Home Blog Page 771

 20 ივლისს საქართველოში წვიმიანი ამინდი შენარჩუნდება-გარემოს ეროვნული სააგენტო

გარემოს ეროვნული სააგენტო 20-22 ივლისს საქართველოში მოსალოდნელი ამინდის შესახებ ავრცელებს ინფორმაციას.

სინოპტიკოსების პროგნოზით, 21 ივლისის დილამდე საქართველოში შენარჩუნებული იქნება დროგამოშვებით წვიმიანი ამინდი, ზოგან შესაძლებელია სეტყვა და ქარის გაძლიერება. 21-22 ივლისს კი ხანმოკლე წვიმა მოსალოდნელია მხოლოდ ცალკეულ რაიონებში. ჰაერის ტემპერატურა ისევ მოიმატებს.

თბილისში 20-21 ივლისს მოსალოდნელია ხანმოკლე წვიმა ელჭექით. 22 ივლისს უნალექო ამინდი იქნება. ჰაერის ტემპერატურა დღისით +30, +32 გრადუსი დაფიქსირდება.

სანაპირო რაიონებში (ბათუმი, ქობულეთი, ანაკლია, ფოთი) 20 ივლისს მოსალოდნელია ხანმოკლე წვიმა ელჭექით, 21-22-ში კი უნალექო ამინდი იქნება. ჰაერის ტემპერატურა დღისით +28, +30 გრადუსი დაფიქსირდება.

დასავლეთ საქართველოს დაბლობ რაიონებში (ზესტაფონი, ქუთაისი, სამტრედია, ზუგდიდი, მარტვილი, ოზურგეთი) 20 ივლისს მოსალოდნელია ხანმოკლე წვიმა ელჭექით, 21-22-ში კი ცხელი და უმეტესდ უნალექო ამინდი იქნება. ჰაერის ტემპერატურა დღისით +32, +34 გრადუსი დაფიქსირდება.

დასავლეთ საქართველოს მთიან რეგიონებში (ამბროლაური, ონი, ცაგერი, შოვი, ჭიათურა, საჩხერე, ხულო, რიკოთის უღელტეხილი) მოსალოდნელია ხანმოკლე წვიმა ელჭექით. ჰაერის ტემპერატურა დღისით +30, +32 გრადუსი იქნება.

დასავლეთ საქართველოს მაღალმთიან რეგიონებში (მესტია, ბახმარო) მოსალოდნელია ხანმოკლე წვიმა ელჭექით. ჰაერის ტემპერატურა +27, +29 გრადუსი იქნება.

ქართლში (რუსთავი, ბოლნისი, მარნეული, გარდაბანი, გორი, ცხინვალი) 20-21 ივლისს მოსალოდნელია ხანმოკლე წვიმა ელჭექით. 22 ივლისს უნალექო ამინდი იქნება, ჰაერის ტემპერატურა დღისით +31, +33 გრადუსამდე აიწევს. კახეთში (საგარეჯო, თელავი, გურჯაანი, სიღნაღი, ლაგოდეხი, ყვარელი, ახმეტა, დედოფლისწყარო) 20-21 ივლისს მოსალოდნელია ხანმოკლე წვიმა ელჭექით, ზოგან შესაძლებელია სეტყვა და ქარის გაძლიერება. 22 ივლისს უნალექო ამინდი იქნება. ჰაერის ტემპერატურა დღისით +31, +33 გრადუსი დაფიქსირდება.

აღმოსავლეთ საქართველოს მთიან რეგიონებში (ახალციხე, ბორჯომი, დუშეთი, თიანეთი, ფასანაური) მოსალოდნელია ხანმოკლე წვიმა ელჭექით. ზოგან შესაძლებელია სეტყვა და ქარის გაძლიერება. ჰაერის ტემპერატურა დღისით +28, +30 გრადუსი იქნება.

აღმოსავლეთ საქართველოს მაღალმთიან რეგიონებში (ახალქალაქი, წალკა, ბაკურიანი, გუდაური, ომალო) მოსალოდნელია ხანმოკლე წვიმა ელჭექით. ზოგან შესაძლებელია სეტყვა და ქარის გაძლიერება. ჰაერის ტემპერატურა დღისით +20, +22 გრადუსი იქნება.

