პარლამენტის თავმჯდომარემ, შალვა პაპუაშვილმა გადაცემა „იმედი LIVE“–ში ისაუბრა არჩევნების შემდგომ მოსალოდნელ ცვლილებებზე და აღნიშნა, რომ მათი გამარჯვება იქნება ქართველი ხალხის მიერ კიდევ ერთხელ მიცემული მანდატი, რომლითაც პასუხს გასცემენ თავიანთ ოპონენტებს.

„უპირველეს ყოვლისა ეს არის ქართველი ხალხის კიდევ ერთი ხმა იმისთვის, რომ მანდატი მისცეს საქართველოს ხელისუფლებას და პასუხი გასცეს ოპონენტებს.

გარკვეული პერიოდია ჩვენ აღმოვჩნდით ისეთ მდგომარეობაში, როდესაც უცხოელები, დიპლომატები თუ პოლიტიკოსები გველაპარაკებიან ქართველი ხალხის სახელით, რაც არის პარადოქსი. წარმოგიდგენიათ საქართველოს ელჩმა რომელიმე ქვეყანაში, მაგალითად პოლონეთში თქვას, რომ პოლონელი ხალხის ნება არის ეს და პოლონეთის ხელისუფლებავ ეს ყურად იღე. ეს ხომ სასაცილოდ არ ეყოფოდა პოლონეთის ხელისუფლებას, ან ნებისმიერ სხვა ხელისუფლებას. ჩვენთან დღეგამოშვებით სხვადასხვა უცხოელი აქტორი გამოდის და ყველა რატომღაც ფიქრობს, რომ უნდა გვესაუბროს ქართველი ხალხის სახელით, რომელსაც არ აქვს გრამი ლეგიტიმაცია ქართველებისგან.

ერთადერთი ლეგიტიმაცია არის ის NGO– ები, რომელსაც აფინანსებენ და ელაპარაკებიან. გარკვეული მიკრო საქართველო აქვს შექმნილი ზოგიერთ დონორს თავის გარშემო და ეს არის მისთვის საქართველო. ასე ვთქვათ ფოკუს ჯგუფი, მისი ფოკუს ჯგუფი არის მისი საქართველო. ჩვენ დანარჩენი ოთხი მილიონი არ ვარსებობთ როგორც ჩანს მათ თვალში.

ზუსტად ამიტომ არის მნიშვნელოვანი ეს არჩევნები, რომ ქართველმა ხალხმა უთხრას ამ უცხოელ აქტორებს, თქვენ ჩვენი სახელით არ უნდა ილაპარაკოთ, რომ სანქციები დააწესე, ეს გააკეთე, ის გააკეთე. ქართველმა ხალხმა უნდა უთხრას რა არის მათი ნება. მათი მაღალი ხმა არის საჭირო, რომ მერე უკვე არჩევნებიდან მეორე და მესამე დღეს რომ გამოვა რომელიმე უცხოელი პოლიტიკოსი თუ დიპლომატი და იტყვის, რომ ქართველი ხალხიო, ამას ვეღარ იტყვის იმ ომახიანი ტემბრით, რომელიც შეაჩვიეს მთელი საქართველოს. რატომღაც ყველა თვლის, რომ ვისაც 20 ხინკალი და 2 ხაჭაპური უჭამია ამ ქვეყანაში, გაერკვა საქართველოში და საქართველოზე უნდა ილაპარაკოს“, – განაცხადა შალვა პაპუაშვილმა.

ჩვენი პოტენციალი უმნიშვნელოვანესია ევროპისა და შავი ზღვის რეგიონის დაკავშირებადობის ფუნქციის გაძლიერებაში, ევროპელ კოლეგებთან ამ მნიშვნელოვან თემებზე დისკუსიები გადამწყვეტია, – ამის შესახებ საქართველოს პრემიერ-მინისტრი ირაკლი კობახიძე სოციალურ ქსელ X-ზე წერს.

