ცესკოს თავმჯდომარის, გიორგი კალანდარიშვილის განცხადებით, ცენტრალური საარჩევნო კომისიის მიერ არჩევნების დაგეგმარების და ორგანიზების პროცესი ყველა ეტაპზე სწორად იყო წარმართული.

მისი განმარტებით, ამაზე არაერთი სტატისტიკური მონაცემი მიუთითებს, მათ შორის, ელექტრონული ტექნიკის მუშაობის გამართულობის მაჩვენებელი.

“დღეს სიამაყით შეგვიძლია ვთქვათ, რომ ჩვენს მიერ პროცესის დაგეგმარება და ორგანიზება ყველა ეტაპზე სწორად იყო წარმართული. ჩემი სიტყვების დასადასტურებლად კი, რამდენიმე სტატისტიკურ მონაცემებს წარმოგიდგენთ. 26 ოქტომბრის არჩევნების დღეს, ჯამში გამოყენებული იყო 15 ათასამდე აპარატი, საიდანაც მხოლოდ 20 აპარატი გამოვიდა მწყობრიდან. ამის მიუხედავად ყველა შემთხვევაში მოხერხდა საარჩევნო პროცესის გაგრძელება და არც ერთ უბანზე არ დამდგარა ხმის მიცემის პროცესის ტრადიციულ მეთოდზე გადასვლის საჭიროება. არსებული კარგი პრაქტიკის შესაბამისად, ტექნოლოგიების გამოყენების კარგ შედეგად ითვლება, თუ საარჩევნო პროცესის დრო, აპარატების 1%-ი გამოვიდა მწყობრიდან. ჩვენ შემთხვევაში კი ამ რიცხვმა მხოლოდ 0,1% შეადგინა, რაც ძალიან კარგი მაჩვენებელია”, – განაცხადა გიორგი კალანდარიშვილმა.

ზერბაიჯანის პრეზიდენტი ილჰამ ალიევი საქართველოს პრემიერ-მინისტრს, ირაკლი კობახიძეს საპარლამენტო არჩევნებში „ქართული ოცნების“ გამარჯვებას ულოცავს და აზერბაიჯნაში ეპატიჟება.

ალიევის მილოცვას აზერბაიჯანის პრეზიდენტის ადმინისტრაცია ავრცელებს.

„ძვირფასო ბატონო პრემიერო, გულითადად გილოცავთ საქართველოში გამართული საპარლამენტო არჩევნების შედეგებს და თქვენი ქვეყნის წამყვანი პოლიტიკური ძალის, პარტია „ქართული ოცნება – დემოკრატიული საქართველოს“ გამარჯვებას. ამ კენჭისყრით საქართველოს მოქალაქეებმა გამოხატეს მხარდაჭერა განვითარების, სტაბილურობისა და ტრადიციული ღირებულებებისადმი.

მჯერა, რომ არჩევნების შედეგები მოემსახურება საქართველოს ყოვლისმომცველ განვითარებას და კეთილდღეობას. ამავდროულად, გამოვთქვამ რწმენას, რომ არჩევნების შედეგები ხელს შეუწყობს აზერბაიჯან-საქართველოს სახელმწიფოთაშორისი ურთიერთობების მდგრად განვითარებას, რომელიც ნაკარნახევია ჩვენი ხალხების ნებით, რომლებიც ისტორიულად ცხოვრობდნენ მეგობრობის, ძმობისა და კეთილმეზობლობის პირობებში, და ჩვენი ქვეყნების პოზიციების შემდგომ გაძლიერება სსამხრეთ კავკასიასა და უფრო ფართო გეოგრაფიაში.

ჩვენი პოლიტიკური დიალოგის გასაგრძელებლად, გეპატიჟებით შესაბამის დროს ოფიციალური ვიზიტით აზერბაიჯანში. დარწმუნებული ვარ, რომ ჩვენი ქვეყნებისა და ხალხების კეთილდღეობის, ჩვენი რეგიონის კეთილდღეობისა და უსაფრთხოების მიზნით, ჩვენ ამის შემდგომაც ერთობლივ ძალისხმევას მივმართავთ ჩვენი სტრატეგიული პარტნიორობის განმტკიცებისა და ორმხრივი და მრავალმხრივი ურთიერთსასარგებლო საქმიანობის წარმატებით გაგრძელების მიმართულებით.

ჩემს საუკეთესო სურვილებს გადმოგცემთ, მშვიდობასა და კეთილდღეობას ვუსურვებ მეგობარ საქართველოს ხალხს“, – ნათქვამია აზრბაიჯანის პრეზიდენტის, ილჰამ ალიევის წერილში.

საქართველოს მმართველი პარტია ლიდერობს, პროევროპული ოპოზიცია აცხადებს, რომ არჩევნები „მოპარულია“, – ამის შესახებ „ბიბისი“ წერს.

