მშვიდობა და უსაფრთხოება აუცილებელია ადამიანის უფლებებისა და მდგრადი განვითარების უზრუნველსაყოფად. მომავლის პაქტი გლობალურ მშვიდობასა და უსაფრთხოებას შეუწყობს ხელს, რაც გაეროს წესდების პრინციპებზეა დაფუძნებული, – ამის შესახებ საქართველოს პრემიერ-მინისტრმა ირაკლი კობახიძემ “მომავლის სამიტზე” სიტყვით გამოსვლისას განაცხადა, რომელიც გაეროს გენერალური ასამბლეის 79-ე სესიის ფარგლებში, გერმანიის ფედერაციული რესპუბლიკის კანცლერ ოლაფ შოლცის და ნამიბიის პრეზიდენტ ნანგოლო მბუმბას ორგანიზებით იმართება.

მთვარობის მეთაურის თქმით, სამიტმა შექმნა პლატფორმა საერთაშორისო თანამშრომლობის გასაძლიერებლად და ახლა მთავარი ამოცანა იქნება ნაკისრი ვალდებულებების პრაქტიკაში განხორციელება.

“ციფრული შეთანხმება იქნება გეგმა ღია და უსაფრთხო ციფრული მომავლისთვის, სადაც ტექნოლოგიების გამოყენება ადამიანის უფლებების დაცვასა და გლობალურ კეთილდღეობას მოემსახურება. გვჯერა, რომ ჩვენი პოლიტიკის ჩარჩოებში აუცილებელია მომავალი თაობების შეხედულებების გათვალისწინება, რათა ჩვენი ქმედებების გრძელვადიანი ზემოქმედება იქნას გათვალისწინებული და უზრუნველყოფილი. მომავალი თაობების შესახებ დეკლარაცია აუცილებელია იმისთვის, რომ მათი ხმა იქნას გაგონილი და მათი ინტერესები იყოს დაცული. ამ სამიტმა შექმნა პლატფორმა საერთაშორისო თანამშრომლობის გასაძლიერებლად. ახლა მთავარი ამოცანა იქნება ნაკისრი ვალდებულებების პრაქტიკაში განხორციელება და უკეთესი ხვალინდელი დღის შექმნა,” – განაცხადა პრემიერ-მინისტრმა.

განათლების, მეცნიერებისა და ახალგაზრდობის სამინისტრო ზოგიერთი მედიასაშუალების მიერ გავრცელებულ ინფორმაციას ეხმაურება. საუბარია, ცნობაზე, თითქოს სამინისტრომ საქართველოს ისტორიის სახელმძღვანელოს გრიფირება შეაჩერა და შექმნა საქართველოს ისტორიის წიგნი.

უწყების განცხადებაში ნათქვამია, რომ ინფორმაცია სიმართლეს არ შეესაბამება.

„საქართველოს განათლების, მეცნიერებისა და ახალგაზრდობის სამინისტრო ეხმიანება ზოგიერთ მედიასაშუალებაში გავრცელებულ ინფორმაციას იმის შესახებ, რომ თითქოს სამინისტრომ საქართველოს ისტორიის სახელმძღვანელოს გრიფირება შეაჩერა და შექმნა საქართველოს ისტორიის წიგნი.

გავრცელებული ინფორმაცია არის სრული სიცრუე და ემსახურება უწყების მიზანმიმართულ დისკრედიტაციას!

მოგახსენებთ, რომ 2024 წელს საქართველოს ისტორიის გრიფირების პროცესი საერთოდ არ გამოცხადებულა.

წელს მე-12 კლასში შემუშავდა მხოლოდ დამხმარე რესურსები ყველა იმ საგანში, რომელიც მოქმედი ეროვნული სასწავლო გეგმის მიხედვით დაემატა აღნიშნულ კლასს – ბიოლოგია, ფიზიკა, გეოგრაფია, ქიმია, საქართველოს ისტორია.

