საქართველოს პრეზიდენტმა, სალომე ზურაბიშვილმა ორბელიანების სასახლეში თბილისის მე-8 საერთაშორისო კონფერენციის, „გარდამტეხი წლის“ ორგანიზატორებსა და მონაწილეებს უმასპინძლა და მიწვეულ სტუმრებს სიტყვით მიმართა.

„მოხარული ვარ, რომ გმასპინძლობთ ორბელიანების სასახლეში მაშინ, როდესაც თქვენი კონფერენცია უკვე მერვედ ტარდება თბილისში. ყოველ ჯერზე თქვენ თბილისში ძალიან მნიშვნელოვან მომენტში ჩამოდიხართ. ნამდვილად, ყოველ ჯერზე ეს მნიშვნელოვანი მომენტი იყო ამ ქვეყნის ისტორიაში. მაგრამ ვფიქრობ, რომ წელს ძალიან განსაკუთრებული პერიოდია. არა მხოლოდ მნიშვნელოვანი, არამედ გადამწყვეტი და საქართველოსთვის ეგზისტენციალური მომენტია. დარწმუნებული არ ვარ, რომ ბოლო პერიოდში გვქონია ისეთი გადამწყვეტი მომენტები, როგორიც 26 ოქტომბერს გვექნება. საქართველო მართლაც გარდამტეხ მომენტშია. „ქართულმა ოცნებამ“ შეწყვიტა ოცნებად ყოფნა, ის კოშმარად იქცა, რომელიც საქართველოს აშორებს იმას, რაც იყო მისი დიდი ხნის მიზანი და არა – ოცნება. ეს არასდროს ყოფილა ოცნება. ეს იყო მიზანი, ეს იყო ამბიცია, ეს იყო მისწრაფება. არა მხოლოდ საქართველოს დამოუკიდებლობის მოპოვების შემდეგ (30 წელზე მეტი ხნის წინ), არამედ საუკუნეების განმავლობაში საქართველო ყოველთვის დასავლეთისკენ, ევროპისკენ ბრუნდებოდა და თავს ევროპულ ქვეყნად ხედავდა. ის ყოველთვის დასავლეთს უყურებდა, რადგან ყოველთვის სურდა, დამოუკიდებელი ყოფილიყო იმპერიებისგან, განსაკუთრებით, ჩვენი ჩრდილოელი მეზობლისგან. დღეს კი რაც ხდება, საქართველოსთვის ტრაგედიაა.

ტრაგედიაა, როცა ზოგი, არ ვამბობ, რომ ჩვენ, მაგრამ ზოგი ჩვენს მთავარ პარტნიორებს წლების განმავლობაში ომის პარტიას უწოდებს და არაფერს ამბობს მეზობელ ქვეყანაზე, რომელსაც ჩვენი ტერიტორიის 20 პროცენტი ოკუპირებული აქვს. ეს ტრაგედიაა, როცა იწყებ არევას და არ იცი, სადაა შენი მთავარი ორიენტაცია. ეს ტრაგედიაა ადამიანისთვის, ინდივიდისთვის და ეს კიდევ უფრო დიდი ტრაგედიაა ქვეყნისთვის. განსაკუთრებით ისეთი ქვეყნისთვის, როგორიც საქართველოა, რომელმაც საუკუნეების განმავლობაში ყოველთვის იცოდა, როგორ დაიცვას თავისი დამოუკიდებლობა, თავისი ღირებულებები და კულტურული ფასეულობები. ამ ფასეულობებს შორის ერთ-ერთს ქართველები საუკუნეების განმავლობაში აფასებდნენ – ეს იყო შემწყნარებლობა, მრავალფეროვნება. ასე რომ, ქვეყანა, რომელიც დღესაა წარმოჩენილი, არ არის ქართული ქვეყანა, ეს რაღაც განსხვავებულია. ეს არის ქვეყანა, რომელიც მზად იქნება, დაემორჩილოს ოკუპანტს, მზად იქნება, დათმობაზე წავიდეს ოკუპანტთან, მზად იქნება, ზურგი შეაქციოს მათ, ვინც მხარს უჭერდა საქართველოს და ქართულ სახელმწიფოს ამ წლების განმავლობაში, და ნამდვილად, თქვენ ყველას თქვენი წვლილი გაქვთ შეტანილი სახელმწიფო ინსტიტუტების მშენებლობაში. ჩვენ ვხედავთ ქვეყანას, სადაც თითქმის ყველა ინსტიტუტი დაცარიელდა შინაარსისა და დამოუკიდებლობისგან“, – განაცხადა სალომე ზურაბიშვილმა.