თამბაქოს წარმოება ლიცენზირებადი საქმიანობა ხდება

პარლამენტმა დაჩქარებული წესით განიხილა და სამივე მოსმენით მხარი დაუჭირა ინიციატივას, რომლის მიხედვით, თამბაქოს წარმოება ლიცენზირებადი საქმიანობა ხდება. სალიცენზიო მოსაკრებლის განაკვეთი 50 000 ლარი იქნება.

“თამბაქოს კონტროლის შესახებ“ კანონში განხორციელებელი ცვლილებებით, მოსაწევი თამბაქოს წარმოება (თამბაქოს ნედლეულის გაჩეჩვა, დანამვა და სოუსირება, თამბაქოს ნედლეულის შერევა, თამბაქოს დაჭრა, დაჭრილი თამბაქოს თერმული დამუშავება, დაჭრილი თამბაქოს არომატიზირება, დაჭრილი თამბაქოს შერევა, მზა პროდუქციის შეფუთვა) და სიგარეტის წარმოება (დაჭრილი თამბაქოს სიგარეტში განთავსება, ფილტრიანი და უფილტრო სიგარეტის წარმოება, სიგარეტის კოლოფში შეფუთვა) თამბაქოს წარმოების ლიცენზიას საჭიროებს.

თამბაქოს წარმოების ლიცენზიას არ საჭიროებს საქართველოს ტერიტორიაზე თამბაქოს ნაწარმის იმპორტი, საქართველოს ტერიტორიაზე სხვა სახის თამბაქოს ნაწარმის წარმოება, ასევე, ფიზიკური პირის მიერ თამბაქოს საქართველოში მოყვანა, პირველადი დამუშავება და დაჭრა.

საკანონმდებლო პაკეტის გათვალისწინებით, თამბაქოს წარმოების ლიცენზირების წესი და პირობები საქართველოს მთავრობის ნორმატიული აქტით განისაზღვრება.

“თამბაქოს წარმოების დარგში ჯანმრთელობისთვის საშიში ნედლეულის გამოყენების შემცირებისთვის აუცილებელია, თამბაქოს წარმოების პროცესის და ზოგადად, აღნიშნული დარგის, გაჯანსაღება-გაძლიერება. მაღალტექნოლოგიური გადამამუშავებელი ინდუსტრიის მქონე მწარმოებლების მიერ თამბაქოს წარმოება მწეველთა ჯანმრთელობის დაცვის სტანდარტებს საგრძნობლად ამაღლებს, მაშინ როდესაც თამბაქოს არაკეთილსინდისიერი მწარმოებლების მიერ წარმოება, მწეველთა ჯანმრთელობისთვის უდიდეს რისკს ქმნის.

სწორედ აღნიშნული მაღალი სტანდარტის მისაღწევად საჭიროა, რომ თამბაქოს წარმოება ლიცენზირებადი საქმიანობა გახდეს“, – ნათქვამია კანონპროექტის განმარტებით ბარათში.

საკანონმდებლო პაკეტი პარლამენტში “ქართული ოცნების“ დეპუტატებმა წარადგინეს.

ჯაბა სამუშიამ ბრიტანეთის საბჭოსთან თანამშრომლობის მემორანდუმს მოაწერა ხელი

თბილისის სახელმწიფო უნივერსიტეტის რექტორმა, აკადემიკოსმა ჯაბა სამუშიამ  ბრიტანეთის საბჭოს საქართველოს ოფისის დირექტორთან ზაზა ფურცელაძესთან ერთად თანამშრომლობის მემორანდუმს მოაწერა ხელი. ხელშეკრულების ფარგლებში თსუ ჰუმანიტარულ მეცნიერებათა ფაკულტეტის ინგლისური ფილოლოგიის სტუდენტებისთვის ბრიტანელი ექსპერტები პროფესიული გადამზადების კუთხით უფასო ტრენინგ-კურსს წაიკითხავენ.

„მნიშვნელოვანია, რომ თბილისის სახელმწიფო უნივერსიტეტში გავაძლიეროთ ენობრივი კომპონენტი და ხელი შევუწყოთ ჩვენს სტუდენტებს,  იყვნენ კონკურენტუნარიანნი ევროპულ ბაზარზე. ვიმედოვნებ, შემდგომი თანამშრომლობის ფარგლებში დაიგეგმება პედაგოგების გადამზადებაც სწავლების თანამედროვე მეთოდების მიმართულებით“,- აღნიშნა თბილისის სახელმწიფო უნივერსიტეტის რექტორმა ჯაბა სამუშიამ.