დღეისათვის სკოლებში არსებობს ძველი გრიფირებული მსოფლიო ისტორიის წიგნი, რომელიც, მოიცავს საქართველოს ისტორიას. ამასთან, მასწავლებლების გზამკვლევად დამატებითი შეიქმნა რესურსი, რომელიც მუდმივად იქნება განახლებადი.

დამხმარე რესურსის პირველი ნაწილი დამუშავდა შესაბამისი კომპეტენციის ისტორიკოსების მიერ მხოლოდ პირველი სემესტრისთვის და მოიცავს მე-20 საუკუნის დასაწყისს – 1900-1921 წლებს. მასწავლებლებისთვის ჩატარდა შეხვედრები და მოხდა მათი დატრენინგება რესურსის გამოყენებაში. შესაბამისად, გამოთქმული ეჭვი, შიში, თუ ბრალდებები იმის თაობაზე, რომ უკანასკნელი 30 წლის პერიოდი არასწორად დაიწერება, ეს არის შეგნებული ტყუილი და საზოგადოების შეცდომაში შეყვანის გზით უწყების დისკრედიტაციის მცდელობა.

2024 წელს დამტკიცდა ზოგადი განათლების ეროვნული მიზნების ახალი დოკუმენტი, რომლის საფუძველზე დაიწყო ყველა საგნობრივი სტანდარტის გადამუშავება. მიუხედავად იმისა, თუ რომელი სახელმძღვანელოთი მიმდინარეობდა სწავლება სკოლებში, მე-12 კლასის ყველა საგნისთვის შეიქმნა მასწავლებლის დამხმარე გზამკვლევები. მათ შორის საქართველოს ისტორიაში.
ახალი ეროვნული სასწავლო გეგმის დამტკიცებისთანავე დაიწყება მუშაობა ყველა საგნის სახელმძღვანელოს განახლებაზე.

საქართველოს განათლების მეცნიერებისა და ახალგაზრდობის სამინისტრო მოუწოდებს ზოგიერთ მედიასაშუალებას, თავი შეიკავონ დეზინფორმაციის გავრცელებისგან!“, – ნათქვამია უწყების მიერ გავრცელებულ განცხადებაში.

„ენჯეოები“ და მათთან აფილირებული პოლიტიკური პარტიები ცდილობენ ხელი შეუშალონ საქართველოს ევროპულ ინტეგრაციას, – ასე ეხმაურება პარლამენტის საგარეო ურთიერთობათა კომიტეტის თავმჯდომარე, ნიკოლოზ სამხარაძე მაკკეინის ინსტიტუტის ანგარიშს.

მისი თქმით, ის რაც აზიანებს ქვეყნის ინტერესებს, აზიანებს „ქართულ ოცნებასაც“ და „ენჯეოების“ მიზანიც სწორედ ესაა.

„ინტერესი აქვთ ის, რომ ამით მათ სურთ, რომ დაასუსტონ „ქართული ოცნება“, რადგან „ქართული ოცნებაა“ დღეს ხელისუფლებაში. შესაბამისად, ნებისმიერი გადაწყვეტილება, რომელიც იქნება ქვეყნის საზიანოდ, ეს თავისთავად ავტომატურად „ქართულ ოცნებასაც“ აზიარებს. არანაირი დეზინფორმაციას ეს არ არის. ჩვენ გვახსოვს, რომ ეს ქალბატონი სულ რამდენიმე კვირის წინ იმყოფებოდა საქართველოში, მაკკეინის კონფერენციაზე მათ შორის. შემდეგ მათ ჰქონდათ შეხვედრები სამოქალაქო საზოგადოებასთან და პოლიტიკურ პარტიებთან. ის რაც მის ანგარიშში გამოქვეყნდა, არ მგონია, რომ დეზინფორმაცია იყოს. პირიქით, ვფიქრობ, რომ ზუსტად ჯდება ასე ვთქვათ იმ განცხადებების ხასიათში, რომელსაც ეს „ენჯეოები“ და პოლიტიკური პარტიები, რომლებიც არასამთავრობოებთან აფილირებულები არიან თუ პირიქით, ერთმანეთში გადაზელილი, უკვე აღარ ვიცით, რომ მათ ყველანაირად ხელი შეუშალონ საქართველოს ევროპულ ინტეგრაციას“, – განაცხადა ნიკოლოზ სამხარაძემ.