მისივე თქმით, მეტ-ნაკლებად გადარჩა ერთი ინსტიტუტი და ეს არის პრეზიდენტის ინსტიტუტი.

„ერთი გადარჩა მეტ-ნაკლებად – პრეზიდენტის ინსტიტუტი, მაგრამ მასაც თავს დაესხნენ. ყველას გახსოვთ იმპიჩმენტის პროცედურა და ყველამ იცით, რომ რეალური ძალაუფლების კუთხით, გარდა სიტყვის ძალისა, პრეზიდენტის ინსტიტუტს თანდათან უარი უთხრეს თითქმის ყველა უფლებამოსილებაზე, რითიც შესაძლებელი იქნებოდა წინააღმდეგობის გაწევა იმისთვის, რაც ქვეყანაში ხდება. ჩვენ ვხედავთ, რომ „ქართული ოცნება“, მმართველი პარტია ნამდვილად მიიწევს ჯერ ნაბიჯ-ნაბიჯ, შემდეგ კი დაჩქარებული გზით რაღაცისკენ, რაც სრულიად უცხოა ამ ქვეყნისთვის.

როცა გვაქვს „ქართული ოცნების“ საპატიო თავმჯდომარის უახლესი გამოსვლები, რომელიც პრაქტიკულად ომს უცხადებს ჯერ ჩვენს პარტნიორებს და მათ ომის პარტიებს უწოდებს, მაგრამ ასევე ომს უცხადებს საკუთარ მოსახლეობას, ქვეყანაში არსებულ პოლიტიკურ ძალებს, როცა წინასწარ აცხადებენ, რომ ისინი მიიღებენ საკონსტიტუციო უმრავლესობას (რაც მათი ოცნებაა) და პოლიტიკურ პარტიებს აკრძალავენ ან მართლმსაჯულების სისტემაში გაატარებენ, რომელიც უკვე აღარ არსებობს. ჩვენ გუშინ და გუშინწინ ვნახეთ, საკონსტიტუციო სასამართლო თუ როგორ ცდილობს, ახლა მთელი რეალობის საწინააღმდეგოდ გაამართლოს, რომ რუსული კანონი ნამდვილად არ ართმევს საქართველოს ევროპულ მომავალს, რომ ის არ მოქმედებს ჩვენს მთავარ ორიენტაციაზე. ასე რომ, ეს ყველაფერი მიუღებელია.

ეს, პირველ რიგში, მიუღებელია ქართველი ხალხისთვის; და ქართველმა ხალხმა ქუჩაში გამოსვლით უკვე ორჯერ თქვა – შარშან და წელს – ძალიან მკაფიოდ, რომ არ ეთანხმება იმას, რაც ამ ქვეყანაში ხდება; ისინი არ იღებენ საქართველოს ამ ახალ იმიჯს და რომ არ არიან მზად ამ ავტორიტარულ ახალ რეჟიმს და ძალაუფლებას დაემორჩილონ.

ქართველი ხალხის, ქართველი ახალგაზრდობის შემდეგი ნაბიჯი (მაგრამ არამარტო ახალგაზრდობა. ჩვენ გვაქვს ტენდენცია, ვთქვათ, რომ ეს მხოლოდ ახალგაზრდები იყვნენ, მაგრამ ეს ძალიან მასობრივი პროტესტი იყო) ისაა, რომ მოსახლეობა უნდა გამოვიდეს და იგივე თქვას ყველაზე დემოკრატიული მეთოდით, არჩევნებით. ეს არის გზა საქართველოს სტაბილურობისკენ. მე არ ვარ მათ შორის, ვინც ამბობს: „აბა, ვნახოთ, რა იქნება არჩევნებზე და მეორე დღეს ვნახოთ, რა იქნება ქუჩებში“. არა, რაც მოხდება, მოხდება არჩევნებზე, ბიულეტენებში. ამ ქვეყანაში არ არსებობს ძალა, რომელსაც შეუძლია, ხალხის ნება დაძლიოს. არ არსებობს იმის შესაძლებლობა, რომ გააყალბოს არჩევნები იმ დონემდე, რომ წავიდეს საქართველოს მოსახლეობის ნების მასობრივი გამოხატვის წინააღმდეგ. მჯერა, რომ საქართველოს მოსახლეობა თავის სიტყვას იტყვის არჩევნებზე.