როგორც მთავრობის მეთაური აღნიშნავს, ევროპული პოლიტიკური გაერთიანების სამიტის ფარგლებში მას ჰქონდა შესაძლებლობა, ხაზი გაესვა საქართველოს განსაკუთრებული როლისთვის ევროპის ენერგეტიკული უსაფრთხოებისა და დაკავშირებადობის კონტექსტში.

„მქონდა პატივი, მონაწილეობა მიმეღო ევროპის პოლიტიკური გაერთიანების სამიტში, რომელსაც დიდი ბრიტანეთის და ჩრდილოეთ ირლანდიის გაერთიანებული სამეფოს პრემიერ მინისტრმა, კირ სტარმერმა უმასპინძლა. მქონდა შესაძლებლობა, ხაზი გამესვა საქართველოს განსაკუთრებული როლისთვის ევროპის ენერგეტიკული უსაფრთხოების და დაკავშირებადობის კონტექსტში. ჩვენი პოტენციალი უმნიშვნელოვანესია ევროპის და შავი ზღვის რეგიონის დაკავშირებადობის ფუნქციის გაძლიერებაში. ევროპელ კოლეგებთან ამ მნიშვნელოვან თემებზე დისკუსიები გადამწყვეტია“, – აღნიშნავს პრემიერი.

ძალიან მნიშვნელოვანია, რომ ევროპის პოლიტიკური გაერთიანების სამიტის დოკუმენტში აისახა ჩანაწერი საქართველოსთან მიმართებით. კერძოდ, გამოიკვეთა საქართველოს განსაკუთრებული მნიშვნელობა ენერგეტიკული დაკავშირებადობის კუთხით და ზოგადად სატრანზიტო ფუნქციის თვალსაზრისით, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს განუცხადა.

როგორც მთავრობის მეთაურმა აღნიშნა, დასრულდა ევროპის პოლიტიკური გაერთიანების სამიტი, სადაც ძალიან საინტერესო დისკუსიები გაიმართა.

„დისკუსიებში მონაწილეობდნენ პრეზიდენტები, პრემიერ-მინისტრები სხვადასხვა ევროპული ქვეყნიდან. ზოგადად იყო ძალიან საინტერესო ფორმატი. მქონდა სიტყვით გამოსვლის საშუალება ენერგეტიკული დაკავშირებადობის თემაზე, რაც იყო ამ სამიტის ერთ-ერთი მთავარი განსახილველი საკითხი. ძალიან მნიშვნელოვანი იყო, რომ ამ სამიტის დოკუმენტში აისახა ჩანაწერი კონკრეტულად საქართველოსთან მიმართებით. კერძოდ, გამოიკვეთა საქართველოს განსაკუთრებული მნიშვნელობა სწორედ რომ ენერგეტიკული დაკავშირებადობის კუთხით და ზოგადად სატრანზიტო ფუნქციის თვალსაზრისით.

ჩვენ გვქონდა ასევე საშუალება, გაგვემართა ორმხრივი შეხვედრები, გავსაუბრებოდით ჩვენს კოლეგებს, პრეზიდენტებს, პრემიერებს სხვადასხვა ევროპული ქვეყნებიდან. შესაბამისად, მაქსიმალურად გამოვიყენეთ ეს ფორმატი, რათა გაგვეზიარებინა ის გზავნილები, რაც უკავშირდება საქართველოს ეროვნულ ინტერესებს“, – განაცხადა ირაკლი კობახიძემ.

მისივე თქმით, დოკუმენტში ასახულია საქართველოს განსაკუთრებული ფუნქცია დაკავშირებადობის კუთხით.