„ჩვენთვის თბილისის სახელმწიფო უნივერსიტეტთან და თსუ ენების ცენტრთან თანამშრომლობა არის უმნიშვნელოვანესი. დარწმუნებული ვარ, ეს პროექტი იქნება წარმატებული და ჩვენი თანამშრომლობა მომავალშიც გაგრძელდება. ინგლისური ენა არ არის ჩვენი ერთადერთი პრიორიტეტი, ჩვენ ასევე ვმუშაობთ ტრანსნაციონალური განათლების მიმართულებით, რომლის ფარგლებშიც ქართული და ბრიტანული უნივერსიტეტები განახორციელებენ ერთობლივ პროგრამებს. ვიმედოვნებთ, ჩვენი თანამშრომლობა ამ პროექტის ფარგლებში კიდევ უფრო გაღრმავდება“, – განაცხადა ბრიტანეთის საბჭოს საქართველოს ოფისის დირექტორმა ზაზა ფურცელაძემ.

თსუ-ისა და ბრიტანეთის საბჭოს  შორის თანამშრომლობა თსუ ენების ცენტრის ინიციატივით ხორციელდება. ტრენინგი გათვალისწინებულია სტუდენტებისთვის, რომლებიც გეგმავენ ინგლისური ენის მასწავლებლობას. ონლაინ ტრენინგს ჩაატარებენ ბრიტანელი ექსპერტები, ბრიტანეთის საბჭოს თანამშრომლების ხელშეწყობით. ონლაინ ტრენინგ-კურსი შეიცავს როგორც დამოუკიდებლად გასაკეთებელ მოდულებს, ისე ინტერაქციას კურსის ბრიტანელ მენტორთან, ადგილობრივ ფასილიტატორებთან და კურსის სხვა მონაწილეებთან.

საერთაშორისო გამოცემამ Euromoney თიბისი საქართველოში საუკეთესო ციფრულ ბანკად დაასახელა

მსოფლიოში წამყვანმა საბანკო და ფინანსურმა გამოცემამ Euromoney, თიბისი, ციფრული ბანკის მიმართულებით, საქართველოში საუკეთესოდ დაასახელა. თიბისიმ აღიარება ციფრულ საბანკო სერვისებში ლიდერობით მოიპოვა, რაც სწრაფ, ეფექტურ და მომხმარებლისთვის მოსახერხებელი სერვისების მიწოდებას გულისხმობს.

წლის განმავლობაში თიბისიმ მობაილბანკის მომხმარებლებს არაერთი სიახლე შესთავაზა, მაგალითად, აპლიკაციიდან სამომხმარებლო სესხის დამტკიცებისა და გაცემის დრო მნიშვნელოვნად შემცირდა, დაემატა ტრანზაქციის განაწილების ფუნქციონალი, ასევე, ახალი საინვესტიციო პლატფორმა, სხვა ბანკიდან მომენტალური გადმორიცხვა,  ლოიალობის პროგრამა – ერთგული და სხვა.

„ეს აღიარება ჩვენი გუნდისთვის განსაკუთრებით საამაყოა. საერთაშორისო გამოცემამ Euromoney თიბისი საქართველოში საუკეთესო ციფრულ ბანკად დაასახელა. ციფრული სერვისების საუკეთესო გამოცდილების შექმნა ჩვენთვის ძალიან პრიორიტეტულია. თიბისის მისია ადამიანების ცხოვრების გამარტივებაა და ვფიქრობ, ეს ჯილდო კიდევ ერთხელ ადასტურებს, რომ თიბისის საქმიანობა კომპანიის მისიას სრულად შეესაბამება”,  – ვახტანგ ბუცხრიკიძე, თიბისის გენერალური დირექტორი.

თიბისიმ მნიშვნელოვნად გააუმჯობესა მობაილბანკის სერვისების სიჩქარე და ხელმისაწვდომობა. თიბისის მთავარი მისია ცხოვრების გამარტივებაა, სწორედ ამ მიღწევების შედეგად იზრდება მომხმარებელთა კმაყოფილება, რაც აძლიერებს მას, როგორც ლიდერ ციფრულ ბანკს საქართველოში.