ასე რომ, როცა მკითხავთ: „რა შეგვიძლია გავაკეთოთ?“ – თქვენ ბევრი გააკეთეთ იმისთვის, რომ საქართველო იქ მისულიყო, სადაც არის და ბევრი გააკეთეთ მენტალიტეტის შესაქმნელად და მხარდასაჭერად, რადგან ვფიქრობ, რომ სიღრმისეულად ქართული მენტალიტეტია, იყო თავისუფალი, დამოუკიდებელი და არ მიიღოს ავტორიტარული რაიმე ფორმა, იქნება ეს შიდა თუ გარედან მომდინარე. თქვენ მხარს გვიჭერდით ინსტიტუტების მხარდაჭერით, სახელმწიფოს განვითარების მხარდაჭერით, ჩვენი ახალგაზრდებისთვის ევროპაში თავისუფლად მოგზაურობის შესაძლებლობით, ევროპასა და ამერიკაში თავისუფლად სწავლის შესაძლებლობით, თქვენ დაგვეხმარეთ ქართველი ხალხის დამოუკიდებლობის უდიდესი ნების მხარდაჭერასა და კონსოლიდაციაში. ასე რომ, მე ვენდობი ქართველ ხალხს, ვენდობი, რას იტყვის ის არჩევნებში ხმის მიცემით. ასე რომ, ამ საკითხში თქვენი საჭიროება არ დგას. თქვენ უნდა აკონტროლოთ; თქვენ უნდა იყოთ ყურადღებით და წარმომადგენლობითად, როგორც დღეს ხართ. მაგრამ გადაწყვეტილება ჩვენზეა. არჩევნების მეორე დღეს თქვენ მე მიპოვით, რადგან მოგეხსენებათ, მე სხვადასხვა პოლიტიკურ პარტიასთან ვიმუშავე, რათა ყველა პროევროპული პარტია ქართული ქარტიის ირგვლივ გაერთიანებულიყო, რომელიც რეალურად ჩვენი გზაა ევროკავშირის ზოგიერთი რეკომენდაციის დასაკმაყოფილებლად და მოლაპარაკებების გასაახლებლად, გასახსნელად, როგორც ეს იყო ჩვენი პარტნიორების, უკრაინისა და მოლდოვის შემთხვევაში.