„საქართველოს მზარდად ავტორიტარულმა მმართველმა პარტიამ გამარჯვება გამოაცხადა მას შემდეგ, რაც წინასწარმა შედეგებმა მისი მკაფიო უპირატესობა აჩვენა გადამწყვეტ არჩევნებში, რომლებიც ფოკუსირებულია ევროპისკენ ქვეყნის მომავალ გზაზე. ცენტრალური საარჩევნო კომისიის ინფორმაციით, მილიარდერი ბიზნესმენის, ბიძინა ივანიშვილის პარტია „ქართული ოცნება“ ხმების 72%-ის დათვლის შედეგად 53%-ს იღებს. წინასწარი შედეგები მკვეთრად განსხვავდებოდა დასავლური კვლევითი კომპანიების მიერ ჩატარებული ეგზიტპოლებისგან და ოპოზიციური პარტიის ერთ-ერთმა ლიდერმა განაცხადა, რომ მათ სჯერათ, რომ „ქართველ ხალხს ხმები მოპარეს”, – წერს „ბიბისი“.

ბრიტანეთის საზოგადოებრივ მაუწყებელს ოპოზიციის ლიდერების კომენტარები მოჰყავს.

„ჩვენ არ ვაღიარებთ ამ გაყალბებული არჩევნების შედეგებს“, – განაცხადა „ერთიანი ნაციონალური მოძრაობის“ ხელმძღვანელმა თინა ბოკუჩავამ. ოპოზიციის კიდევ ერთმა ლიდერმა, ნიკა გვარამიამ განაცხადა, რომ „ქართულმა ოცნებამ“ „საკონსტიტუციო გადატრიალება“ მოაწყო. „ბიბისი“ აღნიშნავს, რომ მანამდე როგორც „ქართულმა ოცნებამ“, ისე ოთხმა პროევროპულმა ოპოზიციურმა ჯგუფმა, რომლებიც ცდილობენ მისი 12-წლიანი მმართველობის დასრულებას, კონკურენტულ ეგზიტპოლებზე დაყრდნობით გამარჯვება გამოაცხადეს.

„შაბათს რუსეთთან მოსაზღვრე სამხრეთ კავკასიის ამ სახელმწიფოში, არჩევნებზე ამომრჩეველთა დიდი რაოდენობა მივიდა და ვრცელდებოდა მრავალი ცნობა ხმის მიცემის პროცედურის დარღვევების და საარჩევნო უბნების გარეთ ძალადობის შესახებ“, – წერს „ბიბისი“.

ჩარევის მცდელობის მიუხედავად, ქართველმა ხალხმა არჩევნებზე თავისი ნება გამოხატა, რის შედეგადაც მმართველმა პარტიამ „ქართულმა ოცნებამ“ დიდი უპირატესობით გაიმარჯვა, – ამის შესახებ უნგრეთის საგარეო საქმეთა მინისტრმა, პიტერ სიიარტომ განაცხადა.

„ჩარევის მცდელობის მიუხედავად, ქართველმა ხალხმა ნათლად აჩვენა, რა სურს. პატრიოტმა მმართველმა პარტიამ „ქართულმა ოცნებამ“ არჩევნები დიდი უპირატესობით მოიგო. ბრავო, გილოცავთ!“ – აღნიშნა სიიარტომ.

მისი მტკიცებით, უნგრეთი, ევროკავშირის თავმჯდომარეობის დარჩენილ პერიოდში და შემდგომაც, მხარს დაუჭერს ქართველ მეგობრებს ევროინტეგრაციის მცდელობებში წარმატების მისაღწევად.

ცენტრალური საარჩევნო კომისიის წინასწარი მონაცემებით, საზღვარგარეთ გახსნილი 52 უბნის შედეგების მიხედვით, ხმების 29.076%-ით (5489 ხმა) „კოალიცია ცვლილებისთვის – გვარამია, მელია, გირჩი, დროა“ ლიდერობს.

მეორე ადგილზეა „ერთიანობა – ნაციონალურმა მოძრაობა“, რომელმაც ხმების 20.839% (3934 ხმა) მიიღო.

“ქართული ოცნება დემოკრატიული საქართველოს“ შედეგია 17.735% (3348 ხმა).

„ძლიერი საქართველოს – ლელო, ხალხისთვის, თავისუფლებისთვის“ 14.053% (2653 ხმა) აქვს მიღებული.

პარტიამ „გახარია საქართველოსთვის“ ხმების 8.449% (1595 ხმა) მოიპოვა.

ცნობისთვის, საზღვარგარეთ 42 ქვეყნის 53 ქალაქში შექმნილია 67 საარჩევნო უბანი.

არჩევნები არის მოპარული. ხელისუფლების უზურპაცია მოხდა ამ ქვეყანაში. ეს არის საკონსტიტუციო გადატრიალება, – ამის შესახებ „კოალიცია ცვლილებისთვის გვარამია, მელია, გირჩი, დროას“ ერთ-ერთმა ლიდერმა, ნიკა გვარამიამ განაცხადა.

