უკრაინის დედაქალაქ კიევის მერის ვიტალი კლიჩკოს განცხადებით, უახლოეს თვეებში პრეზიდენტმა ვოლოდიმირ ზელენსკიმ რთული გადაწყვეტილებები უნდა მიიღოს, რამაც, შეიძლება, ნებისმიერ შემთხვევაში პოლიტიკურ თვითმკვლელობამდე მიიყვანოს,- უკრაინული მედიის ინფორმაციით, ამის შესახებ კლიჩკომ გამოცემა Corriere della Sera-სთან ინტერვიუში განაცხადა.

ვიტალი კლიჩკოს თქმით, ვოლოდიმირ ზელენსკისთვის მომავალი რამდენიმე თვე ძალიან რთული იქნება.

„მომავალი თვეები ვოლოდიმირ ზელენსკისთვის ძალიან რთული იქნება. გააგრძელებს ომს ახალი სიკვდილით და ნგრევით თუ განიხილავს ტერიტორიულ კომპრომისს პუტინთან? და ამ შემთხვევაში რა ზეწოლა იქნება აშშ-იდან, თუ ტრამპი გაიმარჯვებს? ან როგორ ავუხსნათ ქვეყანას, რომ ჩვენ უნდა დავთმოთ ჩვენი ტერიტორიის ის ნაწილები, რასაც ათასობით ჩვენი მებრძოლი გმირის სიცოცხლე ემსხვერპლა? რა ნაბიჯიც უნდა გადადგას, ჩვენი პრეზიდენტი პოლიტიკური თვითმკვლელობის რისკის წინაშეა. მოდით, პირდაპირ ვთქვათ: ჩვენ უნდა მოვიგოთ ომი, მაგრამ სიტუაცია სულ უფრო რთულდება, ეს დამოკიდებულია მოკავშირეების დახმარებაზე. კოშმარი იქნება, თუ კიდევ ორი ​​წელი მოგვიწევს ბრძოლა“, – განაცხადა ვიტალი კლიჩკომ.
კლიჩკო ამბობს, რომ ზელენსკის, სავარაუდოდ, რეფერენდუმის ჩატარება მოუწევს, რადგან ვერ შეძლებს მნიშვნელოვანი შეთანხმებების მიღწევას სახალხო ლეგიტიმაციის გარეშე.

„ზელენსკის, ალბათ, მოუწევს მიმართოს რეფერენდუმს, არა მგონია, მან შეძლოს ასეთი მტკივნეული და მნიშვნელოვანი შეთანხმებების მიღწევა სახალხო ლეგიტიმაციის გარეშე. მისთვის გამოსავალი შეიძლება იყოს ეროვნული ერთიანობის მთავრობის შექმნა, დაახლოებით ისე, როგორც ისრაელში, „ჰამასის“ თავდასხმის შემდეგ მოხდა“, – აღნიშნა კლიჩკომ.
ამასთან, ვიტალი კლიჩკო დარწმუნებული არ არის, რომ ვოლოდიმირ ზელენსკი მზად არის დათმოს მის ხელში კონცენტრირებული ძალაუფლება.

„დარწმუნებული არ ვარ, რომ ის მზადაა, დათმოს მის ხელში კონცენტრირებული ძალაუფლება“, – განაცხადა კლიჩკომ და დასძინა, რომ „ზელენსკიმ ძალიან დიდი ძალაუფლების კონცენტრირება მოახდინა თავის კაბინეტში. შედეგად, კი პარლამენტმა დაკარგა შესაბამისი როლი“.
ჟურნალისტის კითხვაზე ეშინიათ თუ არა დონალდ ტრამპის, კლიჩკო ამბობს, რომ გაპრეზიდენტების შემთხვევაში მასთან მუშაობა მოუწევთ.

„ჩვენ მოგვიწევს მასთან მუშაობა, თუ ის გახდება შეერთებული შტატების პრეზიდენტი“, – აცხადებს კლიჩკო.

