დღეის მდგომარეობით, „ქართული ოცნება“ ხელისუფლებას დააკომპლექტებს უპრობლემოდ, იქნება მმართველი ძალა. რაც შეეხება ოპოზიციას, რაც დღეის მდგომარეობით ჩანს, კიდევ 2 ჯგუფი ლახავს ბარიერს, დანარჩენები ვნახოთ, როგორ გადაეწყობიან, – ამის შესახებ ბექა დავითულიანმა განაცხადა.

ფრაქცია „ქართული ოცნების“ თავმჯდომარის მოადგილემ ასევე იმ სავარაუდო სცენარზე ისაუბრა, რომლითაც წინასაარჩევნო პერიოდი განვითარდება.

„პირადად მე ვვარაუდობ, რომ პროცესი განვითარდება შემდეგნაირად – მაგალითად, როდესაც სექტემბერში არასამთავრობო ორგანიზაციებს მოუწევთ რეგისტრაცია, ერთ-ერთი დონორის მხრიდან მოხდება კოორდინირება პროცესის, რომ არ დარეგისტრირდნენ. წინააღმდეგ შემთხვევაში, როგორც ვიცი, ისინი ეუბნებიან, რომ პროგრამებს შეუწყვეტენ. შესაბამისად, ეს იქნება საპროტესტო ტალღის პირველი ეტაპი. შემდეგ ამას ალბათ მოჰყვება სახელმწიფოს მხრიდან კანონიერი რეაგირება და დაჯარიმება, რაზეც იქნება მეორე შემოტევა, თითქოსდა იდევნებიან არასამთავრობო ორგანიზაციები და ასეთ ფონზე წინასაარჩევნო გარემო თითქოსდა მძიმეა. ამას, რა თქმა უნდა, უცხოეთიდან მოჰყვება ორკესტრირებული განცხადებები, თითქოსდა ჩვენ ვამძიმებთ წინასაარჩევნო გარემოს, არადა ამ სპექტაკლს დგამენ თვითონ ის ძალები, რომლებიც აორგანიზებენ იმას, რომ ამ არასამთავრობოებმა არ გაიარაონ რეგისტრაცია.

ეს განცხადებები გაკეთდება, ჩვენ ჩამოვიყვანთ ოფიციალურ უცხოელ დამკვირვებლებს. ეუთო/ოდირი არის ოფიციალური შემფასებელი და ყველა პარტიას უზის თავისი წარმომადგენელი, როგორც საარჩევნო უბანზე, ისე ოლქში, ისე ცესკოში. ვერცერთი მათგანი მასობრივად ვერ დააფიქსირებს ისეთ დარღვევებს, რომლებსაც შეიძლება არჩევნების შედეგზე ჰქონდეს გავლენა. ამიტომ განცხადებები იმის შესახებ, თითქოს წინასაარჩევნო გარემო იყო ცუდი, თითქოს მოხდა დარღვევები, დარჩება განცხადებებად და ამას ფაქტებით ვერავინ დაასაბუთებს. შესაბამისად, საბოლოო ჯამში არჩევნების აღიარება მოუწევს ყველას, რადგან არ ექნებათ არანაირი ობიექტური დასაბუთება, რომ პირიქით მოხდა და მერე მოუწევთ საუბარი ურთიერთობების გადატვირთვაზე“, – მიიჩნევს დავითულიანი.

თბილისის საკრებულოს სხდომაზე, ფრაქცია „ქართული ოცნება – დემოკრატიული საქართველოს“ წევრმა ვლადიმერ ბოჟაძემ საქართველოს საფეხბურთო ნაკრებს მადლობა გადაუხადა ევროპის ჩემპიონატზე წარმატებული თამაშისთვის და განაცხადა, რომ ქართველმა ფეხბურთელებმა დაუმტკიცეს ევროპას და მსოფლიოს, რომ ჩვენ ვიმსახურებთ ევროკავშირის წევრობას.