ერთი საფიქრალი აქვთ მხოლოდ, რამენაირად გადალახონ 5%-იანი ბარიერი-გიორგი კახიანი “ლელოს” და გახარიას პარტიის შესაძლო გაერთიანებაზე

ერთი საფიქრალი აქვთ მხოლოდ, რამენაირად გადალახონ 5%-იანი ბარიერი. დაივიწყებენ ყველაფერს, როგორ შეურაცხმყოფელი ეპითეტებით მოიხსენიებდნენ ადრე ერთმანეთს, – განაცხადა საქართველოს პარლამენტის თავმჯდომარის მოადგილემ გიორგი კახიანმა „ქრონიკასთან“ „ლელოს“ და „საქართველოსთვის“ შესაძლო გაერთიანებაზე.

„ორივე [„ლელო“ და „საქართველოსთვის“] პოლიტიკური გაერთიანება არის ერთი „კოლექტიური ნაციონალური მოძრაობა“. არ ვიცი ერთმანეთის გადარჩენას აპირებენ, თუ რა. მათ აქვთ ერთი საფიქრალი მხოლოდ, რამენაირად გადალახონ 5%-იანი ბარიერი. დაივიწყებენ ყველაფერს, როგორ შეურაცხმყოფელი ეპითეტებით მოიხსენიებდნენ ადრე ერთმანეთს. იმავდროულად, დაელოდებიან გარედან რა მითითებებს მისცემენ – თუ ეტყვიან, რომ უნდა გაერთიანდეთო – გაერთიანდებიან“, – აღნიშნა კახიანმა.

ცესკოს თავმჯდომარემ ჩინეთის სახალხო რესპუბლიკის ელჩს 26 ოქტომბრის არჩევნებზე ინფორმაცია მიაწოდა

ცენტრალური საარჩევნო კომისიის თავმჯდომარე გიორგი კალანდარიშვილი  ჩინეთის სახალხო რესპუბლიკის საგანგებო და სრულუფლებიან ელჩს საქართველოში, ჭოუ ციენს შეხვდა.

ოფიციალური გაცნობითი ხასიათის შეხვედრა ცესკოში გაიმართა. შეხვედრის მთავარი თემა პარლამენტის არჩევნები იყო. გიორგი კალანდარიშვილმა დეტალურად ისაუბრა 26 ოქტომბრის არჩევნებისთვის გაწეული, მიმდინარე და დაგეგმილი საქმიანობის, აგრეთვე საარჩევნო ტექნოლოგიების დანერგვის,  ამომრჩეველთა ინფორმირებისა და განათლების საკითხების შესახებ.

მხარეებმა ასევე ისაუბრეს არჩევნების საერთაშორისო ევროპული სტანდარტების შესაბამისად ჩატარების მნიშვნელობაზე და ამ მიმართულებით საარჩევნო ადმინისტრაციის მიერ განხორციელებული აქტივობებზე. შეხვედრის მონაწილეებმა განიხილეს ინსტიტუციის წინაშე არსებული გამოწვევები და საჭიროებები.

შეხვედრის დასასრულს მხარეებმა სამომავლო თანამშრომლობის პერსპექტივებზე ისაუბრეს. შეხვედრა 18 ივლისს ცესკოში გაიმართა.

გამჭვირვალობის დანერგვის გამო კრიტიკა მივიღეთ, რუსეთისკენ შეტრიალდა ქვეყანაო, ესპანეთზეც იტყვიან რუსეთისკენ შეტრიალდაო? დადასტურდა ჩვენი სიმართლე -არჩილ თალაკვაძე

ჩვენი საზოგადოება კიდევ უფრო დაინახავს, რომ „ქართული ოცნება“ იყო მართალი და არანაირი ანტიევროპული, ანტიდემოკრატიული გამჭვირვალობაში არ არის, – ამის შესახებ პარლამენტის თავმჯდომარის მოადგილემ, არჩილ თალაკვაძემ ესპანეთის მაგალითზე საუბრისას განაცხადა.

„რაც უფრო მეტი დრო გავა, ყველა კიდევ უფრო დარწმუნდება, რომ საქართველოს ხელისუფლებამ სწორი და დემოკრატიული გადაწყვეტილება მიიღო. დემოკრატიას ინფორმირებული მოქალაქეები ქმნიან და დემოკრატიას ინფორმირებული საზოგადოება სჭირდება. ჩვენ შემოვიტანეთ და დავნერგეთ გამჭვირვალობის რეესტრი, რომელიც ევროკავშირის 15 ქვეყანას აქვს. ესპანეთია მომდევნო, ვინც გამჭვირვალობის რეესტრს ქმნის. პრაქტიკულად, ესპანეთის პრემიერ-მინისტრმა იგივე არგუმენტები დაასახელა, რაც საქართველოს ხელისუფლებამ თავის საზოგადოებას წარუდგინა. გამჭვირვალობა ისეთი ფუნდამენტური პრინციპია, რომლის გვერდის ავლაც მხოლოდ კითხვებს აჩენს, ვიღაცას ხომ არ სურს რაიმეს დაფარვა და დამალვა“, – განაცხადა არჩილ თალაკვაძემ.

