ობიექტური შეფასების შედეგად, მართლმსაჯულებაზე წვდომის ინდექსის მიხედვით, საქართველო ევრაზიის კონტინენტზე პირველ ადგილზე, ხოლო მსოფლიოში პირველ ხუთეულშია. მეტსაც გეტყვით, 2012 წლის შემდეგ 20 პროცენტზე მეტად არის გაზრდილი ჩვენი რეიტინგი, – ასე გამოეხმაურა რეგიონული პოლიტიკისა და თვითმმართველობის საპარლამენტო კომიტეტის თავმჯდომარის პირველი მოადგილე, ირაკლი ზარქუა გლობალური დემოკრატიის საერთაშორისო შემფასებელი ორგანიზაციის – „დემოკრატიის მრავალფეროვნების” კვლევას, რომელიც სამართლიან მართლმსაჯულებაზე წვდომას ეხება.

„არაკეთილისმსურველები მორალს გვიკითხავენ, ნიშნის მოგებით გვესაუბრებიან, დემოკრატია, ადამიანის უფლებებიო და მათივე საერთაშორისო ორგანიზაციები, რომლებიც აპოლიტიკურები არიან და ობიექტურად იკვლევენ ამა თუ იმ ქვეყნის დემოკრატიულობას, კანონის უზენაესობას, მათ შორის მართლმსაჯულებას, ისინი აფასებენ ობიექტურად. ობიექტური შეფასების შედეგად, საქართველო არის ევრაზიის კონტინენტზე პირველ ადგილას“, – აღნიშნა ზარქუამ.

ამასთან, მან მიმართა საქართველოში ევროკავშირის ელჩს, პაველ ჰერჩინსკის, რომ აღნიშნულ მონაცემებს გადახედოს.

„მისტერ ჰერჩინსკი, იქნებ თქვენც გადახედოთ ამ მონაცემებს და გადაიფიქროთ სამარცხვინო განცხადება, რაც გააკეთეთ. ჩვენი თავდაცვის ბიჭები მისიებში მონაწილეობდნენ, მათ შორის ევროპის კონტინენტის უსაფრთხოების ნაწილში, ბევრმა თავი გაწირა, ბევრი დასახიჩრებული დაუბრუნდა თავის ოჯახს, სამშობლოს. ასეთ ბიჭებსა და ქვეყანაზე, რომელიც გვერდში გედგათ და ერთ-ერთი ყველაზე დიდი რაოდენობის ჯარისკაცი გვყავდა გაგზავნილი ამ მისიებში, მათ შორის ერაყსა და ავღანეთში, ასეთ ბიჭებზე თქვენ თქვით, არა, ისინი 30 მილიონს არ იმსახურებენ, გიგაურებს და ლომჯარიებს უნდა გადავურიცხოთ, რადგან დემოკრატიისა და ადამიანის უფლებების შელახვას ვხედავთო“, – აღნიშნა ზარქუამ.

სამართლიან მართლმსაჯულებაზე წვდომის ინდექსით საქართველო ისტორიულ მაქსიმუმზეა და 11-წლიანი პროგრესით ევრაზიის კონტინენტზე პირველ ადგილს იკავებს.

ქვეყანაში, სადაც პრეზიდენტობის კანდიდატისა და ყოფილი პრეზიდენტის უფლებები არ არის დაცული, მისი ხელისუფლება რომ გამოვა და მე გამაკრიტიკებს, მორალს წამიკითხავს, როგორ დავიცვა ადამიანის უფლებები, როგორ შევამცირო პოლარიზაცია, ამაზე ნოტაციას რომ წამიკითხავს, ვერ მივიღებ, – ამის შესახებ რეგიონული პოლიტიკისა და თვითმმართველობის საპარლამენტო კომიტეტის თავმჯდომარის პირველმა მოადგილემ, ირაკლი ზარქუამ განაცხადა.

„სამწუხაროდ, ჩაფლავდა ამერიკის შეერთებული შტატების ამ ხელისუფლების პერიოდში ამერიკა, როგორც დემოკრატიის შუქურა. სამწუხაროა ამას რომ ვამბობ, რადგან ჩვენთვის ყოველთვის იყავით მაგალითის მომცემი და რას დაამსგავსეთ ქვეყანა, წინასაარჩევნოდ პრეზიდენტობის კანდიდატს ტყვიას ესვრიან. ამაზე კომენტარი რა არის?“, – განაცხადა ზარქუამ.