„ჩვენი ქვეყანა მუდმივად მუშაობს, რათა კიდევ უფრო გააძლიეროს საკუთარი სატრანზიტო ფუნქცია, რასაც განსაკუთრებული მნიშვნელობა ენიჭება განსაკუთრებით იმ გეოპოლიტიკური ვითარების ფონზე, რომელიც ჩამოყალიბდა უკრაინაში ომის დაწყების შემდეგ. ჩვენ გვაქვს ძალიან დიდი რესურსი იმისთვის, რომ ამ კუთხით გამოვკვეთოთ ჩვენი ქვეყნის ფუნქცია, მათ შორის შუა დერეფნის ინიციატივის ფარგლებში. ამაზე გვქონდა საუბარი ამ სამიტის ფარგლებში და სწორედ ეს საკითხი აისახა საბოლოო ჯამში სამიტის დოკუმენტში“, – აღნიშნა პრემიერ-მინისტრმა.

ყველა ლიდერს, მათ შორის უშუალოდ ევროკავშირის სტრუქტურების ლიდერებს, ბატონ ბორელს, ბატონ მიშელს გავუზიარეთ ჩვენი გზავნილები საქართველო-ევროკავშირის ურთიერთობებზე, – ამის შესახებ საქართველოს პრემიერ-მინისტრმა, ირაკლი კობახიძემ გაერთიანებულ სამეფოში ჟურნალისტებს განუცხადა.

მთავრობის მეთაურის თქმით, რეგიონში ვითარების დამშვიდებასთან ერთად, მყისიერად შეიცვლება დამოკიდებულება საქართველოს მიმართ.

„გვქონდა საუბარი საქართველო-ევროკავშირის ურთიერთობებზე, გაფართოების საკითხებზე, მიმდინარე დღის წესრიგზე. ჩვენ ვუზიარებდით ჩვენს გზავნილებს ყველა ლიდერს. იყვნენ მათ შორის უშუალოდ ევროკავშირის სტრუქტურების ლიდერები, ბატონი ბორელი, ბატონი მიშელი და სხვები, მათთან გვქონდა საუბარი ამ თემებთან დაკავშირებით. საერთო შთაბეჭდილება რაც მაქვს, არის ის, რომ როგორც კი ზოგადად, რეგიონში გლობალურად შეიცვლება, დამშვიდდება ვითარება, მყისიერად შეიცვლება დამოკიდებულება საქართველოს მიმართ. მანამდეც დაიწყება ეს პროცესი, თუმცა, საბოლოო ჯამში, ბევრი რამ იქნება დამოკიდებული რეგიონში პოლიტიკური ვითარების დამშვიდებაზე“, – განაცხადა პრემიერმა.

ელექტრონულ არჩევნებთან დაკავშირებით ფართომასშტაბიანი საინფორმაციო კამპანიის ფარგლებში საარჩევნო სიახლეებსა და ელექტრონულ ტექნოლოგიებს ეროვნული ბანკის წარმომადგენლები გაეცნენ.

ცესკოს ინფორმაციით, საინფორმაციო შეხვედრა, რომელსაც ეროვნული ბანკის პრეზიდენტის მოვალეობის შემსრულებელი ნათია თურნავა და აპარატის თანამშრომლები ესწრებოდნენ, ცენტრალური საარჩევნო კომისიის (ცესკო) თავმჯდომარე გიორგი კალანდარიშვილმა გახსნა. მან 2024 წლის არჩევნებისთვის მზადების პროცესისა და ტექნოლოგიური სიახლეების შესახებ ისაუბრა. გაიმართა საარჩევნო ტექნოლოგიების დემონსტრაცია და იმიტირებული კენჭისყრა. შეხვედრის მონაწილეებს საშუალება ჰქონდათ პრაქტიკაში გამოეცადათ ვერიფიკაციისა და ხმის მთვლელი აპარატების მუშაობა.

