„მაკკეინის ინსტიტუტის“ ანგარიშის მიხედვით, ქართული არასამთავრობო ორგანიზაციების ნაწილი ევროკავშირისგან უვიზო რეჟიმის შეჩერებას ითხოვს, რაც, მათი მტკიცებით, ამომრჩევლებს რეალურად აჩვენებს „ქართული ოცნების“ მთავრობის ქმედებების შედეგს. ამის შესახებ საუბარია „მაკკეინის ინსტიტუტის“ გლობალური დემოკრატიის პროგრამების დირექტორის, საქართველოში NDI-ის ოფისის ყოფილი ხელმძღვანელის, ლორა თორნტონის მიერ 26 ოქტომბრის საპარლამენტო არჩევნების წინ მომზადებულ ანგარიშში.

ანგარიშის თანახმად, ეს დოკუმენტი ეფუძნება „საქართველოს მეგობრების“ მისიას თბილისში, რომელიც 2-8 სექტემბერს შედგა.

ანგარიშში ჩამოთვლილია შვიდი ქმედება, რომელიც აშშ-ისა და ევროკავშირის პოლიტიკის შემქმნელებმა უნდა განახორციელონ საქართველოს არჩევნების წინ; მათ შორისაა: ევროკავშირის მიერ „ქართული ოცნების“ ლიდერებისთვის სამოგზაურო სანქციების შემოღება, აშშ-ის კონგრესში „ქართული ოცნების“ მთავრობის ანგარიშვალდებულების დემონსტრირებისთვის კანონმდებლობის წინ წაწევა, აშშ-ის მთავრობის მხრიდან „ქართული ოცნების“ ცალკეული ლიდერებისთვის, მათ შორის ბიძინა ივანიშვილისთვის, პირადი და ფინანსური სანქციების დაწესების შესაძლებლობის განხილვა, მედიის ფინანსური მხარდაჭერის გაზრდა.

„მაკკეინის ინსტიტუტის“ ანგარიშში ასევე აღნიშნულია, რომ „ევროკავშირმა შეიძლება, განიხილოს უვიზო მიმოსვლის შეჩერება ქართველებისთვის. დოკუმენტის თანახმად, მიუხედავად იმისა, რომ ეს საკითხი საკამათოა, რამდენიმე ქართულმა არასამთავრობო ორგანიზაციამ დამაჯერებლად უთხრა მისიას, რომ ეს ქმედება რეალურად აჩვენებდა ამომრჩევლებს „ქართული ოცნების“ მთავრობის ქმედებების შედეგებს.

დოკუმენტში ასევე ნათქვამია, რომ „აშშ-ისა და ევროკავშირის საერთაშორისო დახმარების სააგენტოებმა უნდა დაუჭირონ მხარი ქართულ სამოქალაქო საზოგადოებას და არ შეასრულონ „უცხოელი აგენტების შესახებ“ კანონი, ხოლო „აშშ-ისა და ევროკავშირის ლიდერებმა საჯაროდ უნდა გამოთქვან სერიოზული ეჭვები ნებისმიერი საარჩევნო პროცესის ლეგიტიმურობის შესახებ, რომელიც ჩატარდება მიუკერძოებელი დაკვირვების შეზღუდვისა და წარუმატებელი საარჩევნო რეფორმის ფონზე“.

ანგარიშში ასევე მოცემულია რეკომენდაციები არჩევნების შემდგომი პერიოდისთვის, რომელთა შორისაა არჩევნების სამართლიანობის შესახებ სანდო ადგილობრივი და საერთაშორისო დამკვირვებლების მიგნებების მხარდაჭერის აუცილებლობა.

დოკუმენტის მიხედვით, „პარალელური ხმების დათვლის (PVT) და ეგზიტპოლების შედეგები ასევე კრიტიკული იქნება ცენტრალური საარჩევნო კომისიის ოფიციალური არჩევნების შედეგების დამოწმებისთვის“.