მისი თქმით, ოპოზიციამ „ქართული ოცნება“ კანონის მიღების გამო გააკრიტიკა და ისიც თქვა, რომ რუსეთისკენ შეტრიალდა.

„გამჭვირვალობა დავნერგეთ და ამის გამო კრიტიკა მივიღეთ – რუსეთისკენ შეატრიალეს ქვეყანაო, ამასაც კი გვაბრალებდნენ. ახლა არცერთი არ ჩანს. რა თქმა უნდა, ესპანეთზე როგორ გაბედავენ რადიკალური ოპოზიციის წარმომადგენლები და მათი პატრონები ხმის ამოღებას? ესპანეთზეც ხომ არ იტყვიან, რუსეთისკენ შეტრიალდაო, დადასტურდა ჩვენი სიმართლე. რაც უფრო მეტი დრო გავა, ჩვენი საზოგადოება კიდევ უფრო უკეთ დაინახავს, რომ „ქართული ოცნება“ იყო მართალი და არანაირი ანტიევროპული, ანტიდემოკრატიული გამჭვირვალობაში არ არის“, – განაცხადა არჩილ თალაკვაძემ.

ესპანეთის პრემიერ-მინისტრი მედიისთვის წესების გამკაცრებას და დაფინანსების გამჭვირვალობას ითხოვს. პედრო სანჩესი გამოვიდა ინიციატივით, მედიას მოსთხოვონ ყველა აქციონერის იდენტიფიცირება, რომლებიც გავლენას ახდენენ სარედაქციო პოლიტიკაზე, აგრეთვე თანხებზე, რომლებსაც ისინი იღებენ საჯაროდ დაფინანსებულ რეკლამებში და მესამე ქვეყნებიდან, ასევე აუდიტორიის შესახებ გამჭვირვალე მონაცემები.

,,სახეზეა პოლიტიკური ელიტების კრიზისი”- შალვა პაპუაშვილი

სახეზეა პოლიტიკური ელიტების კრიზისი, ვიმედოვნებ, საქართველოს მისამართით გამაოგნებელი რიტორიკა მალე დასრულდება და მსოფლიო დღის წესრიგი რაციონალურ ჩარჩოებში დაბრუნდება, – ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელში წერს.

როგორც პაპუაშვილი წერს, თვალს ადევნებს რა ხდება ევროპარლამენტში, ასევე აშშ-ში მიმდინარე საპრეზიდენტო კამპანიას, რადიკალიზაციის ზოგად ტენდენციებს მთელი ევროპის მასშტაბით.

„საფრანგეთის პარლამენტის თავმჯდომარის არჩევისას პარლამენტის ყველაზე ახალგაზრდა წევრს ეძლევა პრივილეგია, იდგეს საარჩევნო ურნასთან. საპარლამენტო ტრადიცია და კოლეგიალური ეთიკაა, რომ ბიულეტენის ჩაგდების შემდეგ დეპუტატები ურნის მცველს ხელს ართმევენ. ამჯერად ეს პატივი ლე პენის პარტიის 22 წლის დეპუტატს ერგო. მოწინააღმდეგე ფლანგის წარმომადგენლებმა მას ხელი არ ჩამოართვეს.