„უსამართლობაა ის, რაც ხდებოდა ევროკავშირის წევრობის კანდიდატის სტატუსის მიღებასთან დაკავშირებით. უსამართლობაა, რაც ახლაც გრძელდება სამწუხაროდ, როცა ჩვენს ქართულ ჯარს, ჩვენს სიამაყეს, არ უფინანსებენ წვრთნებს, ენჯეოების და მედიების წვრთნებს იწყებენ თურმე 26 ოქტომბრისთვის. მინდა ვუთხრა ოპოზიციას, რომ ეს დაფინანსება მათ მაინც არ უშველის“, – განაცხადა ვლადიმერ ბოჟაძემ.

საკრებულოს უმრავლესობის წევრმა მიმართა ოპოზიციის ელექტორატს და ოპოზიციურ პარტიებს და კითხვები დაუსვა ქვეყნის განვითარებასა და ქართული ჯარის დაფინანსებასთან, ასევე დედაქალაქის ბიუჯეტის ზრდასთან დაკავშირებით.

„მე მინდა მივმართო ოპოზიციურ ელექტორატს, რომელმაც 2020 წელს ხმა მისცა ნაციონალურ მოძრაობას, ასევე იმ ოპოზიციურ პარტიებს, რომლებიც 8 თვის განმავლობაში საერთოდ არ შევიდნენ პარლამენტში და მერე კი შევიდნენ, რომ ხელფასები არ დაეკარგათ და 8 სიტყვა არ აქვთ ნათქვამი და 8 კანონი არ აქვთ მიღებული. მათ შორის არც 12 რეკომენდაციის შესრულების, რომელმაც დაგვაახლოვა ევროკავშირთან, და არც 9 ნაბიჯის პროცესში იღებენ მონაწილეობას.

მინდა ვკითხო თბილისელებს, რომლებმაც ცარიელი ადგილები აირჩიეს თბილისის საკრებულოში, ცარიელი ადგილები, რომლებსაც ერთი სიკეთე თბილისელებისთვის არ გაუკეთებიათ და მინდა ვკითხო ოპოზიციას, რომელიც საქართველოშიც და თბილისშიც ატყუებს ხალხს, რომ ქვეყანა ინგრევა, რომ თურმე ეკონომიკური კოლაფსია და და ასე შემდეგ: თუ ეკონომიკა არ იზრდება, თუ შემოსავლები არ იზრდება და ქვეყანა არ ვითარდება, მაშინ საქართველო მარტო ექვს თვეში 519 მილიონ ლარს დამატებით შემოსავალს როგორ იღებს?

თქვენ იცით, რომ პრემიერ-მინისტრის გადაწყვეტილებით, მნიშვნელოვანი თანხა ქართული ჯარის განვითარებას მოხმარდება. აღარავის ახსოვს, როგორ იბრძოდა ქართული ჯარი ერაყში, ავღანეთში, აფრიკაში, რამდენი სისხლი გაიღო ამ ჯარმა! და ახლა თურმე ის უნდა დაისაჯოს.

მინდა ვკითხო ჩემს ოპოზიციონერ კოლეგებს: რომ დაიშალეთ ნაციონალური მოძრაობის ფრაქციებად და ვინ ვისთან არის და რომელ ლიდერთან, ვერ გაგირკვევიათ, უბრალოდ, გული არ გწყდებათ, რომ იმ სიკეთეში, რომელსაც დედაქალაქის ბიუჯეტის ზრდა ჰქვია, მონაწილეობას არ იღებთ?

ეს ადამიანები 2025 წელს ადგილობრივ არჩევნებში კი არა, 2024 წლის საპარლამენტო არჩევნებშიც ვერ შევლენ პარლამენტში“, – განაცხადა ვლადიმერ ბოჟაძემ.

მე არ მესმის, ქართული ჯარის წვრთნისთვის აღარ უნდათ რომ გაიღონ თანხა და NGO-ების წვრთნას ატარებენ 2024 წელს თუ რა ხდება? – ქართველი ხალხისთვის მიუღებელია ფულით ვაჭრობით მანიპულირება, – ამის შესახებ “ქართული ოცნების” დეპუტატმა, ანრი ოხანაშვილმა დაფინანსების შეჩერებასთან დაკავშირებით, საფრანგეთის ელჩის განცხადებაზე საუბრისას აღნიშნა.