ეს ქარტია იმ კარის გასაღებია, რომელიც საქართველოსთვის უნდა გაიხსნას. როგორც კი ქართველი ხალხი ღიად დაუჭერს მხარს როგორც ქარტიას, ასევე ამ გზას, მე ვიქნები ამ ქარტიის ელჩი ჩვენს ევროპელ და ამერიკელ მეგობრებთან. ასე რომ, ევროპელებს მოუწევთ მოლაპარაკებების დაწყება რაც შეიძლება მალე და ჩვენ სწრაფად უნდა შევასრულოთ ის, რაც წერია ქარტიაში, რომელიც ძალიან დეტალურია. ჩვენმა ამერიკელმა მეგობრებმა უნდა შეასრულონ „მეგობარი აქტი“, რაც ასევე ძალიან ნათლად ჩანს, რომ პოზიტიურ მხარეზეა. უარყოფითი ასპექტები არ არის ჩემი განსახილველი, მაგრამ დადებითი ასპექტები არის. მას შემდეგ, რაც ქართველი ხალხი გააკეთებს იმას, რაც უნდა გააკეთოს, ჩვენ დაგვჭირდება თქვენი მხარდაჭერა, როგორც არასდროს, ჩვენი განვითარების შემდეგი ეტაპისთვის. ჩვენ ეს უნდა გავაკეთოთ სტაბილურ გარემოში და თქვენ გჭირდებათ საქართველო, რომელიც მტკიცედ დაუბრუნდება თავის დემოკრატიულ გზას, საქართველო, რომელიც არის სტაბილური პარტნიორი, საქართველო, რომელსაც შეგიძლიათ ენდოთ. თუ მსოფლიოს რუკას გადავხედავთ, ეს წელი მხოლოდ ჩვენთვის არ არის გადამწყვეტი; ჩვენ ყველამ ვიცით, რომ ეს გადამწყვეტია უკრაინისთვის და ყველამ ვიცით, რომ თავისუფალი სამყაროს მომავალი დიდად არის დამოკიდებული იმაზე, თუ რა მოხდება უკრაინაში. ჩვენთან უფრო ახლოს, შავი ზღვის რეგიონის მომავალი – და ეს თქვენთვისაც მნიშვნელოვანია – დამოკიდებულია იმაზე, თუ რა მოხდება უკრაინაში, მოლდოვაში და საქართველოში. ჩვენ ვართ ისინი, ვისაც შეგვიძლია, ჩვენს ევროპელ და ამერიკელ მეგობრებს და ნატო-ს პარტნიორებს თავისუფალი, უსაფრთხო და თანამშრომლობითი შავი ზღვა შევთავაზოთ, რაც ძალიან მნიშვნელოვანია დასავლური სამყაროს მომავლისთვის, ევროპისთვის და ასევე შეერთებული შტატებისთვის. ჩვენ ყველანი ერთ სიტუაციაში ვართ. ჩვენ ჩვენი ნაწილი უნდა გავაკეთოთ, თქვენ კი – თქვენი. მე ძალიან ოპტიმისტი ვარ, რადგან არ მჯერა ოცნებების, მაგრამ მჯერა იმის, რაც იყო ამ ქვეყნის ბედისწერა და რჩება ბედისწერად. ეს ქართველმა ხალხმა კარგად იცის“, – განაცხადა სალომე ზურაბიშვილმა.

„ნაცმოძრაობის“ ერთ-ერთმა ორგანიზაცია „სირცხვილიამ“ თავის თავზე გამოსცადა ფაშისტური ბულინგის გემო, რასაც ვერ გაუძლო, დამარცხდა ამ ბულინგთან და უკან წაიღეს თავიანთი სიტყვები, სადაც აღიარებდნენ, რომ არანაირი აგენტი და მსგავსი მიდგომები გამჭვირვალობის კანონში არ იყო, – ამის შესახებ საპარლამენტო უმრავლესობის ლიდერმა, მამუკა მდინარაძემ დღევანდელ ბრიფინგზე განაცხადა.

როგორც მდინარაძემ აღნიშნა, აქედან გამომდინარე, „სირცხვილიამ“ პრაქტიკულად აღიარა ისიც, რომ არანაირი რუსული ჩანართები არ იყო კანონმდებლობაში.

„ეს იყო საუკუნის აფიორა, რომელიც ორი წლის განმავლობაში მიმდინარეობდა და ამ საუკუნის აფიორას ერქვა – არა რუსულ კანონს. ეს იყო დადგმული, ფართომასშტაბიანი სპეცოპერაცია, სპექტაკლი, რომელიც მიმართული იყო გამჭვირვალობის, ქართული სახელმწიფოს და სახელმწიფოებრიობის წინააღმდეგ. ყველასთან ძალიან დიდი ბოდიში, უნდა გამოვიყენო უხეში ტერმინი, იურიდიული კომიტეტის ახალგაზრდა, პროფესიონალმა იურისტებმა ყველა ადამიანს, რომელიც რუსულ კანონს უწოდებდა სპეკულაციურად და განზრახ, თავზე გადაახიეს თავისი სარჩელი. უკაცრავად ამ გამოთქმისთვის. ჩვენ ვნახეთ სამდღიანი პროცესი, როდესაც იურიდიული კომიტეტის აპარატის იურისტებმა მაღალ პროფესიულ დონეზე, ყველა კომპონენტში მოუგეს პროცესი „ნაცმოძრაობის“ სხვადასხვა წარმომადგენელს, მათ შორის ზოგი იწოდება „ენჯეოდ“, ზოგი ჟურნალისტად და ა.შ. საერთო ჯამში ეს იყო უსამშობლოთა სარჩელი და საჩივარი საქართველოს წინააღმდეგ, რომელიც პირწმინდად მოიგეს ახალგაზრდა თაობის პროფესიონალმა იურისტებმა“, – აღნიშნა მამუკა მდინარაძემ.