მისი თქმით, „ქართული ოცნება“ არის საკონსტიტუციო გადატრიალების ავტორი.

„ნამდვილად არ გვიფიქრია ჩვენ კოალიციას იმაზე, რომ ამ არჩევნების შედეგებს ჩვენ არ ვაღიარებთ. არჩევნები არის მოპარული. ხელისუფლების უზურპაცია მოხდა საქართველოში. ეს არის საკონსტიტუციო გადატრიალება. „ქართული ოცნება“ არის საკონსტიტუციო გადატრიალების ავტორი და ამაზე „ქართული ოცნება“ აგებს პასუხს იმ წესით, რომელსაც ითვალისწინებს ქართული კანონმდებლობა, მაგრამ, ვიდრე ეს მოხდება, „ქართულ ოცნებას“ მოუწევს ოპოზიციის გამარჯვების აღიარება. ჩვენ გაშიფრული გვაქვს სქემა, რომლის მიხედვითაც მათ მოიპარეს არჩევნები“, – განაცხადა გვარამიამ.

მისი თქმით, კოალიციის გადაწყვეტილება არის ის, რომ „ქართული ოცნება“ ამ ქვეყნის ხელისუფლებაში ვერ დარჩება.

„ჩვენი აბსოლუტურად უალტერნატივო გადაწყვეტილება, რომელიც არ გადაიხედება, არის ის, რომ „ქართული ოცნება“ ამ ქვეყნის ხელისუფლებაში ვერ დარჩება. ეს არის მოპარული არჩევნები. ეს არის ხელისუფლების უზურპაცია და კონსტიტუციური გადატრიალება საქართველოში. ეს არ მოხდება, ეს არ არის რუსეთი, ეს არ არის ვენესუელა, ეს საქართველოა“, – განაცხადა ნიკა გვარამიამ.

ჩვენ მოპარული, მიტაცებული არჩევნების შედეგებს არ ვიღებთ და ამ მიტაცებული შედეგის აღიარებას არ ვაპირებთ, – ამის შესახებ „ნაციონალური მოძრაობის“ თავმჯდომარემ, თინა ბოკუჩავამ განაცხადა.

ცესკო-მ შეასრულა „ქართული ოცნების“ ბინძური დაკვეთა და გამოაცხადა შედეგები, რომელიც აჩვენებს, რომ ოლიგარქმა ივანიშვილმა ქართველ ხალხს გამარჯვება მოპარა და ამით მოპარა ევროპული მომავალი. „ერთიანობა – ნაციონალური მოძრაობის“ სახელით ვაცხადებთ, რომ ჩვენ მოპარული, მიტაცებული არჩევნების შედეგებს არ ვიღებთ და ამ მიტაცებული შედეგის აღიარებას არ ვაპირებთ, – ამის შესახებ „ნაციონალური მოძრაობის“ თავმჯდომარემ, თინა ბოკუჩავამ განაცხადა.

მისი თქმით, გამარჯვება არის ოპოზიციის მხარეს.

“დღევანდელი ისტორიული არჩევნები იყო ქართველი ხალხის გამარჯვება და რჩება ქართველი ხალხის გამარჯვებად, მაგრამ ჩვენ ვხედავთ, რომ ცესკომ შეასრულა ივანიშვილის ბინძური დაკვეთა და გამოაცხადეს შედეგები, რომელიც ქაჩვენებს, რომ ოლიგარქმა ივანიშვილმა ქართველ ხალხს გამარჯვება მოპარა და ამით მოპარა ევროპული მომავალი.

ჩვენ მიტაცებული არჩევნების შედეგებს არ ვიღებთ და ჩვენ ამ მოპარული შედეგების აღიარებას არ ვაპირებთ.

„ჩვენ დიდი იმედი გვაქვს, რომ ამგვარი პოზიცია იქნება სრულიად ოპოზიციური ველზე, რადგან მიგვაჩნია, რომ ის გამარჯვება, რომელიც დღეს მოიპოვა ქართველმა ხალხმა, არ ეკუთვნის რომელიმე ერთეულ პარტიას, არამედ ეკუთვნის მთლიანად ქვეყანას და ოპოზიციას, რომელსაც ერთობლივად მისცა ნდობის მანდატი ხალხმა. ჩვენ ვიბრძოლებთ, როგორც არასდროს ჩვენი ქვეყნის ევროპული მომავლის დასაბრუნებლად და არ შევეგუებით მოპარული არჩევნების შედეგებს. შევხვდით ჩვენს პროევროპელ მომავალ კოალიციურ პარტიებს და დარწმუნებული ვარ, შემდეგი მთავრობა იქნება კოალიციური“, – განაცხადა ბოკუჩავამ.