დოკუმენტის ავტორები მოუწოდებენ აშშ-ს, განიხილოს არჩევნების შემდგომ პერიოდში კონგრესის ორპარტიული დელეგაციის გაგზავნის შესაძლებლობა, „ქართველი დამკვირვებლების გასაძლიერებლად, დემონსტრანტი მოქალაქეების მხარდასაჭერად და შესაძლო ძალადობისა და პოლიტიკურად მოტივირებული დაკავებებისა და დევნის შემაკავებელ ფაქტორად“.

ანგარიშში ნათქვამია, რომ „ქართული ოცნება“ თუ გაიმარჯვებს დამკვირვებლების მიერ დადასტურებით, მაშინ საერთაშორისო საზოგადოებას მოუწევს არჩევნების შემდგომი გარემოს მონიტორინგი, განსაკუთრებით კი, მთავრობის რეაქციისა მოსალოდნელ პროტესტზე“.

დოკუმენტის ავტორები ასევე გამოდიან რეკომენდაციით, რომ ევროკავშირმა განიხილოს საქართველოსთვის კანდიდატის სტატუსის შეჩერება. ამავე ანგარიშში ნათქვამია, რომ „არჩევნებში ოპოზიციის გამარჯვების შემთხვევაში, ევროკავშირი და აშშ აუცილებლად მტკიცედ დაუჭერენ მხარს ხელისუფლების მშვიდობიან გადაბარებას, ხოლო „ქართული ოცნების“ მხრიდან ნებისმიერი ხელის შეშლა გააჩენს საერთაშორისო დახმარების პერმანენტული შეწყვეტის, მთავრობის მიმართ სანქციების დაწესებისა და საქართველოსთვის ევროკავშირის კანდიდატის სტატუსის ჩამორთმევის საჭიროებას“.

„ცენტრალური საარჩევნო კომისია „ქართულ ოცნებას“ გამარჯვებულად თუ გამოაცხადებს, მაგრამ აღმოჩნდება, რომ სადამკვირვებლო ჯგუფებს მნიშვნელოვნად შეუშალეს ხელი ან ისინი განაცხადებენ სერიოზული დარღვევების შესახებ, რაც შედეგებს არასანდოს გახდის, საერთაშორისო ზეწოლა გადამწყვეტი იქნება საჩივრების განხილვის, აუდიტის, ხმების გადათვლისა და, საჭიროების შემთხვევაში, ახალი არჩევნების ჩატარების უზრუნველსაყოფად“, – აღნიშნულია „მაკკეინის ინსტიტუტის“ ანგარიშში.

წყარო

ლომჯარიები და გიგაურები ყოველდღიურად ცდილობენ, მონაწილეობა მიიღონ ქვეყნისთვის ზიანის მიყენებაში, არეულობისა და დესტრუქციის შემოტანაში, ეს ჩვენთვის ახალი არ არის, – ამის შესახებ ფრაქცია „ქართული ოცნების“ თავმჯდომარის მოადგილემ, ირაკლი კირცხალიამ განაცხადა.

მისივე თქმით, ისინი არიან კოლექტიური „ნაცმოძრაობა“ და არა – „ენჯეოები“.

„მინდა, საზოგადოებას შევახსენო, როდესაც ვიზალიბერალიზაციის საკითხი იდგა, როგორ დარბოდნენ კაბინეტ-კაბინეტ მათი წარმომადგენლები, და არამხოლოდ,  ევროპარლამენტში თუ ცალკეულ ქვეყნებში და არწმუნებდნენ, რომ არცერთ შემთხვევაში არ უნდა მიეცათ ქვეყნისთვის ვიზალიბერალიზაცია, რადგან ამას „ქართული ოცნება“ მიიწერსო. ისინი არიან კოლექტიური „ნაცმოძრაობა“ და არა  -„ენჯეოები“ ან სამოქალაქო საზოგადოება, ამაში დავრწმუნდით.

