებისმიერს, მათ შორის ბატონ გახარიას და არა ისე, კულუარულად რომ მიდის საუბარი, თითქოს რაღაცა კონსულტაციები მიდის.

4 კითხვა მგონი, ყველამ ძალიან კარგად იცით, აქ ჩამოთვლას არ დავიწყებ, არ მინდა ამ დეტალებში შესვლა. ერთ-ერთი მთავარი პოლიტიკური კითხვაა, გაუკეთებს თუ არა იგი ქართულ ოცნებას კოალიციას, ჩვენ ამაზე პასუხი არ გვაქვს, შესაბამისად, პირველი კითხვის პასუხი ეს არის, დანარჩენ სამ კითხვაზე, როცა იქნება დრო, მე გიპასუხებთ”, – განაცხადა მამუკა ხაზარაძემ.

ნიკა გვარამია ყველა წიაღსვლას საკუთარი ვიწრო პოლიტიკური მოსაზრებებისთვის იყენებს, – ამის შესახებ იურიდიულ საკითხთა კომიტეტის თავმჯდომარის პირველმა მოადგილემ, საპარლამენტო უმრავლესობის წევრმა დავით მათიკაშვილმა განაცხადა.

მისივე თქმით, გვარამია მიხვდა, რომ ეკონომიკური წინსვლა სავაჭრო ურთიერთობებთანაა კავშირში და ცდილობს, რომ მცირედი ელექტორალური მხარდაჭერა არ დაკარგოს.

„უპრინციპო და პოლიტიკური მორალისგან სრულიად დაცლილი რადიკალური ოპოზიცია, ამ შემთხვევაში ნიკა გვარამია, როგორც მის პოლიტიკურ დღის წესრიგს სჭირდება, ისე ცვლის რიტორიკას. ის ატყობს, რომ ეკონომიკური განვითარება, წინსვლა არის თავისუფალ ვაჭრობასთან, სავაჭრო ურთიერთობებთან დაკავშირებული, ამიტომ ცდილობს, რომ არ დაკარგოს ელექტორალური მცირედი მხარდაჭერა და ამ კუთხით, ყველა წიაღსვლას საკუთარი ვიწრო პოლიტიკური მოსაზრებებისთვის იყენებს“,- აღნიშნა მათიკაშვილმა.

სავარაუდოდ, გახარიას მაინც დაავალებენ, რომ „ლელოს“ შეუერთდეს იმიტომ, რომ ამ კონფიგურაციით 5%-იან ბარიერს „ლელო“ მაინც ვერ მიუახლოვდება. ეს არის მხოლოდ ვერსია, რომელსაც შეგვიძლია ვენდოთ ან არ ვენდოთ, – ამის შესახებ უმრავლესობის ლიდერმა, მამუკა მდინარაძემ ჟურნალისტებს განუცხადა, როდესაც ოპოზიციის გაერთიანებაზე ისაუბრა

მამუკა მდინარაძის თქმით, ოპოზიცია თვითონ არ მოქმედებს და დავალებებს გარედან იღებს.

„ოპოზიციის კონფიგურაციას არ წყვეტს თავად ოპოზიცია იმიტომ, რომ ამას წყვეტენ მათი გარე დავალებების მიმცემები. რამდენიმე დღის წინ, გიორგი გახარიამ მესიჯი გატესტა, რომ „ლელო“ უნდა გადავარჩინო „განაცებასო“ და რა რეაქცია მიიღო ამის გამო – თავი შეიკავეს გაერთიანებაზე იმიტომ, რომ ყველა მიხვდა, რომ ასეთი „ზედმეტი პრინციპულობაც“ არ ვარგოდა, გახარიას და მამუკა ხაზარაძის ერთობა. ამის შემდეგ, როგორც ბოროტი ხმები ამბობენ, გახარიასთვის გადანახული ანა დოლიძის და ლევან ცუცქირიძის პარტიები „ლელოსკენ“ გადაისროლეს, ახლა, გატესტავენ რეიტინგებს და მერე ახალ დავალებას მისცემენ. სავარაუდოდ, გახარიას მაინც დაავალებენ, რომ „ლელოს“ შეუერთდეს იმიტომ, რომ ამ კონფიგურაციით 5%-იან ბარიერს „ლელო“ მაინც ვერ მიუახლოვდება, ეს არის მხოლოდ ვერსია, რომელსაც შეგვიძლია ვენდოთ ან არ ვენდოთ. ისინი რომ თავისით არ მოქმედებენ ეს არის მოცემულობა და შემდეგ შიგნით, რა დინებები მიმდინარეობს ამას დიდი მნიშვნელობაც არ აქვს იმიტომ, რომ საერთო პატრონი ჰყავთ და საერთო საქართველოს საწინააღმდეგო ომის მიზნებით მოქმედებენ ერთად“, – განაცხადა მამუკა მდინარაძემ.

პარლამენტმა პირველი მოსმენით, 75 ხმით „პენიტენციურ კოდექსში“ ცვლილების შეტანას მხარი დაუჭირა.

ამის შესახებ ინფორმაციას საქართველოს პარლამენტი ავრცელებს.

მათივე ინფორმაციით, კანონპროექტის ერთ-ერთი ინიციატორის, თენგიზ შარმანაშვილის განმარტებით, კანონპროექტით პენიტენციურ კოდექსს ემატება ნორმა, რომელიც ითვალისწინებს ტერორიზმში ან საქართველოს კონსტიტუციური წყობილებისა და უშიშროების საფუძვლების წინააღმდეგ მიმართული დანაშაულის ჩადენაში ბრალდებულის/მსჯავრდებულის უფლების შეზღუდვას.

„კანონპროექტის თანახმად, შესაბამისი უფლებები შეიძლება შეეზღუდოს მხოლოდ იმ პირებს, რომლებიც სისხლის სამართლის კოდექსის XXXVII თავით (დანაშაული საქართველოს კონსტიტუციური წყობილებისა და უშიშროების საფუძვლების წინააღმდეგ) და XXXVIII თავით (ტერორიზმი) განსაზღვრული დანაშაულების ჩადენისთვის არიან ბრალდებულნი ან მსჯავრდებულნი.

ცვლილების მიხედვით, აღნიშნული პირებისთვის შესაბამისი უფლების/უფლებების შეზღუდვის შესახებ გადაწყვეტილებას საქართველოს სახელმწიფო უსაფრთხოების სამსახურის მიერ მიწოდებული ინფორმაციის ან პენიტენციური კოდექსის შესაბამისად ოპერატიულ-სამძებრო ღონისძიებების განხორციელების შედეგად მოპოვებული ინფორმაციის საფუძველზე, საკუთარი ინიციატივით, პენიტენციური დაწესებულების დირექტორი იღებს. შესაბამისი უფლება/უფლებები შეიძლება შეეზღუდოს 3 თვემდე ვადით. აღნიშნული ვადის ამოწურვის შემდეგ უფლების/უფლებების შეზღუდვა უქმდება.

კანონპროექტი უფლების/უფლებების შეზღუდვის ვადის გაგრძელების შესაძლებლობასაც ითვალისწინებს“, – ნათქვამია გავრცელებულ ინფორმაციაში.