პენსილვანიაში, სადაც დონალდ ტრამპი მხარდამჭერებთან შეხვედრას მართავდა და მათ სიტყვით მიმართავდა, სროლა იყო. დაიღუპა მიტინგის ერთი მონაწილე.

დონალდ ტრამპის თქმით, ტყვიამ მას მარჯვენა ყურის ზედა ნაწილი გაუხვრიტა.

აშშ-ის გამოძიების ფედერალური ბიურო (FBI) აცხადებს, რომ სროლა, რომელიც აშშ-ის ყოფილი პრეზიდენტის, დონალდ ტრამპის მიტინგზე მოხდა, ყოფილი პრეზიდენტის მკვლელობის მცდელობა იყო.

აშშ-ის გამოძიების ფედერალურმა ბიურომ (FBI) დონალდ ტრამპის მიტინგზე მსროლელის ვინაობა დაასახელა.

„გამოძიების ფედერალურმა ბიურომ გამოავლინა თომას მეთიუ კრუკსი [20 წლის], როგორც სუბიექტი, რომელიც მონაწილეობდა ყოფილი პრეზიდენტის, დონალდ ტრამპის მკვლელობის მცდელობაში. მომხდარი რჩება აქტიურ და მიმდინარე გამოძიებად“, – განაცხადეს უწყებაში.

დონალდ ტრამპის მკვლელობის მცდელობამ და მასზე ჩვენი ოპოზიციის და მათი ენჯეოების რეაქციამ საბოლოოდ დაადასტურა, რომ 26 ოქტომბრის არჩევნები იქნება წყალგამყოფი ომსა და მშვიდობას შორის, – ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელ წერს.

როგორც პარლამენტის თავმჯდომარე აღნიშნავს, “უცხოეთიდან მართული ამ ხალხის” ხელისუფლებაში მოსვლის თეორიულად დაშვებაც კი ჩვენი ქვეყნის “დაბეჩავებას, შიდა არეულობას, ეკონომიკის ჩამოშლას და ცეცხლის ალში საქართველოს გახვევას ნიშნავს”.

,,დონალდ ტრამპის მკვლელობის მცდელობამ და მასზე ჩვენი ოპოზიციის და მათი ენჯეოების რეაქციამ საბოლოოდ დაადასტურა, რომ 26 ოქტომბრის არჩევნები იქნება წყალგამყოფი ომსა და მშვიდობას შორის.

უცხოეთიდან მართული ამ ხალხის ხელისუფლებაში მოსვლის თეორიულად დაშვებაც კი ჩვენი ქვეყნის დაბეჩავებას, შიდა არეულობას, ეკონომიკის ჩამოშლას და ცეცხლის ალში საქართველოს გახვევას ნიშნავს.

ყველგან და ყოველთვის გახსოვდეს საქართველო!” – წერს პარლამენტის თავმჯდომარე.

დონალდ ტრამპი მხარდამჭერებს „ფიქრებისა და ლოცვებისთვის“ მადლობას უხდის.

“მხოლოდ ღმერთმა შეუშალა ხელი იმას, რომ წარმოუდგენელი რამ მომდარიყო. ჩვენ არ შევშინდებით, არამედ მტკიცენი დავრჩებით რწმენაში და ქედმოუდრეკელნი უკეთურების წინაშე”, – წერს აშშ-ის ყოფილი პრეზიდენტი Truth Social-ში გამოქვეყნებულ პოსტში.

მისი თქმითმ ახლა ერთიანობა ისეთი მნიშვნელოვანია, როგორც არასდროს.

“მე ნამდვილად მიყვარს ჩვენი ქვეყანა და მიყვარხართ თქვენ ყველანი და მოუთმენლად ველი ჩვენს დიდ ერთან საუბარს ამ კვირაში ვისკონსინიდან“, – აცხადებს ტრამპი.