მისივე თქმით, თანხებით მანიპულირება არ არის არც მეგობრული ჟესტი და არც დამოკიდებულება სუვერენული სახელმწიფოსა და ქართველი ხალხის მიმართ.

“მე არ მესმის, ქართული ჯარის წვრთნისთვის აღარ უნდათ რომ გაიღონ თანხა და ამბობენ, რომ NGO-ები უნდა დავაფინანსოთო. NGO-ების წვრთნაში იხდიან თანხას თუ რა ხდება? NGO-ების წვრთნას ატარებენ 2024 წელს, თუ რაზეა საუბარი? NGO-ების წვრთნას აპირებს ვინმე ამ ქვეყანაში? ნუ, თუ გაწვრთნიან, რომ უფრო დემოკრატიულები იყვნენ და გამჭვირვალობას უჭერდნენ მხარს, ცუდი არ არის, წაადგება ჩვენს ქვეყანას და პირველ რიგში, მათ. თანხებით მანიპულირება არ არის არც მეგობრული ჟესტი და არც დამოკიდებულება სუვერენული სახელმწიფოსა და ქართველი ხალხის მიმართ. ქართველი ხალხისთვის მიუღებელია ფულით ვაჭრობით მანიპულირება. ჩვენთვის, ყველასთვის მიუღებელია. ეს არ წაადგება მეგობრულ ურთიერთობას და ამიტომ თხოვნა გვაქვს, რომ გადახედონ ამ ნაბიჯებს, ამ რიტორიკას, ამ მიდგომას,” – განაცხადა ოხანაშვილმა.

ცნობისთვის, საქართველოში საფრანგეთის ელჩმა, შერაზ გასრიმ განაცხადა, რომ მიიღეს გადაწყვეტილება, დროებით შეაჩერონ დახმარება საქართველოს ბიუჯეტში და დახმარება სამოქალაქო საზოგადოებასა და მედიას გაუძლიერონ.

„27 ივნისს ევროპულმა საბჭომ დაასკვნა, რომ ევროკავშირში გაწევრიანების გზა იყო დე ფაქტო შეჩერებული, ეს არის საქართველოს მთავრობის მიერ მიღებული გადაწყვეტილებების შედეგი, რაც ყველამ იცის. ამ მიზეზით, ჩვენ გადავწყვიტეთ დროებით შევაჩეროთ ჩვენი პირდაპირი დახმარება საქართველოს ბიუჯეტში და გავუძლიეროთ დახმარება სამოქალაქო საზოგადოებას და მედიას. საქართველოს ხელისუფლების გადასაწყვეტია, შეატრიალოს კურსი იმისათვის, რომ დავუბრუნდეთ იმას, რისი გაკეთებაც გვინდა, ესე იგი გავაგრძელოთ საქართველოს მხარდაჭერა მის ევროპულ გზაზე, ყველა სფეროში“ , – განაცხადა შერაზ გასრიმ.

როგორც თავის დროზე ედუარდ შევარდნაძემ განაცხადა, დღესაც აქტუალურია ეს სიტყვები: როდესაც ღია კარში დიდხანს ხარ, შეიძლება ამ ორპირ ქარში ადამიანი გაცივდეს,-ამის შესახებ პარლამენტის თავმჯდომარემ, შალვა პაპუაშვილმა დღეს გამართულ ბრიფინგზე, ნატო-სთან დაკავშირებით განაცხადა

შალვა პაპუაშვილის თქმით საქართველო მრავალი წელია ელოდება ჩრდილოატლანტიკურ ალიანსში გაწევრიანებას, თუმცა უკვე 16 წელია ამ ღია კარში დგას.