მაკკეინის ინსტიტუტის მიერ გამოქვეყნებული ანგარიშის მიხედვით, ევროკავშირმა ქართველებისთვის უვიზო მიმოსვლის შეჩერება შესაძლოა ქართული „ენჯეოების“ მოთხოვნის საფუძველზე განიხილოს.

მე ისეთ არასამთავრობო ორგანიზაციებს არ ვიცნობ, რომლებიც უვიზო მიმოსვლის შეჩერებას მოითხოვენ, – ამის შესახებ „ლელოს“ ერთ-ერთმა ლიდერმა დავით უსუფაშვილმა განაცხადა.

დავით უსუფაშვილის განმარტებით, პოლიტიკოსები და ექსპერტები ხელისუფლებას რეალურ საფრთხესთან დაკავშირებით აფრთხილებენ.

„მე ასეთ არასამთავრობო ორგანიზაციებს არ ვიცნობ, რომლებიც უვიზო მიმოსვლის შეჩერებას მოითხოვენ. მე ვიცნობ ძალიან ბევრ პოლიტიკოს, ექსპერტს და არასამთავრობო ორგანიზაციასაც, რომლებიც ძალიან დიდი ხანია, საქართველოს ხელისუფლებას აფრთხილებენ, რომ ევროკავშირის პოლიტიკაში, იმ ქვეყნების მიმართ, ვინც ევროკავშირს ასე განუდგება, მტრად მოიხსენიებს და ასეთი დამოკიდებულება აქვს, ევროკავშირი ზომებს იღებს ხოლმე. ამ ჩამონათვალში დიახ, არის იმის უკან წაღება, რაც მოგვცა. ეს არის რეალური ხიფათი, მე არ ვიცნობ ისეთ ქართველს, რომელიც ამას ითხოვს, ქართველებს იქ სიარული აუკრძალეთო, მე ვიცნობ ბევრს, ვინც ხელისუფლებას ეუბნება, აქეთ მიგყავთ საქმე და შესაძლოა, ასეც მოხდესო. მე მინდა, რომ ეს არ მოხდეს. 26 ოქტომბრის მერე, ეს რომ არ მოხდება, ნამდვილად ვიცი“, – განაცხადა უსუფაშვილმა.

ფრაქცია „ქართული ოცნების“ თავმჯდომარის მოადგილე ლევან მაჭავარიანი უკრაინაში მებრძოლის, „ქართული ლეგიონის“ ხელმძღვანელის შესახებ უკრაინული გამოცემის მიერ გამოქვეყნებულ ინფორმაციას ეხმაურება.

საუბარია Ukraine Today-ის სტატიაზე, სადაც ნათქვამია, რომ უკრაინაში მებრძოლმა მამუკა მამულაშვილმა საკუთარი მოწამვლის ამბავი მოიგონა, რათა შემოწირულებები მიეღო.