დონალდ ტრამპი პენსილვანიის შტატში მხარდამჭერებთან შეხვედრის დროს მომხდარი სროლის შედეგად დაშავდა. შეხვედრის ერთ-ერთი მონაწილე დაიღუპა, ორი მონაწილე კი – მძიმედ დაშავდა. დაღუპულია თავად შეიარაღებული პირიც, რომელიც აშშ-ის საიდუმლო სამსახურის თანამშრომლებმა გაანეიტრალეს. აშშ-ის ფედერალური გამოძიების ბიურომ (FBI-მ) ყოფილი პრეზიდენტის, დონალდ ტრამპის მკვლელობის მცდელობაში მონაწილე პირის იდენტიფიცირება მოახდინა და განაცხადა, რომ ის 20 წლის თომას მეთიუ კრუკსია. დონალდ ტრამპმა საავადმყოფო შესაბამისი სამედიცინო დახმარების გაწევის შემდეგ მალევე დატოვა.

პარტია „ქართული ოცნების“ თავმჯდომარე ირაკლი ღარიბაშვილი დონალდ ტრამპზე თავდასხმას სოციალურ ქსელში ეხმაურება და აღნიშნავს, რომ ამერიკის პრეზიდენტობის კანდიდატი სასწაულებრივად გადაურჩა სიკვდილს.

ღარიბაშვილი მშვიდობას უსურვებს ამერიკას, ამერიკელ ხალხს და მთელ მსოფლიოს.

„ღრმად შეშფოთებული ვარ ამერიკის 45-ე პრეზიდენტზე, პრეზიდენტობის კანდიდატ დონალდ ტრამპზე თავდასხმით. მადლობა ღმერთს, ის სასწაულებრივად გადაურჩა სიკვდილს და ჯანმრთელადაა. მშვიდობას ვუსურვებ ამერიკას და ამერიკელ ხალხს, მთელ მსოფლიოს!“ – წერს ირაკლი ღარიბაშვილი.

“ქართული ოცნების” დეპუტატის, ირაკლი ზარქუას განცხადებით, პრეზიდენტ სალომე ზურაბიშვილს არაფერი აქვს საერთო ქართულ სახელმწიფოსთან, საერთო ქართულ ტრადიციებთან, მართლმადიდებლობასთან, ქართველი ხალხის ინტერესებთან და ბუნებრივია, ის „უცხოური გავლენის გამჭვირვალობის შესახებ“ კანონს გაასაჩივრებდა.

ზარქუას თქმით, ამ კანონის მიღებით, მორიგ ჯერზე მოხდა „უცხოური აგენტების ლუსტრაცია“.

„როდესაც ამ კანონს ვაინიცირებდით, ზუსტად ვიცოდით, რომ უცხოური გავლენის აგენტურა ამ კანონს შემდეგ გაასაჩივრებდა. როგორც მოლოდინი გვქონდა, პირველი არის პრეზიდენტი, რომელიც არაერთხელ არის შემჩნეული კონსტიტუციის დარღვევაში და ეს დადასტურებულია. მას არაფერი აქვს საერთო ქართულ სახელმწიფოსთან, საერთო ქართულ ტრადიციებთან, მართლმადიდებლობასთან, ქართველი ხალხის ინტერესებთან და ბუნებრივია, ის გაასაჩივრებდა, ამას ველოდებოდით. შემდეგ უკვე ლომჯარია-გიგაურები რომ გაასაჩივრებდნენ, ჩვენ ხომ ვიცოდით. როგორც კანონის განხილვის დროს ყველას ვეპატიჟებოდით, იქნებ ერთი არგუმენტი მაინც წარმოადგინეთო, კაციშვილი არ შემოდიოდა. ახლაც, მობრძანდნენ ჩვენ არგუმენტებს წარვადგენთ, რატომ უწყობს ხელს ქართული კანონის მიღება სუვერენიტეტის განმტკიცებას, თავისუფლებას და რატომ არის ეს ქართული სახელმწიფოს ინტერესებში. ამას მარტივად დავამტკიცებთ, მაგრამ მათი ლუსტრაცია კიდევ ერთხელ მოხდა. მადლობა ამ კანონს, მორიგ ჯერზე მოხდა ამ უცხოური აგენტების ლუსტრაცია“, – განაცხადა ზარქუამ.

ცნობისთვის, პრეზიდენტი საკონსტიტუციო სასამართლოში ამზადებს სარჩელს, რაც ე.წ. აგენტების კანონის არაკონსტიტუციურად ცნობას შეეხება. პრეზიდენტის გარდა, სარჩელს სამოქალაქო სექტორიც ამზადებს.