„ეროვნული ბანკის ხელმძღვანელობას და აპარატის თანამშრომლებს მივაწოდეთ დეტალური ინფორმაცია იმ საარჩევნო ტექნოლოგიების შესახებ, რომელიც გამოყენებული იქნება 26 ოქტომბრის არჩევნებზე. აღსანიშნავია, რომ შეხვედრა აქტიური დისკუსიის რეჟიმში განხორციელდა. იყო არაერთი კითხვა და მონაწილეებმა დეტალური და ამომწურავი პასუხები მიიღეს მათთვის საინტერესო საკითხებზე. თეორიულ ინფორმაციასთან ერთად მათ ასევე ჰქონდათ შესაძლებლობა, პრაქტიკაში გამოეცადათ ტექნოლოგიური საშუალებები“,- განაცხადა ცესკოს თავმჯდომარემ.

„ჩვენ ძალიან დიდი ინტერესით ვუსმენდით ცესკოს გუნდის მიერ ჩატარებულ პრეზენტაციას. მართლაც, უამრავი სამუშაოა ჩატარებული, საარჩევნო პროცესი სრულიად განახლებულია, ეყრდნობა ახალ ტექნოლოგიებს. ვფიქრობ, საკმაოდ მარტივია, ძალიან ლოგიკურად არის აწყობილი. ამასთან, გვეხმარებიან სპეციალურად მომზადებული ადამიანები. ვფიქრობ, საარჩევნო უბანზე მისული არცერთი ამომრჩეველი არ დარჩება ყურადღების გარეშე და საკმაოდ მარტივად შეასრულებს თავის მოქალაქეობრივ ვალს“, – აღნიშნა ნათია თურნავამ.

ტექნოლოგიური სიახლეების შესახებ ამომრჩეველთა ინფორმირება და განათლება საარჩევნო ადმინისტრაციის ერთ-ერთ მთავარ პრიორიტეტს წარმოადგენს. ელექტრონული ტექნოლოგიების დემონსტრაცია ეტაპობრივად იმართება ქვეყნის მასშტაბით ხალხმრავალ ადგილებში, საჯარო და კერძო სტრუქტურებში. დღეის მდგომარეობით უკვე ინფორმირებულია 500 000-მდე ადამიანი.

აღსანიშნავია, რომ ინფორმირების ფართომასშტაბიანი კამპანიის ფარგლებში 6 ივლისიდან საარჩევნო ტექნოლოგიების საყოველთაო დემონსტრირება მიმდინარეობს. ახალი პროექტის ფარგლებში, მთელი ქვეყნის მასშტაბით 64 მუნიციპალიტეტში, წინასწარ განსაზღვრულ 89 ლოკაციაზე, ყოველ შაბათ-კვირას გამართულ შეხვედრებზე ამომრჩევლებს საშუალება აქვთ პირადად გაეცნონ ვერიფიკაციისა და ხმის მთვლელი აპარატების მუშაობას.

საქართველოს პრემიერ-მინისტრი ირაკლი კობახიძე ურსულა ფონ დერ ლაიენს ევროკომისიის პრეზიდენტად ხელახლა არჩევას ულოცავს.

„ვულოცავ ურსულა ფონ დერ ლაიენს ევროკომისიის პრეზიდენტად ხელმეორედ არჩევას. იმედი მაქვს, რომ ჩვენი თანამშრომლობა გაგრძელდება, და საქართველოს ევროკავშირისკენ მისწრაფება გაძლიერდება“, – წერს მთავრობის მეთაური სოციალურ ქსელ X-ში.

ევროპარლამენტმა ხუთშაბათს სესიაზე ხმათა უმრავლესობით ურსულა ფონ დერ ლაიენი ევროკომისიის პრეზიდენტად მეორე ვადით აირჩია.