„უკრაინულმა მხარემ ეს პიროვნება [მამუკა მამულაშვილი] ამხილა იმასთან დაკავშირებით, რომ ის იყო ზუსტად იგივე ტიპის სიმულაციით დაკავებული, რა სიმულაციაც ჩვენ თავს მოგვახვია ბატონმა სააკაშვილმა 2 წლის განმავლობაში; თითქოს ისიც მოწამლული იყო, კვდებოდა და სჭირდებოდა რაღაც თანხები სამკურნალოდ. სხვათა შორის ის ფონდი, რომელიც მან დააარსა, პარტნიორად ვინც ჰყავს შემოყვანილი, ეს პიროვნებაც [რიჩარდ შარპი] თაღლითობისთვის არის ნასამართლევი. შესაბამისად ეს ჩვეულებრივი თაღლითური გეგმა იყო და ეს პიროვნებაც „ნაციონალური მოძრაობის“ წარმოდგენილია. ჩვენ მიჩვეულები ვართ, რომ მათი დღის წესრიგი დგას მთლიანად ტყუილზე, სიმულაციაზე“, – განაცხადა მაჭავარიანმა.

შინაგან საქმეთა მინისტრმა, ვახტანგ გომელაურმა და ცენტრალური საარჩევნო კომისიის თავმჯდომარემ, გიორგი კალანდარიშვილმა, 2024 წლის 26 ოქტომბრის საქართველოს პარლამენტის არჩევნების მშვიდ და უსაფრთხო გარემოში ჩატარების უზრუნველყოფის მიზნით, ურთიერთთანამშრომლობის მემორანდუმი გააფორმეს. ინფორმაციას შსს ავრცელებს.

უწყების ცნობით, მემორანდუმის თანახმად, შინაგან საქმეთა სამინისტროსა და ცესკო-ს შორის კომპეტენციის ფარგლებში ინფორმაციის კოორდინირებული გაცვლა მოხდება.

„დოკუმენტით განისაზღვრა საარჩევნო პერიოდში მხარეთა შორის თანამშრომლობის ფორმები და შესაბამისი სამართლებრივი ჩარჩო.

ამასთან, მემორანდუმი შინაგან საქმეთა სამინისტროს თანამშრომლებისა და ცესკო-ს წარმომადგენლების მონაწილეობით ერთობლივ ტრენინგებს, ასევე, სამუშაო შეხვედრების ორგანიზებას ითვალისწინებს.

საარჩევნო პროცესის უსაფრთხოების მაქსიმალური დაცვის უზრუნველსაყოფად, კოორდინირებული მუშაობის მიზნით, შინაგან საქმეთა სამინისტროსა და ცენტრალურ საარჩევნო კომისიას შორის ურთიერთთანამშრომლობის მემორანდუმი, ბოლო წლებია, ყველა არჩევნებთან დაკავშირებით ფორმდება“,- აღნიშნულია შსს-ს ინფორმაციაში.

ჩვენ გვაბრუნებენ იმ ეპოქაში, როდესაც ჩინოვნიკებს საზოგადოებასთან არანაირი ანგარიშვალდებულება არ ჰქონდათ – თითქოს გვეხვეწებიან, მოდით 26 ოქტომბერს და დაგვასრულეთო! – ამის შესახებ საქართველოს ყოფილი პრეზიდენტი, მიხეილ სააკაშვილი სოციალურ ქსელში წერს.

მისივე თქმით, მმართველი გუნდის წევრები ყოველდღე ახალ უბედურებას იგონებენ და ხალხს სრულიად ღიად დასცინიან.

„ჩემს მიერ პარლამენტის იურიდიული კომიტეტის თავმჯდომარეობის დროს, ჯერ კიდევ 1998 წელს ინიცირებული ჩინოვნიკების ქონების საჯარო დეკლარირების სისტემა, ახლა ივანიშვილის პარლამენტმა გააუქმა. ჩვენ გვაბრუნებენ იმ ეპოქაში, როდესაც ჩინოვნიკებს საზოგადოებასთან არანაირი ანგარიშვალდებულება არ ჰქონდათ.

მოკლედ ყოველდღე ახალ უბედურებას იგონებენ და ხალხს სრულიად ღიად დასცინიან. თითქოს გვეხვეწებიან, მოდით, 26 ოქტომბერს და დაგვასრულეთო!,“ – წერს სააკაშვილი.