უკვე ორი თვე გადის მას შემდეგ, რაც უცხოური გრანტებით დაფინანსებული „ჯემნიუსის“ ჟურნალისტმა, ირაკლი დათუნაშვილმა კეფაში ტყვიის სროლის მუქარა გაავრცელა- ამის შესახებ წერს „ქართული ოცნების“ კომუნიკაციების დეპარტამენტის Facebook-გვერდი „სინამდვილეში“.

როგორც გვერდის, „სინამდვილეში“ განცხადებაშია აღნიშნული დღემდე არც ერთ დონორს არ დაუგმია ეს მოწოდება. მეტიც, სავარაუდოდ, ის დღემდე უცხოური გრანტიდან იღებს ხელფასს.

აქვე ნათქვამია, რომ ძალადობის წაყრუება ძალადობის წახალისებაა.

„უკვე ორი თვე გადის მას შემდეგ, რაც უცხოური გრანტებით დაფინანსებული „ჯემნიუსის“ ჟურნალისტმა, ირაკლი დათუნაშვილმა კეფაში ტყვიის სროლის მუქარა გაავრცელა.
დღემდე არც ერთ დონორს არ დაუგმია ეს მოწოდება. მეტიც, სავარაუდოდ, ის დღემდე უცხოური გრანტიდან იღებს ხელფასს. ძალადობის წაყრუება ძალადობის წახალისებაა“, – წერს Facebook-გვერდი „სინამდვილეში“.

გამაოგნებელია ის ფაქტი, რაც მსოფლიომ ახლახან იხილა – საპრეზიდენტო კანდიდატ დონალდ ტრამპზე თავდასხმა, რამაც შოკში ჩააგდო ცივილიზებული საზოგადოება, – ამის შესახებ თბილისის მერი კახა კალაძე სოციალურ ქსელში წერს.

„თავდასხმას შეეწირა უდანაშაულო ადამიანის სიცოცხლე, დაშავდნენ რიგითი მოქალაქეები. ნებისმიერი ადამიანის სიცოცხლის ხელყოფა უდიდესი დანაშაულია, მით უფრო, როდესაც საუბარია საპრეზიდენტო კანდიდატზე, რომელსაც მხარს უჭერს ამერიკის მოსახლეობის დიდი ნაწილი.

სასტიკად ვგმობთ დონალდ ტრამპზე თავდასხმას, სოლიდარობას ვუცხადებთ მას, ვუსურვებთ მალე გამოჯანმრთელებას და მთელი შემართებით საარჩევნო კამპანიაში ჩართვას!

ჩვენს მეგობარ ამერიკელ ხალხს კი ვუსურვებთ მშვიდობას და საკუთარი არჩევანის მშვიდ, სამართლიან გარემოში გაკეთებას!“, – წერს კალაძე.

ღრმად შოკირებული ვარ აშშ-ს ყოფილ პრეზიდენტ ტრამპზე განხორციელებული თავდასხმით, – ამის შესახებ საქართველოს პრეზიდენტი, სალომე ზურაბიშვილი სოციალურ ქსელში წერს.

პრეზიდენტის თქმით, პოლიტიკური ძალადობა სავალალოა და დემოკრატიაში ადგილი არ უნდა ჰქონდეს.

„პრეზიდენტ ტრამპს და ყველა დაშავებულს სწრაფ გამოჯანმრთელებას ვუსურვებ და ვუსამძიმრებ

ამ თავდასხმის დროს დაღუპულის ოჯახს”, – წერს პრეზიდენტი ზურაბიშვილი.

ცნობისთვის, დონალდ ტრამპი პენსილვანიის შტატში მხარდამჭერებთან შეხვედრის დროს მომხდარი სროლის შედეგად დაშავდა. შეხვედრის ერთ-ერთი მონაწილე დაიღუპა, ორი მონაწილე კი – მძიმედ დაშავდა. დაღუპულია თავად შეიარაღებული პირიც, რომელიც აშშ-ის საიდუმლო სამსახურის თანამშრომლებმა გაანეიტრალეს. აშშ-ის ფედერალური გამოძიების ბიურომ (FBI-მ) ყოფილი პრეზიდენტის, დონალდ ტრამპის მკვლელობის მცდელობაში მონაწილე პირის იდენტიფიცირება მოახდინა და განაცხადა, რომ ის 20 წლის თომას მეთიუ კრუკსია.