აშშ-ის სახელმწიფო დეპარტამენტის ანგარიში, რომელიც საქართველოს საინვესტიციო კლიმატს აფასებს, საკმაოდ ობიექტურია. დადებითია საქართველოს საინვესტიციო გარემოსა და კლიმატის შესახებ შეფასება. ანგარიშში აღნიშნულია ის ძირითადი ეკონომიკური რეფორმები, რომელთაც ქვეყანა ბოლო წლებში წარმატებით ახორციელებს, რის შედეგადაც ქვეყანას უპრეცედენტოდ მაღალი ეკონომიკური ზრდა ჰქონდა რეგიონისა და ევროკავშირის წევრობის კანდიდატ ქვეყნებთან შედარებით. ეს ტენდენცია შენარჩუნებული უნდა იყოს უახლოეს წლებში, რასაც საერთაშორისო ავტორიტეტული ეკონომიკური ორგანიზაციები, მათ შორის, საერთაშორისო სავალუტო ფონდიც ადასტურებს, – განაცხადა პირველმა ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა აშშ – ის სახელმწიფო დეპარტამენტის 2024 წლის საინვესტიციო კლიმატის შესახებ ანგარიშის კომენტირებისას.

პირველი ვიცე-პრემიერის განცხადებით, ეს ყველაფერი მიუთითებს იმაზე, რომ საქართველოს გააჩნია სწორი ეკონომიკური პოლიტიკა, რაც, პირველ რიგში, მაკროეკონომიკურ სტაბილურობას ითვალისწინებს. მისი თქმით, ქვეყანას აქვს გაუმჯობესებული მაკროეკონომიკური მაჩვენებლები, რაც ინვესტორებისთვის საქართველოში ინვესტიციების განხორციელების საფუძველია.

ლევან დავითაშვილის განცხადებით, საქართველო, ამ კუთხით, რეგიონის სხვა ქვეყნებისგან გამოირჩევა, რაც ასევე მკაფიოდ არის სახელმწიფო დეპარტამენტის ანგარიშში აღნიშნული. მისი თქმით, ქვეყნის საინვესტიციო გარემო პროგნოზირებადია, მარეგულირებელი კანონმდებლობა კი სრულ შესაბამისობაშია საერთაშორისო სტანდარტებთან.

პირველმა ვიცე-პრემიერმა განაცხადა, რომ საქართველოში ბოლო წლებში მნიშვნელოვანი სტრუქტურული რეფორმები განხორციელდა, მათ შორის, საკანონმდებლო კუთხით. მან განსაკუთრებული ყურადღება გაამახვილა გადახდისუნარიანობის და ინვესტიციების დაცვის აღიარების შესახებ კანონებზე და აღნიშნა, რომ ეს ყველაფერი, ქმნის დამატებით მოტივაციას ინვესტორებისთვის, რომ არჩევანი საქართველოზე გააკეთონ.

ლევან დავითაშვილის ინფორმაციით, საქართველომ ბოლო წლებში ყველა საერთაშორისო რეიტინგში შეინარჩუნა და გააუმჯობესა თავისი მდგომარეობა, რაც უკავშირდება კონკურენტუნარიანობას, მცირე და საშუალო მეწარმეობის მხარდაჭერას, ზოგადად კერძო სექტორის დახმარებას, ასევე კორუფციასთან ბრძოლას.

„ვფიქრობ, რომ ეს ყველა ობიექტური ინფორმაცია ანგარიშში ასახულია და არის მკაფიო სიგნალი ინვესტორებისთვის, რომ საქართველო შეიძლება იყოს ხანგრძლივ პერიოდში საიმედო პარტნიორი და სწორი არჩევანი რეგიონში ინვესტიციების განხორციელებისთვის. ჩვენ ამ პოლიტიკას ვინარჩუნებთ მომავალ წლებშიც. ჩვენ გვექნება მაკროეკონომიკური სტაბილურობა და ყველა ის ხელშემწყობი ღონისძიება, რომელიც საქართველოში ბიზნესის კეთებას კიდევ უფრო მარტივს და ხელსაყრელს გახდის და საბოლოოდ, ქვეყნის კონკურენტუნარიანობას აამაღლებს,“ – განაცხადა პირველმა ვიცე-პრემიერმა.