ლატვიამ ბელარუსის სანომრე ნიშნების მქონე ავტომობილების ქვეყანაში შესვლა აკრძალა. როგორც ლატვიის შემოსავლების სამსახურში განმარტეს, 16 ივლისიდან პირებს, რომლებიც გადაადგილდებიან ბელარუსის რესპუბლიკაში დარეგისტრირებული სატრანსპორტო საშუალებებით, მსუბუქი ავტომობილებით, ლატვიისა და ბელარუსის და ლატვიის და რუსეთის სასაზღვრო გამშვები პუნქტის გავლით ევროკავშირში შესვლა აეკრძალებათ.

როგორც განცხადებაშია აღნიშნული, ეს გადაწყვეტილება მიღებულია ევროკავშირის მიერ რუსეთის წინააღმდეგ დაწესებული სანქციებისთვის გვერდის ავლის აღსაკვეთად.

აკრძალვა არ გავრცელდება დიპლომატიური ან საკონსულო წარმომადგენლობებისთვის განკუთვნილ სატრანსპორტო საშუალებებზე.

განცხადებაში წერია, რომ თუ პირი, რომელიც ბელარუსში დარეგისტრირებულ ავტომობილს მართავს უარს იტყვის იმ ქვეყნის ტერიტორიაზე დაბრუნებაზე, საიდანაც ის ლატვიაში შესვლას აპირებდა, მაშინ საბაჟო სამსახურებმა შეიძლება, მიიღონ სატრანსპორტო საშუალების კონფისკაციის გადაწყვეტილება.

ამასთან, ბელარუსში დარეგისტრირებული ავტომობილებით ევროკავშირიდან ბელარუსში დაბრუნება დაშვებული იქნება, თუმცა იმ შემთხვევაში თუ ეს მანქანები არ არის დეკლარირებული როგორც პროდუქტი და გამოყენებულია როგორც სატრანსპორტო საშუალება.

აშშ-ის შიდა უსაფრთხოების დეპარტამენტის მდივანმა, ალეხანდრო მაიორკასმა განაცხადა, რომ დონალდ ტრამპის წინასაარჩევნო მიტინგზე სროლა უსაფრთხოების სფეროში ჩავარდნას ნიშნავს.

ინფორმაციას ამის შესახებ გამოცემა The Washington Post-ი ავრცელებს.

„როდესაც ვამბობ, რომ მსგავსი რამ არ შეიძლება მოხდეს, ჩვენ ვსაუბრობთ ჩავარდნაზე. ჩვენ ვაპირებთ, დამოუკიდებელი შემოწმების მეშვეობით გავაანალიზოთ, როგორ მოხდა ეს, რატომ მოხდა და მივიღოთ რეკომენდაციები და დასკვნები, რათა დავრწმუნდეთ, რომ ეს აღარ განმეორდება“, – აღნიშნა ალეხანდრო მაიორკასმა.

„ჩვენ გავაძლიერეთ უსაფრთხოების ზომები ყოფილი პრეზიდენტისთვის, სულ მცირე, ივნისიდან. ჩვენ არ მიგვიღია რაიმე მოთხოვნა უსაფრთხოების დამატებითი ზომების შესახებ“, – დასძინა მან.

აშშ-ის გამოძიების ფედერალური ბიურო (FBI) აცხადებს, რომ სროლა, რომელიც აშშ-ის ყოფილი პრეზიდენტის, დონალდ ტრამპის მიტინგზე მოხდა, ყოფილი პრეზიდენტის მკვლელობის მცდელობა იყო.

აშშ-ის გამოძიების ფედერალურმა ბიურომ (FBI) დონალდ ტრამპის მიტინგზე მსროლელის ვინაობა დაასახელა.

„გამოძიების ფედერალურმა ბიურომ გამოავლინა თომას მეთიუ კრუკსი [20 წლის], როგორც სუბიექტი, რომელიც მონაწილეობდა ყოფილი პრეზიდენტის, დონალდ ტრამპის მკვლელობის მცდელობაში. მომხდარი რჩება აქტიურ და მიმდინარე გამოძიებად“, – განაცხადეს უწყებაში.

ფლორიდის მოსამართლემ აშშ-ის ყოფილი პრეზიდენტის, დონალდ ტრამპის წინააღმდეგ საიდუმლო დოკუმენტების უკანონო შენახვის საქმის წარმოება დახურა.

ინფორმაციას ამის შესახებ ტელეკომპანია BBC ავრცელებს.

ფლორიდის საოლქო სასამართლოს მოსამართლემ, აილინ ქენონიმ, რომელიც ამ თანამდებობაზე დონალ ტრამპმა წარადგინა, განაცხადა, რომ სპეციალური პროკურორი ჯეკ სმიტი, რომელიც ბრალდების მხარეს წარმოადგენდა, უკანონოდ იყო დანიშნული ამ თანამდებობაზე და მას არ ჰქონდა უფლებამოსილება, საქმე აღეძრა.

ფედერალური პროკურატურის 49-გვერდიანი ოქმის მიხედვით, ტრამპს 37-მდე დარღვევაში ედება ბრალი. მათგან 31 ეროვნული თავდაცვის ინფორმაციის განზრახ უკანონოდ შენახვას ეხება. საიდუმლო დოკუმენტების განზრახ მითვისების გარდა, გამოკვეთილია მართლმსაჯულების შეფერხების მიზნით, დოკუმენტების გადამალვის, ფედერალური გამოძიებისთვის დოკუმენტის განზრახ არ გამჟღავნების ბრალდებებიც.