რუსეთის უშიშროების საბჭოს თავმჯდომარის მოადგილე, დიმიტრი მედვედევი აშშ-ის პრეზიდენტის, ჯო ბაიდენის მიერ საპრეზიდენტო არჩევნებში კანდიდატურის მოხსნას ეხმაურება და აცხადებს, რომ ე.წ. სპეციალური სამხედრო ოპერაციის მიზნების მიღწევა მოხდება.

„ბაიდენი მორჩა. ვუსურვებთ მას ჯანმრთელობას. სპეციალური სამხედრო ოპერაციის მიზნების მიღწევა მოხდება“, – წერს მედვედევი „ტელეგრამზე“.

შეგახსენებთ, აშშ-ის პრეზიდენტმა ჯო ბაიდენმა განაცხადა, რომ ნოემბრის საპრეზიდენტო არჩევნებში თავის კანდიდატურას ხსნის და მხარს უჭერს ვიცე-პრეზიდენტ კამალა ჰარისის წარდგენას „დემოკრატების“ კანდიდატად წარდგენას.

კამალა ჰარისის დამარცხება უფრო ადვილი იქნება, ვიდრე ბაიდენის, – ამის შესახებ აშშ-ის პრეზიდენტობის კანდიდატმა, დონალდ ტრამპმა განაცხადა.

მედიის ცნობით, აღნიშნული კომენტარი ტრამპმა „სიენენის“ ჟურნალისტთან საუბრისას გააკეთა.

ჯო ბაიდენმა 2024 წლის საპრეზიდენტო არჩევნებში თავისი კანდიდატურა მოხსნა.

„მიუხედავად იმისა, რომ ჩემი განზრახვა იყო ხელახლა არჩევა, მჯერა, ჩემი პარტიისა და ქვეყნის ინტერესებშია განზე გადგომა და მხოლოდ ჩემი ვადის დარჩენილ პერიოდზე ფოკუსირება“, –აღნიშნავს ჯო ბაიდენი გამოქვეყნებულ წერილში.

ამასთან, ბაიდენი აცხადებს, რომ 2024 წლის საპრეზიდენტო არჩევნებზე დემოკრატიული პარტიის კანდიდატად ვიცე-პრეზიდენტ კამალა ჰარისს დაუჭერს მხარს.

აშშ-ის ვიცე-პრეზიდენტი კამალა ჰარისი აცხადებს, რომ აპირებს, კენჭი იყაროს 2024 წლის საპრეზიდენტო არჩევნებში.

„ჩემთვის პატივია პრეზიდენტის მხარდაჭერა და ჩემი მიზანია, გავიმარჯვო. არჩევნებამდე 107 დღე გვაქვს. ჩვენ ერთად ვიბრძოლებთ და ერთად გავიმარჯვებთ“, – განაცხადა ჰარისმა.

ჰარისმა ჯო ბაიდენს არაჩვეულებრივი ლიდერობისთვის მადლობა გადაუხადა.

„მადლობას ვუხდი ჯო ბაიდენს არაჩვეულებრივი ლიდერობისთვის, როგორც ამერიკის შეერთებული შტატების პრეზიდენტისა, და ათწლეულების განმავლობაში ჩვენი ქვეყნისთვის გაწეული სამსახურისთვის. მისი შესანიშნავი მიღწევები შეუდარებელია ამერიკის თანამედროვე ისტორიაში და აღემატება მრავალი პრეზიდენტის მიღწევებს, რომლებიც მსახურობდნენ ორი ვადით. ამ თავდაუზოგავი და პატრიოტული აქტით, პრეზიდენტი ბაიდენი აკეთებს იმას, რასაც აკეთებდა მთელი ამ პერიოდის განმავლობაში: ამერიკელ ხალხს და ჩვენს ქვეყანას ყველაფერზე მაღლა აყენებს. გასული წლის განმავლობაში, მე ვიმოგზაურე მთელი ქვეყნის მასშტაბით, ვესაუბრე ამერიკელებს ამ მნიშვნელოვანი არჩევნების შესახებ და ეს არის ის, რასაც გავაგრძელებ მომდევნო დღეებსა და კვირებში. ყველაფერს გავაკეთებ, რომ გავაერთიანო დემოკრატიული პარტია და ერი, რათა დავამარცხოთ დონალდ ტრამპი“, – განაცხადა ჰარისმა.