ამ სცენასთან ერთად, ვუყურებ გუშინ ევროპარლამენტში მომხდარ აყალმაყალს, აშშ-ში მიმდინარე საპრეზიდენტო კამპანიის პერიპეტიებს, საფრანგეთის საპრეზიდენტო წინასაარჩევნო რიტორიკას და რადიკალიზაციის ზოგად ტენდენციებს მთელი ევროპის მასშტაბით და მახსენდება უცხოელი პოლიტიკოსების, ბიუროკრატების და დიპლომატების მიერ ქართული „პოლარიზაციის“ და „მკაცრი რიტორიკის“ კრიტიკის ტონი, რომელიც თავს არასრულფასოვან, შეუმდგარ საზოგადოებად გვაგრძნობინებს. მსუბუქად რომ ვთქვათ, ბიბლიური ანდაზისა არ იყოს, კაცი საკუთარ თვალში დირეს ვერ ხედავდა, სხვის თვალში კი ბეწვსაც ამჩნევდაო. უფრო ღრმად თუ განვსჯით, სახეზეა პოლიტიკური ელიტების კრიზისი, რაც ძალზე სამწუხარო მოვლენაა. იმედს ვიტოვებ, საქართველოს მისამართით, მათ შორის ამ კრიზისით განპირობებული გამაოგნებელი რიტორიკა მალე დასრულდება და მსოფლიო დღის წესრიგი რაციონალურ ჩარჩოებში დაბრუნდება“ – წერს პარლამენტის თავმჯდომარე.

სომხეთში სამხედრო თვითმფრინავი ჩამოვარდა, დაღუპულია ორი ადამიანი

სომხეთის ქალაქ ეღვარდთან AN-2 ტიპის სამხედრო სასწავლო თვითმფრინავი ჩამოვარდა, დაიღუპა ორი პილოტი.

ინფორმაციას ამის შესახებ სომხური მედია ავრცელებს.

„გიდასტურებთ, რომ ჩამოვარდა თვითმფრინავი, რომელიც სასწავლო იყო. თავდაცვის სამინისტრო უსამძიმრებს დაღუპული მფრინავების ოჯახის წევრებს, ნათესავებსა და თანამებრძოლებს“, – განაცხადა სომხეთის თავდაცვის სამინისტროს პრეს-მდივანმა არამ თოროსიანმა.

ინციდენტი დილით მოხდა. შეტყობინება თვითმფრინავის ჩამოვარდნის შესახებ პოლიციაში ადგილობრივი მოსახლეობისგან შევიდა.

ამნისტიის კანონი არ გახდება პოლიტიკური ვაჭრობის საგანი. ყველას ვაფრთხილებ, ნურავინ გაეხვევა იმ ბოროტ თაღლითობაში, როცა ამნისტიაში რაღაც მუხლების ჩაწერის დაპირებით სარგებლობენ და ატყუებენ ვიღაცებს -მდინარაძე

ყველას ვაფრთხილებ, ნურავინ გაეხვევა იმ ბოროტ თაღლითობაში, როცა ამნისტიაში რაღაც მუხლების ჩაწერის დაპირებით სარგებლობენ და ატყუებენ ვიღაცებს, – ამის შესახებ პარტია „ქართული ოცნების“ აღმასრულებელმა მდივანმა და საპარლამენტო უმრავლესობის ლიდერმა მამუკა მდინარაძემ რიგგარეშე სესიაზე „ამნისტიის შესახებ კანონის განხილვაზე განაცხადა.

მისი თქმით, ვიღაცები ამნისტიის კანონით ხელის მოთბობას ცდილობენ.

„სამწუხაროდ, აღმოჩნდა ისე, რომ ამ ქალაქში არსებობს ხალხი, რომელთაც გადაწყვიტეს ხელის მოთბობა ამნისტიის საკითხებთან დაკავშირებით. ეს შეიძლება ნახევრად სკანდალური, ძალიან უცნაური, ბრალდების შემცველი ინფორმაციები იყოს, მაგრამ ეს ასეა და ბევრმა იცის, რომ ასეა. შესაბამისად, ყველას ვაფრთხილებ, ნურავინ გაეხვევა იმ ბოროტ თაღლითობაში, როცა ამნისტიაში რაღაც მუხლების ჩაწერის დაპირებით სარგებლობენ და ატყუებენ ვიღაცებს“,- აღნიშნა მდინარაძემ.

მან ასევე გაუსვა ხაზი იმას, რომ ამნისტიის კანონი არ გახდება პოლიტიკური თუ სხვა სახის ვაჭრობის საგანი.