ამ ბრალდებებიდან ყველაზე მძიმე, რომელიც დაკავშირებულია დოკუმენტების დამალვასთან, 20 წლამდე თავისუფლების აღკვეთას ითვალისწინებს.

უკრაინა უსაფრთხოების სფეროში ორმხრივი შეთანხმებების ხელმოწერასთან დაკავშირებულ მოლაპარაკებებს კიდევ ცხრა ქვეყანასთან აწარმოებს, – ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.

მისი განმარტებით, „დიდი შვიდეულის“ ვილნიუსის დეკლარაციას უკრაინის „უსაფრთხოების გარანტიების“ შესახებ სულ 32 ქვეყანა შეუერთდა.

„ეს არის 32 ქვეყანა, რომელთანაც ჩვენ გავაფორმეთ, ან მიმდინარეობს ხელმოწერის პროცესი უსაფრთხოების გარანტიების შესახებ ორმხრივ შეთანხმებებზე. 23 ქვეყანას უკვე აქვს შესაბამისი შეთანხმებები უკრაინასთან, ეს მოიცავს ყველაფერს დაწყებული ფულიდან იარაღამდე და ჰუმანიტარული დახმარებიდან რეკონსტრუქციამდე“, – განაცხადა პრეზიდენტმა.

მისი ინფორმაციით, ამ შეთანხმებების დაახლოებითი ღირებულება 38 მილიარდი აშშ დოლარია, რაც კარგი შედეგია.

შეგახსენებთ, ნატო-ს სამიტის კვირაში ხელი მოეწერა უსაფრთხოების შეთანხმებებს პოლონეთთან, ლუქსემბურგთან და რუმინეთთან. ასევე სამიტის ფარგლებში, ხელი მოეწერა დამატებით შეთანხმებას, „უკრაინის კომპაქტს“ – მრავალმხრივ დოკუმენტს, რომელიც უკრაინის მხარდაჭერის ვალდებულებებს მოიცავს.

უკრაინელების 44%-ს მიაჩნია, რომ რუსეთთან სამშვიდობო მოლაპარაკებების დაწყების დრო დადგა,გამოკითხულთა 35% -წინააღმდეგია, 21%-ს – პასუხის გაცემა უჭირს, – აღნიშნული მონაცემები „რაზუმკოვის ცენტრმა“ გამოკითხვის შედეგებზე დაყრდნობით გამოაქვეყნა.

კვლევის თანახმად, ქვეყნის ცენტრალურ ნაწილში მცხოვრები მოსახლეობის 49%-ი მშვიდად მიიღებს ინფორმაციას რუსეთის ფედერაციასთან ოფიციალური სამშვიდობო მოლაპარაკებების დაწყების შესახებ. უკრაინის დასავლეთ ნაწილში ეს მაჩვენებელი მნიშვნელოვნად დაბალია და მხოლოდ 35%-ს შეადგენს. ქვეყნის აღმოსავლეთში მოლაპარაკებების დაწყება გამოკითხულთა მხოლოდ 33%-ს სურს.

კითხვაზე, უნდა გაუქმდეს თუ არა პრეზიდენტ ვოლოდიმირ ზელენსკის მიერ 2022 წლის ოქტომბრის ბრძანება, რომლის თანახმადაც ვლადიმერ პუტინთან მოლაპარაკებები შეუძლებელია, კვლევის მონაწილეთა 32%-მა დადებითად უპასუხა. 37%-ს მიაჩნია, რომ ეს დადგენილება, შესაძლოა, ძალაში დარჩეს.

ამავდროულად, უკრაინელების აბსოლუტური უმრავლესობა მიიჩნევს, რომ ქვეყანა არ უნდა დაეთანხმოს ვლადიმერ პუტინის მიერ შეთავაზებულ „სამშვიდობო“ პირობებს. გამოკითხულთა 83%-მა განაცხადა, რომ არ დაეთანხმება უკრაინის ჯარების გაყვანას დონეცკის, ლუგანსკის, ხერსონისა და ზაპოროჟიეს ტერიტორიებიდან. გამოკითხულთა 77%-ი ეწინააღმდეგება რუსეთის წინააღმდეგ დაწესებული ყველა საერთაშორისო სანქციის მოხსნას, გამოკითხულთა 58.5%-ი არ ეთანხმება უკრაინის კონსტიტუციაში ნეიტრალური და არაბირთვული ქვეყნის სტატუსის დამატებას. 22%-ი კი მზადაა ასეთი ნაბიჯისთვის.

უკრაინელების უმრავლესობა, 76%-ი, დარწმუნებულია, რომ რუსეთის პრეზიდენტისთვის მშვიდობა მხოლოდ საკუთარი პირობებითაა დასაშვები. 47%-ს მიაჩნია, რომ პუტინი “მზადაა ვაჭრობისთვის”, რადგან ომი რუსეთის ეკონომიკას ძალიან ძვირი უჯდება.

„რაზუმკოვის ცენტრმა“ გამოკითხვა უკრაინული გამოცემის, ZN.UA-ს (“კვირის სარკე”) დაკვეთით ჩაატარა.