უკრაინაში ომის ცხელი ეტაპი, შესაძლოა, მიმდინარე წლის ბოლომდე დასრულდეს, – ამის შესახებ ვოლოდიმირ ზელენსკიმ BBC-სთან ინტერვიუში განაცხადა.

მისი თქმით, უკრაინა ამზადებს საპასუხო გეგმას, რომელსაც შესთავაზებს რუსეთს. უკრაინის პრეზიდენტის თქმით, ომის დასრულება არ ნიშნავს ყველა ტერიტორიის ძალის გამოყენებით დაბრუნებას და ამას, შესაძლოა, დიპლომატიის ძალამ შეუწყოს ხელი, მაგრამ უკრაინა ბრძოლის ველზე მაინც ძლიერი უნდა იყოს.

ამასთან, ზელენსკიმ არ გამორიცხა უშუალოდ ვლადიმერ პუტინთან მოლაპარაკებების შესაძლებლობა.

აშშ-ის პრეზიდენტმა, ჯო ბაიდენმა, რომელიც ოფიციალურად გამოეთიშა საარჩევნო რბოლას, მხარი დაუჭირა კამალა ჰარისის „დემოკრატიული“ პარტიის საპრეზიდენტო კანდიდატად წარდგენას.

„მე გადავწყვიტე არ მივიღო პარტიის საპრეზიდენტო კანდიდატურა და მთელი ჩემი ენერგია მოვახმარო პრეზიდენტის მოვალეობების შესრულებას ჩემი [საპრეზიდენტო] ვადის დარჩენილი პერიოდის განმავლობაში. 2020 წელს ჩემი პირველი გადაწყვეტილება, როგორც პარტიის [საპრეზიდენტო] კანდიდატის, იყო ვიცე-პრეზიდენტად კამალა ჰარისის არჩევა. ეს იყო საუკეთესო გადაწყვეტილება, რაც მივიღე. დღეს მსურს ჩემი სრული მხარდაჭერა გამოვაცხადო, რომ კამალა იყოს ჩვენი პარტიის [საპრეზიდენტო] კანდიდატი წელს. „დემოკრატებო“, დროა გავერთიანდეთ და დავამარცხოთ ტრამპი“, – აღნიშნა ჯო ბაიდენმა.

https://www.facebook.com/joebiden/posts/pfbid02q4ewVxj2dNS7h6FDAeFodtwCfbbeBq5wfAcRedRkYfsKZpszri3irTSs2SoTWAnel?ref=embed_post

ჯო ბაიდენმა აღადგინა აშშ-ის ლიდერობა მთელ მსოფლიოში და პრეზიდენტის რანგში ისტორიული მიღწევები განახორციელა, – ამის შესახებ აშშ-ის სახელმწიფო მდივანი ენტონი ბლინკენი სოციალურ ქსელში წერს, რითაც პრეზიდენტ ჯო ბაიდენის გადაწყვეტილებას ეხმაურება.

„იყო და რჩება ჩემი ცხოვრების სიამაყედ, რომ ვიმუშაო პრეზიდენტ ბაიდენთან ბოლო 22 წლის განმავლობაში. მან აღადგინა აშშ-ის ლიდერობა მთელ მსოფლიოში და პრეზიდენტის რანგში ისტორიული მიღწევები განახორციელა. მოუთმენლად ველოდები მასთან ერთად ამ რეკორდის გაგრძელებას მომდევნო ექვსი თვის განმავლობაში“, – წერს ბლინკენი.

ცოტა ხნის წინ ცნობილი გახდა, რომ ჯო ბაიდენი 2024 წლის საპრეზიდენტო არჩევნებიდან თავის კანდიდატურას ხსნის და მხარს უჭერს დემოკრატების კანდიდატად ვიცე-პრეზიდენტ კამალა ჰარისის ნომინირებას.