საქართველოში საარჩევნო უბნები დაიხურა, ეგზიტპოლების „ომი“ მიმდინარეობს, არ მოვიწყენთ, – ამის შესახებ უკრაინის რადას წევრი ალექსეი გონჩარენკო სოციალურ ქსელში წერს.

მისი თქმით, გამომდინარე იქიდან, რომ საქართველოში არჩევნები ელექტრონული სისტემით ჩატარდა, მონაცემები მალე გამოქვეყნდება, თუმცა ბიულეტენების ხელის დათვლა მაინც გახდება საჭირო.

„საქართველოში საარჩევნო უბნები დაიხურა. ეგზიტპოლების „ომი“ მიმდინარეობს, ორი ოპოზიციური და ერთი პროსახელისუფლებო ეგზიტპოლი იყო. პროსახელისუფლებო ეგზიტპოლი მთავრობას 56% უწერს, ოპოზიციის – 41% და 42%; ხოლო 48-51% ოთხ ოპოზიციურ პარტიას და ბლოკს. სხვაობა ფუნდამენტურია. სხვათა შორის, უბანზე ოპოზიციიდან მხოლოდ ერთი ადამიანი ვნახე. საზღვარგარეთ ხმის მიცემა გრძელდება. რამდენიმე ათეული ათასი ადამიანი მისცემს ხმას, დაახლოებით 2%. ოპოზიცია იქ ნამდვილად გაიმარჯვებს. ვინაიდან ხმის მიცემა აქ ელექტრონული მანქანების გამოყენებით ჩატარდა, მონაცემები მალე გამოქვეყნდება, მაგრამ მერე მაინც მოგვიწევს ბიულეტენების ხელით დათვლა. არ მოვიწყენთ“, – დაწერა ალექსეი გონჩარენკომ.

ცესკოს საიტზე გამოქვეყნდა მონაცემები – „ქართულმა ოცნებამ“, მოიპოვა მყარი უმრავლესობა, – განაცხადა ბრიფინგზე „ქართული ოცნების“ აღმასრულებელმა მდივანმა, მამუკა მდინარაძემ.

„მინდა მადლობა გადავუხადო ჩვენს თითოეულ ამომრჩეველს, რომელმაც აიღო პასუხისმგებლობა ევროპულ, ტრადიციულ, ქრისტიანულ მომავალზე და „ქართულ ოცნებას“ მხარი დაუჭირა. მადლობა ყველას და განსაკუთრებით „ქართული ოცნების“ ამომრჩეველს, რომელმაც საშუალება მოგვცა რომ 4 წლის განმავლობაში ჩვენი ქვეყნის განვითარებაზე ვიზრუნოთ“, – აღნიშნა მამუკა მდინარაძემ.

ცესკო-ში ამ დროისთვის არსებული მონაცემებით, საპარლამენტო არჩევნებში „ქართული ოცნება“ 52,94 პროცენტით ლიდერობს

ცენტრალური საარჩევნო კომისიის მიერ დათვლილი, 2 137 საარჩევნო უბნის წინასწარი შედეგების მიხედვით, საპარლამენტო არჩევნებში „ქართულმა ოცნებამ“ ხმების 52.943% მიიღო, მეორე ადგილზეა „კოალიცია ცვლილებებისთვის 11.197 %-ით, მესამე ადგილზე „ერთიანობა ნაციონალური მოძრაობა“, რომელსაც ხმების 9,797 % აქვს.

რაც შეეხება „ძლიერ საქართველოს“ , წინასწარი შედეგების მიხედვით მას ამომრჩეველთა 9,056 %-მა დაუჭირა მხარი.

შემდეგ ადგილზე კი „გახარია- საქართველოსთვისაა“ 8.264 %-ით.

ამ დროისთვის არსებული ინფორმაციით, საპარლამენტო არჩევნებში ამომრჩეველთა აქტივობამ, საქართველოს მასშტაბით, 2 060 412 შეადგინა, – ამის შესახებ ცესკოს პრესსპიკერმა, ნათია იოსელიანმა ჟურნალისტებთან განაცხადა.

ნათია იოსელიანის განცხადებით, ეს არ არის საბოლოო შედეგი, რადგან 5 უბნიდან ჯერ ვერ მოხერხდა ინფორმაციის მიღება.

„ამომრჩეველთა აქტივობამ ამ დროის მონაცემებით საქართველოს მასშტაბით შეადგინა 2 060412. რაც ამომრჩეველთა საერთო რაოდენობის 58.94%-ია.ეს არ არის საბოლოო შედეგი, ვიანიდან ამ დროისთვის მაღალმთიანი რეგიონების 5 უბნიდან ჯერ ვერ მოხერხდა ინფორმაციის მიღება“, – განაცხადა ნათია იოსელიანმა.

