ჩვენი საზოგადოება კიდევ უფრო დაინახავს, რომ „ქართული ოცნება“ იყო მართალი და არანაირი ანტიევროპული, ანტიდემოკრატიული გამჭვირვალობაში არ არის, – ამის შესახებ პარლამენტის თავმჯდომარის მოადგილემ, არჩილ თალაკვაძემ ესპანეთის მაგალითზე საუბრისას განაცხადა.

„რაც უფრო მეტი დრო გავა, ყველა კიდევ უფრო დარწმუნდება, რომ საქართველოს ხელისუფლებამ სწორი და დემოკრატიული გადაწყვეტილება მიიღო. დემოკრატიას ინფორმირებული მოქალაქეები ქმნიან და დემოკრატიას ინფორმირებული საზოგადოება სჭირდება. ჩვენ შემოვიტანეთ და დავნერგეთ გამჭვირვალობის რეესტრი, რომელიც ევროკავშირის 15 ქვეყანას აქვს. ესპანეთია მომდევნო, ვინც გამჭვირვალობის რეესტრს ქმნის. პრაქტიკულად, ესპანეთის პრემიერ-მინისტრმა იგივე არგუმენტები დაასახელა, რაც საქართველოს ხელისუფლებამ თავის საზოგადოებას წარუდგინა. გამჭვირვალობა ისეთი ფუნდამენტური პრინციპია, რომლის გვერდის ავლაც მხოლოდ კითხვებს აჩენს, ვიღაცას ხომ არ სურს რაიმეს დაფარვა და დამალვა“, – განაცხადა არჩილ თალაკვაძემ.

მისი თქმით, ოპოზიციამ „ქართული ოცნება“ კანონის მიღების გამო გააკრიტიკა და ისიც თქვა, რომ რუსეთისკენ შეტრიალდა.

„გამჭვირვალობა დავნერგეთ და ამის გამო კრიტიკა მივიღეთ – რუსეთისკენ შეატრიალეს ქვეყანაო, ამასაც კი გვაბრალებდნენ. ახლა არცერთი არ ჩანს. რა თქმა უნდა, ესპანეთზე როგორ გაბედავენ რადიკალური ოპოზიციის წარმომადგენლები და მათი პატრონები ხმის ამოღებას? ესპანეთზეც ხომ არ იტყვიან, რუსეთისკენ შეტრიალდაო, დადასტურდა ჩვენი სიმართლე. რაც უფრო მეტი დრო გავა, ჩვენი საზოგადოება კიდევ უფრო უკეთ დაინახავს, რომ „ქართული ოცნება“ იყო მართალი და არანაირი ანტიევროპული, ანტიდემოკრატიული გამჭვირვალობაში არ არის“, – განაცხადა არჩილ თალაკვაძემ.

ესპანეთის პრემიერ-მინისტრი მედიისთვის წესების გამკაცრებას და დაფინანსების გამჭვირვალობას ითხოვს. პედრო სანჩესი გამოვიდა ინიციატივით, მედიას მოსთხოვონ ყველა აქციონერის იდენტიფიცირება, რომლებიც გავლენას ახდენენ სარედაქციო პოლიტიკაზე, აგრეთვე თანხებზე, რომლებსაც ისინი იღებენ საჯაროდ დაფინანსებულ რეკლამებში და მესამე ქვეყნებიდან, ასევე აუდიტორიის შესახებ გამჭვირვალე მონაცემები.

ყველას ვაფრთხილებ, ნურავინ გაეხვევა იმ ბოროტ თაღლითობაში, როცა ამნისტიაში რაღაც მუხლების ჩაწერის დაპირებით სარგებლობენ და ატყუებენ ვიღაცებს, – ამის შესახებ პარტია „ქართული ოცნების“ აღმასრულებელმა მდივანმა და საპარლამენტო უმრავლესობის ლიდერმა მამუკა მდინარაძემ რიგგარეშე სესიაზე „ამნისტიის შესახებ კანონის განხილვაზე განაცხადა.