ამასთან, მამუკა მდინარაძის განმარტებით, სიცრუეა, თითქოს გამჭვირვალობის რეესტრში რეგისტრაცია გაიარა არასამთავრობო ორგანიზაციების მხოლოდ ერთმა პროცენტმა.

„ერთმა პროცენტმა გაიარა მხოლოდ რეგისტრაციაო – ამაზე დიდი ბინძური ტყუილი არ არსებობს. ისინი ითვლიან 30 000-დან, 30 000 „ენჯეო“ საქართველოში არ არსებობს, ეს მხოლოდ ფურცელზეა. როგორც შპს-ების რაოდენობა არის ასობით ათასი, რიგ შემთხვევაში ასე მოიხსენიებენ, ან ათობით ათასი, ასევეა 30 000 „ენჯეო“ საქართველოში ფურცელზე. რეალურად, მოქმედი „ენჯეო“ არის რამდენიმე ათასი და აქედან გაცილებით მცირე ნაწილი არის ისეთი, რომელიც 20 პროცენტზე მეტ დაფინანსებას იღებს უცხოეთიდან.

შესაბამისად, ერთი პროცენტი არის ძალიან დიდი ტყუილი. იგივე ლოგიკით ჩვენ შეგვიძლია ვთქვათ, რომ სარჩელი წარადგინა მხოლოდ 0,5-მა პროცენტმა, აპროტესტებდა სულ 1.5 თუ 2 პროცენტი. ასეთი მარტივი ფეიკი საზოგადოებას არ უნდა აკადრო და შესთავაზო. როგორც კი ვინმე იტყვის, რომ ერთი პროცენტი არის მხოლოდ დარეგისტრირებული, იმწუთასვე უნდა ვუთხრათ, რომ აპროტესტებდა მხოლოდ 1.5 პროცენტი და 98.5 პროცენტი არ აპროტესტებდა. ამიტომ რეალობა მდგომარეობს შემდეგში: როდესაც ჩვენ გავიგებთ ზუსტ რაოდენობას, არა ფორმალურად, ფურცელზე არსებული, არამედ რეალურად მოქმედი რამდენი „ენჯეოა“ საქართველოში, აქედან რამდენი იღებს 20 პროცენტზე მეტ დაფინანსებას უცხოეთიდან, ანუ მას ევალება რეესტრში რეგისტრაცია, აქედან დათვალონ შემდეგ პროცენტები. რამდენჯერაც ერთ პროცენტს იტყვიან, თავის თავს გაუკეთებენ ლუსტრირებას, რომ ისინი არიან მატყუარები.

ვინც არ დარეგისტრირდა, მათი მიზანია გაუმჭვირვალობა, მოკლედ და ყოველგვარი ზედმეტი შეფასების გარეშე. ქვეყნის საწინააღმდეგოდ ფულის დამალვის მიზანი. ეს მიზანი ჰქონდათ, როცა ისინი იბრძოდნენ მორალურად გაუმართავი მეთოდებით საქართველოს და გამჭვირვალობის კანონის წინააღმდეგ“, – განაცხადა მამუკა მდინარაძემ.

საქართველოს იუსტიციის სამინისტროში განაცხადეს, რომ უცხოური გავლენის გამჭვირვალობის რეესტრში დასარეგისტრირებლად საჯარო რეესტრის ეროვნულ სააგენტოში ამ დროისთვის 476 მსურველის განაცხადია შესული.

საპარლამენტო უმრავლესობის ლიდერის მამუკა მდინარაძის განცხადებით, ამნისტიის კანონი საბოლოო ჯამში, დაახლოებით 6 000 პატიმარს შეეხება.

როგორც მდინარაძემ უმრავლესობის სხდომის შემდეგ გამართულ ბრიფინგზე განაცხადა, ეს არის ერთ-ერთი ყველაზე მასშტაბური ამნისტია და ადამიანებს მიეცემათ რესოციალიზაციის საშუალება, რაც მნიშვნელოვანია.