საქართველოში არჩევნები ყველა შესაბამის კრიტერიუმს აკმაყოფილებდა, დაცული იყო ევროპული, დემოკრატიული ღირებულებები, ყველაფერი წესების შესაბამისი იყო, – ამის შესახებ საერთაშორისო ექსპერტების ჯგუფის წარმომადგენელმა, ფანი ლაიკომ განაცხადა.

მისი თქმით, საარჩევნო უბნებზე ამომრჩევლებს ხმის მიცემა დაბრკოლებების გარეშე შეეძლოთ, არ ყოფილა ძალადობა.

„ვიმყოფებოდით ხუთ საარჩევნო უბანზე, მათ შორის ორში თბილისში და სამში რეგიონებში. დღეს ვნახეთ ძალიან თავისუფალი და სამართლიანი არჩევნები. ამომრჩევლებს დაბრკოლებები არ ჰქონიათ. ყველა მოქალაქის შეეძლო ხმა მარტივად მიეცა. ძალადობა არ გვინახავს, ყველაფერი იყო ჩატარებული შესანიშნავად. ცესკო-ს თანამშრომლებმა პროფესიონალურად იმუშავეს. შეგვიძლია ვთქვათ, რომ არჩევნები აკმაყოფილებდა ყველა შესაბამის კრიტერიუმს და დაცული იყო ევროპული, დემოკრატიული ღირებულებები. ყველაფერი იყო წესების შესაბამისად“, – განაცხადა ფანი ლაიკომ.

ქართველმა ხალხმა დაამტკიცა ერთი მთავარი რამ, რომ ქართველებს ვერც მოატყუებენ და ვერც დააჩოქებენ ვერასდროს – ტრადიციად უნდა ვაქციოთ, რომ საქართველოში გარდა ეროვნული ხელისუფლებისა, ვერასდროს ვერავინ გაიმარჯვებს, – ამის შესახებ „ქართული ოცნების“ აღმასრულებელმა მდივანმა მამუკა მდინარაძემ „გორბის“ ეგზიტპოლის შედეგების გამოცხადების შემდეგ „ქართული ოცნების“ ოფისში მოწყობილ ღონისძიებაზე განაცხადა.

მამუკა მდინარაძემ კომისიის წევრებს მოუწოდა ბოლომდე მიადევნონ თვალი საუბნო საარჩევნო კომისიებში მიმდინარე პროცესს და იმედი გამოთქვა, რომ მმართველი პარტიის შედეგები კიდევ უფრო გაუმჯობესდება.

„გილოცავთ, მეგობრებო, კიდევ ერთხელ, თქვენ აქ ვინც ხართ. ქართველმა ხალხმა დაამტკიცა ერთი მთავარი რამ, რომ ქართველებს ვერც მოატყუებენ და ვერც დააჩოქებენ ვერასდროს. ამიტომ ჩვენს ამაყ საქართველოს გაუმარჯოს! ყველას დიდი მადლობა, მინდა დავიწყო ამომრჩევლით, საქართველოს თითოეული მოქალაქით, ვინც დღეს გამოვიდა მართლა ქუდზე კაცი და დადო ეს შედეგი. ერთ ამბავს გაგიმხელთ, წეღან ვითვლიდით, როგორც კი გამოცხადდა შედეგები, კალკულატორი ამოვიღეთ, 100 მანდატი გვექნება თუ არაო. ჯერ დეტალებზეა ბევრი რამ დამოკიდებული, ჩვენი საარჩევნო კომისიის წევრებს, ჩვენს აქტივს მოვუწოდებ, რომ კარგად დავთვალოთ, ბოლომდე იქ ვიყოთ, მონაცემები კი არ შევინარჩუნოთ, შეიძლება მეტი იყოს და ამაღლდეს ეს მონაცემები. ტალახაძე ამბობდა, ხომ არ ავწიოო ზემოთ და შეიძლება აიწიოს მონაცემებმა. ყველას უღრმესი მადლობა და მადლობა ჩვენს პარტიულ ოჯახს, დაწყებული ბატონი ბიძინადან. გულწრფელი მადლობა იმისთვის, რასაც ამდენი ხნის განმავლობაში „ქართული ოცნების“ თითოეული ჯარისკაცი ბატონი ბიძინას ხელმძღვანელობით აკეთებს. „ქართულ ოცნებას“ გაუმარჯოს! დღეს დაიწერა ისტორიის კიდევ ერთი ფურცელი, სადაც ქართველებმა ვთქვით, რომ ტრადიციად უნდა ვაქციოთ, რომ საქართველოში გარდა ეროვნული ხელისუფლებისა ვერასდროს ვერავინ გაიმარჯვებს. ამიტომ ჩვენს ქვეყანას, ეროვნულ იდენტობას, ყველაფერს ქართულს გაუმარჯოს.“- განაცხადა მდინარაძემ.