მისი თქმით, ვიღაცები ამნისტიის კანონით ხელის მოთბობას ცდილობენ.

„სამწუხაროდ, აღმოჩნდა ისე, რომ ამ ქალაქში არსებობს ხალხი, რომელთაც გადაწყვიტეს ხელის მოთბობა ამნისტიის საკითხებთან დაკავშირებით. ეს შეიძლება ნახევრად სკანდალური, ძალიან უცნაური, ბრალდების შემცველი ინფორმაციები იყოს, მაგრამ ეს ასეა და ბევრმა იცის, რომ ასეა. შესაბამისად, ყველას ვაფრთხილებ, ნურავინ გაეხვევა იმ ბოროტ თაღლითობაში, როცა ამნისტიაში რაღაც მუხლების ჩაწერის დაპირებით სარგებლობენ და ატყუებენ ვიღაცებს“,- აღნიშნა მდინარაძემ.

მან ასევე გაუსვა ხაზი იმას, რომ ამნისტიის კანონი არ გახდება პოლიტიკური თუ სხვა სახის ვაჭრობის საგანი.

„ასევე, მინდა „გირჩის“ წარმომადგენლებს მივმართო, ძალიან ბევრი საუბრობს იმაზე, რომ თქვენ შეგვევაჭრებით ამ თემასთან დაკავშირებით, რაღაც პოლიტიკური ვაჭრობა გაიმართება და რაღაც მუხლებს ჩაგვაწერინებთ ამაში. ეს ამბავი ციხეშიც ვრცელდება. თქვენი ბრალი შეიძლება ეს არ არის, მაგრამ შეიძლება ვიღაცები საუბრობენ კიდევაც ამას და ყველას ვაფრთხილებ, რომ ასე ნუ ისაუბრებენ. თქვენ რომ არგუმენტები მოგაქვთ შეიძლება ამან რამე დააზიანოს, თუნდაც დაზარალებულზე რომ ვლაპარაკობთ. მაგალითად, თუ ავტოავარიებზეა საუბარი შეიძლება რაღაც საკითხები ჩავამატოთ კიდეც, ოღონდ აუცილებლად დაზარალებულის თანხმობით. მაგრამ ყველას ვაფრთხილებთ, რომ ეს არავითარ შემთხვევაში არ იქნება რაიმე პოლიტიკური ვაჭრობს საგანი და სხვა სახის მითუმეტეს. თუკი ვინმეს უნდა, რომ რომელიმე მუხლს არ შეეხოს, მაშინ უნდა გაავრცელოს, რომ ამ მუხლზე შეიძლება ვიღაცამ ივაჭროს პოლიტიკურად ან სხვაგვარად. მათ შორის, ყველას ვაფრთხილებ, რომ თუ ვინმე ვინმეს აქეზებს, რომ შენ დაიწყე შიმშილობა და ამასაც შეეხება ამნისტია, ეს ასე არ მოხდება. თუკი რამე მუხლს ცვლილება შეიძლება შეეხოს ერთადერთი საფუძველი შეიძლება იყოს მყარი არგუმენტები სამართლებრივი, მორალური და ა.შ.“,- განაცხადა მდინარაძემ.

ჩვენი მიზანია პატიმრების რაოდენობა იმ ნიშნულამდე დავწიოთ, რომ ეს იყოს საერთო ევროპულ სტანდარტში – პირობას ვაძლევთ ყველას, რომ ვერცერთი ვეტო და დესტრუქციული ნაბიჯი ვერ შეაფერხებს საპარლამენტო უმრავლესობის საქმიანობას, – ამის შესახებ იურიდიულ საკითხთა კომიტეტის თავმჯდომარემ, ანრი ოხანაშვილმა, კომიტეტის სხდომაზე განაცხადა, სადაც დეპუტატები „ამნისტიის შესახებ“ კანონპროექტს პირველი მოსმენით განიხილავდნენ.