„პოლონეთის პრეზიდენტმა ანჯეი დუდამ თქვა – 2008 წელს ბუქარესტში იმით, რომ გერმანიამ და საფრანგეთმა დაბლოკეს საქართველოს ნატო-ში მიღება, გარკვეული შესაძლებლობა მისცეს რუსეთს იმისთვის, რომ აგრესია განეხორციელებინა. ამიტომ, ალბათ, ნატო-ს წევრები უნდა დაფიქრდნენ, რა გააკეთეს 2008 წელს. შეგიძლიათ პოლონეთის პრეზიდენტის ეს განცხადება იხილოთ, ჰქონდა თუ არა ამას კავშირი შემდეგ რუსეთის აგრესიასთან, სულ რამდენიმე კვირაში. ჩვენ არ გვინდა პირობები, ჩვენ გვინდა გადაწყვეტილებები. ჩვენ უკვე 16 წელია ამ ღია კარში ვდგავართ. როგორც თავის დროზე ედუარდ შევარდნაძემ განაცხადა, დღესაც აქტუალურია ეს სიტყვები: როდესაც დიდხანს ხარ ღია კარში, შეიძლება ამ ორპირ ქარში ადამიანი გაცივდეს. ამიტომ, ამაზე უნდა იფიქრონ ნატო-ს წევრმა ქვეყნებმა, რომ უსაფრთხოებას არ განაპირობებს დანაპირებები, უსაფრთხოებას უზრუნველყოფს გადაწყვეტილებები. ჩვენ ვნახეთ, რომ სამწუხაროდ, უკრაინის მიმართაც დამატებითი გადაწყვეტილება მიღებული არ ყოფილა, იგივე გაიმეორეს, რაც 16 წლის წინ უკრაინასთან და საქართველოსთან დაკავშირებით ითქვა, რომ უკრაინა გახდება ნატო-ს წევრი. როდის გახდება, როგორ გახდება და ა.შ. უცნობია, მიუხედავად იმისა, რომ უკვე 2 წელზე მეტია უკრაინა იბრძვის ევროპის დასაცავად და ასე აფასებს თავად ნატო ამ ომსაც, იმიტომაც ეხმარება უკრაინას. მიუხედავად იმისა, რომ გმირ უკრაინელ ხალხს უკვე 2 წელზე მეტია ფრონტი აქვს იმისთვის, რომ რუსეთის ჯარები შეაკავოს, ვნახეთ, რომ უკრაინასთან დაკავშირებით რაიმე დამატებითი გადაწყვეტილება მიღებული არ არის“, – განაცხადა შალვა პაპუაშვილმა.

მქონდა მოლოდინი, რომ ევროპელი ელჩებისგან მოვისმენდი დაპირებას, რომ გამჭვირვალე იქნება მათი ქვეყნიდან შემოსული თანხა და ქართველ ხალხს ეტყვიან, თანხას ვის აძლევენ, რამდენს და რისთვის, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

როგორც მან აღნიშნა, მას აქვს ერთადერთი მოწოდება, რომ ყველა დაუბრუნდეს საერთო ღირებულებებს, რომელსაც ვიზიარებთ გამჭვირვალობის, საჯაროობის და ურთიერთპატივისცემის ღირებულებებს, ამ ღირებულებებით იმოქმედონ, იყვნენ გამჭვირვალე ქართველი ხალხის წინაშე.

“არ ვიცი, ემოციებში, რატომ გადასდის ზოგიერთ დიპლომატს, მაგრამ გვესმის ასეთი კომენტარები, რაც აბსოლუტურად, არ მგონია, იყოს სერიოზული აღქმა იმ გამოწვევისა, რომლის წინაშეც დგას ქართული საზოგადოება. ქართველებმა მკაფიოდ თქვეს, რომ ქართველი ხალხის სურვილია იცოდეს მეტი, რა ფული შემოდის, სად მიდის, რაში იხარჯება. ამის საპასუხოდ ჩვენ ვხედავთ რაღაც გაღიზიანებულ რეაქციებს, რაც არ არის ევროპული ღირებულებების შესაბამისი რეაქცია.

ამიტომ მე ერთადერთი მოწოდება მაქვს, ყველა დაუბრუნდეს ჩვენს საერთო ღირებულებებს, რომელსაც ვიზიარებთ გამჭვირვალობის, საჯაროობის და ურთიერთპატივისცემის ღირებულებებს, ამ ღირებულებებით იმოქმედონ, იყვნენ გამჭვირვალე ქართველი ხალხის წინაშე. ქართველმა ხალხმა მკაფიოდ დააფიქსირა საკუთარი სურვილი და ინტერესი იცოდეს, რაში იხარჯება უცხოეთიდან შემოსული თანხა“, – განაცხადა შალვა პაპუაშვილმა.