მოხდა სწორედ ის, რასაც ვპროგნოზირებდით მრავალი თვის მანძილზე და მთელი დღის განმავლობაში. მიუხედავად ბიულეტენების ჩაყრისა, ძალადობისა, გაიმარჯვა ევროპამ. დღეს არ გაიმარჯვა რომელიმე ერთმა პარტიამ, გაიმარჯვა ქვეყნის ევროპულმა მომავალმა, გაიმარჯვა ოპოზიციამ და დამარცხდა „ქართული ოცნებამ“, – ამის შესახებ „ნაციონალური მოძრაობის“ თავმჯდომარემ, თინა ბოკუჩავამ განაცხადა.

მისი თქმით, „ქართული ოცნება“ დამარცხდა, რაც ეგზიტპოლებში გამოჩნდა.

„ივანიშვილის დრო დასრულდა და ეს ჩვენ ვნახეთ იმ ეგზიტპოლებში, რომელიც გამოქვეყნდა. ქართველმა ხალხმა გააკეთა არჩევანი კოალიციურ მთავრობაზე. ჩვენ ამ ნდობას, რომელიც მივიღეთ, ვეპყრობით ძალიან დიდი პასუხისმგებლობით, შესაბამისად, უმოკლეს დროში, სხვა ოპოზიციურ პარტიებთან ერთად, რომლებმაც გადალახეს საარჩევნო ბარიერი, ჩვენ დავიწყებთ მოლაპარაკებებს კოალიციური მთავრობის ფორმირებაზე, რომელიც ჩვენს ქვეყანას აუცილებლად შეიყვანს ევროკავშირში“, – განაცხადა ბოკუჩავამ.

ტელეკომპანია „იმედის“ დაკვეთით ჩატარებული „გორბის“ ეგზიტპოლების მონაცემებით, (18:00 საათის მდგომარეობით) პარტიული რეიტინგები საპარლამენტო არჩევნებში ასე გადანაწილდა: „ქართული ოცნება – დემოკრატიული საქართველო“ – 56,1%. „ერთიანობა – ნაციონალური მოძრაობა“ – 11.6% „ძლიერი საქართველო – ლელო, ხალხისთვის, თავისუფლებისთვის“ – 7.0% „კოალიცია ცვლილებისთვის გვარამია, მელია, გირჩი, დროა“ – 12.6%. „გახარია საქართველოსთვის“ – 4.8 %.

მადლობას გადავუხდი გუნდს. დიდი მადლობა თითოეულ მხარდამჭერს, თითოეულ თქვენგანს და დიდი მადლობა ქართველ ხალხს, – განაცხადა საქართველოს პრემიერ-მინისტრმა ირაკლი კობახიძემ „ქართული ოცნების“ ოფისში გამართულ ღონისძიებაზე ეგზიტპოლების გამოქვეყნების შემდეგ.

„ამ 12 წლის განმავლობაში არცერთი დღე არ ყოფილა იოლი, მაგრამ ბოლო 4 წელი განსაკუთრებულად რთული იყო, რადგან ბევრი სირთულის გადატანა მოგვიწია ამ წლების განმავლობაში და, რა თქმა უნდა, ვერცერთ წარმატებას ვერ მივაღწევდით, რომ არა ქართველი ხალხის დგომა მის მიერ არჩეულ ხელისუფლებასთან ერთად. მადლობა ქართველ ხალხს – გამოცდილ და ბრძენ ხალხს თანადგომისთვის. მადლობა ერთად დგომისთვის. ამ გამარჯვების მთავარი ავტორი არის, რა თქმა უნდა, ქართველი ხალხი. მილიონზე მეტი ჩვენი თანამოქალაქე მოვიდა საარჩევნო უბნებზე და მხარი დაუჭირა მშვიდობას, მხარი დაუჭირა ჩვენი ქვეყნის ნამდვილად ნათელ და ევროპულ მომავალს“, – განაცხადა კობახიძემ.

ტელეკომპანია „იმედის“ დაკვეთით, „გორბის“ მიერ ჩატარებული ეგზიტპოლების შედეგები ცნობილია. ეგზიტპოლების თანახმად, მმართველმა პარტიამ, „ქართულმა ოცნებამ“, 18:30 საათის მონაცემებით 56.1 პროცენტი მიიღო. ნდომილების ზღვარი +- 2.5 პროცენტია.

ვულოცავ პრემიერ-მინისტრ ირაკლი კობახიძეს და “ქართული ოცნების” პარტიას დღეს საპარლამენტო არჩევნებში დიდი სხვაობით გამარჯვებას, – ამის შესახებ უნგრეთის პრემიერ-მინისტრი, ვიქტორ ორბანი “ტვიტერის” პირად გვერდზე წერს.

“ვულოცავ პრემიერ-მინისტრ ირაკლი კობახიძეს და “ქართული ოცნების” პარტიას დღეს საპარლამენტო არჩევნებში დიდი სხვაობით გამარჯვებას. საქართველოს ხალხმა იცის რა არის საუკეთესო მათი ქვეყნისთვის, და თავიანთი ხმა დღეს გააჟღერეს!” , – წერს ორბანი.