სიტყვა „უსამშობლოს“ როდესაც ვამბობთ, ამას აქვს თავისი მიზეზები და სწორედ ეს ქმედებებია იმ უსამშობლობის ნათელი დასტური და მაგალითი. საერთოდ არ არის გასაკვირი, როდესაც კოლექტიური გიგაური და ლომჯარია ანტისახელმწიფოებრივ და უსამშობლო ნაბიჯებს დგამენ და აუცილებლად გადადგამენ, სადაც ამის იურიდიული შანსი მიეცემათ. იურიდიულადაც კი არის უკვე დადასტურებული, მას შემდეგ, რაც უარი განაცხადეს რეგისტრაციასა და გამჭვირვალობაზე. ისინი აქ რეალურად „ენჯეოები“ კი არ იყვნენ, არამედ იყვნენ იმ კოლექტიური „ნაცმოძრაობის“ უბრალოდ გამტარი შპს-ები. დონორისგან მიღებულ ფულს, როგორც შპს შავ ფულს, ისე ატარებდნენ ამ უსამშობლოების დასაფინანსებლად, რასაც კოლექტიური „ნაცმოძრაობა“ და, დღეს როგორც ვხედავთ, მათი დანაყოფები ჰქვია“, – აღნიშნა კირცხალიამ.

ცნობისთვის, „მაკკეინის ინსტიტუტმა“ გამოაქვეყნა ანგარიში, რომლის მიხედვითაც, ქართული არასამთავრობოების ნაწილი ევროკავშირისგან უვიზო რეჟიმის შეჩერებას ითხოვს.

„ერთიანი ნეიტრალური საქართველოს“ წევრი ლევან ნიკოლეიშვილი გავრცელებულ ინფორმაციას ეხმიანება, რომლის მიხედვითაც აშშ-მ ბიძინა ივანიშვილის წინააღმდეგ სანქციების პაკეტი შეიმუშავა.

როგორც ნიკოლეიშვილი აღნიშნავს, თუ მართლაც გადაიდგა ნაბიჯი ბიძინა ივანიშვილის დასასანქცირებლად, ეს იმის მტკიცებულება იქნება, რომ საქართველოს ომში ჩართვის მცდელობა რეალური იყო.

მისივე თქმით, დროა ვიფიქროთ ქვეყნის ნეიტრალურ სტატუსზე და ჩვენს აფხაზებთან და ოსებთან ერთიან საქართველოში მშვიდობიან თანაცხოვრებაზე.

„ამერიკელებმა თუ რეალურად გადადგეს ნაბიჯი ბიძინა ივანიშვილის დასასანქცირებლად, ეს იქნება მტკიცებულება, რომ ჩვენი ომში ჩართვა მართლაც უნდოდათ. ისე, ჩვენში დარჩეს და ცოტა მაინც უნდა ესწავლათ ჭკუა, რომ ამ კაცის დაშანტაჟებას შედეგი არ მოაქვს, ხომ ცადეს და აქტივები გაუყინეს შვეიცარიულ ბანკში, პასუხად რა მიიღეს ბიძინა ივანიშვილისგან, რომ სამშობლო და მშვიდობა არ იყიდება! ევროკავშირის მაღალჩინოსნებიც ძალიან დაეცნენ და დამდაბლდნენ, როდესაც რასაც აშშ-ს მოქმედი ხელისუფლება ეტყვის უპირობოდ ასრულებენ და სამარცხვინოდ გვემუქრებიან. ამიტომაც მტკიცე წერტილი უნდა დავუსვათ ჩვენს დაშანტაჟებას ევროკავშირსა და ნატოში ვითომდა გაწევრიანების სიყალბეს, სამაგალითოდ მოვუგოთ არჩევნები საქართველოს ავისმზრახველებს. დროა ვიფიქროთ ქვეყნის ნეიტრალურ სტატუსზე და ჩვენს აფხაზებთან და ოსებთან ერთიან საქართველოში მშვიდობიან თანაცხოვრებაზე!“-წერს ლევან ნიკოლეიშვილი.