„ასევე, მინდა „გირჩის“ წარმომადგენლებს მივმართო, ძალიან ბევრი საუბრობს იმაზე, რომ თქვენ შეგვევაჭრებით ამ თემასთან დაკავშირებით, რაღაც პოლიტიკური ვაჭრობა გაიმართება და რაღაც მუხლებს ჩაგვაწერინებთ ამაში. ეს ამბავი ციხეშიც ვრცელდება. თქვენი ბრალი შეიძლება ეს არ არის, მაგრამ შეიძლება ვიღაცები საუბრობენ კიდევაც ამას და ყველას ვაფრთხილებ, რომ ასე ნუ ისაუბრებენ. თქვენ რომ არგუმენტები მოგაქვთ შეიძლება ამან რამე დააზიანოს, თუნდაც დაზარალებულზე რომ ვლაპარაკობთ. მაგალითად, თუ ავტოავარიებზეა საუბარი შეიძლება რაღაც საკითხები ჩავამატოთ კიდეც, ოღონდ აუცილებლად დაზარალებულის თანხმობით. მაგრამ ყველას ვაფრთხილებთ, რომ ეს არავითარ შემთხვევაში არ იქნება რაიმე პოლიტიკური ვაჭრობს საგანი და სხვა სახის მითუმეტეს. თუკი ვინმეს უნდა, რომ რომელიმე მუხლს არ შეეხოს, მაშინ უნდა გაავრცელოს, რომ ამ მუხლზე შეიძლება ვიღაცამ ივაჭროს პოლიტიკურად ან სხვაგვარად. მათ შორის, ყველას ვაფრთხილებ, რომ თუ ვინმე ვინმეს აქეზებს, რომ შენ დაიწყე შიმშილობა და ამასაც შეეხება ამნისტია, ეს ასე არ მოხდება. თუკი რამე მუხლს ცვლილება შეიძლება შეეხოს ერთადერთი საფუძველი შეიძლება იყოს მყარი არგუმენტები სამართლებრივი, მორალური და ა.შ.“,- განაცხადა მდინარაძემ.

პარლამენტმა ამნისტიის შესახებ კანონპროექტს, პირველი მოსმენით, მხარი დაუჭირა

კანონმდებლებმა, რიგგარეშე სესიაზე, ამნისტიის შესახებ კანონპროექტზე იმსჯელეს და დოკუმენტი პირველი მოსმენით მიიღეს.

ჰუმანური აქტი უმრავლესობის ინიციატივაა. ის 300-მდე მუხლს შეეხება, მაგრამ არ გავრცელდება მძიმე და განსაკუთრებით მძიმე დანაშაულებზე.

დეპუტატები დოკუმენტს მესამე, საბოლოო მოსმენით, მას საშემოდგომო სესიის დროს მიიღებენ.

საერთაშორისო რესპუბლიკური ინსტიტუტი (IRI) 2024 წლისსაპარლამენტო არჩევნების საერთაშორისო სადამკვირვებლომისიას იწყებს

ლონდონში, The National Geographic Traveller Food Festival-ის გამართვამდე 2 დღით ადრე, საქართველოს ტურიზმის ეროვნული ადმინისტრაციის ხელმძღვანელმა მაია ომიაძემ საქართველოს სტენდი დაათვალიერა და გაეცნო მოსამზადებელ სამუშოებს.

20-21 ივლისს  საერთაშორისო გასტრონომიულ ფესტივალზე,  “მასტერკლასის თეატრში”  ქართული ღვინისა და კერძების მასტერკლასების 4 სესია გაიმართება.

ფესტივალის ფარგლებში, საქართველოს სტენდზე, ორი დღის განმავლობაში, ღვინის დეგუსტაცია და ე.წ.  Show Kitchen მოეწყობა.

ფესტივალში ქართველი შეფები და სომელიეები მიიღებენ მონაწილეობას, რომლებიც ქართულ კერძებსა და ღვინოს გააცნობენ  მონაწილეებს. ცნობილი შეფები გურამ ბაღდოშვილი და თეკუნა გაჩეჩილაძე ფესტივალის მონაწილეებს ქართულ ტრადიციულ და თანამედროვე კერძებს გააცნობენ, ღვინის ეროვნული სააგენტოს წარმომადგენელი ირაკლი ჩოლობარგია კი ქართული ღვინის დეგუსტაციას მოაწყობს.

The National Geographic Traveller Food Festival 2024-ზე საქართველოს როგორც ღვინის სამშობლოს და ღვინის წარმოების 8 ათასწლოვან ქვეყანას განსაკუთრებული ყურადღება დაეთმობა.

1...770771772...2,743Page 771 of 2,743
ჩვენი არქივი

კონტაქტი

მის: ქ.თბილისი, მ.კოსტავას 59

ტელ: +995 32 93 44 05

ელ.ფოსტა: editor@geotimes.ge

ნავიგაცია

ონლაინ გაზეთი Geotimes.ge

დამატებითი რესურსი