„ხვალ და მომდევნო დღებში ჩვენ ვიმსჯელებთ ამნისტიის კანონზე, რომელიც საბოლოო ჯამში სხვადასხვა დროს და ფორმით შეეხება 6 000-მდე პატიმარს. აქედან 1 000-ზე მეტი ამნისტიის ძალაში შესვლისთანავე დატოვებს საპატიმროს, ხოლო 5 000 პატიმარი დატოვებს ეტაპობრივად, სხვადასხვა დროს. ეს არის ერთ-ერთი ყველაზე მასშტაბური ამნისტია. მიუხედავად ბევრი სპეკულაციისა, ჩვენ კარგ საქმეს ვაკეთებთ და ადამიანებს მიეცემათ რესოციალიზაციის საშუალება, რაც სასჯელის დანიშვნის დროსვე არის ხოლმე გათვალისწინებული“, – განაცხადა მამუკა მდინარაძემ.

რაც შეეხება სტატისტიკას, ამ წუთის მდგომარეობით ჩვენთან მომართული აქვთ შესაბამისი განცხადებით 469 ააიპ-ს. ამასთან, ამ წუთსაც კი, იუსტიციის სახლში არის რიგი, ჯერჯერობით არ ამოწურულა ეს რიცხვი და ჩვენ დღის ბოლოს, საბოლოო რიცხვს გავაჟღერებთ, ვინც ნებაყოფლობით მოგვმართა განცხადებით შესაბამის რეესტრში რეგისტრაციის მიზნებისათვის, – განაცხადა იუსტიციის მინისტრის მოადგილე თამარ ტყეშელაშვილმა გადაცემა „დღის ქრონიკაში“.

მისი თქმით, რაც შეეხება კითხვას იმასთან დაკავშირებით, თუ რა საქმიანობის საგანი აქვთ ამ ორგანიზაციებს ან საიდან ფინანსდებიან ისინი, კანონმდებლობით არ აქვს უფლება, რომ გაასაჯაროოს აღნიშნული ინფორმაცია იქამდე, ვიდრე ისინი არ იქნებიან რეგისტრირებულები ამ რეესტრში.

„ერთია, მომართვა და მეორეა, ჩვენი უწყების, საჯარო რეესტრის ეროვნული სააგენტოს პასუხისმგებლობა, რომ გადავამოწმოთ, ხომ ნამდვილად სწორია ის ინფორმაცია, რომელიც მათ მოგვაწოდეს შესაბამის განაცხადში, ანუ დეკლარაციაში.

აქ აუცილებლად, ხაზგასმით უნდა ვთქვა ის, რომ ჩვენი უწყება არის ძალიან მოწადინებული და მონდომებული თანამშრომლობაზე. ყველანაირად ვაკვალიანებთ შესაბამისი ორგანიზაციების წარმომადგენლებს, მუშაობს ცხელი ხაზიც. ასევე, ხდება უშუალოდ კომუნიკაცია, გადმომისამართება საჯარო რეესტრთან და მიდის კონსულტაცია, დახმარება ამ ადამიანების.

აქვე ერთი ნიუანსი უნდა აღვნიშნო, ჩვენ ვახსენეთ, რომ დღეს სრულდება ვადა. არ მინდა ეს იყო იმგვარად გაგებული, რომ საერთოდ სრულდება ვადა ჩვენთან მომართვის. სრულდება ნებაყოფლობით მომართვის ვადა, თუმცა, ხვალაც, ზეგაც და შემდგომაც მათ რჩებათ დრო, რომ კიდევ მოგვმართონ, თუმცა, ეს რა თქმა უნდა, იქნება უკვე არანებაყოფლობით მომართვა და უკვე სხვა რეჟიმი ამოქმედდება ამ ორგანიზაციების მიმართ, იმ კუთხით, რომ გამოიწვევს გარკვეულ ჯარიმას, ვადის დარღვევით მომართვის შემთხვევაში. თუმცა, რა თქმა უნდა, ეს არის აუცილებელი, რომ განმეორებით ქმედებებს არ ჰქონდეს ადგილი და გაგრძელდეს თანამშრომლობა უწყებასთან, სახელმწიფოსთან და უზრუნველყოფილი იყოს კანონის მიზანი“, – აღნიშნა მან.