როგორც ოხანაშვილმა აღნიშნა, ამ ხელისუფლებისთვის მნიშვნელოვანია ნებისმიერი პატიმრის რესოციალიზაცია, რათა ის საზოგადოებას საზოგადოების ჯანსაღ წევრად დაუბრუნდეს.

„ჩვენი ამოცანაა [ამნისტიის პროექტის] ისეთი მოდელის შექმნა და კანონისთვის ისეთი ფორმის მიცემა, რომელიც იქნება დაბალანსებული. ეს ხელისუფლება არ უყურებს პატიმარს როგორც ობიექტს, ამ ხელისუფლებისთვის მნიშვნელოვანია ნებისმიერი პატიმრის რესოციალიზაცია, რათა ის საზოგადოებას ჯანსაღ წევრად დაუბრუნდეს, მეტი მართლშეგნებით, მეტი მონდომებით, დანაშაულისკენ რომ აღარ გაიხედოს. ჩვენი მიზანია პატიმრების რაოდენობა იმ ნიშნულამდე დავწიოთ, რომ ეს იყოს საერთო ევროპულ სტანდარტში. თუმცა მთავარი საზრუნავი აქ არის ის, რომ რაც შეიძლება ნაკლებმა ადამიანმა ჩაიდინოს დანაშაული შემდგომ და ნაკლები ადამიანი წავიდეს ციხეში, ვინაიდან საპატიმრო დაწესებულებაში მოთავსება ისეთი უფლებების შეზღუდვას უკავშირდება, რომლის აღდგენასაც შემდგომ დრო სჭირდება. ჩვენთვის, რა თქმა უნდა, სასურველია და უკეთესია, რომ ნაკლები პატიმარი გვყავდეს. თუმცა ეს მხოლოდ ჩვენზე არაა დამოკიდებული. ასევე, სასპეკულაციო სივრცე რომ არ დავტოვოთ, შესაძლოა, ახლა მივიღოთ ამნისტიის პროექტი და ახალი მოწვევის პარლამენტის შეკრებისთანავე მეორე ეტაპი განხორციელდეს. თუ ერთი პროექტის ფარგლებში უნდა გაკეთდეს ეს ყველაფერი, ამ შემთხვევაში, ახალი მოწვევის პარლამენტის ფარგლებში ხომ არ გავაკეთოთ ნაწილი, ნაწილი ახლა. შეიძლება ამ ყველაფერზე ფიქრი და მუშაობა, თუ უფრო ფართო მუხლების დაფარვა გვსურს. რაც შეეხება პრეზიდენტის ვეტოს, არაფერია გამორიცხული, ამ რისკსაც ვითვალისწინებთ და ვიმოქმედებთ კანონმდებლობის სრული დაცვით. როგორც აქამდე ვერ შეაფერხა ვეტოებით საპარლამენტო ცხოვრება, ამ შემთხვევაშიც, პირობას ვაძლევთ ყველას, რომ ვერცერთი ვეტო და დესტრუქციული ნაბიჯი ვერ შეაფერხებს საპარლამენტო უმრავლესობის საქმიანობას, რომელიც საზოგადოების ინტერესებს უკავშირდება.

სააკაშვილსაც აქვს გამოყენებული ვეტო „ამნისტიის კანონზე“. შესაბამისად, ზურაბიშვილისგან, რომელიც სააკაშვილის გზას ადგას მთელი რიგი მიმართულებებით, გამორიცხული არაფერია. არავითარი ფასი ვეტოს არ აქვს, არც მოლოდინები არ უნდა შევქმნათ, რომ შემდგომ ვინმემ იმით მოიწონოს თავი, რომ რაღაცას ვეტო დაადოს. არავითარი ფასი და ძალა ამას არ ექნება“, – განაცხადა ანრი ოხანაშვილმა.