საოლქო საარჩევნო კომისიების მიერ საუბნო-საარჩევნო კომისიების ხელმძღვანელი პირებისა და წევრების შესარჩევი კონკურსი გამოცხადდა. ცესკო-ს ინფორმაციით, 3 030 საარჩევნო უბანზე ამომრჩევლებს სულ 51 510 კომისიის წევრი მოემსახურება, მათგან საოლქო საარჩევნო კომისიებმა უნდა აირჩიონ 9 090 ხელმძღვანელი პირი და 15 150 წევრი. დანარჩენ 27 270 წევრს კი უფლებამოსილი ცხრა პოლიტიკური პარტია დანიშნავს.

„ცენტრალური საარჩევნო კომისია (ცესკო) გაცნობებთ, რომ კონკურსში მონაწილეობის მსურველებმა განცხადებით უნდა მიმართონ შესაბამის საოლქო საარჩევნო კომისიას 2-დან 5 სექტემბრის ჩათვლით 10:00-დან 18.00 საათამდე. ასევე, განმცხადებელმა საკონკურსო დოკუმენტაცია შესაძლებელია წარადგინოს სპეციალური ელექტრონული პლატფორმის Konkursi.cec.gov.ge საშუალებით.

პროცედურების გამარტივების მიზნით, ცესკო-მ მსურველთათვის შეიმუშავა განცხადების სარეკომენდაციო ფორმა, რომელიც ასევე ხელმისაწვდომია საოლქო საარჩევნო კომისიებში. აღსანიშნავია, რომ კანონის მოთხოვნის შესაბამისად, წელს პირველად საოლქო საარჩევნო კომისია სერტიფიცირებულ საუბნო-საარჩევნო კომისიის წევრებს აირჩევს.

კანონმდებლობაში შესული ცვლილებების შესაბამისად, საოლქო საარჩევნო კომისიების მიერ არჩეული საუბნო საარჩევნო კომისიების წევრებისთვის სერტიფიკატის ფლობა სავალდებულო გახდა. სერტიფიკატის აღების მსურველებისთვის მაქსიმალური ხელშეწყობის მიზნით საარჩევნო ადმინისტრაციამ მთელი ქვეყნის მასშტაბით რამდენჯერმე გაუწია ორგანიზება სერტიფიცირების გამოცდებს. გამოცდები 2023 წლის სექტემბრიდან 2024 წლის ივლისის ჩათვლით ჯამურად სულ ცხრაჯერ ჩატარდა. ხუთი გამოცდა – საუბნო საარჩევნო კომისიის ხელმძღვანელი პირებისთვის (მათ შორის, ორი გამოცდა ჩატარდა ეთნიკური უმცირესობების ენებზე ნათარგმნი ტესტების გამოყენებით), ხოლო ოთხი გამოცდა – საუბნო საარჩევნო კომისიის წევრებისთვის (მათ შორის, ორი გამოცდა ჩატარდა ეთნიკური უმცირესობების ენებზე ნათარგმნი ტესტების გამოყენებით). საერთო ჯამში, სერტიფიცირებულია 34 000-მდე პირი.

ამასთან, საარჩევნო ადმინისტრაციამ ბოლო წელიწად-ნახევრის განმავლობაში არაერთი საგანმანათლებლო და სასწავლო პროექტი განახორციელა, რომელიც მიზნად ისახავდა პოტენციური წევრების ინფორმირებასა და შესაძლებლობების განვითარებას.

აქვე გვინდა, აღვნიშნოთ, რომ არსებული გამოცდილებიდან გამომდინარე, დაინტერესებული მხარეების მხრიდან საუბნო საარჩევნო-კომისიების წევრთა შერჩევის პროცესის დისკრედიტაციის მცდელობას არ გამოვრიცხავთ. ხაზგასმით ვაცხადებთ, რომ საარჩევნო ადმინისტრაცია თავის საქმიანობას კანონმდებლობის სრული დაცვითა და საერთაშორისო სტანდარტების შესაბამისად ახორციელებს. მოვუწოდებთ ჩართულ მხარეებს, უსაფუძვლო და მანიპულაციური განცხადებებით ნუ დააზიანებენ საარჩევნო პროცესის ისეთ მნიშვნელოვან ეტაპს, როგორიცაა საუბნო საარჩევნო კომისიების დაკომპლექტება“, – ნათქვამია ცესკო-ს ინფორმაციაში.